फिलिप्पियों 3:19 - चम्बयाली नौआ नियम

¹⁹ अग्गे चली करी तिन्हेरा खातमा होई जाणा, तिन्हेरा परमेश्वर तिन्हेरे शारीरिक इच्छा हिन, से अपणी बेशर्मी री गल्लां पर घमंड करदे, ते से मणू सिर्फ तिन्हा दुनियावी चीजां जो करणे रे बारे बिच सोचदे रैहन्दे जे इस दुनिया रे मणू करदे।

फिलिप्पियों 3:19 Iomraidhean Croise

मत्ती 16:23

तां यीशु ने मुड़ी करी पतरस जो बोल्लेया, ओ शैतान, मेरे सामणे का दुर होई जा तू मेरे तांइ इक्क अड़चन है किजोकी तू परमेश्वर री गल्लां पर नी, पर मणूआं री गल्लां पर मन लगादां।

मत्ती 25:41

तां मैं पुठ्ठे पास्से वालेयां लोक्कां कने बोलणा ओ अभागे लोक्कों! मेरे का दुर चली जाओ, अते जे आग्ग परमेश्वर ने शैतान ते तिसेरे दूतां तांइ तैयार कित्ती, उस हमेसा तिकर बलणे वाली आग्ग बिच पेई जाओ।

लूका 12:19

ते फिरी मैं अपणे आप जो बोलणा, कि तेरे का तां बड़ा भरी अनाज है जे केई सालां तांइ तेरे का बची रैह्णा अते अवे चैन कने खा-पी ते मजे कने जी।

लूका 16:19

फिरी यीशु ने तिन्हा लोक्कां जो इक्क उदारण दित्तेया, दिख्खो, इक्क मणू थिया ते से बड़ा अमीर थिया। से बडे़ छैल अते मैह्न्गे रे कपड़े पान्दा थिया। ते हर रोज बड़े ऐश-ओ-अराम री जिन्दगी जिन्दा थिया।

लूका 18:4

तिस हाकिम ने मते रोजां तांइ तिस विधवा री गल्लां री कोई परवाह ही नी कित्ती, पर बाद बिच तिन्ने अपणे मनां अन्दर सोचेया, कि मैं ना तां परमेश्वर का डरदा ना ही मणूआं री परवाह करदा,

रोमियों 16:18

किजोकी ऐसे मणू प्रभु मसीह यीशु री सेवा अपणे मतलब तांइ करदे, से अपणे मतलब जो पूरा करणे तांइ मिठ्ठी-मिठ्ठी गल्लां बोल्ली करी, भोले भाले लोक्कां जो धोखा दिंदे।

रोमियों 6:21

तुसा पैल्ले बुरे कम्म कित्ते पर अवे तिन्हा पर शर्मिंदा हिन। तुसा जे से कम्म करी के कोई फायदे नी होया किजोकी तिन्हा कम्मां रा अंजाम सिर्फ मौत है।

1 कुरुन्थियों 3:3

किजोकी हल्ले तांइ तुसा इस दुनिया रे अविश्वासी लोक्कां सांई हिन। तुसा रे बिच हिर्स अते झगड़ा है, इस कने साबित हुंदा कि तुसा इस दुनिया रे दूए लोक्कां सांई हिन ते तिय्यां ही बरताव करदे।

1 कुरुन्थियों 5:2

इस बारे बिच तुसा दुखी होणा चाएदा थिया। जे कोई इदेया कम्म करदा तुसा जो तिस मणू जो अपणी कलीसिया बिच का बाहर कड्डी दैणा चाएदा थिया, पर इय्यां करणे रे बजाए तुसा उल्टा घमंड कने भरी गे।

1 कुरुन्थियों 5:6

तुसा घमंड करणा छड्डी देयो। जिय्यां कि तुसा जाणदे कि जरा करी तराक पूरे गुह्ने रे आट्टे जो तराक्की दिंदा तिय्यां ही जां कोई इक्क मणू पाप करदा रैहन्दा तां तिस वजह कने तिसेरे कन्ने रे सारे मणू तिस असर बिच पाप करणा लग्गी पैंदे।

