1 तीमुथियुस 1:3 - चम्बयाली नौआ नियम

^3-4 तीमुथियुस, जिय्यां कि तू जाणदा इफिसुस सहर बिच किच्‍छ मणू हिन जे गलत शिक्षां दिंदे। से लगातार मनघड़ंत कहाणियां ते पूरखां रे लंबी सुची रे बारे बिच सिखांदे रैह्‍न्दे। जां मैं इफिसुस सहर का मकिदुनिया रे इलाक्के बिच जाणे तांइ तैयार थिया तां मैं तुसा जो इफिसुस सहर बिच रैह्णे तांइ बोल्लेया थिया ते फिरी तित्ते ही रुकणे ते बोलदा कि तिन्हा लोक्कां जो समझाओ कि से लोक्कां जो झूठ्ठी गल्लां ना सिखाण ते विश्वासी मणू भी इदेइ झूठ्ठी गल्लां बिच मन ना लाण किजोकी जां से इदेइ झूठ्ठी गल्लां सिखांदे तां विश्वासी तिस बारे बिच अप्पु-मिते बैह्स करदे ते इदेइ बैह्सबाजी परमेश्वर रा कम्म करणे बिच मदद नी करदी, परमेश्वर री सेवा रा कम्म सिर्फ तां ही होई सकदे जां कोई मणू परमेश्वर बिच पूरा विश्वास रख्खे।

1 तीमुथियुस 1:3 Iomraidhean Croise

प्रेरितां रे कम्म 18:19

फिरी से त्रैन्नी जणे इफिसुस सहर बिच पूज्जे ते पौलुस ने प्रिस्किल्ला ते अक्विला जो तित्ते ही छड्डी दित्तेया ते अप्पु सभास्थल बिच जाई करी यहूदियां कने बैह्स करणे लग्गेया।

प्रेरितां रे कम्म 18:21

पर जांदे बेल्ले तिसने बोल्लेया, जे परमेश्वर री मर्जी हुन्गी तां मैं तुसा का फिरी आंगा फिर तिसने इफिसुस सहर कने किस्ती बिच सफर कित्तेया

रोमियों 15:26

किजोकी मकिदुनिया ते अखाया प्रदेश रे विश्वासियां जो ए सही लग्गेया कि यरुशलेम सहर बिच रैह्णे वाले पवित्र मणूआं बिच जे गरीब विश्वासी हिन, तिन्हा जो दैणे तांइ किच्‍छ दान इक्कठा कित्ता जाए।

रोमियों 16:17

अवे ओ संगी विश्वासियों, मैं तुसा रे छंदे करी के बोलदा, कि तुसा तिन्हा लोक्कां का अलग होई जाओ, जे दूज्जेयां रे विश्वास जो कमजोर करदे, अते तिन्हा लोक्कां भी दुर रेयो जे असा री सिखाए री गल्लां री ना-फरमानी करी के कलीसिया बिच मुसीबतां ते फूट पांदा।

2 कुरुन्थियों 11:4

अगर कोई तुसा का आई करी यीशु रे बारे बिच गलत ही प्रचार करो, जे असा रे प्रचार का बखरा हो, या जे पवित्रात्मा तुसा जो पैल्ले का मिल्ले रा है, तिसेरे अलावा होर कोई आत्‍मा तुसा जो मिलदा, या जां तुसा कुसकी होर बसेख जो अपणाई लिंदे जे असा रे सुणाए रे बसेख का बखरा है, तां तुसा तिसजो अपनाणे बिच गलत हिन।

इफिसियों 4:14

ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा।

फिलिप्पियों 2:24

ते मेरे जो प्रभु जी अन्दर विश्वास है कि मैं अप्पु भी तौले ही तुसा का आणा।

1 तीमुथियुस 4:11

विश्वासियां जो ए गल्लां सिखांदा रे ते तिन्हा पर इन्हा गल्लां जो मनणे रा जोर पांदा रे।

