13 ख्रीस्इ बयःओ ग्वम् दोःआक्तीको दोह् खेःयाकायःमा ङाइ लोत्ती जाङ्ह्सा खाय्लेःनाङः।
“लौ उया वाङ्अ” त दाय्ह्ती येसुइ तोआथै। येसु एत तोआथै त खेःओ पत्रुस् दोङ्गासै ग्ल्युङ्ह्ती तीःकोः माल्गहाङः वाह्ती येसुकःताङ् वाङ्खेःतो
लौ नीङ् ङाकःहाङः मुती ङाकोः कुरा ल्हुङ्हाङः सेती गम्तेःनानी त खेःया दोह् दोह्तेः नीङ् लयः झाक्ती तेतेःचै ओउःलेः दोःतेःनै।
ओउःकोः नाःतो नाःओ गह्र्सै नीङ्कायः ओउःकोः ग्वालामःइ ग्वम् दोःताक्तेःपै ओहाङःसै नीङ् ल्हुङ् ग्रमःत स्याव्तेःनै।
लौ उया पुःचोङ् हौचोङ्य प्रभुकोः ताङ्ह्ओ ग्वम् दोःती ग्रमःत मुन दा। ओउःत हायःती नीङ्इ दोह् खेःयामा हायःसा खाय्तेःनानी।
फेरी परमेस्वर्कोः सबैसै ताङ्ह्ओ आन पेओ ग्वम्सै नीङ् क्रोङ्तो ल्हुङ् दोःती सबै चोङाय्तोलेः गोरःसा खाय्तेःनानी।
फेरी ओउः काम् जाङ्ह्साकायः ङीकोः प्रभु येसु ख्रीस्इ ङाकायः ङ्हाम्ती “ओउःइ ङाकोः काम् जाङ्ह्लेःनौ” त दाय्ह्ती ङाकायः छ्युङ्ह्आताङः। छ्युङ्ह्आक्तीको ओउःइ ग्वम् बयःआताङः ओउःत झ्यान्ते ओउःकायः ङाइ द्याह् “च्युता” त तोलेःनाङः।