Apocalipsis 18:2 - Chinantec Comaltepec

² Jo̱ caféꞌrˋ có̱o̱ꞌ˜ júuˆ teáˋ lala: ¡Lanab catɨ́ˋ íꞌˋ! ¡Lanab catɨ́ˋ íꞌˋ e dseángꞌˉ niꞌíingˉ e fɨɨˋ féꞌˋ e ꞌgøngꞌˊ eáangˊ e siiˋ Babilonia! ¡Co̱ꞌ jmangꞌˉ jaléngꞌˋ i̱ ꞌlɨmꞌˆbingꞌ i̱ seengˋ do jmɨɨ˜ na, jo̱ jmangꞌˉ jaléꞌˋ e ꞌlɨꞌˆbaꞌ jmóorˋ, jo̱guɨ lɨ́ɨˊ lafaꞌ ꞌnʉ́ʉˊ fɨˊ lɨ˜ seángꞌˋ jaléngꞌˋ i̱ ꞌlɨngꞌˆ; jo̱ e fɨɨˋ jo̱ lɨ́ɨˊ cajo̱ lafaꞌ sɨɨˉ jaléngꞌˋ i̱ ꞌníꞌˋ níiˉ i̱ jmóoˋ jmangꞌˉ e jaˋ dseengˋ!

Apocalipsis 18:2 Iomraidhean Croise

Apocalipsis 1:15

jo̱guɨ tɨɨrˉ lɨ́ɨˊ dseángꞌˉ lafaꞌ co̱o̱ˋ ñíˆ e siiˋ bronce e dseángꞌˉ jíingˋ jɨꞌˋ lafaꞌ mɨ˜ iʉ˜ fɨˊ ni˜ jɨˋ, jo̱guɨ júuˆ quiáꞌrˉ nʉ́ꞌˋ lɨ́ꞌˆ laco̱ꞌ i̱i̱ˉ co̱o̱ˋ lóoꞌ˜ e féꞌˋ eáangˊ.

Apocalipsis 10:3

Jo̱ teáˋ eáangˊ caꞌóorˋ lɨ́ꞌˆ laco̱ꞌguɨ mɨ˜ ó̱o̱ˉ jaangˋ ieꞌˋ; jo̱ mɨ˜ tɨˊ lɨ˜ caꞌóorˋ, e luur˜ do canʉ́ꞌˋ lafaꞌ e caquieꞌˋ güɨꞌñiሠguiéˉ ya̱ꞌˊ.

Apocalipsis 11:8

Jo̱ i̱ ꞌlɨɨ˜ gángˉ do fɨˊ dob nirɨsaaiñ˜ fɨˊ jee˜ ꞌnʉ́ʉˊ quiáꞌˉ e fɨɨˋ féꞌˋ e lɨ˜ catángˉ Fiir˜ fɨˊ dseꞌˋ crúuˆ. Jo̱ e fɨɨˋ jo̱ lɨ́ɨˊ lafaꞌ fɨɨˋ Sodoma o̱si lɨ́ɨˊ lafaꞌ Egipto é.

Apocalipsis 14:15

Jo̱ cagüɨꞌɨ́ɨˊ jaangˋguɨ ángel fɨˊ dsíiˊ sɨnʉ́ʉˆ guáꞌˉ e siꞌˊ fɨˊ ñifɨ́ˉ, jo̱ i̱ ángel do óorˋ teáˋ lala e áiñꞌˋ i̱ dseaˋ i̱ guiing˜ fɨˊ ni˜ e jníiˊ do, jo̱ casɨ́ꞌˉreiñꞌ do lala: —¡Jméeꞌ˜ ta˜ e ñíˆ hoz na quíiꞌˉ, jo̱ sɨtɨ́ɨngˇ lají̱i̱ꞌ˜ e nɨcarooˋ, co̱ꞌ lanab catɨ́ˋ íꞌˋ, jo̱guɨ lají̱i̱ꞌ˜ e lafaꞌ e cajníˋ dseaˋ fɨˊ ni˜ guóoꞌ˜ uǿˉ, lanab nɨcarooˋ!

