१ तीमोथी 5:10 - चेपाङ

¹⁰ अनि ओउखे पे-पेओ काम जाह्‍ङोझ्‍यान्‍ते जुदा मान्‍तालमकसयले मान दोःओ स्‍याउसा परना। ओउइ लयको चोः चोःद्‍याङलमकाय पेतोकुसि स्‍यासो र पाहुनालमकाय लयको किमहाङ सेवा-सत्‍कार जाह्‍ङो स्‍याउसा परना, अनि ओउइ अरु बिस्‍वासिलमको दोम हुर्‌ति सेवा जाह्‍ङो र खान्‍चोहाङ परओलमकाय सहयोग जाह्‍ङो स्‍याउसा परना। ओउतले अरु पेओ कामलम जाह्‍ङो स्‍याउसा परना।

१ तीमोथी 5:10 Iomraidhean Croise

लुका 7:38

र ओउ काह्‍सय वाङा, येसुको दोमसय चिङ्‌ति र्‌याआ र ओउको मिक्‌तिःइ येसुको दोम न्‍यात्‍ताकाकान। ओहाङसयको ओउइ लयको म्याङइ येसुको दोम थ्‍‍‍‍युराकान, तुःम्‌ति लाताकान, र येसुको दोम ब्‍लिङतो अत्‍तर ल्‍यान्‍ति बयाकान।

लुका 7:44

ओहाङसय येसु मोम्‍चोकताङ हिल्‍ति सिमोनकाय तोसास्‍यावा, “नाङइ इ मोम्‍चोकाय च्‍यउतेआकान? ङा नाङको किमहाङ वाङालाङ, नाङइ ङाकाय दोम हुर्‌सा तिःमा बइतेचिलि, तर इ मोम्‍चोइपाय ङाको दोम लयको मिक्‌तिःइ हुर्‌ति लयको म्‍याङइ थ्‍‍‍‍युराकान।

खबरदुत 10:22

ओउमय त्‍याङाकाय, “यातचाक कर्‌नेलियस त मय्‍ङ्‍ओ रोमि हाकिमिइ निकाय ल्‍होकाताङ्‍सु। ओउखे धर्‌मि मान्‍ता खेना र ओउइ परमेस्‍वरको भक्‍ति जाह्‍ङ्‍नउ, र जुदा यहुदि मान्‍तालमइ ओउकाय मान जाह्‍ङ्‍नाथय। कर्‌नेलियसइ नाङकसय खबर साइसा दोःपाना त दाह्‍य्‌ति परमेस्‍वरको पबित्र लाङकादुतइ ओउकाय लयको किमहाङ नाङकाय गोत्‍साको लागि तोसास्‍यावा।”

खबरदुत 22:12

ओउ सहरहाङ निको यहुदि नेम-कानुन पालन जाह्‍ङो र ओहाङको यहुदिलमइ जोक्‍तो मान जाह्‍ङो यातचाक हननिया त मय्‍ङ्‍ओ धार्‌मिक मान्‍ता खेतो।

खबरदुत 6:3

ओउतझ्‍यान्‍ते होयालम, निङ मध्‍येसय जुदाइ मान-सम्‍मान जाह्‍ङो र पबित्र ग्‍वालामकसय दोःओ बुद्‍दिइ भरपुर स्‍यावो सात जना गोय्‍चो मान्‍तालमकाय छ्‍युह्‍ङ्‍नु। निइ ओउमयकाय इ कामको लागि जिम्‍मेवारि बइनाङ्‍सु।

खबरदुत 9:36

योप्‍पा त तोओ सहरहाङ तबिता त मय्‍ङ्‍ओ यातचाक बिस्‍वासि हउद्‍याङ खेतो। (ग्रिक भासाहाङ ओउको मय्‍ङ दोर्‌कास त खेतो, र ओउको मानेखे “कस्‍याः” खेना।) ओउइ लयको जुदा समय पे-पेओ काम जाह्‍ङ्‌ति र गरिबलमकाय सहयोग जाह्‍ङ्‌ति हुतुतो।

