1 तीमुथियुस 1:16 - चम्बयाली नौआ नियम

¹⁶ पर मेरे पर दया कित्ती गई। मेरे जदेय सबका बड्डे पाप्पी जो माफ करणे रे जरिये मसीह यीशु ए दिखाणा चाह्‍ंदे थिये कि तिन्हा बिच किन्ना जादा सबर है। ए तिन्हा लोक्कां तांइ इक्क उदारण बणी जाणा जिन्हा ने बाद बिच मसीह यीशु बिच विश्वास करी के हमेसा री जिन्दगी हासिल करणी।

1 तीमुथियुस 1:16 Iomraidhean Croise

लूका 15:10

मैं तुसा जो बोलदा, कि इय्यां ही जां कोई मणू पाप्पां जो छड्डी करी परमेश्वर रे रस्ते पर चलणा लग्गी पैन्दा, तां तिसेरे तांइ स्वर्गदूतां रे सामणे उतणी ही खुसियां मनाई जान्दियां।

लूका 23:43

यीशु ने तिसजो बोल्लेया, मैं तिज्जो सच बोल्दा, अज्ज ही तू मेरे कने स्वर्ग-लोक बिच होणा।

लूका 7:47

इधेरे तांइ मैं तिज्जो बोल्दा, कि इसेरे पाप जे कि मते थिये, से सब माफ होई गे, किजोकी इन्ने जादा प्यार रख्खेया पर जिसेरे घट्ट पाप माफ होए होण, से प्यार भी घाट्ट ही करदा

यूहन्ना 20:31

अते जे गल्लां लिख्खी हिन, से इधेरे तांइ हिन कि तुसा विश्वास करो कि यीशु ही परमेश्वर रे पुत्तर, मसीह हिन अते इधेरे तांइ विश्वास करणे रे जरिए तुसा जो उसेरे नां बिच हमेसा री जिन्दगी मिल्लो।

यूहन्ना 3:36

जे परमेश्वर रे पुत्तर पर विश्वास करदा, हमेसा री जिन्दगी तिसेरी है, पर जे परमेश्वर रे पुत्तर री नी मनदा, तिनिए हमेसा री जिन्दगी नी दिखणी, पर परमेश्वर ने तिसजो सजा दैणी।

यूहन्ना 5:24

मैं तुसा रे कने सच-सच बोलदा, जे मेरा वचन सुणी करी मेरे भेजणे वाले पर विश्वास करदा हमेसा री जिन्दगी तिसका है, कने तिस पर सजा रा हुकम नी हुन्दा पर से मौत जो टप्पी करी हमेसा री जिन्दगी बिच जाई चुके रा है।

यूहन्ना 6:37

जिस कुसकी जो मेरा “पिता” मेरे जो दिंदा, से मेरे का आंगा, ते जे कोई मेरे का आदां, तिसजो मैं कदी भी नी नक्कारणा।

यूहन्ना 6:40

किजोकी मेरे “पिता” री इच्छा ए है कि जे कोई पुत्तर जो दिख्खे, कने तिस पर विश्वास रखे, से हमेसा री जिन्दगी पाये कने मैं तिसजो आखरी दिन फिरी जिन्दा करणा।

यूहन्ना 6:54

जे कोई मेरा सरीर खान्दा, कने मेरा खून पीन्दा, हमेसा री जिन्दगी तिसेरी है, कने मैं अन्त रे दिना फिरी तिसजो जिन्दा करणा।

प्रेरितां रे कम्म 13:39

ते जिन्हा गल्लां कने तुसा मूसा रे कानून रे जरिए धार्मिक नी ठैहरी सकदे थिये, तिन्हा सबणी हर इक्क गल्ल कने इक्क विश्वास करणे वाला यीशु रे जरिए धार्मिक ठहरदा।

रोमियों 15:4

जिन्नी गल्लां पैल्ले पवित्रशास्त्र बिच लिख्खी गे री हिन, से असा जो शिक्षा दैणे तांइ ही लिख्खी गे री हिन, कि असी सबर ते पवित्रशास्त्र का मिलणे वाले प्रोत्साहन कने ए आस बणाई रखण, कि परमेश्वर ने वादा कित्ते रा है तिसजो तिन्हा ने पूरा करणा।

रोमियों 6:23

किजोकी पाप री मजदूरी ता मौत है, पर परमेश्वर री दान कने असा जो प्रभु यीशु मसीह रे जरिये हमेसा री जिन्दगी मिलदी।

