फिलिप्पियों 1:10 - चम्बयाली नौआ नियम

¹⁰ ताकि तुसा जिन्दगी बिच अप्पु तांइ सही चीजां जो चुणी सको ताकि तुसा मसीह यीशु रे हटणे रे दिन तांइ निर्मैल ते बेकसूर रेयो।

फिलिप्पियों 1:10 Iomraidhean Croise

मत्ती 16:23

तां यीशु ने मुड़ी करी पतरस जो बोल्लेया, ओ शैतान, मेरे सामणे का दुर होई जा तू मेरे तांइ इक्क अड़चन है किजोकी तू परमेश्वर री गल्लां पर नी, पर मणूआं री गल्लां पर मन लगादां।

मत्ती 26:33

इस पर पतरस ने तिन्हा जो बोल्लेया, जे सारे तुसा रे बारे बिच धोखा खाण ते खाण, पर मैं कदी भी धोखा नी खाणा।

यूहन्ना 1:47

यीशु ने नतनएल जो अपणे पास्से आंदे दिख्खी करी उसेरे बारे बिच बोल्लेया: ए सच्ची इस्राएल रे ‍खानदान रा है ते भरोसेमंद है: इस आदमी बिच कोई ढोंग नी है।

यूहन्ना 3:20

कि जे कोई बुराई करदा से रौसनी कने दुश्मणी रखदा कने रौसनी रे नेड़े नी आंदा, इदेया न हो कि तिसेरे कम्मां पर दोष लगाया जाए

प्रेरितां रे कम्म 24:16

इस तांइ मैं अप्पु भी कोसीस करदा कि परमेश्वर रे, ते मणूआं रे पास्से मेरा मन हमेसा बेकसूर रेयो

रोमियों 12:2

इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो।

रोमियों 12:9

प्यार करणे बिच कदी कोई दिखावा ना हो, पर दिल कने प्यार करेया करो। बुराई कने नफरत रख्खो। भले कम्म करणे बिच लग्गी रेयो।

रोमियों 16:17

अवे ओ संगी विश्वासियों, मैं तुसा रे छंदे करी के बोलदा, कि तुसा तिन्हा लोक्कां का अलग होई जाओ, जे दूज्जेयां रे विश्वास जो कमजोर करदे, अते तिन्हा लोक्कां भी दुर रेयो जे असा री सिखाए री गल्लां री ना-फरमानी करी के कलीसिया बिच मुसीबतां ते फूट पांदा।

रोमियों 2:18

ते ए जाणदा हो कि परमेश्वर री तेरे तांइ कै इच्छा है, ते जाणदा हो कि कै सही है, किजोकी तिज्जो कानून री शिक्षा दित्ती गे री है, ते खरी-खरी गल्लां जो पसंद करदा हो,

रोमियों 7:16

जे अगर मैं से ही बुरे कम्म करदा जिस जो पसदं नी करदा, तां मैं मन्नी लिदां कि मूसा रा कानून खरा है।

रोमियों 7:22

मैं पूरे दिल कने परमेश्वर रे कानून कने तां बड़ा खुस रैहन्दा,

रोमियों 8:7

किजोकी पाप रे स्वभाव रे काबू बिच रैह्णा ता परमेश्वर कने दुश्मणी रखणा है, किजोकी पाप रा स्वभाव ना परमेश्वर रे कानून रे हेठ है, ते ना ही होई सकदा।

1 कुरुन्थियों 1:8

परमेश्वर ने तुसा जो आखरी समय तिकर मजबूत बनाणा, ते मसीह यीशु बिच तुसा रे विश्वास जो ताकतवर बनाणा ताकि तुसा मसीह यीशु रे हटी आणे वाले बेल्ले बिच बेकसूर ठेहरो।

1 कुरुन्थियों 10:32

जे किच्‍छ भी मैं करदा तिस बिच मैं सारेयां जो खुस करणे री कोसीस करदा, मैं सिर्फ अपणा फायदा नी सोचदा पर सारेयां रे फायदे तांइ सोचदा ताकि से मणू छुटकारा पाई सकण। तिय्यां ही तुसा इस तरिक्के कने जिन्दगी जियो कि यहूदी, गैर यहूदी ते परमेश्वर री कलीसियां रे लोक्कां तांइ मुसीबत री वजह बणो।

1 कुरुन्थियों 8:13

इस वजह कने अगर मूर्तां रे सामणे चढ़ाए री रोट्टी खाणा मेरे संगी विश्वासी रे मसीह यीशु बिच विश्वास करणे का हटणे री वजह बणदा तां मैं कदी कुसकी भी तरिक्के कने से रोट्टी नी खाणी, इय्यां ना हो कि मैं अपणे संगी विश्वासियां तांइ विश्वास का भटकणे री वजह बणी जां।

