Lucas 23:2 - Chinantec Comaltepec

² Jo̱ mɨ˜ caguilíiñꞌˉ do fɨˊ do, jo̱ canaaiñˋ jmóorˋ dseeˉ quiáꞌˉ dseaˋ do jo̱ cajíñꞌˉ: —I̱ dseañʉꞌˋ la ngɨrˊ lacaangˋ jee˜ ꞌnʉ́ʉˊ ta˜ jmiguíingˉ jaléngꞌˋ dseaˋ i̱ seengˋ fɨˊ lɨ˜ quiʉ́ꞌˋ ꞌnʉˋ ta˜. Jo̱guɨ ngɨrˊ féꞌrˋ e jaˋ ꞌnéˉ niquíˆnaaꞌ cuuˉ quiáꞌˉ i̱ dseata˜ dseaˋ féngꞌˊ i̱ guiing˜ fɨˊ Roma, jo̱guɨ féꞌˋbɨr cajo̱ e íˋbre lɨ́ɨiñˊ Dseaˋ Jmáangˉ i̱ nisíngˉ Fidiéeˇ i̱ nicá̱ˋ nifɨˊ quiáꞌˉ jaléngꞌˋ dseaˋ góoˋnaaꞌ dseaˋ Israel.

Lucas 23:2 Iomraidhean Croise

Mateo 17:27

Jo̱ lɨco̱ꞌ jaˋ ɨ́ˉ dsíiˊ i̱ dseaˋ do gaˋ uii˜ quíˆiiꞌ, guaˋ fɨˊ lɨ˜ néeˊ guiéeˊ, jo̱ güɨbíiˊ ꞌmáaˊ quíiꞌˉ jo̱ guiing˜ i̱ laꞌuii˜ ꞌñʉˋ i̱ nilíꞌˋ; jo̱ fɨˊ moꞌooˉ i̱ ꞌñʉˋ íˋ nɨsɨcúꞌˆ co̱o̱ˋ cuuˉ, jo̱ có̱o̱ꞌ˜ jí̱i̱ꞌ˜ e jo̱b nɨtɨ́ngꞌˋ guiʉ́ˉ quiáꞌˉ e nigüɨquíꞌˆ quíˉiiꞌ quiáꞌˉ lají̱i̱ꞌ˜ cuuˉ e catɨ́ɨˉnaaꞌ niquíˆiiꞌ quiáꞌˉ guáꞌˉ; jo̱baꞌ quie̱ˊ e cuuˉ do jo̱ güɨqui˜ jóng.

Mateo 22:21

Jo̱baꞌ cañíiˋ i̱ dseaˋ fariseo do quiáꞌˉ Jesús: —Dseata˜ dseaˋ guiing˜ fɨˊ Roma táangˋ fɨˊ na. Jo̱baꞌ cañíiˋtu̱ Jesús quiáiñꞌˉ do jo̱ casɨ́ꞌˉreiñꞌ: —Cuǿøꞌ˜naꞌ dseata˜ i̱ guiing˜ fɨˊ Roma lají̱i̱ꞌ˜ e catɨ́ɨngˉ íˋ, jo̱guɨ lajo̱bɨ cajo̱ cuǿøꞌ˜naꞌ Fidiéeˇ lají̱i̱ꞌ˜ e catɨ́ɨngˉ Fidiéeˇ.

Mateo 27:11

Jo̱ mɨ˜ caguiéngꞌˉ Jesús fɨˊ quiniˇ i̱ dseata˜ i̱ siiˋ Pilato do, jo̱ íˋ cajmɨngɨ́ꞌrˉ Jesús: —¿Su e jáꞌˉbaꞌ e ꞌnʉˋ lɨnꞌˊ dseata˜ dseaˋ féngꞌˊ i̱ quie̱ˊ nifɨˊ quiáꞌˉ jaléngꞌˋ dseaˋ góoꞌˋ dseaˋ Israel? —ꞌNʉbˋ nɨcaféeꞌ˜guɨꞌ —cañíiˋ Jesús.

Marcos 12:17

Jo̱baꞌ cañíiˋtu̱ Jesús quiáꞌˉ jaléngꞌˋ i̱ dseaˋ do: —Cuǿøꞌ˜naꞌ dseata˜ dseaˋ guiing˜ fɨˊ Roma lají̱i̱ꞌ˜ e catɨ́ɨngˉ íˋ, jo̱guɨ cuǿøꞌ˜naꞌ Fidiéeˇ cajo̱ lají̱i̱ꞌ˜ e catɨ́ɨngˉ Fidiéeˇ. Jo̱ eáamˊ cangogáˋ dsíiˊ jaléngꞌˋ i̱ dseaˋ do mɨ˜ canúurˉ lají̱i̱ꞌ˜ e júuˆ e cañíiˋ Jesús do.

Marcos 15:2

Jo̱ mɨ˜ caguilíingˉ jaléngꞌˋ i̱ dseaˋ íˋ fɨˊ jo̱, jo̱ dseata˜ Pilato cajmɨngɨ́ꞌrˉ Jesús lala: —¿Su jáꞌˉbaꞌ e ꞌnʉbˋ i̱ lɨ́ɨngˊ dseata˜ dseaˋ féngꞌˊ quiáꞌˉ dseaˋ Israel? Jo̱ Jesús cañíirˋ: —E jábꞌˉ. Lajo̱b lɨ́ɨˊ lɨ́ꞌˆ laco̱ꞌguɨ la nɨcaféeꞌ˜ na.

Lucas 23:14

Jo̱ mɨ˜ caseángꞌˊ jaléngꞌˋ i̱ dseaˋ íˋ, jo̱ lalab cajíñꞌˉ casɨ́ꞌˉreiñꞌ: —ꞌNʉ́ꞌˋ cañijéengˋnaꞌ i̱ dseañʉꞌˋ la fɨˊ la e jmooˋnaꞌ dseeˉ quiáꞌrˉ e ngɨrˊ jmiguíiñˉ jaléngꞌˋ dseaˋ fɨɨˋ; jo̱ jnea˜ nɨcajmɨngɨ́ɨꞌrˇ jaléꞌˋ e júuˆ jo̱ fɨˊ quiníˆ ꞌnʉ́ꞌˋ lajaléngꞌˋnaꞌ na, jo̱ dsʉꞌ jí̱i̱ꞌ˜ co̱o̱ˋ dseeˉ jaˋ mɨˊ cadséꞌˋe e røøiñˋ lɨ́ꞌˆ laco̱ꞌ jí̱i̱ꞌ˜ e ꞌnɨ́ɨngˊnaꞌre.

Lucas 23:5

Jo̱ mɨ˜ canúuˉ jaléngꞌˋ i̱ dseaˋ do lado, jo̱ eáangˊguɨ canaaiñˋ jmóorˋ dseeˉ quiáꞌˉ Jesús jo̱ cajíñꞌˉ: —I̱ dseañʉꞌˋ na eáangˊ ngɨrˊ ta˜ jmiguíingˉ dseaˋ có̱o̱ꞌ˜ jaléꞌˋ e erˊ. Jo̱ canaaiñˋ jmóorˋ lajo̱ catɨˊ lɨ˜ se̱ꞌˊ Galilea cartɨˊ cagüéiñˉ fɨˊ la, fɨˊ lɨ˜ se̱ꞌˊ Judea, e jmóorˋ lajo̱.

Juan 18:29

Jo̱ mɨ˜ tɨˊ lɨ˜ cangáˉ dseata˜ Pilato e nɨtéeˋ dseaˋ Jesús, jo̱baꞌ cagüɨꞌɨ́ɨrˊ jo̱ casɨ́ꞌrˉ jaléngꞌˋ i̱ dseaˋ do lala: —¿E˜ dseeˉ e cuøꞌˊnaꞌ i̱ dseañʉꞌˋ na?

Juan 18:30

Jo̱baꞌ cañíiˋ dseaˋ Israel quiáꞌˉ i̱ dseata˜ Pilato do jo̱ casɨ́ꞌˉreiñꞌ: —Faꞌ jiʉ˜guɨ i̱ dseañʉꞌˋ la jaˋ jmóorˋ ta˜ ꞌléeˊ jee˜ jaléngꞌˋ dseaˋ, jo̱baꞌ jaˋ jáangꞌ˜naaꞌre jóng fɨˊ quiníꞌˆ faco̱ꞌ lajo̱.

Juan 19:12

Jo̱ jo̱b mɨ˜ canaangˋ dseata˜ Pilato e ꞌnóꞌrˊ jial nileáiñˉ Jesús, jo̱ dsʉꞌ mɨ˜ calɨlíꞌˆ i̱ dseaˋ Israel do e jo̱, jo̱baꞌ canaaiñˋ taꞌˊguɨr mɨ́ɨꞌ˜ jo̱ sɨ́ꞌrˋ dseaˋ do lala: —Song nilaanꞌˉ i̱ dseaˋ na, jo̱baꞌ lɨ́ɨˊ lafaꞌ ꞌníꞌˋ máamˊbaꞌ jóng i̱ dseata˜ dseaˋ féngꞌˊ i̱ guiing˜ fɨˊ Roma, co̱ꞌ lɨ́ꞌˆ doñiˊ i̱i̱ˋ dseaˋ i̱ jíngꞌˉ e lɨ́ɨiñˊ jaangˋ dseata˜ dseaˋ féngꞌˊ, jo̱baꞌ lɨ́ɨˊ lafaꞌ e ꞌníꞌˋ níimˉbre i̱ dseata˜ i̱ guiing˜ fɨˊ Roma do.

Hechos 24:13

Jo̱ jaléngꞌˋ i̱ dseaˋ ꞌnɨ́ɨngˋ jnea˜ i̱ teáangˉ la jaˋ niguiéꞌrˊ jí̱i̱ꞌ˜ co̱o̱ˋ dseeˉ quiéˉe e jmóorˋ, co̱ꞌ jaˋ e røønˉ jí̱i̱ꞌ˜ co̱o̱ˋ laco̱ꞌguɨ la féꞌrˋ.

Hechos 24:5

Jo̱ lana nɨcadséꞌˋnaaꞌ jaléꞌˋ e gaˋ e jmóoˋ i̱ dseañʉꞌˋ na fɨˊ latøøngˉ fɨˊ jmɨgüíˋ e ꞌnóorˋ mɨ́ɨꞌ˜ quiáꞌˉ jaléngꞌˋ dseaˋ Israel e laco̱ꞌ niꞌnángˋ dseaˋ quiáꞌˉ rúiñꞌˋ. Jo̱guɨ lɨ́ɨmˊbɨr cajo̱ dseaˋ mogui˜ quiáꞌˉ co̱o̱ˋ ꞌléꞌˋ dseaˋ Israel i̱ siiˋ nazareno.

Romanos 13:7

Jo̱baꞌ fɨ́ɨˉguɨ́ɨ ꞌnʉ́ꞌˋ, dseaˋ rúꞌˋnaaꞌ dseaˋ quiáꞌˉ Dseaˋ Jmáangˉ, jmitíˆnaꞌ lají̱i̱ꞌ˜ e catɨ́ɨngˉnaꞌ; jo̱baꞌ cuǿøꞌ˜naꞌ jaléngꞌˋ i̱ dseaˋ i̱ óoˋgo̱ ta˜ lají̱i̱ꞌ˜ e catɨ́ɨiñˉ e niñíiñˋ, faꞌ jaléngꞌˋ i̱ catɨ́ɨngˉ e niꞌíngꞌˋ jaléꞌˋ cuuˉ e sooˋ fɨɨˋ, jo̱baꞌ qui˜naꞌ e jo̱; jo̱guɨ jaléꞌˋ e cuuˉ e quiáꞌˉ eeˋgo̱ ta˜ jmooˋnaꞌ o̱si eeˋgo̱ seaˋ quíiˉnaꞌ, jo̱baꞌ qui˜naꞌ e jo̱ cajo̱. Jo̱guɨ jmɨꞌgooˋnaꞌ jaléngꞌˋ dseaˋ i̱ óoˋgo̱ ta˜, co̱ꞌ lajo̱b catɨ́ɨngˉ e nijméeˆnaꞌ, jo̱guɨ jmiféngꞌˊnaꞌ lajaléngꞌˋ dseata˜ laco̱ꞌ catɨ́ɨngˉ cajo̱.