9 नीङ्कःसै जेःगा तुङ्गा सोह् त्याक्सा स्याव्सापाय् स्याव्ओ खेःतो ङीइ नीङ्कायः पेतो स्यान्साकायः ओउःतलेः हायःआलाङःसु।
वाह्तोक्हाङः थैलोमा नीस् क्रमःनाय्मा लात्ती आलःलाम्। जुत्ता दङ्गमा लात्तेःचानी दोह् हायःती दाय्ह्सा ओउः काम् जाङ्ह्ओ मान्ताकायः दोह् दोह् राह्चाः ओउःलेः ओउःकोः जाङ्ह्झ्याङ्कोः दोःओ खेःतो।
ङाकायः तेःती ङाइ गतलो नीङ्इमा ओउःतलेः हायःसा खेःतेःनै।
ओउःत झ्यान्ते “ङाइ जाङ्ह्ओ कुरा नीङ्इमा तेःती जाङ्ह्नु दा” त ङाइ तोनेःनाङ्स।
सुसु ख्रीस्कोः कुरा स्यान्नाःइसी ओउःपाय् दोह् दोह् पेओ थोक्लम् दोःनाः ओउः थोक्लम् ओउःकायः स्यान्ओ मान्ताकायः वेःती बयःपानी।
नीङ्कःसैमा अरुकःसैमा ङीकायः नेह्रो ओर्ताक्सा कुरा बोङःङुसुलु। ङीपाय् ख्रीस्इ छ्युङ्ह्ती लोक्ओमयः खेःनाङी ओउःत झ्यान्ते नीङ्कःसै दोह् दोह् खेःयामा त्याक्सा स्याव्चाः खेःतो। स्याव्सापाय् स्याव्ओलेः खेःतो नीङ्कःसै दोह्मा त्याक्ङुसुलु।
गतलो ङीइ हायःआलाङःसु ओउःतलेः नीङ्इमा तेःती हायःसा खेःतो ओउःत नीङ्खेइ पेतोलेः चीःतेःनानी। नीङ्कःहाङः मुतोक्हाङः ङी अरुकायः काम् नाओ खेःङीली।
ओउःत हायःसाकायः परमेस्वर्इ गोत्तेःआकाय् दोह् हायःती दाय्ह्सा येसु ख्रीस्मा नीङ्कायः आन लीह्सीःओपाय् ग्याती गोरःलेःआ ओउःलो लेखालेः नीङ्इमा तेःतेःपानी।
फेरी खह्र्तोलेः गानाक्ती तोमामाःत ओउःमयःकायः लयः स्यालःती छ्यानःती स्यान्नु दा।