2 कुरुन्थियों 11:12

पर मैं तुसा का कदी दान नी लैणा, ताकि दूज्जेयां जो इस गल्ल बिच घमंड करणे रा मौक्का ना मिल्ले कि तिन्हा ने भी तिस्सी तरिक्के कने सेवा करदे जिय्यां असी करदे।

2 कुरुन्थियों 11:15

इधेरे तांइ इस गल्ल बिच कोई हैरानी नी है कि शैतान रे दास भी परमेश्वर री सेवा करणे वालेयां रे भेस बिच आंदे। तिन्हेरे कम्मां रे हिसाब कने तिन्हेरा खातमा होई जाणा।

गलातियों 6:13

किजोकी यहूदी विश्वासी जो अप्पु ता मूसा रे कानून पर नी चलदे, पर तुसा रा खतना इधेरे तांइ कराणा चाह्‍ंदे कि तुसा रे सरीर री हालत पर घमंड करण।

फिलिप्पियों 2:21

किजोकी सारे अपणे-अपणे मतलब री चीजां रे पीच्छे पे रे हिन। ते तिन्हा गल्लां री फिकर नी करदे जे मसीह यीशु तांइ जरुरी हिन।

कुलुस्सियों 3:2

दुनिया री चीजां पर नी, पर स्वर्ग री चीजां पर ध्यान लांदे रेयो।

2 थिस्सलुनीकियों 1:9

तिन्हा जो परमेश्वर का हमेसा तांइ अलग करी दित्तेया जाणा ते तिन्हा ने परमेश्वर री महिमामय ताकत रा अनुभव नी करी पाणा। परमेश्वर ने तिन्हा लोक्कां जो हमेसा री सजा दैणी।

2 थिस्सलुनीकियों 2:12

परमेश्वर ने तिन्हा सारे लोक्कां रा हिसाब-किताब लैणा जिन्हा ने मसीह यीशु रे सच्चाई रे बसेख पर विश्वास नी कित्तेया पर अपणे बुराई रे कम्मां कने प्यार कित्तेया।

2 थिस्सलुनीकियों 2:8

तां तिस दुष्ट ने सामणे आई जाणा, पर बाद बिच जां मसीह यीशु ने आणा तां तिन्हा ने तिस दुष्ट जो अपणे मुँह का निकले रे हुकम ते अपणे हटी करी आणे री महिमा कने मुकाई दैणा।

1 तीमुथियुस 6:5

जिन्हा लोक्कां री समझ बिगड़ी गे री है, तिन्हा लोक्कां बिच बेकार रे झगड़े हुदें ते से मणू नी समजी सकदे कि सच कै है। से मणू सोचदे कि परमेश्वर री शिक्षा सिखाणा पैसा कमाणे रा जरिया है।

2 तीमुथियुस 3:4

धोखेबाज, ढीठ, अकड़बाज, ते परमेश्वर रे का जादा शरीरी सुख जो चाह्‍णे वाले मणू होणे।

याकूब 4:16

पर अवे तुसा अपणे बुरे मनसुबे पर घमडं करदे, ते इदेया घमंड बुरा है।

2 पतरस 2:1

जिय्यां कि बड़े पैल्ले झूठ्ठे भविष्यद्वक्तां उठे थिये, तिय्यां ही तुसा बिच झूठ्ठे शिक्षक उठणे। तिन्हा ने झूठ्ठी शिक्षा देया करणी जिसेरी वजह कने लोक्कां ने मसीह बिच विश्वास करणा छड्डी दैणा। इत्ते तिकर तिन्हा ने मसीह जो अपणा मालिक बणने का इन्कार करी दैणा जिन्हेरा तिन्हा लोक्कां पर हक है ते जिन्हा ने तिन्हा लोक्कां जो पाप रे काबू का अजाद कित्ते रा है। तिस्सी तरिक्के कने तिन्हा ने अप्पु जो चाणचक्के ही मुकाई दैणे री वजह बणना।

2 पतरस 2:13

तिन्हा ने जिन्ना नुक्सान कित्ते रा है, तिस तांइ तिन्हेरा ईनाम सिर्फ बर्बादी है। तिन्हा जो सरे-आम अपणी बुरी इच्छा जो पूरा करणा छैल लगदा। चाए से तुसा कने संगती बिच बेई करी रोट्टी ही किजो ना खाया करदे होण, तां भी तिन्हा जो धोख्खा दैणा पसंद है।

