2 तीमुथियुस 4:5 - चम्बयाली नौआ नियम

⁵ पर तू हर गल्ल बिच अप्पु पर काबू रख्खे, बड़े सबर कने सारी मुसीबतां जो सहन करी लेय। सुब बसेख रा प्रचार करणे तांइ तू कड़ी मैहनत करे, ते परमेश्वर रा सेवादार होणे रे नात्ते तू से सारे कम्म करे जिन्हा तांइ परमेश्वर ने तेरे जो चुणे रा है।

2 तीमुथियुस 4:5 Iomraidhean Croise

मत्ती 25:16

तां, जिस जो पांज्ज तोड़े मिल्ले थिये, उसने झट ही उन्हा जो कम्म पर लाई दित्तेया अते पंज तोड़े होर कमाई लै।

मरकुस 13:34

“मेरे से आणे रा दिन तिस आदमी रे उदारण जदेया होणा जे इक्क लम्बे सफर पर गेया। ते जाणे का पैल्ले तिसने अपणे हर नौक्कर जो तिन्हेरे कम्म समझाई दित्ते, ते तिसने अपणे चौकीदार जो तिसेरे हटणे री भाल बिच रैह्णे जो बोल्लेया।

मरकुस 13:37

अते मैं जे तुसा जो बोल्दा, से ही सबणी जो बोल्दा : चुकन्ने रेयो!”

लूका 12:37

से नौक्कर धन्न हिन जे अपणे मालक रे हटणे री भाल अन्दर जागदे हुन्दे ते दुआर खोल्णे तांइ तैयार हुन्दे मैं तुसा जो सच बोल्लेया करदा है, कि तिस मालक ने अप्पु नौकरां वाले कपड़े पाई करी अपणे नौक्करां जो अप्पु रोट्टी खुआणी ते तिन्हेरी सेवा भी करणी

प्रेरितां रे कम्म 21:8

दूए रोज्जे असी तित्ते चली करी कैसरिया अन्दर आये, ते फिलिप्पुस सुब बसेख सुनाणे वाले रे घरे जे सत्त बिच का इक्क थिया जाई करी तिसका रे

रोमियों 15:19

जे ताकत पवित्रात्मा ने मेरे जो दित्ते री है, तिस कने मैं चिन्ह-चमत्कार दिखांदा। इधेरे तांइ मैं यरुशलेम का लेई करी इल्लिरिकुम प्रदेश तिकर जित्ते भी गेया, तित्ते लोक्कां जो मसीह यीशु रा सुब बसेख सुणाया।

इफिसियों 4:11

मसीह यीशु ने ही ए बखरे-बखरे दान दित्ते, तिन्हा ने किच्‍छ जणेया जो प्रेरित ठैहराया, ते किच्‍छ जणेया जो भविष्यद्वक्ता ठैहराया, ते थोड़े जणेया जो सुब बसेख सुनाणे वाले ठैहराया, ते किच्‍छ जणेया जो पादरी ते उपदेस दैणे वाले ठैहराया रा है।

इफिसियों 4:12

तिन्हा ने ए दान इधेरे तांइ दित्ते ताकि से परमेश्वर रे लोक्कां जो तिन्हेरे तांइ कम्म करणे तांइ तैयार करी सकण, ते से मसीह रे सरीर रे रुप बिच पूरी तरह कने पकी जाण ते ताकतवर बणी सकण।

कुलुस्सियों 1:25

इस कलीसिया तांइ मैं तुसा वास्ते परमेश्वर रे जरिये मेरे जो सौप्पि गे री सेवा तांइ इक्क दास रे रुप बिच चुणेया गे रा है, ताकि मैं परमेश्वर रे बसेख जो पूरे तरिक्के कने प्रचार करी सकां।

कुलुस्सियों 4:17

अरखिप्पुस जो बोल्लेयो, जे सेवा करणे तांइ प्रभु ने तेरे जो चुणे रा है, ध्यान रे कि तू तिस सेवा जो पूरा करे।

1 थिस्सलुनीकियों 5:6

इधेरे तांइ असी दूज्जेयां सांई प्रभु रे आणे रे समय तांइ सोन्दे ते बगैर तयारी रे ना रैह्ण, पर जागदे होए ते चुकन्ने रैह्ण।

