फिलिप्पियों 2:8 - चम्बयाली नौआ नियम

⁸ तिन्हा ने इन्सान रे रुप बिच जन्म लेई करी अप्पु जो इन्ना जादा निमता कित्ता कि परमेश्वर रे हुकमां जो मनदे होए से इक्क मुजरिम सांई मरणे तांइ भी तैयार थिये, ते हाँ, सुली पर अपणी जान देई भी दित्ती।

फिलिप्पियों 2:8 Iomraidhean Croise

मत्ती 17:2

तित्ते तिन्हेरे सामणे यीशु रा रुप बदली गेया उन्हेरा मुँह सूरज साई चमकी पेया, अते तिन्हेरे कपड़े इय्यां चमके जिय्यां लौ हो।

मत्ती 26:39

फिरी से थोड़ा होर अग्गे बधी करी मुँह रे भारे पेय, ते प्रार्थना कित्ती, ओ मेरे पिता जे होई सके तां ए कटोरा मेरे का टली जाए तां भी जिय्यां मैं चाह्‍ंदा तिय्यां नी पर जिय्यां तुसा चाह्‍ंदे तिय्यां ही हो।

मत्ती 26:42

फिरी तिन्हा ने दुई वरी जाई करी प्रार्थना कित्ती ओ मेरे पिता, जे ए मेरे पिए बगैर नी हटी सकदा तां तुसा री मर्जी पूरी हो।

लूका 9:29

प्रार्थना करदे-करदे यीशु रा रुप ही बदली गेया ते तिन्हेरे कपड़े लस्कदे-गाढ़े चिट्टे रांग रे होई गे

यूहन्ना 10:18

कोई मेरी जिन्दगी मेरे का खुस्सेया नी है करदा, बल्कि मैं अप्पु ही अपणी जिन्दगी दिंदा, मेरे जो अपणी जिन्दगी दैणे रा भी हक्क है, ते तिसजो फिरी लेई लैणे रा भी हक्क है: ए हुकम मेरे जो मेरे पिता-परमेश्वर का मिल्ले रा है।

यूहन्ना 14:31

पर ए इधेरे तांइ होया करदा है कि दुनिया रे मणू जाणे कि मैं पिता कने प्यार करदा, ते जिय्यां पिता ने मेरे जो हुकम दित्ते हिन मैं तिय्यां ही करदा। उठ्ठो, इत्ते का चलदे।

यूहन्ना 15:10

जे तुसा मेरे हुकमां जो मंनगे, तां मेरे प्यार बिच बणी रैहन्गे, तिय्यां ही जिय्यां मैं अपणे पिता रे हुकमां जो मनदा अते तिन्हेरे प्यार बिच बणी रैहन्दा।

यूहन्ना 4:34

यीशु ने तिन्हा जो बोल्लेया, मेरी रोट्टी से है कि परमेश्वर जिन्हा ने मेरे जो भेज्जे रा है, तिन्हेरी मर्जी रे हिसाब कने चलां ते तिसेरा कम्म पूरा करां।

प्रेरितां रे कम्म 8:33

तिसजो नीचा दिखाया गेया ते तिस कने हिसाब-किताब नी होया, कुसकी ने भी तिसेरे वंश जो नी जाणना किजोकी तिसेरा वंश सुरु होणे का पैल्ले ही तिसजो मारी दित्तेया गेया।

रोमियों 5:19

किजोकी इक्क मणू रे परमेश्वर रे हुकम जो ना मनणे री वजह कने मते मणू पापी ठैहराए गे, तिय्यां ही इक्क मणू रे परमेश्वर रे हुकम जो मनणे री वजह कने मते मणू धार्मिक ठैहराए गे।

2 कुरुन्थियों 8:9

तुसा असा रे प्रभु यीशु मसीह रे अनुग्रह जो जाणदे कि से अमीर होई करी भी तुसा तांइ कगांल बणी गे, ताकि तिन्हेरे कगांल होई जाणे कने तुसा अमीर होई जाओ।

गलातियों 3:13

मसीह यीशु ने असा जो मूसा रे कानून रे श्राप का छुटकारा दैणे तांइ तिस श्राप जो अपणे उप्पर लेई करी सुली पर अपणी जान देई दित्ती, किजोकी पवित्रशास्त्र बिच लिख्खे रा है, “शापित है से मणू जे सुली पर मरदा।”

तीतुस 2:14

जिन्हा ने असा जो पाप री ताकत का छुटकारा दैणे तांइ अप्पु जो कुर्बान करी दित्ता ते असा जो धार्मिक ठैहराया ताकि असी तिन्हेरे अपणे खास मणू बणी जाण जिन्हा बिच ठीक कम्म करणे री बड़ी वरी इच्छा है।

इब्रानियों 12:2

असा जो अपणी हाख्खियां यीशु पर लाई रखणी चाएदी, जे असा जो विश्वास बिच अग्गे बधांदे ते पूरा भी करदे। तिन्हा ने सुली पर जान दैणे ते बेज्जती जो भी, बाद बिच मिलणे वाले आनंद रे बारे बिच सोचदे होए सहन करी लित्तेया। से अवे परमेश्वर रे सिहांसन रे सज्जे पास्से बैठ्ठे रे हिन।

इब्रानियों 12:4

पाप रे खिलाफ संघर्ष करणे अंदर तुसा कदी इदेय मोड़ पर नी पूज्जे, जित्ते तुसा जो अपणी जान खतरे बिच पाणी पेयो।

1 पतरस 2:24

जां मसीह मरे, तां तिन्हा जो असा रे पाप्पां री सजा तांइ सुली पर चढाया गेया थिया। तिन्हा ने ए इधेरे तांइ कित्तेया थिया ताकि असी पाप करणा छड्डी दैण ते धार्मिकता कने जीणा सुरु करी दैण। जिन्हा जख्मां जो तिन्हा ने सहन कित्तेया, तिन्हेरी वजह कने असी ठीक होए।

1 पतरस 3:18

मैं ए इधेरे तांइ बोल्लेया करदा है किजोकी मसीह ने असा रे पाप्पां रे बदले जुल्म सैह्‍ण कित्तेया ते मारे गे। से इक्क ही वरी मरे ते तिय्यां दुबारा करणे री जरुरत नी है। से अप्पु धार्मिक थिये जिन्हा असा जो परमेश्वर रे नेड़े अणने तांइ असी पाप्पी लोक्कां तांइ अपणी जान देई दित्ती। लोक्कां ने तिन्हेरे सरीर जो मारी छड्डेया पर तिन्हेरी आत्‍मा हल्ले भी जिया करदी है।