Apocalipsis 14:8

Jo̱ mɨ˜ cangɨ́ˋ jo̱, jaangˋguɨ ángel cajíñꞌˉ có̱o̱ꞌ˜ júuˆ teáˋ lala: —¡Lanáb catɨ́ˋ íꞌˋ! ¡Lanáb catɨ́ˋ íꞌˋ e dseángꞌˉ niꞌíingˉ e fɨɨˋ féꞌˋ e siiˋ Babilonia, co̱ꞌ jaléngꞌˋ i̱ dseaˋ i̱ seengˋ fɨˊ jo̱ nɨcajmɨꞌlɨiñꞌˆ jaléngꞌˋ dseaˋ i̱ seengˋ fɨˊ laꞌúngˉ fɨˊ jmɨgüíˋ e jmóorˋ lɨ́ꞌˆ doñiˊ eeˋ e lɨ́ˋ dsíiˊ ngúuˊ táaiñˋ!

Apocalipsis 16:13

Jo̱ mɨ˜ tɨˊ lɨ˜ cangɨ́ˋ e jo̱, camánˉn gaangˋ i̱ ꞌlɨngꞌˆ i̱ jnéemˉjiʉ la jnéengˉ tee˜, jo̱ caꞌuøøngˋneꞌ táꞌˉ jángˋneꞌ fɨˊ moꞌooˉ i̱ jóꞌˋ guiéˉ mogui˜ do có̱o̱ꞌ˜guɨ fɨˊ moꞌooˉ i̱ jóꞌˋ dséeˉ laꞌuii˜ do có̱o̱ꞌ˜guɨ fɨˊ moꞌooˉ i̱ jóꞌˋ dséeˉ i̱ catɨ́ˋ tú̱ˉ i̱ jmɨcaang˜ i̱ féꞌˋ cuaiñ˜ quiáꞌˉ Fidiéeˇ.

Apocalipsis 16:19

Jo̱guɨ e fɨɨˋ féꞌˋ laniingˉ do ꞌnɨˊ dseáꞌˉ caꞌuíingˉ, jo̱guɨ lajaléꞌˋguɨ fɨɨˋ e seaˋ fɨˊ jmɨgüíˋ sɨɨˋ cangolíˋ lɨ˜ néeˊ; jo̱guɨb mɨ˜ tɨˊ lɨ˜ cadseꞌˉ dsíiˊ Fidiéeˇ e fɨɨˋ laniingˉ e siiˋ Babilonia do e laco̱ꞌ nicuǿꞌrˉ jaléngꞌˋ i̱ dseaˋ seengˋ fɨˊ jo̱ e méeˊ do e niꞌɨ́iñꞌˋ do laguidseaangˆ e guǿngꞌˋ jaléꞌˋ iihuɨ́ɨˊ e casíingˋ Fidiéeˇ quiáꞌˉ jaléngꞌˋ i̱ dseaˋ íˋ uíiꞌ˜ e eáamˊ nɨsɨguíiñˆ quiáiñꞌˉ do.

Apocalipsis 17:18

Jo̱guɨ i̱ dseamɨ́ˋ i̱ cañinꞌˊ do, íˋbingꞌ lɨ́ɨngˊ lafaꞌ e fɨɨˋ féꞌˋ e laniingˉ e quɨ́ɨꞌ˜ jmɨɨ˜ quiʉꞌˊ ta˜ jaléngꞌˋ dseata˜ dseaˋ féngꞌˊ i̱ quiʉꞌˊ ta˜ fɨˊ ni˜ guóoꞌ˜ uǿˉ jmɨgüíˋ.

