प्रकाश 8:3 - चेपाङ

³ ओहाङःसैको यात्‌चाक् अरु ल्‍होक्ओमयः सुन्‌कोः धुप् लात्‌सा तेव्‌केरा लात्‌ती ओउः बेदीताङ् वाङ्आक्‌तीको ओहाङः चीङ्‌ती मुओ खेःइतो। ओउः बेदीकोः सुन्‌कोः खात्‌पाय् ओउः राजा च्‍युङःसा थाव्‌कोः खोस्‌हाङः मुओ खेःतो। ओहाङःपाय् परमेस्‍वर्‌कायः ङ्‌हाम्ओलम्इ तेती तोओ कुरालेः परमेस्‍वर्‌कायः ल्‍हाओ खेःतो। ओहाङःसैको ओउःमयःकोः तेती तोओ कुरा पाःती ल्‍हासाकायः ओउः ल्‍होक्ओमयःकायः नाःतो धुप् उलःती बयःओ खेःतो।

प्रकाश 8:3 Iomraidhean Croise

लुका 1:10

बाहीरसै नाःतो अरु मान्‍तालम्‌खेइ परमेस्‍वर्‌कायः तेती तोती मुआकाय्।

रोमी 8:34

ओउःत झ्‍यान्‍ते अरुइ सुइमा गाल्‌तुम्‌ती तोसा खाय्‌नीली। ङीकायः दल्‌ताक्‌साकायः येसु ख्रीस्‌लेः सीओआः। माः रैस सीओ झुङ्आले खेःल ओउःपाय् उह्‌ती च्‍योक्‌माआ। उह्‌ती च्‍योक्आक्‌तीको द्याह् परमेस्‍वर्‌कोः गुल्‍ह्‌दाङ् स्‍याव्‌ती ओउःकोः ङोय्‌दोहाङः मुती ङीकायः परमेस्‍वर्‌कः तेती तोनाःतय्‍ही।

हेब्रैनी 7:25

द्याह्‌मा लोनेःमा गलकायःमा ओउःकायः ङ्‌हाम्‌ती परमेस्‍वर्‌कःताङ् वाङ्‌ह्ओलम्‌कायः ओउःइ पेतोलेः दल्‌ताक्‌सा खाय्‌नौ दोह् हायःती दाय्‍ह्‌सा ओउःमयःकायः परमेस्‍वर्‌कःताङ् तेती तोसाकायः येसुपाय् गलकायःमा मुलेःनाः।

हेब्रैनी 9:4

ओहाङः यात्‌ज्‍योः धुप् उलःसा सुन्‌कोः खाती तैबल् गम्ओ खेःतो। यात्‌ज्‍योः होम्‌काय्‌ती गम्ओ कुरा गीलताक्‌सा बकीस्‌मा खेःतो माल्‍गसै सुन्इ ल्‍यानःती भीत्रहाङःपाय् सुन्‌कोः तेव्‌केराहाङः “मन्‍न” त तोओमा गम्ओ खेःतो। हारन् त तोओकोः मात् तुरःओ दङ्‌गमा ऐन् लेखओ नीस्‌ज्‍योः पाथालः बाङ्‌मा गम्ओ खेःतो।

प्रकाश 10:1

ओहाङःसैको यात्‌चाक् अरु ताङ्‌ह्ओ ल्‍होक्ओमयः लाङ्‌कासै ग्‍ल्‍युङ्‌ह्ओ च्‍यवःआलाङः। ओउःपाय् मुस्इलेः क्रमःओ खेःतो। तालाङ्‌हाङः यो मुतो ओउःकोः खेन्‌पाय् न्‍याम्‌लो लेखा थोङ्‌तो दोम्‌पाय् म्‍हेः ल्‍युङ्ओ धुर्‌कुनःसीङःलो लेखा खेःतो।

