Apocalipsis 15:4 - Chinantec Comaltepec

⁴ Jo̱ lajɨɨmˋ dseaˋ ꞌnéˉ nijmɨꞌgórˋ ꞌnʉˋ, Fíiˋiiꞌ, jo̱ lajɨɨmˋ dseaˋ ꞌnéˉ nijmiféiñꞌˊ ꞌnʉˋ cajo̱. Co̱ꞌ dseángꞌˉ lají̱i̱ꞌ˜ ꞌnʉbˋ dseaˋ güeangꞌˆ; jo̱ lajɨɨmˋ dseaˋ seengˋ fɨˊ laꞌúngˉ fɨˊ jmɨgüíˋ nijalíiñˉ e nijajmiféiñꞌˊ ꞌnʉˋ, co̱ꞌ nɨcajmilíˆbaꞌ e dseángꞌˉ røøbˋ quidsiꞌˋ íꞌˋ quiáꞌˉ lajaangˋ lajaangˋ dseaˋ jmɨgüíˋ.

Apocalipsis 15:4 Iomraidhean Croise

Romanos 15:9

Jo̱guɨ cajáˉbɨ Dseaˋ Jmáangˉ cajo̱ e laco̱ꞌ jaléngꞌˋ dseaˋ i̱ jaˋ lɨ́ɨngˊ dseaˋ Israel nijmiféiñꞌˊ Fidiéeˇ uíiꞌ˜ e eáangˊ fɨꞌˋ lɨ́ɨngˉ dseaˋ do jaléngꞌˋ i̱ dseaˋ íˋ lɨ́ꞌˆ laco̱ꞌguɨ la féꞌˋ fɨˊ ni˜ jiˋ quiáꞌˉ Fidiéeˇ lɨ˜ féꞌˋ lala: Jo̱ nijmifénꞌˊn ꞌnʉˋ jee˜ jaléngꞌˋ dseaˋ i̱ jaˋ lɨ́ɨngˊ dseaˋ Israel, jo̱guɨ nijmifénꞌˊn ꞌnʉˋ có̱o̱ꞌ˜ jaléꞌˋ e øøˉ.

1 Pedro 1:16

co̱ꞌ lajo̱b féꞌˋ fɨˊ ni˜ jiˋ quiáꞌˉ Fidiéeˇ: “Güɨꞌnaangˋnaꞌ jee˜ jaléꞌˋ dseeˉ quíiˉnaꞌ e laco̱ꞌ nilíingˉnaꞌ dseaˋ güeanꞌˆ, dsʉco̱ꞌ jnea˜ lɨ́ɨnˊn jaangˋ i̱ güeangꞌˆ i̱ jaˋ dseeˉ røøngˋ jí̱i̱ꞌ˜ co̱o̱ˋ.”

Apocalipsis 11:15

Jo̱ co̱o̱bˋ mɨ˜ cajiʉ́ʉˉ i̱ ángel i̱ catɨ́ˋ guiángˉ do lúuˊ trompéꞌˆ quiáꞌrˉ, jo̱ jo̱b mɨ˜ tɨˊ lɨ˜ canʉ́ꞌˋ jmiguiʉˊ luu˜ e teáˋ eáangˊ fɨˊ yʉ́ꞌˆ jmɨgüíˋ jo̱ lalab nʉ́ꞌˋ guicajíngꞌˉ: Lanab catɨ́ˋ íꞌˋ e Fíiˋnaaꞌ Fidiéeˇ, co̱lɨɨng˜ có̱o̱ꞌ˜ i̱ jó̱o̱rˊ Dseaˋ Jmáangˉ i̱ casíiñˋ do, niquiʉ́ꞌrˉ ta˜ fɨˊ latøøngˉ fɨˊ ni˜ guóoꞌ˜ uǿˉ jmɨgüíˋ, jo̱ carˋ ngongɨ́ɨˋ jmɨɨ˜ nijmérˉ lajo̱.