Apocalipsis 17:5

jo̱guɨ quie̱ˊbre cajo̱ co̱o̱ˋ júuˆ e tó̱o̱ˋ fɨˊ guiaquíirˊ, jo̱ lɨɨm˜ eeˋ guǿngꞌˋ do quiáꞌrˉ lɨfaꞌ jaˋ i̱i̱ˋ ñiˊ lɨ́ꞌˆ lají̱i̱ꞌ˜ ꞌñiaꞌˊbre dseaˋ ñirˊ, jo̱ lalab tó̱o̱ˋ: “Eáamˊ féꞌˋ niingˉ jo̱guɨ ꞌgøngꞌˊ fɨɨˋ féꞌˋ e siiˋ Babilonia, co̱ꞌ e jo̱baꞌ e lɨ́ɨˊ lafaꞌ niquiáꞌˆ lajaléngꞌˋ dseamɨ́ˋ i̱ éeˋ dseeˉ e jmóorˋ ta˜ ꞌnɨ́ɨngˋ yaang˜, jo̱guɨ e jo̱b cajo̱ lɨ́ɨˊ lafaꞌ niquiáꞌˆ lɨ́ꞌˆ lajaléꞌˋ e ꞌlɨꞌˆ e seaˋ fɨˊ jmɨgüíˋ la.”

Apocalipsis 18:10

Jo̱ dsʉꞌ huíimˉ niꞌnángˋ yaaiñ˜ quiáꞌˉ i̱ dseamɨ́ˋ do, co̱ꞌ ꞌgóꞌˋbre e ninírˋ lají̱i̱ꞌ˜ iihuɨ́ɨˊ e catɨ́ɨiñꞌˉ do. Jo̱guɨ yaam˜bɨ jaléngꞌˋ i̱ dseata˜ dseaˋ féngꞌˊ do féꞌrˋ lala: ¡E ngɨ˜ fɨ́ɨbˆ ꞌnʉˋ! ¡E ngɨ˜ fɨ́ɨbˆ ꞌnʉˋ, fɨɨˋ féꞌˋ e laniingˉ ꞌgøngꞌˊ e siiˋ Babilonia! Dsʉco̱ꞌ co̱o̱ˋ lajeeˇ jali˜ lanab cagüeáˉ iihuɨ́ɨˊ quíiꞌˉ.

Apocalipsis 18:21

Jo̱ mɨ˜ cangɨ́ˋ jo̱, jaangˋ ángel i̱ ꞌgøngꞌˊ eáangˊ caséerˋ co̱o̱ˋ cu̱u̱˜ ꞌlooˋ e lɨ́ɨˊ laco̱ꞌguɨ la lɨ́ɨˊ e cu̱u̱˜ tóoˋ quiáꞌˉ lɨ˜ dsirˊ mɨcuɨꞌieeˋ, jo̱ e cu̱u̱˜ ꞌlooˋ do cabírˋ fɨˊ dsíiˊ jmɨñíꞌˆ, jo̱ lalab cajíñꞌˉ mɨ˜ cabíˋreꞌ do: Jo̱ ꞌnʉˋ, fɨɨˋ féꞌˋ e laniingˉ ꞌgøngꞌˊ e siiˋ Babilonia, lanab nibíinꞌ˜ é̱ꞌˋ jmɨɨˋ cajo̱ lɨ́ꞌˆ laco̱ꞌguɨ cabíˋ e cu̱u̱˜ ꞌlooˋ do, jo̱ joˋ tó̱o̱ˋ jmɨɨ˜ faꞌ e i̱i̱ˋ niníingˉguɨ ꞌnʉˋ.

Apocalipsis 5:2

Jo̱ camámˉbɨ́ɨ cajo̱ jaangˋ ángel i̱ ꞌgøngꞌˊ eáangˊ quiáꞌˉ Fidiéeˇ, jo̱ jmɨngɨ́ɨrˋ có̱o̱ꞌ˜ luu˜ teáˋ lala: —¿I̱˜ dseaˋ i̱ catɨ́ɨngˉ i̱ nineáˉ e jiˋ do jo̱guɨ e nifíñˉ lajɨˋ guiéˉ e sello quiáꞌˉ e jaˋ cuǿøngˋ nineaˊ do?