खबरदुत 9:39

ओहाङसयको पत्रुस ओउनिसकुस आला, र जब ओउ ओहाङ दाहा, ओउकाय त्‍याःउको चोताहाङ आःलाथय। ओहाङ नाःतो राङ्‌गि मोम्‍चोलम र्‌याधयमुओ खेइतो र दोर्‌कास स्‍याक्‍ति मुतोकहाङ लयमयको लागि ओउइ रुप्‌तिबयो लावनायलम पत्रुसकाय छ्‍यानाकानि।

१ तीमोथी 2:10

बरु परमेस्‍वरको भक्‍ति जाह्‍ङो मोम्‍चोलमइखे लयमयइ जाह्‍ङो पे-पेओ कामलम दुवारा लयमयको रुवाङकाय सजाउपाइसि।

१ तीमोथी 3:2

ओउतझ्‍यान्‍ते मन्‍दलिको अगुवाखे सुइमा गाल बइसा खाइमातो स्‍याउसा परना। ओउखे यातयज्‍यो मात्र माचाको पाचा स्‍याउसा परना, र ओउखे लयको मन र रुवाङको अनुसासनहाङ मुसा खाइसा परना। ओउतले ओउखे मान-सम्‍मान दोःसा ज्‍योतो स्‍याउसा परना, अनि अरुको सेवा-सत्‍कार जाह्‍ङ्‍सा, र अरुकाय पेतो स्‍यान्‍सा खाइतो स्‍याउसा परना।

१ तीमोथी 3:7

ओउच्‍युक मात्र खेल, अगुवाखे मन्‍दलि भन्‍दा बाहिरको मान्‍तालमइमा मान जाह्‍ङो मान्‍ता स्‍याउसा परना, ओउत खेयाकाय मात्र ओउको अपमान स्‍याउल र दुस्‍त सय्‍तानको धारापहाङ परल।

१ तीमोथी 5:16

यदि कुनय बिस्‍वासि मोम्‍चोको लयको मान्‍तालमकहाङ राङ्‌गि मोम्‍चोलम मुनय त खेया, मन्‍दलिकाय दोह भारमा परताक्‍मातो ओउइले ओउमयको स्‍याहार जाह्‍ङ्‍पनउ। ओउत हाइतोकहाङ दोङ्‌सिले सुमा नाःमालो राङ्‌गि मोम्‍चोकाय मन्‍दलिइ सहयोग जाह्‍ङ्‍सा खाइनउ।

१ तीमोथी 5:25

ओउतहाइतिले गच्‍युक मान्‍तालमइ जाह्‍ङो पेओ कामलममा ङ्‍हाखाले पेतोकुसि चिःतो स्‍याउना, र ङ्‍हाखाले पेतोकुसि चिःमालो गच्‍युक पेओ कामलमखे लोन्‍हे चिःतो स्‍याउलेना।

१ तीमोथी 6:18

ओउमयको धन-सम्‍पति पेओ कामलम जाह्‍ङ्‍साको लागि मात्र प्रयोग जाह्‍ङ्‍पानानि त दाह्‍य्‌ति ओउमयकाय स्‍यानु। ओउमयखे पेओ कामलमको धनि स्‍याउपनय, र योःन्‌मय स्‍याउति लयकुस नाःओ थोकलम खान्‍चोहाङ परओ अरु मान्‍तालमकाय वेःति बइपानानि।

२ तीमोथी 1:5

ङाइ नाङकहाङ मुओ सत्‍य बिस्‍वासकाय सम्‍झनाङ, ओउ बिस्‍वासखे नाङको बजे लोइस र नाङको आमा युनिसकहाङमा खेतो। अनि ओउतताह्‍ङो बिस्‍वास अझले नाङकुस मुलेना त दाह्‍यो कुराहाङ ङा पक्‍का मुनाङ।

