फिलिप्पियों 2:1 - चम्बयाली नौआ नियम

¹ हालांकि तुसा मसीह यीशु रे मणू होणे रे वजह कने उत्साहित, तुसा जो मसीह रे प्यार कने तसल्ली मिल्ले री है, तुसा जो पवित्रात्मा कने सहभागिता मिल्ले री है, ते मसीह तुसा तांइ करुणामयी ते दयावान रे,

फिलिप्पियों 2:1 Iomraidhean Croise

लूका 2:25

तिन्हा दिनां बिच, यरुशलेम सहर अन्दर शमौन नां रा इक्क मणू रैहन्दा थिया, से परमेश्वर रे रस्ते पर चलणे वाला, भला अते नेक मणू थिया, से बड़ी उम्मीद कने मसीह रे आणे रा इंतजार करेया करदा थिया ताकि से आई करी इस्राएल रे मणूआं जो सांती दये, ते शमौन पवित्रात्मा रे गलाये चलदा थिया।

यूहन्ना 14:18

मैं तुसा जो अनाथ नी छड्डणा, मैं तुसा का आन्दा

यूहन्ना 14:27

“मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।”

यूहन्ना 17:13

अवे मैं तुसा रे का आया करदा है, पर ए गल्लां मैं दुनिया रे लोक्कां बिच रेह्ई करी बोल्लेया करदा है, ताकि से मणू मेरी खुसी कने पूरी तरिक्के कने भरी जाण।

प्रेरितां रे कम्म 2:46

से हर रोज इक्क मन होई करी मन्दिर बिच कठिदें थिये, ते घर-घर रोट्टी तोड़दे होए खुसी ते मन रे सिद्देपन कने भोजन करेया करदे थिये,

प्रेरितां रे कम्म 4:32

भरोसे करणे वालेयां री मडंली इक्क मन रे थिये, इत्ते तिकर कोई भी अपणी जायदाद जो अपणा नी बोलदा थिया, पर सारा किच्‍छ आपस रा थिया

रोमियों 5:5

ते इस आस कने असा जो निराशा नी हुंदी, किजोकी परमेश्वर ने असा जो पवित्रात्मा दित्ते रा है, जे असा रे मन जो परमेश्वर रे प्यार कने भरी दिंदा।

रोमियों 8:26

इस्सी तरिक्के कने पवित्रात्मा भी असा री आत्मिक कमजोरी बिच असा री मदद करदा, किजोकी असी अप्पु नी जाणदे कि परमेश्वर कै चाह्‍ंदे कि असा जो कुस गल्ल तांइ प्रार्थना करणा चाएदी, पर पवित्रात्मा अप्पु ही असा तांइ रुआंसे मन कने इदेइ बिनती करदे जिस जो लफ्ज़ां बिच बयान नी कित्तेया जाई सकदा।

1 कुरुन्थियों 12:13

तिय्यां ही असी सारे जणे चाए यहूदी या गैर यहूदी, चाए गुलाम हो या अजाद, असी सारेयां रा इक्क ही सरीर बिच इक्क बणी जाणे तांइ तिस ही आत्‍मा रे जरिये बपतिस्मा होए रा है ते असी सारेयां ने इक्क ही आत्‍मा पाए रा है।

1 कुरुन्थियों 15:31

ओ संगी विश्वासियों, मेरे जो तुसा पर गर्व है कि तुसा रा मसीह यीशु कने इक्क गहरा रिस्ता है, ते ए गल्ल भी सही है कि मैं हर रोज मसीह रा बसेख सुनाणे री वजह कने मौत रे खतरे बिच रैहन्दा।

1 कुरुन्थियों 3:16

तुसा ठीक तरिक्के कने जाणदे कि तुसा परमेश्वर रा मन्दिर हिन अते पवित्रात्मा तुसा रे बिच वास करदा।

2 कुरुन्थियों 13:14

असा रे प्रभु यीशु रा अनुग्रह, ते परमेश्वर रा प्यार ते पवित्रात्मा री संगती, तुसा सबणी कने बणी रेयो।

2 कुरुन्थियों 2:14

परमेश्वर रा शुकर हो, मसीह कने असा रा रिस्ता होणे री वजह कने से असा जो मसीह कने हमेसा लेई करी चलदे ते असा जो जीत दुआंदे। ते परमेश्वर अपणे मसीह जो जानणे री खुशबू जो इक्क महक सांई असा रे जरिये हर जगाह् फैलांदे।