2 कुरुन्थियों 1:12

किजोकी असी अपणे विवेक री इस गवाई पर असी पूरी बुड़ख कने बोलदे कि असी अपणे हर काम्म-काज बिच परमेश्वर री दित्ते री पवित्रता ते सच्चाई कने जिन्दगी जिन्दे, खासतौर पर जां असी तुसा कने थिये। असी अपणी इन्सानी समझ पर नी पर परमेश्वर रे अनुग्रह पर निर्भर रैहन्दे।

2 कुरुन्थियों 2:17

असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।

2 कुरुन्थियों 6:3

परमेश्वर रे सहकर्मी होणे रे नात्ते असी कुसकी गल्ल बिच ठोक्कर खाणे रा कोई भी मौक्का नी दिदें, ताकि असा री सेवा पर कोई इल्जाम ना आये।

2 कुरुन्थियों 8:8

मैं तुसा जो हुकम नी है देया करदा, पर मैं तुसा रे प्यार री सच्चाई जो दूज्जेयां री गहरी इच्छा कने तुलना करी के परखणा चाह्‍ंदा।

गलातियों 5:11

पर ओ संगी विश्वासियों, जे अगर मैं मसीह का छुटकारा मिलणे रे बसेख कने-कने खतना कराणे रा प्रचार करदा रैहन्दा ता ना ही कोई मेरे बुरा मनदा ते ना ही मेरे पर कोई जुल्म करदा।

इफिसियों 4:15

प्यार कने सच बोलणे रे जरिये असा जो हर इक्क गल्ल बिच मसीह यीशु सांई बणने तांइ पकदे जाणा चाएदा, जे असा रे प्रधान हिन।

इफिसियों 5:10

ते ए परखो की परमेश्वर जो कै पसंद आदां।

इफिसियों 5:27

तिन्हा ने इधेरे तांइ भी कुर्बानी दित्ती ताकि से अपणे सारे लोक्कां जो सिद्व बणाए ते तिन्हा सारेयां जो अपणी मौजुदगी बिच लेई आए जिन्हा बिच कोई भी गलती या पाप नी होणा, बल्कि तिसने साफ ते पवित्र होणा।

इफिसियों 6:24

जे असा रे प्रभु यीशु मसीह कने सच्चा प्यार करदे, तिन्हा सारेयां पर परमेश्वर रा अनुग्रह हुंदा रे।

फिलिप्पियों 1:16

से मणू इधेरे तांइ मसीह रा सुब बसेख सुणांदे किजोकी से मेरे जो प्यार करदे ते से जाणदे कि मैं मसीह रे बसेख पर उठणे वाले सवाल्लां रा जवाब दैणे तांइ चुणेया गे रा है।

फिलिप्पियों 1:6

मेरे जो इस गल्ल रा भरोस्सा है कि जिस परमेश्वर ने तुसा अन्दर भला कम्म सुरु कित्ते रा है ते तिस्सी परमेश्वर ने ही तिस कम्म जो मसीह यीशु रे हटणे रे समय तिकर पूरा करणा।

फिलिप्पियों 2:16

ताकि जिस दिन मसीह यीशु ने हटी आणा तिस दिन मेरे जो ए घमंड होणा कि मेरी कोशीशां ते मैहनत फायदेमंद होई।

1 थिस्सलुनीकियों 3:13

अते इस तरिक्के कने से तुसा सारेयां रे मन जो मजबूत करण, अते पिता परमेश्वर रे सामणे असा रे प्रभु यीशु रे हटणे पर अपणे सब लोक्कां कने पवित्र अते बेकसूर ठैहराई देंन।

1 थिस्सलुनीकियों 5:21

हर बसेख जो परखो, ते जे बसेख परमेश्वर रे पास्से का हिन तिन्हा जो अपणाई लेयो।

1 थिस्सलुनीकियों 5:23

ते परमेश्वर जे तुसा जो सांती दिंदे अप्पु ही तुसा जो पूरे तरिक्के कने पवित्र करण ते असा रे प्रभु यीशु मसीह रे हटी आणे तिकर तुसा री पूरी आत्‍मा ते पूरे प्राण ते पूरा सरीर कने बेकसूर ते सुरक्षित रे।

1 यूहन्ना 4:1

ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्‍मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन।

प्रकाशित वाक्य 2:2

मैं जाणदा कि तू कै करदा। तू बड़ी जी-हजुरी कने मेरा कम्म करदा, तू मेरे पर अपणे विश्वास री वजह कने जुल्मां जो भी बड़े सबर कने सहन करदा। मैं जाणदा कि तू दुष्ट लोक्कां री झूठ्ठी शिक्षा जो बर्दाश नी करदा। तू तिन्हा लोक्कां जो परखे रा है जे ए बोलदे कि से प्रेरित हिन पर हकीकत बिच से नी हिन, ते तू जाणदा कि से झूठ्ठे हिन।