१ पत्रुस् 5:9 - चेपाङ

⁹ ओउःकायः सायःमामाःत परमेस्‍वर्‌कायः ङ्‌हाम्‌ती ग्रमःत मुन। ल्‍हाव्‍ह्‌दैबाङ्‌हाङः गाःहाङः खेःयामा नीङ्‌कोः ङ्‌हाम्ओ पुःचोङ् हौचोङ्‌लम्‌मा नीङ्‌लो लेखालेः लीह्‌सीःओ गोरःनानी एत चीःती ल्‍हुङ् घ्‍युम्‌तेःचै।

१ पत्रुस् 5:9 Iomraidhean Croise

लुका 22:32

नाङ्‌कायः ङाइ परमेस्‍वर्‌कः तेती ‘इ सीमोन्‌कायः पेतोलेः ङ्‌हाम्‌ताक्‌जेःउ दा’ त दाय्‍ह्‌ती तोआलाङः ओहाङःसैको लोने नाङ् ङाकःताङ् ल्‍हुङ् द्यान्‍ह्ओ त खेःओ नाङ्‌कोः साथीलम्‌कायः होम्‌ती ग्रमःत मुताक्उदा” त दाय्‍ह्‌ती येसुइ तोआकान्।

युहना 16:33

नीङ् ल्‍हुङ् र्‍याङःमाःतोलेः धोमाय्‌तो मुसाकायः इ कुरा तोनेःनाङ्‌स। ल्‍हाव्‍ह्‌दैबाङ्‌हाङः मुतोक्‌हाङः आन लीह्‌सीःओ च्‍यवःतेःनानी। ओउःततेः च्‍यवःतेःनानी ग्रमःत मुन दा ङाइ ल्‍हाव्‍ह्‌दैबाङ्‌कोः मुओलम्‌कायः क्‍लीमःआलाङः” त दाय्‍ह्‌ती येसु दाय्‍ह्आ।

खबरदुत 14:22

ओहाङःकोः येसुकोः ङ्‌हाम्ओलम्‌कायः लव्‍ह्‌ती तोआकाचु “लौ येसुकोः कुरा फेमाःत ग्रमःतलेः ङ्‌हाम्‌लेःआनु। लीह्‌सीःओ च्‍यवःओहाङःमा फेलाम् ग्रमःत मुन। लीह्‌सीःओमा हेलामा गोरःती ङी परमेस्‍वर्‌कोः राजीताङ् दाह्‌नाःतय्‍ही बा” त दाय्‍ह्‌ती स्‍यान्आथास।

१ कोरीन्‍थी 10:13

नीङ्‌कायःपाय् “गुच्‍युक् पेतोलेः ङ्‌हाम्‌नानी” त वेलःती योसाकायः लीह्ओ गोरःसा खेःतेःनै नीङ्‌कोः लीह्ओपाय् अरु मान्‍ताकोः लीह्ओसै पेमालो खेःल। लीह्‌सीःओ वाङ्‌सापाय् वाङ्‌लेःनाः परमेस्‍वर्‌पाय् जुगाङ् ङ्‌हाम्‌सीःओ लेःआः। ओउःइ तोती गम्ओ कुरा जाङ्‌ह्‌ती ओउःइ लोत्‌सा खाय्‌मालो लीह्ओ बयःतेःइली। फेरी लीह्ओ वाङ्‌तोक्‌हाङः ओउःइ नीङ्‌कायः ग्रमःत मुताक्‌तेःनै ओहाङःसै नीङ्इ गोरःसा खाय्‌तेःनानी।

एफेसस् 4:27

सैतान्‌कायः नीङ्इ पुःसा जुगाङ् ताक्‌लाम्।

एफेसस् 6:16

नीङ् पेतो ङ्‌हाम्‌तेःनानी त खेःया ओउः ङ्‌हाम्ओपाय् परमेस्‍वर्‌इ बयःओ चक्‌वै नीङ्‌कोः क्रुत्‌हाङः मुनाः। ओउःत हायःती पेमालोलम्इ आप्‌ती ल्‍होक्ओ म्‍हेःलो खेःओ लाःलम् छ्याःसा खाय्‌तेःनानी।

कोलसी 2:5

ङा नीङ्‌कुस् आङ्‌खेहाङः मुङल नीङ्‌कायः ल्‍हुङ्‌खेहाङः च्‍यवःनेःनाङ्‌स। “ओउःमयः ग्रपक्‌त पेतोलेः ग्रमःत मुती ख्रीस्‌कायः पेतो ङ्‌हाम्‌नानी” त चीःती चोङाय्‌नाङः।

१ थेसलोनिकि 3:3

ओहाङःसै लीह्‌सीःओ वाङ्ओ बेलाहाङः नीङ्इ ग्रमःत मुती ङ्‌हाम्‌सा खाय्‌तेःनानी। ओउःत लीह्‌सीःओपाय् ङी गोरःसा खेःनाःतय्‍ही एत नीङ्इ चीःतेःनानी।

१ तीमोथी 6:12

ङ्‌हाम्‌साकायः पेतो ग्रमःत ङ्‌हाम्‌ती मुअ दा फेरी रौ जीङःपाय् पेतोलेः त्‍याक्उ। इत रौ जीङः दोःसाकायः नाङ्इ नाःतो मान्‍तालम्‌कोः मीक्‌हाङः छ्यानःती तोतोक् बेलाहाङः परमेस्‍वर्‌इ गोत्‌तेःआ।