1 तीमुथियुस 4:6

जे अगर तू संगी विश्वासियां जो इन्हा गल्लां री शिक्षां दिंदा रैह्‍ंगा, तां तैं मसीह यीशु रा खरा दास ठैहराणा ते तैं अपणे मन जो परमेश्वर रे वचन कने मजबूत करणा जिस जो असी बदिया का बदिया शिक्षा कने मनदे भी।

1 तीमुथियुस 5:7

इन्हा सारी गल्लां रे बावजूद भी कलीसिया रे मणूआं जो ए शिक्षां देया कर ताकि कोई तिन्हा विधवा जनानियां पर इल्जाम ना लाए।

1 तीमुथियुस 6:10

किजोकी पैसे रा लालच हर तरिक्के री बुराई री जड़ है, किच्‍छ लोक्कां बिच पैसे री चाह्‍त इन्नी जादा है कि तिन्हा ने मसीह यीशु री शिक्षा जो मनणा ही छड्डी दित्तेया, ते से मणू इन्ना जादा तड़पेया करदे हिन जिय्यां कि कुसकी मणू ने अप्पु जो कुसकी हथियार कने छलनी करी दित्तेया हो।

1 तीमुथियुस 6:17

इस दुनिया रे अमीर लोक्कां जो हुकम दे कि से घमंडी ना होण ते अपणे तिस पैसे पर आस ना रख्खे जे इक्क दिन मुकी जाणा, पर परमेश्वर उम्मीद रख्खे, जे असा जो बड़ी दयालुता कने से सारी चीजां दिंदे जे असा का है ताकि असी तिन्हेरा लुफ्त लेई सके।

1 तीमुथियुस 6:3

जे अगर कोई मणू गलत शिक्षा सिखांदा ते मसीह यीशु री दित्ते री सही शिक्षा जो नी मनदा,

2 तीमुथियुस 1:18

प्रभु अपणे दुबारा हटणे रे दिन पर उनेसिफुस पर दया करे। तुसा अप्पु ही जाणदे कि जां मैं इफिसुस सहर बिच थिया तां तिनिये मेरी किन्नी जादा मदद कित्ती थी।

2 यूहन्ना 1:7

मैं ए इधेरे तांइ बोलदा किजोकी लोक्कां जो झूठ्ठी शिक्षा देई करी भटकाणे वाले मणू दुनिया बिच जगाह्-जगह फैल्ली गेरे हिन। से बोलदे कि मसीह यीशु इक्क मणू रे रुप बिच दुनिया बिच नी आए थिये। जे अगर कोई मणू इदेइ गल्लां करदा तां से मणू मसीह विरोधी है जे लोक्कां जो भटकांदा।

प्रकाशित वाक्य 2:14

पर मेरे जो तेरे खिलाफ किच्‍छ गल्लां बोलणी हिन, किजोकी तुसा तिन्हा लोक्कां रा विरोध नी करदे जे झूठ्ठी शिक्षा सुणांदे जिय्यां कि भविष्यद्वक्ता बिलाम ने भी बड़े पैल्ले कित्तेया थिया। बिलाम ने बलाक राज्जा जो सिखाया कि किय्यां इस्राएल रे लोक्कां का पाप कराया जाए। तिनिये लोक्कां का अनैतिक जिन्दगी जीणे ते मूर्तां जो भेंट चढ़ाए री चीजां खाणे तांइ सिखाया।

प्रकाशित वाक्य 2:20

मेरे जो तेरे खिलाफ ए बोलणा है कि पैल्ले जमान्ने राणी ईज़ेबेल जदेई इक्क जनानी तुसा बिच-मझाट्टे है। से अप्पु जो भविष्यद्वक्तिणी बोलदी पर मेरे विश्वासियां जो झूठ्ठी शिक्षां सिखांदी। से लोक्कां जो ए खोठ्ठी गल्लां सिखाई करी भटकांदी कि हमेसा तिकर जीणे तांइ मूर्तां जो भेंट चढ़ाए री चीजां खाओ।