फिलिप्पियों 4:8 - चम्बयाली नौआ नियम

⁸ इस तांइ ओ संगी विश्वासियों, जे गल्लां सच हिन, ते जे गल्लां आदरणीय हिन, ते जे गल्लां सही हिन ते जे गल्लां पवित्र हिन ते, जे गल्लां सोह्णि हिन, ते जे गल्लां दिलां जो भाणे वाली हिन, ते आखिरकार जे ठीक गुण ते तारिफ रे जोग्गे हिन, तिन्हा पर ध्यान लाया करो।

फिलिप्पियों 4:8 Iomraidhean Croise

मत्ती 22:16

अते तिन्हा ने अपणे चेल्‍लेयां जो हेरोदेस रे झुण्ड रे लोक्कां कने तिन्हेरे का ए बोलणे जो भेज्जेया, ओ गुरु, असी जाणदे की तुसा सच्चे हिन, ते परमेश्वर रा रस्ता सच्चाई कने दसदे, ते कुसकी री परवाह नी करदे, किजोकी तुसा मणूआं रा मुँह दिख्खी करी गल्लां नी करदे।

मरकुस 6:20

किजोकी हेरोदेस यूहन्ना जो धार्मिक ते पवित्र मणू समजी करी उस का डरदा थिया, ते तिसजो बचाई रखदा थिया ते उसेरी गल्ल सुणी करी बड़ा डरदा थिया पर खुसी कने सूणदा थिया।

लूका 16:15

यीशु ने तिन्हा जो बोल्लेया, तुसा जे मणूआं जो ए जताणा चाह्‍ंदे कि तुसा बड़े सही हिन, पर परमेश्वर तां तुसा रे मनां जो भी जाणदे। दुनिया जिस गल्ल रा बड़ा आदर करदी, से गल्ल परमेश्वर री नजरां अन्दर घटिया हिन।

लूका 2:25

तिन्हा दिनां बिच, यरुशलेम सहर अन्दर शमौन नां रा इक्क मणू रैहन्दा थिया, से परमेश्वर रे रस्ते पर चलणे वाला, भला अते नेक मणू थिया, से बड़ी उम्मीद कने मसीह रे आणे रा इंतजार करेया करदा थिया ताकि से आई करी इस्राएल रे मणूआं जो सांती दये, ते शमौन पवित्रात्मा रे गलाये चलदा थिया।

लूका 23:50

तित्ते यूसुफ ना रा यहूदी महासभा रा इक्क बन्दा थिया, से बड़ा खरा मणू थिया।

यूहन्ना 7:18

जे कोई अपणे पासे का बोलदा से अपणी अप्पु ही बड़ाई करदा, पर जे अपणे भेजणे वाले री बड़ाई चाहन्दा, से ही सच्चा है, कने तिस बिच कोई ढोंग नी है।

प्रेरितां रे कम्म 10:22

तिन्हा ने बोल्लेया, कुरनेलियुस हाकिम जे भला अते पवित्र कने परमेश्वर रा डर मनणे वाला ते सबणी यहूदियां बिच ठीक नां वाला मणू है, तिस स्वर्गदूत ने तिज्जो अपणे घरे सदणे तांइ ते जे किच्‍छ तुसा बोल्णा तिसजो असा जो सुनणे तांइ बोल्ले रा है

प्रेरितां रे कम्म 22:12

तां हनन्याह नां रा मूसा रे कानून रे हसाब्बे इक्क भग्त मणू थिया, जे तित्ते रैह्णे वाले यहूदियां बिच का नामी थिया, मेरे का आया,

प्रेरितां रे कम्म 6:3

इस तांइ, ओ भाईयो, अपणे बिच का सत्त ठीक नां वाले मणूआं जो जे पवित्रात्मा ते समजदारी कने भरित्ते रे होण, चुणी लो कि असी तिन्हेरे जो इस कम्म पर ठहराई दैण।

रोमियों 13:13

असा जो रौसनी बिच रैह्णे वाले लोक्कां सांई अपणे चालचलन जो खरा बणाई करी रखणा चाएदा। पर न्याहरे बिच रैह्णे वाले लोक्कां सांई मतवाल्ले, पियक्कड़, रंगरेलियां, व्यभिचारी करणे वाले, अश्लील, झगड़े करणे वाले ते हिर्स करणे वाले ना बणे।