2 पतरस 2:3

ए झूठ्ठे शिक्षक लालची होणे, ते तिन्हा ने तुसा का रुपया लैणे तांइ तुसा जो मनघड़ंत गल्लां सुनाणी। परमेश्वर ने बड़े पैल्ले ही इस गल्ल रा फैसला करी लित्तेया थिया तिन्हा ने इन्हा लोक्कां जो सजा दैणी ते से इय्यां करणे तांइ तैयार भी हिन। तिन्हा ने इन्हा लोक्कां जो यकिनन बर्बाद करी दैणा।

यहूदा 1:10

पर मसीह बिच विश्वास करणे रा ढोंग करणे वाले ए मणू तिन्हा गल्लां रे बारे बिच पुठ्ठी-सीद्दी गल्लां बोलदे जिस जो से समजदे भी नी, ते जिन्हा चीजां जो से जाणदे ते कुदरती तौर पर जानवरां सांई करदे से चीजां करणे री वजह कने ही बर्बाद भी होई जांदे।

यहूदा 1:16

ए मणू हमेसा परमेश्वर रे खिलाफ ही बोलदे ते लोक्कां री गलती ही कडदे रैह्‍न्दे। से हमेसा अपणी दिल री मर्जी कने दुष्ट कम्म करदे रैह्‍न्दे। से अप्पु पर बड़ा घमंड करदे ते अपणा मतलब कडणे तांइ लोक्कां री चापलूसी करदे।

यहूदा 1:4

मेरा तुसा जो ए चीठ्ठी लिखणे रा मकसद ए है कि किच्‍छ इदेय मणू तुसा लोक्कां बिच मझाटे मिली गेरे हिन जे मसीह यीशु बिच विश्वास करणे रा ढोंग करदे। से परमेश्वर रा आदरमान नी करदे ते से मणू ए सिखांदे कि परमेश्वर असा रे पाप्पां जो माफ करी दिंदे इधेरे तांइ असी अनैतिक जिन्दगी जी सकदे। से मसीह यीशु जो नक्कारदे जे असा रे मालिक ते प्रभु हिन।

प्रकाशित वाक्य 18:7

तिसने अपणी जिन्नी जादा अराम ते घमंड बिच बिताई, तिसका तिसेरे ही बराबर जुल्म सैह्‍ण कराओ। तिनिये अप्पु जो बोल्लेया, “मैं लोक्कां पर राणी सांई राज करणा। मैं कोई विधवा नी है, ते मेरे जो कोई दुख नी होणा।

प्रकाशित वाक्य 19:20

से ड्रोणे जानवर, ते तिसेरे कन्ने से भविष्यद्वक्ता पकड़ेया गेया। झूठ्ठे भविष्यद्वक्ता ने तिस ड्रोणे जानवर रे पास्से का लोक्कां जो बड़े वरी चमत्कार दिखाए ते लोक्कां जो भटकाई दित्तेया जिन्हा ने तिस ड्रोणे जानवर री छाप लित्ती थी ते तिसेरी मूर्ति री पूजा कित्ती थी। से झूठ्ठा भविष्यद्वक्ता ते से ड्रोणा जानवर तिस आग्ग ते गन्धक रे समुंदर बिच सूटी दित्ते गे।

प्रकाशित वाक्य 21:8

पर जे मणू अप्पु पर जुल्म होणे रे डर कने मेरे पर विश्वास करणे का मुकरी जांदे, तिन्हा जो भी तिस गन्धक बिच सूटी दित्तेया जाणा। तिय्यां ही बुराई रे कम्म करणे वाले लोक्कां जो तिस गन्धक वाली आग्ग बिच सूटी दित्तेया जाणा जिन्हा ने व्यभिचार, अपणे संगी साथियां पर जादू टोणा, ते मूर्ति पूजा कित्ती हो। इसजो दुई मौत बोल्लेया जांदा।

प्रकाशित वाक्य 22:15

बाहर कूत्ते, जादू-टौणे करणे वाले, अश्लील मणू, हत्यारे, मूर्तां री पूजा करणे वाले ते झूठ बोलणे वाले होणे। से कदी भी सहर बिच नी आई सकदे।