Apocalipsis 14:7

Jo̱ lalab féꞌrˋ có̱o̱ꞌ˜ júuˆ teáˋ: —Jmɨꞌgooˋnaꞌ Fidiéeˇ dseaˋ guiing˜ ñifɨ́ˉ jo̱guɨ jmiféngꞌˊnaꞌr, co̱ꞌ lanáb catɨ́ˋ íꞌˋ e niquidsirˊ íꞌˋ quiáꞌˉ lajaangˋ lajaangˋ dseaˋ jmɨgüíˋ. Jo̱ jmiféngꞌˊnaꞌ i̱ dseaˋ íˋ, co̱ꞌ íˋbingꞌ i̱ cajméeˋ yʉ́ꞌˆ jmɨgüíˋ có̱o̱ꞌ˜ guóoꞌ˜ uǿˉ jo̱guɨ jmɨñíꞌˆ lɨ́ꞌˆ lacaangˋ lɨ˜ níingꞌ˜ jmɨɨˋ.

Apocalipsis 16:5

Jo̱ mɨ˜ cangɨ́ˋ jo̱, canúˉu e cajíngꞌˉ i̱ ángel i̱ jmóoˋ íˋ jaléꞌˋ jmɨɨˋ do lala: Fidiéeˇ quíˉiiꞌ, jaˋ dseeˉ røønꞌˋ jí̱i̱ꞌ˜ co̱o̱ˋ; co̱ꞌ nɨcaquidsíˋbaꞌ íꞌˋ laco̱ꞌ catɨ́ɨngˉ, jo̱ ꞌnʉbˋ i̱ seengˋ jo̱guɨ nɨseemˋbaꞌ cajo̱ lají̱i̱ꞌ˜ nʉ́ꞌˉguɨ e nitɨro̱o̱ˇ jmɨgüíˋ,

Apocalipsis 16:7

Jo̱ mɨ˜ cangɨ́ˋ jo̱, canúˉguɨ́ɨ co̱o̱ˋguɨ luu˜ e jáaˊ fɨˊ nifeꞌˋ e jíngꞌˉ lala: —Jábꞌˉ, lajo̱b lɨ́ɨˊ, Fíiˋnaaꞌ Fidiéeˇ, ꞌnʉbˋ dseaˋ i̱ quɨ́ɨꞌ˜ jmɨɨ˜ jméˆ lɨ́ꞌˆ doñiˊ eeˋ, co̱ꞌ nɨcaquidsíˋbaꞌ íꞌˋ laco̱ꞌ catɨ́ɨngˉ jo̱guɨ laco̱ꞌ sɨꞌíˆ cajo̱.

Apocalipsis 19:2

dsʉco̱ꞌ íˋbingꞌ i̱ tɨɨngˋ ɨ́ɨˋ íꞌˋ laco̱ꞌ catɨ́ɨngˉ, co̱ꞌ nɨsɨꞌíꞌˋbre jial tíiˊ iihuɨ́ɨˊ e catɨ́ɨngˉ lajaangˋ lajaangˋ dseaˋ; jo̱guɨ íˋbre cajo̱ dseaˋ nɨcacuøꞌrˊ iihuɨ́ɨˊ jaléngꞌˋ dseaˋ i̱ seengˋ fɨˊ e fɨɨˋ e lɨ́ɨˊ lafaꞌ i̱ dseamɨ́ˋ i̱ cajméeˋ ta˜ ꞌnɨ́ɨngˋ ꞌñiaꞌˊ do, co̱ꞌ có̱o̱ꞌ˜ jaléꞌˋ e ꞌlɨꞌˆ e nɨcajméerˋ do caꞌiéꞌrˋ ta˜ e laco̱ꞌ cajmɨꞌlɨngꞌˆ yaang˜ jaléngꞌˋ dseaˋ jmɨgüíˋ; jo̱ uii˜ jo̱baꞌ Fidiéeˇ nɨcacuøꞌrˊ iihuɨ́ɨˊ jaléngꞌˋ i̱ dseaˋi̱ cajngangꞌˊ jaléngꞌˋ dseaˋ quiáꞌrˉ i̱ jmóoˋ lají̱i̱ꞌ˜ ta˜ e iing˜ Fidiéeˇ ꞌñiaꞌrˊ.

Apocalipsis 19:8

jo̱ lana i̱ dseamɨ́ˋ do nɨcangɨ́ɨmˋbre fɨˊ e niquɨꞌrˊ sɨ̱ꞌrˆ e jloꞌˆ jo̱guɨ e ꞌmoꞌˆ eáangˊ jo̱guɨ e teeˋ e jíingˋ jɨꞌˋ jloꞌˆ eáangˊ cajo̱. Jo̱ e ꞌmɨꞌˊ e niguoꞌˆ do cuøˊ li˜ e jaléngꞌˋ i̱ dseaˋ i̱ lɨ́ɨngˊ dseaˋ quiáꞌˉ Fidiéeˇ teáaiñˉ teáˋ fɨˊ guiʉ́ˉ có̱o̱ꞌ˜ dseaˋ do.