1 कुरुन्थियों 7:25

कुंआरी कुड़ियां तांइ प्रभु का कोई भी हुकम मेरे जो नी मिल्लेया, पर परमेश्वर ने अपणी दया कने मेरे जो जे ज्ञान दित्ते रा है से भरोस्से रे लायक है ते मैं तुसा जो सलाह दिंदा,

2 कुरुन्थियों 4:1

इधेरे तांइ जां असा रे पर इदेयी दया होई कि असा जो परमेश्वर रा बसेख सुनाणे री सेवा मिल्ली तां असी हिम्मत नी हारदे।

इफिसियों 1:12

परमेश्वर ने ए इधेरे तांइ कित्तेया ताकि असी यहूदी मणू जे मसीह बिच आस रखणे वाले पैल्ले मणू हिन तिन्हेरी महिमा ते बड़ाई करी सकण।

इफिसियों 1:6

परमेश्वर ने इय्यां इस तांइ कित्तेया ताकि तिन्हेरे महिमामय अनुग्रह तांइ तिन्हेरी बड़ाई करण, जिस जो तिन्हा ने असा लोक्कां जो मुफ्त बिच इधेरे तांइ दित्तेया किजोकी असा रा तिन्हेरे प्यारे पुत्तर कने रिस्ता है।

इफिसियों 2:7

ताकि परमेश्वर ए इधेरे तांइ कित्ता ताकि से आणे वाले समय बिच ए दिखाई सकण कि से किन्ने जादा अनुग्रहकारी हिन। परमेश्वर री ए दया मसीह यीशु कने रिश्ते बिच जुड़े रे असी लोक्कां जो दिसदी।

2 थिस्सलुनीकियों 1:10

ए सारी चीजां तिस बेल्ले होणी जां मसीह यीशु ने तिन्हा लोक्कां का महिमा ते आदरमान पाणे तांइ हटी आणा जे तिन्हा बिच विश्वास करदे ते जे तिन्हेरे अपणे मणू हिन। तुसा भी तिन्हा लोक्कां बिच होणा किजोकी तुसा तिस बसेख पर विश्वास कित्तेया जे असा ने तुसा जो दस्सेया थिया।

1 तीमुथियुस 1:13

मसीह बिच विश्वास करणे पैल्ले तां मैं तिन्हेरी बुराई करदा थिया, विश्वासी लोक्कां पर जुल्म करी के बड़ी बेरहमी कने तिन्हेरा नुक्सान करदा थिया पर फिरी भी परमेश्वर ने मेरे पर दया कित्ती किजोकी मेरे जो नी पता थिया कि मैं जे करेया करदा है से गलत है किजोकी तिस बेल्ले तक मैं मसीह यीशु बिच विश्वास नी कित्तेया थिया।

इब्रानियों 7:25

इधेरे तांइ जे मणू मसीह यीशु रे जरिए परमेश्वर का आंदे, से तिन्हा लोक्कां रा पूरा छुटकारा दिंदे, किजोकी मसीह यीशु तिन्हा लोक्कां तांइ बिचौल्ले रे तौर पर हमेसा प्रार्थना करदे रैहन्दे।

1 पतरस 3:20

ए तिन्हा लोक्कां री आत्मां हिन जिन्हा ने लम्बे समय पैल्ले परमेश्वर रे हुकम री ना-फरमानी कित्ती थी, जां नूह अपणा जहाज बणाया करदा थिया, ते परमेश्वर इस गल्ल रा इंतजार करेया करदे थिये कि ए मणू अपणे पाप्पां का तौबा करगे कि नी। पर सिर्फ आठ्ठ मणू ही तिस भयानक बाढ़ बिच डूबणे का बचाए गे।

2 पतरस 3:15

असा रे प्रभु रे सबर जो अपणे तांइ इक्क समझो, से तुसा जो तिन्हेरे हिसाब-किताब लैणे का बचणे रा मौक्का देया करदे हिन। ए ही गल्ल असा रा संगी विश्वासी पौलुस भी तुसा जो अपणी तिस समझ रे हिसाब कने चीठ्ठी बिच लिख्खी करी समजाया करदा है जे परमेश्वर ने तिसजो दित्ते री है।

2 पतरस 3:9

किच्‍छ मणू इय्यां सोचदे कि परमेश्वर अपणे वापिस हटणे रे वादे जो पूरा करणे बिच देर करेया करदे हिन। पर परमेश्वर तिस तरिक्के कने देर नी करेया करदे हिन। बल्कि से तुसा कने सबर कने रेया करदे हिन, किजोकी से कुसकी जो मुकाणा नी चाह्‍ंदे। पर से चाह्‍ंदे कि सारे अपणे मन जो बदली करी, गलत कम्म करणा छड्डी करी, तिन्हा का आए।