प्रकाश 14:18

आने यात्‌ज्‍योः अरु म्‍हेः योती गम्ओ ल्‍होक्ओमयः मन्‍दीर्‌कोः ल्‍हाती बयःसा बेदीसै ग्‍ल्‍युङ्‌ह्‌ती ओउः रामा लात्ओ ल्‍होक्ओमयःकायः सोतो गोःती “लौ नाङ्‌कोः व्‍हानःओ रामा लात्‌ती ल्‍हाव्‍ह्‌दैबाङ्‌हाङः मुओ धाक्‌सायः सायःलम् त्‍युम्‍ह्‌ती वानःउ। ओउः सायःपाय् मीन्ओ लेःआः” त दाय्‍ह्‌ती तोआथै।

प्रकाश 5:8

ओउःत त्‍याक्आक्‌तीको ओउः चार्‌गोता जीङः नाःओलम्‌मा ओउः चौबीस् थालवःपालम्‌मा ओउःकःताङ् बाःती स्‍यवआकानी। ओउःमयःपाय् क्रुत्‌क्रुत्‌हाङः याःआःज्‍योः वरनीमा धुप् लात्‌साकायः सुन्‌कोः लोतामा धुप् ब्‍लीङ्‌तोलेः लात्आकानी। ओउः धुप्‌पाय् ङ्‌हाम्ओलम्इ परमेस्‍वर्‌कायः तेती तोओ कुरा लेःआः।

प्रकाश 6:9

ओहाङःसैको ओउः भेदाकोः चोःइपाय् यातैज्‍योः अरु छाप् तेत्आकान् ओउःकुस् पास्‌गोता छाप् तेत्ओ खेःतो। ओउः छाप् तेत्आक्‌तीको ङाइ योती परमेस्‍वर्‌कोः नोःराय् थोल्‍ह्‌ती तोसाकायःमा पेतो छ्यानःओकायःमा सात्ओलम्‌कोः रुआङ्‌लम्‌लेः परमेस्‍वर्‌कायः ल्‍हासा बेदीकोः खात् ताल्‍गेसै च्‍यवःआलाङः।

प्रकाश 7:2

ओहाङःसैको यात्‌चाक् अरु ल्‍होक्ओमयः च्‍यवःआलाङः। ओउःपाय् ओउः जीङः नाःओ परमेस्‍वर्‌कोः छाप् लात्‌ती दाह्‌न्‍याम्‌सै लन्‍ह्‌ती वाङ्आ। ओउःपाय् ओउः चार्‌ दोवाहाङः मुओ ल्‍हाव्‍ह्‌दैबाङ्‌कायःमा द्युम्‌मालो तीःकायःमा वाय्‌सा ग्‍वम् दोःओ ल्‍होक्ओमयःकायःपाय् सोतोलेः गोःआथास।

प्रकाश 8:4

ओउः परमेस्‍वर्‌कोः मीक्‌हाङः चीङ्ओ ल्‍होक्ओमयःइ क्रुत्इ ल्‍हाआक्‌तीको ङ्‌हाम्ओलम्इ तेती तोओ कुराकुस् ओउः धुप्‌पाय् कुःती लन्‍ह्आ।

प्रकाश 8:5

धुप् ल्‍हाआक्‌तीको ओउः ल्‍होक्ओमयःइ ओउः धुप् लात्‌सा तेव्‌केरा रोत्‌ती ओउः तेव्‌केराहाङः बेदीकोः म्‍हेः ब्‍लीङ्‌तोलेः काआकान्। म्‍हेः काआक्‌तीको ओउःइ ल्‍हाव्‍ह्‌दैबाङ्‌ताङ् तेव्‌केरा क्‍लाःआकान्। क्‍लाःआक्‌तीको न्‍याम् मुक्ओमा प्‍लीङ्‌ह्ओमा ल्‍याङ् वाङ्‌माआ।

प्रकाश 9:13

ओहाङःसैको यात्‌चाक् अरु ल्‍होक्ओमयःइ ओउःकोः तुरही मुत्आकान् ओउःकुस् छ ल्‍होक्ओमयःइ मुत्आकानी। मुत्आक्‌तीको परमेस्‍वर्‌कोः मीक्‌हाङः मुओ सुन्‌कोः बेदीकोः चार्‌ चोङ्‌कोः रोङःसै हाव्‌नयः सायःआलाङः