Apocalipsis 3:7

’Jo̱ lalab fɨ́ɨˉguɨ́ɨ ꞌnʉˋ, Juan, e nijméeꞌ˜ co̱o̱ˋ jiˋ e catɨ́ɨngˉ i̱ dseaˋ i̱ quie̱ˊ nifɨˊ quiáꞌˉ jaléngꞌˋ dseaˋ quiéˉe i̱ neáangˊ fɨˊ fɨɨˋ Filadelfia, jo̱ lalab jméeꞌ˜: “Lalab jíngꞌˉ i̱ dseaˋ güeangꞌˆ jo̱guɨ i̱ féꞌˋ jmangꞌˆ júuˆ jáꞌˉ contøøngˉ jo̱guɨ i̱ quie̱ˊ joñíˆ quiáꞌˉ dseata˜ dseaˋ féngꞌˊ Davíꞌˆ; jo̱ mɨ˜ náaˊ i̱ dseaˋ i̱ quie̱ˊ e joñíˆ do, jo̱baꞌ jí̱i̱ꞌ˜ jaangˋ dseaˋ joˋ i̱i̱ˋ nilíꞌˋ faꞌ e nijnírˉ; jo̱guɨ mɨ˜ jnɨ́ɨrˊ, jo̱baꞌ jí̱i̱ꞌ˜ jaangˋ dseaˋ jaˋ i̱i̱ˋ nilíꞌˋ faꞌ e nineárˉ.

Apocalipsis 4:8

Jo̱ lajaangˋ lajaangˋ i̱ quiúungˉ do dsi˜ jñʉ́ʉˉ cuéerˊ, jo̱guɨ dsi˜ jmiguiʉˊ jminirˇ lɨ́ꞌˆ lɨˊ ni˜ jo̱guɨ lɨ́ꞌˆ lɨˊ nʉ́ꞌˉ cajo̱; jo̱ dseángꞌˉ uǿøˋ jmɨ́ɨbˋ jaˋ tʉ́rˋ e féꞌrˋ lala: Dseángꞌˉ jaˋ cǿøngˋ có̱o̱bꞌ˜ güeangꞌˆ Fíiˋiiꞌ, Fidiéeˇ dseaˋ guiing˜ ñifɨ́ˉ. Dseángꞌˉ dseaˋ güeamꞌˆ dseaˋ do, dseángꞌˉ dseaˋ guiúmˉ dseaˋ do, jo̱ íbˋ dseaˋ ꞌgøngꞌˊ, jo̱guɨ tɨɨiñˋ jmérˉ lɨ́ꞌˆ doñiˊ eeˋ. Jo̱ íbˋ Fidiéeˇ i̱ seengˋ lají̱i̱ꞌ˜ latɨˊ malɨɨ˜guɨ, lají̱i̱ꞌ˜ nʉ́ꞌˉguɨ e nitɨro̱o̱ˇ jmɨgüíˋ jo̱guɨ latɨˊ lana jo̱guɨ cajo̱ i̱ nijáaˊtu̱ caléꞌˋ catú̱ˉ, i̱ seengˋ carˋ ngongɨ́ɨˋ jmɨɨ˜.

Apocalipsis 6:10

Jo̱ féꞌˋ jaléngꞌˋ i̱ dseaˋ íˋ có̱o̱ꞌ˜ júuˆ e teáˋ eáangˊ, jo̱ lalab jíñꞌˉ do: —Fíiˋnaaꞌ, ꞌnʉbˋ dseaˋ i̱ güeanꞌˆ i̱ jaˋ dseeˉ røøngˋ jí̱i̱ꞌ˜ co̱o̱ˋ jo̱guɨ dseángꞌˉ i̱ jmiti˜ júuˆ quiáꞌˉ contøøngˉ. Jo̱ ¿lɨ˜ catɨˊ niquidsiꞌˋ íꞌˋ quiáꞌˉ jaléngꞌˋ dseaˋ jmɨgüíˋ jo̱guɨ nicuǿꞌˆre iihuɨ́ɨˊ uii˜ quiáꞌˉ e cajngaiñꞌˊ jneaꞌˆ?