२ तीमोथी 2:21

ओउतझ्‍यान्‍ते यदि कुनय मान्‍ताइ लयकाय सुद्‍ध जाह्‍ङ्‌ति गम्‍नउ त खेया, ओउखे मान-सम्‍मानको लागि प्रयोग जाह्‍ङो बिसेस भान्‍दाकुन्‍दालम लेखा स्‍याउलेना। ओउ सुद्‍ध स्‍याउना, अनि ओउको मालिकइ ओउकाय पेओ कामलमहाङ प्रयोग जाह्‍ङ्‍साको लागि तयार जाह्‍ङ्‍नाथय।

२ तीमोथी 3:15

नाङपाय बालाख कालहाङसयले पबित्र धर्‌मसास्‍त्रको बारेहाङ स्‍यानराय दोःति हुर्‌कओ मान्‍ता खेतेना। ख्रिस्‍त येसुहाङ बिस्‍वास जाह्‍ङ्‍तोकहाङ मुक्‍ति दोःना त दाह्‍यो कुराको बुद्‍दिखे ओउ धर्‌मसास्‍त्रसयले दोःना।

२ तीमोथी 3:17

ओउतझ्‍यान्‍ते परमेस्‍वरको सेवा जाह्‍ङो मान्‍तालम जुदा खालको पेओ कामलम जाह्‍ङ्‍साको लागि ज्‍योतो स्‍याउपनय त दाह्‍य्‌तिले धर्‌मसास्‍त्र बयो खेना।

तीतस् 2:14

निकाय जुदा खालको पापलमसय छुत्‍कारा बइसा, र निको ल्‍हुङतुककाय सुद्‍ध जाह्‍ङ्‍साको लागि येसुइ बलिदानको रुपहाङ लयको रुवाङले बइसास्‍यावा। येसुइखे निकाय लयको मान्‍ता स्‍यावो र पे-पेओ कामलम जाह्‍ङ्‍सा मात्र झाको चाहसास्‍यावोझ्‍यान्‍ते ओउत जाह्‍ङ्‍सास्‍यावो खेना।

तीतस् 2:7

नाङइ जाह्‍ङो जुदा कुराहाङ पे-पेओ काम जाह्‍ङ्‌ति ओउमयको लागि यातज्‍यो उधारन स्‍याव। नाङइ बिस्‍वासिलमकाय स्‍यानतोक बेलाहाङ इमान्‍दार अनि गम्‍भिर स्‍याउति स्‍यानु।

तीतस् 3:1

सरकार र सरकारि हाकिमिलमको अधिनहाङ मुसा परना, ओउमयइ तोओ नेमलम पालन जाह्‍ङ्‍सा परना, र सधय पे-पेओ कामलम जाह्‍ङ्‍साको लागि तयार स्‍याउसा परना त दाह्‍यो कुरा नाङइ बिस्‍वासिलमकाय सम्‍झाउति बयु।

तीतस् 3:14

निको बिस्‍वासि होयालमखे पेओ कामलम जाह्‍ङ्‍सा स्‍यानपाइसि। ओउमयइ खान्‍चोहाङ परओलमकाय सहयोग जाह्‍ङ्‍सा खाइपानानि। ओउतहाइति बिस्‍वासिलमइ बेर्‌थको रुवाङ याक्‍सा परजेलाम।

तीतस् 3:8

ङाइ तोओ इ कुरालमखे बिस्‍वास जाह्‍ङ्‍सा ज्‍योओ सत्‍य कुराले खेना। बिसेस जाह्‍ङ्‌ति नाङइखे ङाइ तोओ इ कुरालम मान्‍तालमइ पेतोकुसि चिःतोसम्‍म स्‍यानो ङा चाहनाङ। ओउतस्‍याउतोक बेलाहाङ परमेस्‍वरहाङ बिस्‍वास जाह्‍ङो मान्‍तालम पेओ कामलम जाह्‍ङ्‍साको लागि होसियार स्‍याउलेनय। ओउ कुरालमखे जुदा मान्‍तालमको लागि पेतो र फाइदाको लागि स्‍याउलेना।