2 तीमुथियुस 1:7 - चम्बयाली नौआ नियम

⁷ किजोकी परमेश्वर ने असा जो डरपोक नी बणाए रा है। बल्कि तिन्हेरा आत्‍मा असा जो आत्मिक ताकत दिंदा, ते असा जो दूए लोक्कां कने प्यार करणे बिच मदद करदा ते असा जो अप्पु पर काबू रखणे री ताकत दिंदा।

2 तीमुथियुस 1:7 Iomraidhean Croise

लूका 10:19

दिख्खो, मैं तां तुसा जो कीड़े ते बिच्छुओं जो रौदंणे रा, ते असा रे दुश्मण री सारी ताकत पर जितणे रा अधिकार दित्ते रा है ते तुसा जो कुसकी भी चीज रा कोई नुक्सान नी होणा।

लूका 15:17

फिरी तिसजो अपणी गलती रा एहसास होया ते सोच्णा लगेया, कि मेरे प्यो का कम्म करणे वाले किन्ने ही मजदूर रज्जी करी रोट्टी खान्दे थिये, अते खाणे रे बाद रोट्टी बची भी जान्दी थी, ते मैं इत्ते भूखा मरेया करदा है।

लूका 24:49

ते दिख्खो, जिय्यां मेरे पिता ने वादा कित्ते रा है, तिसेरे हिसाब कने मैं तुसा पर पवित्रात्मा जो भेजणा, ते स्वर्ग का ताकत पाणे तिकर तुसा इसी कस्बे बिच ठहरे रेयो।

लूका 8:35

फिरी तित्ते रे मणू जे किच्‍छ होया थिया से दिखणे जो आये से यीशु कने मिल्ले अते तिन्हा ने दुष्टात्मा वाले मणू जो भला-चंगा कपड़े पाई करी यीशु रे पैरां का बैठ्ठे रा दिख्खेया, ए दिख्खी करी से सब डरी गे।

यूहन्ना 14:27

“मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।”

प्रेरितां रे कम्म 1:8

पर जां पवित्रात्मा तुसा पर आणा तां तुसा ताकत पाणी ते तुसा यरुशलेम सहर ते सारी यहूदियां प्रदेश ते सामरिया प्रदेश बिच, ते दुनिया रे हर कुणे तिकर तुसा मेरे गवाह बणना।”

प्रेरितां रे कम्म 10:38

परमेश्वर ने कुस तरिक्के कने नासरत कस्बे रे यीशु, जो पवित्रात्मा ते ताकत कने अभिषेक कित्तेया: से भलाई रे कम्म करदे, ते सारेयां जो जे शैतान रे सताए रे थिये, जाई-जाई करी ठीक करदे रे, किजोकी परमेश्वर तिन्हा कने थिये।

प्रेरितां रे कम्म 20:24

पर मैं अपणी जान जो किच्‍छ भी नी समजदा कि तिसजो प्यारा समजां, पर तां ए कि, मैं अपणी दौड़ जो ते तिस सेवा जो पूरा करां, जे मैं परमेश्वर रे अनुग्रह री सुब बसेख पर गवाई दैणे तांइ प्रभु यीशु का पाए री है।

प्रेरितां रे कम्म 21:13

पर पौलुस ने जवाब दित्तेया, तुसा करदे कै हिन कि रोई-रोई करी मेरा दिल तोड़ेया करदे हिन? मैं तां प्रभु यीशु तांइ यरुशलेम अन्दर ना सिर्फ कैद होणे तांइ पर तां मरणे तांइ भी तैयार है

प्रेरितां रे कम्म 26:11

हर इक्क सभास्थल अन्दर मैं तिन्हा जो सजा दुआई-दुआई करी यीशु री बेजती करान्दा थिया ते होर तां होर, लेर री वजह कने इदेया पागल होई गेया कि दूए सहरां अन्दर भी जाई करी तिन्हा जो तंग करदा थिया।

प्रेरितां रे कम्म 26:25

पर पौलुस ने बोल्लेया, ओ महामहिम फेस्तुस, मैं पागल नी है, पर मैं सच्ची ते बुद्वी री गल्लां बोलदा।

प्रेरितां रे कम्म 6:8

स्तिफनुस अनुग्रह ते ताकत कने भरी करी लोक्कां बिच बड्डे अनौखे कम्म ते चिन्ह-चमत्कार दिखाया करदा थिया

प्रेरितां रे कम्म 9:22

पर शाऊल होर भी जोर-शोर कने प्रचार करदा गेया ते इस गल्ल जो साबित करी के कि मसीह यीशु इत्ते ही है, दमिश्क बिच रैह्णे वाले यहूदियां रा मुँह बांद्द करदा थिया,

रोमियों 5:5

ते इस आस कने असा जो निराशा नी हुंदी, किजोकी परमेश्वर ने असा जो पवित्रात्मा दित्ते रा है, जे असा रे मन जो परमेश्वर रे प्यार कने भरी दिंदा।

रोमियों 8:15

किजोकी तुसा जो गुलामी री आत्‍मा नी मिल्ले री है कि तुसा जो डर बिच जिन्दगी बिताओ, पर जां परमेश्वर ने तुसा जो अपणी औलाद्दां बणाई करी गोद लेई लित्ता, तां तुसा जो पवित्रात्मा मिल्लेया। अवे असी परमेश्वर जो पिता बोलदे।

1 कुरुन्थियों 2:4

अते मेरे शिक्षा ते मेरे प्रचार बिच इन्सानी समझ वाले बड्डे बड्डे छैल शब्द नी थिये पर पवित्रात्मा ने तुसा जो इन्ने ताकतवर तरिक्के ए दिखाया कि जे बसेख मैं तुसा जो सुणाया थिया से सच थिया,

गलातियों 5:22

पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है।

कुलुस्सियों 1:8

तिनिये ही असा जो दुज्जेया तांइ तुसा रे प्यार रे बारे बिच दस्सेया जे पवित्रात्मा तुसा लोक्कां जो दित्तेया।

इब्रानियों 2:15

जिसेरी वजह कने यीशु ने तिन्हा लोक्कां जो छुटकारा दित्तेया, जिन्हा लोक्कां ने मौत रे डर बिच अपणी जिन्दगी गुलाम्मां सांई कट्टी।

1 पतरस 1:22

सच्चाई जो मन्नी करी चलणे री वजह कने अवे तुसा सुच्चे कित्ते गे, अवे तुसा जो तन-मन लाई करी संगी विश्वासियां कने आपसी प्यार रखणा चाएदा। बड़ी चाह्‍त ते पूरे दिल कने इक्क-दूए कने प्यार रख्खो।

1 यूहन्ना 4:18

प्यार अन्दर डर नी हुन्दा, पर सिद्ध प्यार डर जो दुर करी दिन्दा, किजोकी डरा कने तकलीफ हुंदी, ते जे डरदा, से प्यार अन्दर सिद्ध नी होया।