रोमियों 13:3

किजोकी जे अगर कोई मणू खरा कम्म करेया करदा हो, तां तिज्जो अपणे अधिकारी का डरणे री जरुरत नी है। पर जे अगर कोई मणू गलत कम्म करेया करदा हो तां तिसजो अपणे अधिकारी का डरणे री जरुरत है। इधेरे तांइ ठीक कम्म कर तां तुसा रे अधिकारियां ने तुसा री तारिफ करणी।

रोमियों 14:18

जे कोई इस तरिक्के कने मसीह यीशु री सेवा करदा, से परमेश्वर जो खुस करदा, ते मणू भी तिसेरा आदरमान करदे।

रोमियों 2:29

पर सच्चा यहूदी से ही है जिसेरा मन परमेश्वर री नजरां बिच धार्मिक हो। ते सच्चा खतना सिर्फ मूसा रे कानून बिच लिख्खे री गल्लां जो मनणा ही नी है, पर परमेश्वर रे आत्‍मा रे जरिये अपणे दिल रा बदलणा है। इदेय मणू जो मणूआं रे पास्से का नी पर परमेश्वर रे पास्से का प्रशंसा मिलदी।

1 कुरुन्थियों 4:5

इधेरे तांइ, पैल्ले ही कुसकी गल्ल रा हिसाब कताब मत करेया करो, बल्कि जां तांइ प्रभु नी आंदे तां तांइ रुकी रेयो। किजोकी तिन्हा ने लोक्कां री दिल री लुके री गल्लां रे बारे बिच साफ-साफ दसणा जिन्हा रे बारे बिच कोई नी जाणदा। तिन्हा ने लोक्कां रे दिल रे लुके रे इराद्देयां जो साफ-साफ ज़ाहिर करणा। तां फिरी परमेश्वर ने सारेयां री तारिफ करणी।

2 कुरुन्थियों 13:7

असी परमेश्वर का ए प्रार्थना करदे कि तुसा मणू कोई पाप ना करो, ए दिखाणे तांइ नी कि असी कामयाब होई गे, पर सिर्फ इधेरे तांइ कि तुसा भलाई रे कम्म करो, भले ही असी निकम्मे समजे जाण।

2 कुरुन्थियों 8:18

असा ने तिस कने तिस विश्वासी भ्याल जो भी भेज्जे रा है, जिस जो सारी कलीसियां रे सारे संगी विश्वासी मसीह यीशु रे सुब बसेख रे प्रचारक होणे रे नात्ते जाणदे।

2 कुरुन्थियों 8:21

किजोकी असी तिन्हा गल्लां री फिकर करदे जे गल्लां सिर्फ प्रभु रे ही सामणे नी, पर लोक्कां रे सामणे भी भली हिन।

गलातियों 5:22

पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है।

इफिसियों 4:25

इधेरे तांइ झूठ बोलणा छड्डी करी सब जणे अपणे संगी विश्वासी कने सच बोल्लेया करो, जिय्यां कि असी इक्क ही सरीर रे अंग हिन।

इफिसियों 5:9

किजोकी रौसनी बिच जीणे वाले मणूआं रा स्वभाव हर तरिक्के कने भला, ते धार्मिकता ते भरोसेमंद है।

इफिसियों 6:14

तैयार रेयो! सच्चाई जो अपणी कमर रा पटुका बणाओ, ते तुसा री धार्मिकता जो इक्क झीलम सांई तुसा री रक्षा करणा देयो। परमेश्वर रा सांती रा सुब बसेख सुनाणे री तुसा री इच्छा तुसा रे पैरां बिच तैयारी रे जूत्ते सांई होणे चाएदे। तुसा रा विश्वास इक्क ढाल सांई होणा चाएदा, तां तुसा ने शैतान रे भखदे तीरां जो रोक्की सकणा। परमेश्वर री तुसा जो बचाणे री ताकत तुसा तांइ इक्क टोप सांई होणी चाएदी, ते परमेश्वर रे सुब बसेख रे वचन जो इक्क तलवार सांई इस्तेमाल करो जो पवित्रात्मा रे पास्से का मिल्ले रा है।