गलातियों 4:6

अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्‍मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा।

गलातियों 5:22

पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है।

इफिसियों 4:4

असी इक्क ही सरीर रे हिस्से हिन, ते असा जो इक्क ही पवित्रात्मा भी मिल्ले रा है, से आस भी इक्क ही है जिस बिच तुसा जो परमेश्वर रे मणू बणने तांइ चुणेया गेया थिया।

फिलिप्पियों 1:8

इस अन्दर परमेश्वर मेरे गवाह हिन कि मैं मसीह यीशु सांई दाह करी के तुसा सबणी जणेया कने मिलणे री चाह करदा रेयां।

फिलिप्पियों 3:3

हकीकत बिच तां असी परमेश्वर रे मणू हिन, ते परमेश्वर रे पवित्रात्मा रे दसणे रे हिसाब कने अराधना करदे, ते मसीह यीशु पर घमंड करदे ते असी अपणे इन्सानी कम्मां पर निर्भर नी हुंदे।

कुलुस्सियों 2:2

ताकि तुसा जो ते तिन्हा लोक्कां जो होंसला मिल्ले, ते से प्यार कने अप्पु बिच कठ्ठे रैह्ण। मैं चाह्‍ंदा कि तिन्हा जो इस गल्ल रा होंसला रेयो किजोकी से परमेश्वर रे हर राज़ री योजनां जो समजदे, जे मसीह यीशु ही हिन।

कुलुस्सियों 3:12

किजोकी परमेश्वर तुसा जो प्यार करदे ते तिन्हा ने तुसा जो अपणे पवित्र मणू बणने तांइ चुणी लित्ते रा है, इधेरे तांइ तुसा बड़ी करुणा, निमतापन, भलाई, कने सहनशीलता ते दया रा स्वभाव धारण करी लेयो।

इब्रानियों 6:18

इधेरे तांइ परमेश्वर ने असा कने वादा कित्तेया, ते तिन्हा ने असा कने कसम खाई। ए दो गल्लां बदली नी सकदी, किजोकी ए नामुमकिन है कि परमेश्वर झूठ बोल्ले। इधेरे तांइ असी जे तिन्हा का शरण लैणे तांइ, तिन्हा का गेरे हिन, ते जे आस तिन्हा ने असा जो दित्ते री है, तिसजो पाणे तांइ बड़े प्रोत्साहित हिन।

1 पतरस 1:2

पिता परमेश्वर ने तुसा जो अपणे मणू बणाणे ते पवित्रात्मा रे जरिये पवित्र ठैहराणे तांइ बड़े पैल्ले का ही चुनणे रा फैसला करी लित्तेया थिया। तिन्हा ने ए इधेरे तांइ कित्तेया ताकि तुसा मसीह यीशु रे कहे मुताबिक चलो ताकि तुसा तिन्हेरे सुली पर खून बहाणे रे जरिये सुच्चे कित्ते जाण। तुसा जो परमेश्वर रे पास्से का अनुग्रह ते सांती मिलदी रे।

1 यूहन्ना 3:24

जे तिसेरे हुकमां जो मनदा, से परमेश्वर कने बणी रैहन्दा ते परमेश्वर तिस मणू बिच बणी रैहन्दा ते इस तरिक्के कने पवित्रात्मा रे जरिए जिस जो परमेश्वर ने असा जो दित्तेया है, असी ए जाणदे कि असा रा परमेश्वर कने रिस्ता बणे रैहन्दा।

1 यूहन्ना 4:12

परमेश्वर जो कदी कुनिए भी नी दिख्खेया अगर असी अप्पु-मिते प्यार रखण, तां परमेश्वर असा री जिन्दगी अन्दर बणी रैह्न्दा, ते तिसेरा प्यार असा अन्दर सिद्ध होई गे रा है।

1 यूहन्ना 4:16

ते असी जाणदे ते विश्वास करदे कि परमेश्वर असा कने बड़ा जादा प्यार करदे। परमेश्वर प्यार है, जे प्यार बिच बणी रैह्न्दा, से परमेश्वर बिच बणी रैहन्दा, ते परमेश्वर तिस अन्दर बणी रैह्न्दा।