२ तीमोथी 3:12

माः रैस सुसु येसु ख्रीस्‌कुस् ब्राङ्‌ती पेतो हायःती वाह्‌सा बोङःनानी ओउःकायःलेः अरुइ लीह्‌सीःओ बयःनाःथास।

२ तीमोथी 4:7

ङ्‌हाम्‌सापाय् ग्रमःत मुआलाङः ङाकोः काम् दप्‌ती खाय्आलाङः।

हेब्रैनी 11:33

ओउःमयःइ ङ्‌हाम्‌ती झ्‍यान्‍ते अरु देस्‌कोः मान्‍तालम्‌कुस् मीन्‍ह्‌काय्‌ती क्‍लीमःआकानी। ओउःमयःइ एतलेः पेतो हायःती परमेस्‍वर्‌इ तोती गम्ओ कुरा दोःआकाय्। जाःकोः म्‍होतोङ्‌कायः उमःताक्‌ती दल्‌तो स्‍याव्‌माआकाय्

हेब्रैनी 12:8

ओउःत झ्‍यान्‍ते परमेस्‍वर्‌कोः अरु चोःलम्‌खेइ च्‍यवःओ लीह्‌सीःओ नीङ्‌खेइ च्‍यवःतेःनीली त खेःया नीङ्‌पाय् ओउःकोः दोङ् चोःतेः खेःतेःइली अरुकोः चोःतेः खेःतेःनै।

याकुब् 4:7

ओउःत खेःओ परमेस्‍वर्‌कोः तोओ कुराखे ग्‍याती सायःनु। सैतान्‌कोः कुराखे ग्‍यातेःचनै ओहाङःसैको ओउःपाय् नीङ्‌कःसै क्रव्‌नाः।

१ पत्रुस् 1:6

“लौ एत पेओ दोःनाःतय्‍ही” त दाय्‍ह्‌ती चोङाय्‌तोलेः मुतेःनै। चोङाय्‌तोलेः मुसापाय् मुतेःनै तेन्‌छ्याङ् यात् चीच्‍योक्‌कायः लीह्‌सीःओ दीन्‌लम् वाङ्‌नाः।

१ पत्रुस् 2:21

ओउःत हायःसाकायः परमेस्‍वर्‌इ गोत्‌तेःआकाय् दोह् हायःती दाय्‍ह्‌सा येसु ख्रीस्‌मा नीङ्‌कायः आन लीह्‌सीःओपाय् ग्‍याती गोरःलेःआ ओउःलो लेखालेः नीङ्इमा तेःतेःपानी।

१ पत्रुस् 3:14

बुरु पेतोलेः जाङ्‌ह्‌साकायः लीह्‌सीःओ च्‍यवःतेःनानी त खेःया नीङ्‌पाय् भालातेः स्‍याव्‌तेःआकाय् बा। सुकःमातेः रैमामाःत ल्‍हुङ् रुःमामाःत मुन।

१ पत्रुस् 4:13

ओउः लीह्‌सीःओ नीङ्इ ख्रीस्‌कुस्इलेः गोरःतेःनानी ओउःत झ्‍यान्‍ते म्रोतोलेः मुन ओहाङःसैको लोनेः ओउः ताङ्‌ह्‌तो स्‍याव्ओ दीन्‌हाङः नीङ् आन चोङाय्‌तोलेः स्‍याव्‌तेःनै।

प्रकाश 1:9

ङापाय् युहना त तोओलेः नीङ्‌कोः पुः स्‍याव्‌ती ङाइ नीङ्‌कुस् येसुकायः लीह्‌सीःओ गोरःमानाङः नीङ्‌कुस्‌लेः ओउःकोः राजीहाङः मुमानाङः ओउः वाङ्‌साकायः ल्‍युङ्‌ह्‌तीलेः मुमानाङः। परमेस्‍वर्‌कोः नोःराय्‌मा येसुइ छ्यानःओ कुरामा थोल्‍ह्‌ती तोती झ्‍यान्‍ते ङापाय् पात्‍मोस् त तोओ तीःइ तोङःती गम्ओ देस्‌हाङः थुनतीलेः मुनाङः।

प्रकाश 6:11

ओउःत दाय्‍ह्आक्‌तीको ओउःमयःपाय् लःलयः जोक्‌कायः यायाःज्‍योः भाम्ओ क्रमःनाय् बयःओ खेःतो “लौ ओउः नीङ्‌लो लेखा सात्‌तोलेः स्‍याव्‌सा खेःओ नीङ्‌कुस् काम् जाङ्‌ह्ओ साथीलम्‌मा हौलम्‌मा ओउःमयःकोः नम्‍बर्‌ दाह्‌धाङ्‌मालो बेलाहाङःच्‍युक्‌कायः ल्‍हुङ् धोमाय्‌तोलेः ल्‍युङ्‌ह्‌ती मुआक्‌न” त दाय्‍ह्‌ती तोओमा खेःतो।

प्रकाश 7:14

“अ प्रभुय ङाखेइ खेःल नाङ्‌खेइलेःतेः चीःतेःनौ” त दाय्‍ह्‌ती त्‍याङ्आलाङः। “लौ इमयःपाय् ओउः आन लीह्‌सीःओ बेलाहाङःसै दल्‌ती वाङ्आकाय्। ओउःमयःकोः नाय्‌लम् भेदाकोः चोःकोः वयःइ धावःती भाम्‌ताक्आकानी।