फिलिप्पियों 3:1

ते ओ मेरे संगी विश्वासियों, प्रभु री वजह कने खुस रेयो, तुसा जो से ही गल्लां घड़ी-घड़ी लिखणे बिच मेरे जो कोई तकलीफ नी है, ताकि इस कने गलत शिक्षकां का बची सको।

कुलुस्सियों 4:5

हर मौक्के जो कीमती मन्नी करी गैर यहूदियां कने समजदारी कने बर्ताव करो।

1 थिस्सलुनीकियों 4:12

कि गैर-विश्वासियां कने खरा बर्ताव करेया करो, ते तुसा जो अपणी जरुरतां तांइ निर्भर नी होणा पे।

1 तीमुथियुस 2:2

सारे राज्जेयां ते अधिकारी मणूआं तांइ प्रार्थना करेया करो ताकि असी सुख-चैन कने रेई सके ताकि असी परमेश्वर री अराधना करण ते दूए लोक्कां कने खरा बर्ताव रखण।

1 तीमुथियुस 3:11

सेवादारां री लाड़ियां रा लोक्कां बिच खरा नां होणा चाएदा। से मणूआं पर इल्जाम लाणे वाली नी होणा चाएदी, पर तिन्हा जो चज्ज कने बर्ताव करणा चाएदा ते से पूरे तरिक्के कने भरोस्सेमंद होणा चाएदी।

1 तीमुथियुस 3:4

से मणू ठीक तरिक्के कने अपणे परिवार जो चलाणे ते तिन्हेरी ठीक देख-रेख करणे ते काबिल होणा चाएदा ते तिसजो अपणे बच्चेयां जो ए सिखाणा चाएदा कि से पूरी तरिक्के कने तिसेरी इज्जत करण ते तिसेरी गल्लां मन्नेया करण।

1 तीमुथियुस 4:12

किजोकी तुसा जुआन हिन इधेरे तांइ इस हिसाब कने बर्ताव करो ताकि कोई तुसा रा अनादर ना करी सके पर तुसा जो गल्ल-बात करणे कने, तुसा रे बर्ताव कने, दूज्जेयां तांइ अपणे प्यार री वजह कने, मसीह बिच तुसा रे विश्वास री वजह कने ते तुसा रे बेदाग जिन्दगी री वजह कने विश्वासियां तांइ इक्क खरा उदारण बणना चाएदा ताकि से भी तिय्यां ही करण।

1 तीमुथियुस 5:10

से विधवा जनानी अपणे भलाई रे कम्मां तांइ जाणी जांदी हो जिय्यां कि बच्चेयां रा पालण-पोषण करणा, मेहमान-नवाजी करणा, प्रभु रे लोक्कां री सेवा करणा, मुसीबत बिच पेय रे लोक्कां री मदद करणा ते हर तरिक्के रे भलाई रे कम्मां बिच मन लाणा।

1 तीमुथियुस 5:2

बुजुर्ग जनानियां जो अपणी मां जदेया मन्नी करी तिन्हा जो सलाह देया करो ते जुआन कुड़ियां जो अपणी भैण मन्नी करी समजाया कर। ए सब किच्‍छ अपणे पूरे दिल कने करेया करो।

तीतुस 1:8

पर परौणे रा सत्कार करणे वाला हो, सारेयां री भलाई चाह्‍णे वाला, अप्पु पर काबू रखणे वाला, जे सही ते गलत रा फैसला करणे रे जोग्गे हो, ते अनुशासन बिच रैह्णे वाला हो।

तीतुस 2:14

जिन्हा ने असा जो पाप री ताकत का छुटकारा दैणे तांइ अप्पु जो कुर्बान करी दित्ता ते असा जो धार्मिक ठैहराया ताकि असी तिन्हेरे अपणे खास मणू बणी जाण जिन्हा बिच ठीक कम्म करणे री बड़ी वरी इच्छा है।

तीतुस 2:2

बुजुर्ग मणू अप्पु जो काबू बिच रखणे वाले होण, ते सोच्ची-समजी करी बर्ताव करणे वाले होण ताकि मणू तिन्हेरी इज्जत करण, परमेश्वर बिच तिन्हेरा विश्वास मजबूत हो, ते दूए लोक्कां कने बड़ा रखणे वाले होण, ते सहनशील होण।