1 तीमुथियुस 4:12

किजोकी तुसा जुआन हिन इधेरे तांइ इस हिसाब कने बर्ताव करो ताकि कोई तुसा रा अनादर ना करी सके पर तुसा जो गल्ल-बात करणे कने, तुसा रे बर्ताव कने, दूज्जेयां तांइ अपणे प्यार री वजह कने, मसीह बिच तुसा रे विश्वास री वजह कने ते तुसा रे बेदाग जिन्दगी री वजह कने विश्वासियां तांइ इक्क खरा उदारण बणना चाएदा ताकि से भी तिय्यां ही करण।

1 तीमुथियुस 4:15

चुकन्ने होई करी इन्हा गल्लां जो अपणी जिन्दगी बिच लागू करदे रेयो ते पक्के तौर पर इन्हा गल्लां जो निभाओ ते इसेरे हिसाब कने ही जिन्दगी जियो। इस तरिक्के कने सारे विश्वासियां ने दिखणा कि तुसा मसीह बिच विश्वास करणे अंदर जादा का जादा बदेया करदे हिन।

2 तीमुथियुस 1:8

इस वजह कने दूज्जे लोक्कां जो असा रे प्रभु मसीह यीशु रे बारे बिच दसणे का शरमाओ मत, ते तुसा जो इधेरे तांइ भी शर्मिंदा होणे री जरुरत नी है किजोकी मैं तिन्हेरी सेवा करणे री वजह कने कैद बिच है। इसेरे बजाए तुसा जो से ताकत इस्तेमाल करणी चाएदी जे तुसा जो परमेश्वर दिंदे ते सुब बसेख तांइ मेरे कने मेरी तकलीफ बिच हिस्सेदार बणी जाओ।

2 तीमुथियुस 2:10

इधेरे तांइ मैं परमेश्वर रे चुणे रे लोक्कां री भलाई तिकर हर तरिक्के रे दुख-तकलीफ जो सहन करी लिंदा, ताकि से मणू भी मसीह यीशु बिच विश्वास करण ते छुटकारा पाण, ते तिस महिमा जो हासिल करण जे हमेसा-हमेसा तांइ रैह्णी।

2 तीमुथियुस 2:3

काफी हद तिकर जिय्यां इक्क सिपाई लड़ाई रे मैदान बिच मुस्किल हालात रा सामणा करदा, तिय्यां ही तुसा जो भी मुस्किल हालात रा सामणा करणा चाएदा जिय्यां असी मसीह तांइ मुसीबतां सैह्‍ण करेया करदे हिन।

2 तीमुथियुस 4:17

पर प्रभु ही मेरे मददगार रे ते तिन्हा ने मेरे जो ताकत दित्ती जिसेरी वजह कने मैं साफ तौर पर मसीह रे बसेख रे बारे बिच प्रचार करी सकेया ते तित्ते मौजूद सारे गैर यहूदी लोक्कां ने मसीह रा बसेख सूणन ते तिन्हा ने मेरे जो मौत रे खतरे का इय्यां बचाया जिय्यां कि मैं भूख्खे शेर रे मुँह का बचाया गे रा हो।

इब्रानियों 13:17

अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

1 पतरस 1:13

इधेरे तांइ अपणे मन जो इय्यां तैयार करी लेयो कि जिय्यां मणू अपणी कमर बन्नी करी कम्म करणे तांइ तैयार हुंदे। इसेरा मतलब ए है कि तुसा जो अपणी सोच पर काबू रखणा चाएदा। बड़े हौसंले कने तिस छुटकारे री पूरी आस रख्खी करी अपणी बोल-चाल जो सही रख्खो जे परमेश्वर ने तुसा जो मसीह यीशु रे स्वर्ग हटणे रे समय पर बड़े अनुग्रह कने दैणा।

प्रकाशित वाक्य 3:2

मैं जाणदा कि इक्क विश्वासी होणे रे तौर पर तुसा री जिन्दगी रा स्तर तिस जगाह् पर नी है जे परमेश्वर ने ठैहराए रा है, इधेरे तांइ चुकन्ने होई जाओ ते अपणी आत्मिक निंद्दर का उठी हो, ते अपणी मसीही खुबियां जो तिन्हेरे मुकणे का पैल्ले फिरी नौए जदेया करी लेयो जे तुसा बिच हल्ले भी हिन। मैं जाणदा कि तेरी घटी बड़ी जादा है किजोकी परमेश्वर तेरे कम्मां का खुस नी हिन।