Apocalipsis 5:12 - Chinantec Comaltepec

¹² jo̱ guicanʉ́ꞌˋ e guicaféiñꞌˋ do lala có̱o̱ꞌ˜ júuˆ teáˋ eáangˊ: I̱ Joꞌseꞌˋ Jiuung˜ i̱ cajúngˉ do dseángꞌˉ catɨ́ɨmˉbreꞌ e niꞌíngꞌˋneꞌ jaléꞌˋ e ꞌgøngꞌˊ jo̱guɨ jaléꞌˋ e jloꞌˆ e seaˋ fɨˊ laꞌúngˉ fɨˊ jmɨgüíˋ jo̱guɨ e tɨɨngˋneꞌ eáangˊ, jo̱guɨ catɨ́ɨmˉbreꞌ e íngꞌˋneꞌ jaléꞌˋ bíˋ cajo̱, jo̱guɨ e nijmɨꞌgóˋ dseaˋ íˋreꞌ, jo̱guɨ e nijmiꞌiáangˋ dsíiˊ dseaˋ có̱o̱ꞌ˜reꞌ, jo̱guɨ e nijmiféngꞌˊ dseaˋ íˋreꞌ contøøngˉ cajo̱.

Apocalipsis 5:12 Iomraidhean Croise

Mateo 28:18

Jo̱ cangoquiéemˊ Jesús fɨˊ quiá̱ꞌˉguɨ laco̱ꞌ teáaiñꞌˉ do jo̱ casɨ́ꞌrˉ dseaˋ do lala: —Fidiéeˇ nɨcacuøꞌrˊ jnea˜ e niquiʉ́ꞌˆʉ ta˜ fɨˊ latøøngˉ fɨˊ ñifɨ́ˉ jo̱guɨ fɨˊ ni˜ guóoꞌ˜ uǿˉ la.

Juan 1:29

Jo̱ mɨ˜ cajneáˉ co̱o̱ˋguɨ jmɨɨ˜ lajo̱, i̱ Juan do cangárˉ e nɨjaquiéengˊ Jesús fɨˊ lɨ˜ siñꞌˊ. Jo̱baꞌ caféꞌrˋ uii˜ quiáꞌˉ dseaˋ do, jo̱ casɨ́ꞌrˉ jaléngꞌˋ i̱ dseaˋ i̱ teáangˉ có̱o̱ꞌr˜ do lala: —Fɨng na jǿøˉnaꞌ, dob nɨjáaˊ i̱ lɨ́ɨngˊ i̱ Joꞌseꞌˋ Jiuung˜ quiáꞌˉ Fidiéeˇ i̱ íingˉ jaléꞌˋ dseeˉ e røøngˋ dseaˋ jmɨgüíˋ.

Juan 17:2

Co̱ꞌ ꞌnʉˋ nɨcacuǿøꞌ˜ jnea˜ e ooˉ ta˜ jee˜ jaléngꞌˋ dseaˋ jmɨgüíˋ e laco̱ꞌ jaléngꞌˋ dseaˋ quíiꞌˉ i̱ nɨcacuǿønꞌ˜ jnea˜, nicuǿøˆøre e nilɨseeiñˋ cøøngˋ có̱o̱ꞌ˜ ꞌnʉˋ lata˜.

2 Corintios 8:9

Jo̱ guiʉ́bˉ nɨñíˆ ꞌnʉ́ꞌˋ e Fíiˋnaaꞌ Dseaˋ Jmáangˉ, uíiꞌ˜ e eáangˊ guiúiñˉ có̱o̱ꞌ˜ jneaa˜aaꞌ, jo̱baꞌ mɨ˜ cagüéiñˉ fɨˊ jmɨgüíˋ la caꞌuíiñˉ jaangˋ dseaˋ tiñíingˉ uíiꞌ˜ jneaa˜aaꞌ, nañiˊ faꞌ jaangˋ dseaˋ i̱ niingˉ eáamˊbre lɨ́ɨiñˊ fɨˊ ñifɨ́ˉ. Jo̱ cajméerˋ lajo̱ e laco̱ꞌ laꞌeáangˊ e caꞌuíiñˉ jaangˋ dseaˋ tiñíingˉ, jo̱baꞌ jneaa˜aaꞌ niꞌíingꞌ˜naaꞌ jaléꞌˋ e jloꞌˆ e catɨ́ɨˉnaaꞌ.

1 Timoteo 1:17

¡Jo̱baꞌ majmɨꞌgooˉnaaꞌ Fidiéeˇ jo̱guɨ majmiféngꞌˊnaaꞌre cajo̱, co̱ꞌ íbˋ Fidiéeˇ i̱ quiʉꞌˊ ta˜ fɨˊ laꞌúngˉ fɨˊ jmɨgüíˋ lata˜, jo̱guɨ íbˋ cajo̱ i̱ jaˋ cuǿøngˋ líˋ júungˉ jo̱guɨ jaˋ quɨ́ꞌˉ jmɨɨ˜ faꞌ e nineeng˜naaꞌre, jo̱guɨ jí̱i̱ꞌ˜ íbˋ Fidiéeˇ i̱ jáꞌˉ! Jo̱ lajo̱b lɨ́ɨˊ.

Apocalipsis 1:6

Jo̱guɨ nɨcajméerˋ e jaléngꞌˋ jneaa˜aaꞌ, dseaˋ lɨ́ɨˊnaaꞌ dseaˋ quiáꞌrˉ, nɨlɨ́ɨˊnaaꞌ co̱o̱ˋ ꞌléꞌˋ dseaˋ i̱ lɨ́ɨngˊ lafaꞌ jmidseaˋ i̱ jmooˋ lají̱i̱ꞌ˜ e iing˜ Tiquiáꞌrˆ Fidiéeˇ. ¡Jo̱ majmɨꞌgooˉbaaꞌ jo̱guɨ majmifémꞌˊbaaꞌ dseaˋ do, co̱ꞌ íbˋ dseaˋ i̱ eáangˊ ꞌgøngꞌˊ jo̱guɨ i̱ güeangꞌˆ carˋ ngongɨ́ɨˋ jmɨɨ˜! Jo̱ lajo̱b nilíˋ.

Apocalipsis 13:8

Jo̱ i̱ fɨ́ɨmˊ dseaˋ i̱ seengˋ fɨˊ ni˜ guóoꞌ˜ uǿˉ jmɨgüíˋ nijmiféiñꞌˊ i̱ jóꞌˋ dséeˉ do, dsʉꞌ nijméˉ lajo̱ lajaléngꞌˋ i̱ dseaˋ i̱ jaˋ sɨjnéengˉ fɨˊ ni˜ jiˋ latɨˊ mɨ˜ catɨro̱o̱ˇ jmɨgüíˋ e fɨˊ lɨ˜ taang˜ jaléngꞌˋ dseaˋ i̱ nɨsɨguángꞌˋ quiáꞌˉ i̱ Joꞌseꞌˋ Jiuung˜ do i̱ cajúngˉ fɨˊ dseꞌˋ crúuˆ.

Apocalipsis 15:3

Jo̱ i̱ dseaˋ íˋ ørˊ co̱o̱ˋ e caꞌøˊ Moi˜, jaangˋ dseaˋ i̱ cajméeˋ lají̱i̱ꞌ˜ ta˜ e iing˜ Fidiéeˇ, jo̱guɨ caꞌørˊ cajo̱ co̱o̱ˋ e caꞌøˊ i̱ Joꞌseꞌˋ Jiuung˜ do, jo̱ lalab ngóoˊ e jo̱: Eáamˊ jloꞌˆ jo̱guɨ niguoꞌˆ lajɨˋ e nɨcajmeeˉ ꞌnʉˋ, Fíiˋiiꞌ, co̱ꞌ ꞌnʉbˋ Fidiéeˇ dseaˋ féngꞌˊ dseaˋ ñíingˊ i̱ ꞌgøngꞌˊ fɨˊ jmɨgüíˋ i̱ quɨ́ɨꞌ˜ jmɨɨ˜ jméˉ lɨ́ꞌˆ doñiˊ eeˋ; jo̱ jmangꞌˉ júuˆ jábꞌˉ quié̱ˆ ꞌnʉˋ, jo̱guɨ jmangꞌˉ fɨˊ røøbˋ sinꞌˊ cajo̱, co̱ꞌ ꞌnʉbˋ lɨnꞌˊ Fii˜ féngꞌˊ fɨˊ laꞌúngˉ fɨˊ jmɨgüíˋ.

Apocalipsis 19:1

Jo̱ mɨ˜ cangɨ́ˋ jaléꞌˋ e la —jíngꞌˉ Juan— jo̱ canúˉtú̱u̱ co̱o̱ˋ luu˜ e teáˋ lɨ́ꞌˆ laco̱ꞌguɨ la nʉ́ꞌˋ luu˜ i̱ ꞌleáangˉ dseaˋ, jo̱ e jo̱ canúˉu e jáaˊ fɨˊ ñifɨ́ˉ, jo̱ lalab féꞌˋ do: Majmiféngꞌˊnaaꞌ Fidiéeˇ quíˉiiꞌ, co̱ꞌ íbˋ dseaˋ láaiñˋ jneaa˜aaꞌ e laco̱ꞌ jaˋ niꞌíingꞌ˜naaꞌ iihuɨ́ɨˊ uíiꞌ˜ quiáꞌˉ dseeˉ quíˉiiꞌ; jo̱ majmɨꞌgooˉnaaꞌr, dsʉco̱ꞌ íbˋ dseaˋ féngꞌˊ dseaˋ i̱ ñíingˊ i̱ ꞌgøngꞌˊ fɨˊ jmɨgüíˋ,

Apocalipsis 4:11

Fíiˋnaaꞌ Fidiéeˇ, ꞌnʉbˋ dseángꞌˉ dseaˋ féngꞌˊ dseaˋ ñíingˊ fɨˊ laꞌúngˉ fɨˊ jmɨgüíˋ, jo̱baꞌ ꞌnʉbˋ dseaˋ catɨ́ɨngˉ e nijmiféngꞌˊ dseaˋ ꞌnʉˋ, jo̱guɨ e nijmɨꞌgóˋ dseaˋ ꞌnʉˋ, jo̱guɨ e niféꞌˋ dseaˋ e eáamˊ ꞌgønꞌˊ cajo̱, co̱ꞌ ꞌnʉbˋ dseaˋ cajmeeꞌˉ lajaléꞌˋ e seaˋ fɨˊ jmɨgüíˋ, jo̱ jalébꞌˋ e cajmeeˉ ꞌnʉˋ calɨseáˋ dseángꞌˉ laco̱ꞌ la iinꞌ˜ uøꞌˊ.

Apocalipsis 5:13

Jo̱ mɨ˜ cangɨ́ˋ jo̱, canúˉbɨguɨ́ɨ cajo̱ —jíngꞌˉ Juan— e lajɨbˋ e cateáaˊ Fidiéeˇ fɨˊ yʉ́ꞌˆ jmɨgüíˋ jo̱guɨ fɨˊ ni˜ guóoꞌ˜ uǿˉ la jo̱guɨ fɨˊ lɨ́ꞌˆ nʉ́ꞌˉ uǿˉ jo̱ lajo̱bɨ fɨˊ lɨ́ꞌˆ nʉ́ꞌˉ jmɨñíꞌˆ cajo̱, jo̱ lalab guicajíngꞌˉ: I̱ dseaˋ quie̱ˊ nifɨˊ i̱ guiing˜ fɨˊ lɨ˜ niingˉ quiʉꞌˊ ta˜ do, jo̱guɨ i̱ Joꞌseꞌˋ Jiuung˜ do cajo̱, íˋbingꞌ i̱ catɨ́ɨngˉ i̱ nijmiféngꞌˊ dseaˋ jo̱guɨ i̱ nijmɨꞌgóˋ dseaˋ cajo̱, co̱ꞌ dseaˋ íbˋ dseaˋ i̱ ꞌgøngꞌˊ i̱ tɨɨngˋ jméˉ lɨ́ꞌˆ doñiˊ eeˋ, jo̱baꞌ dseángꞌˉ catɨ́ɨmˉbre e nijmérˉ lají̱i̱ꞌ˜ e iáangˋ dsíirˊ lata˜ ró̱o̱ˋ jmɨgüíˋ.

Apocalipsis 5:6

Jo̱ mɨ˜ cangɨ́ˋ e caféꞌˋ i̱ dseaˋ do, jo̱baꞌ camánˉn i̱ Joꞌseꞌˋ Jiuung˜ i̱ singꞌˊ fɨˊ guiáꞌˆ jóoˋ e fɨˊ lɨ˜ guiing˜ i̱ dseaˋ laniingˉ do có̱o̱ꞌ˜guɨ e lɨ˜ neáangˉ i̱ quiúungˉ do jo̱guɨ e fɨˊ guiáꞌˆ jóoˋ e fɨˊ lɨ˜ neáangˊ i̱ guiequiúungˋ dseaˋ cǿøngꞌ˜ do. Jo̱ i̱ Joꞌseꞌˋ Jiuung˜ do lɨ́ɨngˊneꞌ lafaꞌ jaangˋ i̱ nɨcajúngˉ i̱ nɨcajngaꞌˊ dseaˋ quiáꞌˉ. Jo̱guɨ dsi˜ guiéˉ fíˆreꞌ jo̱guɨ guiéˉ jminiˇreꞌ cajo̱; jo̱ e jo̱b lɨ́ɨˊ lafaꞌ lajɨˋ guiángˉ jmɨguíˋ quiáꞌˉ Fidiéeˇ e casíiñˋ fɨˊ laꞌúngˉ fɨˊ jmɨgüíˋ.

Apocalipsis 5:8

Jo̱ dsifɨˊ mɨ˜ catɨ́ɨngˉneꞌ e jiˋ do, i̱ quiúungˉ do jo̱guɨ lajɨˋ guiequiúungˋ i̱ dseaˋ cǿøngꞌ˜ do casíngꞌˋ yaaiñ˜ e té̱e̱ˉ uǿˉ jnir˜ fɨˊ quiniˇ i̱ Joꞌseꞌˋ Jiuung˜ do. Jo̱ lajaangˋ lajaaiñˋ do quie̱rˊ co̱o̱ˋ lúuˊ e siiˋ arpa, jo̱guɨ quie̱rˊ úuˊ e lɨ́ɨˊ có̱o̱ꞌ˜ layaang˜ cunéeˇ e téeꞌ˜ sʉ̱ˋ e cooˋ, jo̱ e jo̱baꞌ lɨ́ɨˊ jaléꞌˋ e júuˆ quiáꞌˉ dseaˋ quiáꞌˉ Dseaˋ Jmáangˉ mɨ˜ jmiféiñꞌˊ Fidiéeˇ.

Apocalipsis 5:9

Jo̱guɨ ørˊ júuˆ e ꞌmɨ́ɨˉ e ngóoˊ lala: ꞌNʉbˋ dseángꞌˉ i̱ catɨ́ɨngˉ i̱ nisó̱ꞌˋ e jiˋ do, jo̱guɨ i̱ nifíngˉ jaléꞌˋ e sello quiáꞌˉ do, co̱ꞌ cajngangꞌˊ dseaˋ ꞌnʉˋ, jo̱ có̱o̱ꞌ˜ e jmɨꞌøønꞌˉ e catu̱u̱ˋ do íingˆ ta˜ quiáꞌˉ jaléngꞌˋ dseaˋ e laco̱ꞌ niꞌuíiñˉ dseaˋ quiáꞌˉ Fidiéeˇ; jo̱ jee˜ i̱ dseaˋ do quíingꞌ˜ jmaquíingˊ ꞌléꞌˋ dseaˋ, jo̱guɨ jmaquíingˊ íingꞌ˜ jmíiˊ e féꞌrˋ, jo̱ jaléngꞌˋ i̱ dseaˋ íˋ jalíiñˉ fɨˊ jmaquíingˊ fɨɨˋ e seaˋ fɨˊ laꞌúngˉ fɨˊ jmɨgüíˋ.

Apocalipsis 6:1

Jo̱ mɨ˜ cangɨ́ˋ jo̱, camóˉguɨ́ɨ —jíngꞌˉ Juan— jial i̱ Joꞌseꞌˋ Jiuung˜ do cafíingˋneꞌ laꞌuii˜ e guiéˉ sello do. Jo̱ mɨ˜ calɨ́ˉ jo̱, jo̱ canúˉu e guicaféꞌˋ jaangˋ lajeeˇ i̱ quiúungˉ do, jo̱ dseángꞌˉ canʉ́ꞌˋ lafaꞌ e lɨɨng˜ eeˋ co̱o̱ˋ guicaniibˋ dseángꞌˉ e teáˋ eáangˊ jo̱ cajíñꞌˉ: —¡Neaˊ jo̱ jǿøˉ e la!

Apocalipsis 7:12

¡Lajo̱b nilíˋ! Jo̱ catɨ́ɨmˉ Fidiéeˇ quíˉiiꞌ e nijmiféngꞌˊnaaꞌr, jo̱ catɨ́ɨmˉbre e niꞌíñꞌˋ dseángꞌˉ lají̱i̱ꞌ˜ e ꞌgøngꞌˊ, jo̱guɨ íˋbɨ dseaˋ i̱ tɨɨngˋ ngángꞌˋ, jo̱guɨ catɨ́ɨmˉbre e nicuǿøꞌ˜naaꞌre guiꞌmáangꞌˇ jo̱guɨ e nijmɨꞌgooˉbaaꞌre cajo̱ jo̱ tɨɨmˋbre jmérˉ lɨ́ꞌˆ doñiˊ eeˋ, jo̱guɨ seabˋ bíˋ quiáꞌrˉ cajo̱ carˋ ngongɨ́ɨˋ jmɨɨ˜. ¡Jo̱ lajo̱b nilíˋ!