तीतुस 2:7

तुसा अप्पु हर गल्ल बिच दूज्जेयां तांइ ठीक बर्ताव रा इक्क उदारण बणो कि से भी तिय्यां ही करण।

तीतुस 3:14

सिर्फ इन्ना ही नी पर तुसा जो विश्वासियां जो ए सिखाणे री जरुरत है कि से ठीक कम्म करणे तांइ मैहनत करणे बिच ध्यान लाण ताकि जरुरतमंद लोक्कां री जरुरतां जो पूरा करी सकण। इस कने विश्वासी लोक्कां जो इक्क ठीक मकसद कने जीणे बिच मदद मिलणी।

इब्रानियों 11:2

असा रे पूरखां ने परमेश्वर बिच इस इसी तरिक्के रा विश्वास कित्ता थिया, तां ही परमेश्वर तिन्हा कने खुस थिये।

इब्रानियों 13:18

इस तिकर असा तांइ प्रार्थना करदे रेयो। किजोकी असी पक्के तौर पर जाणदे कि असा रा विवेक साफ है, ते असी सारी गल्लां अन्दर परमेश्वर जो आदर दैणा चाह्‍ंदे।

याकूब 1:27

असा रे परमेश्वर पिता री नजर बिच सच्ची ते सुच्ची भक्ति ए है कि अनाथ ते विधवा रे दुख बिच तिन्हेरा ख्याल रखणा, ते अप्पु दुनिया रे बुरे कम्मां का दुर रैह्ण जे तुसा जो बिगाड़दे।

याकूब 3:17

पर परमेश्वर रे पास्से का मिलणे वाला ज्ञान सबका पैल्ले तां से पवित्र हुन्दा, फिरी मिलनसार, भद्र, दया कने भरितेरा अते ठीक कम्मां कने लद्दितेरा, अते बगैर भेद-भाव रे ते सच्चा भी हुन्दा।

1 पतरस 1:22

सच्चाई जो मन्नी करी चलणे री वजह कने अवे तुसा सुच्चे कित्ते गे, अवे तुसा जो तन-मन लाई करी संगी विश्वासियां कने आपसी प्यार रखणा चाएदा। बड़ी चाह्‍त ते पूरे दिल कने इक्क-दूए कने प्यार रख्खो।

1 पतरस 2:12

तुसा रे नेड़े-तेड़े रैह्णे वाले मणू जे परमेश्वर बिच विश्वास नी करदे इय्यां जरुर बोलगे कि तुसा गलत कम्म करेया करदे हिन। पर तुसा इक्क इदेइ जिन्दगी जियो ताकि से मणू तुसा रे भलाई रे कम्मां जो दिख्खी सकण ते मसीह यीशु रे हटणे रे दिन पर परमेश्वर री महिमा करण।

1 पतरस 4:8

अते सबका बड्डी गल्ल ए है कि इक्क-दूज्जे तांइ प्यार रखो, किजोकी प्यार अणगिणत पाप्पां जो ढक्की दिंदा

2 पतरस 3:1

ओ मेरे प्यारे दोस्तों, अवे ए दूज्जी चीठ्ठी है जे मैं तुसा जो लिख्खेया करदा है दोन्नां चीठ्ठियां बिच मैं तुसा जो से गल्लां याद कराई करी, जे तुसा ने पैल्ले का सिख्खे री हिन, तुसा जो सही तरिक्के कने सोचणे तांइ होंसला बंधाणे री कोसीस करेया करदा है।

1 यूहन्ना 3:18

ओ प्यारे बच्चों, असा रा प्यार सिर्फ गल्लां बिच ही नी रैह्णा चाएदा बल्कि से कम्मां बिच दिसणा चाएदा अते सच्चा होणा चाएदा।

1 यूहन्ना 3:3

हर कोई जे मसीह पर इदेयी आस रखदा, से अप्पु जो तिय्यां ही पवित्र रखदा, जिय्यां मसीह यीशु पवित्र है।

1 यूहन्ना 4:1

ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्‍मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन।