রোমীয় 9:1 - Chakma Bible

^1-2 খ্রীষ্ট সমারে মিজেইনে মুই কঙত্তে, মনত্ দুঘে বুগ্ ভাঙের্ আর চিদোত্ পুদের্, আর এ কধাগান সত্য, মিজে নয়। মঅ বিবেগ্‌কান্অ পবিত্র আত্মা সমারে মিজেইনে সেই একই সাক্ষ্য দের্।

রোমীয় 9:1 Iomraidhean Croise

রোমীয় 1:9

গোজেন পুয়ো পৌইদ্যেনে গম্ হবর্ প্রচার গুরিনে মর্ বেক্ মনান্দোই মুই গোজেনরে সেবা গরঙর্। মুই যেদক্ বার্ তবনা গরং সেদক্ বার্ যে তমা কধানি ইদোত্ তুলোং, তেয়ই সিয়েনর্ সাক্ষী।

রোমীয় 2:15

ইয়েনত্ দেগা যায়, রীদি-সুদোম মজিম যিয়েন গরানা উজিত্ সিয়েন তারা মনত্ লেগা আঘে। তারার্ বিবেক্-অ সেই এক্কুই সাক্ষ্য দে। তারার্ চিন্তেগানিয়ে কনঅ কনঅ সময় তারারে দুষী গরে, আরঅ কনঅ কনঅ সময় তারা পক্ষেয়ো থায়।

রোমীয় 8:16

পবিত্র আত্মাগানেয়ো নিজে আমা মনত্ এই সাক্ষিগান দেত্তে যে, আমি গোজেনর্ পুয়ো।

২ করিন্হীয় 1:12

আমি যিয়েনত্যে দেমাগে ফুলি উদিই সিয়েন এই-আমা বিবেগ্‌‌‌কানিয়ে এ সাক্ষ্যগানি দেত্তে যে, গোজেনর্ দিয়্যে পবিত্রতালোই আর সরলতায় আমি বেক্ মানুচ্চুনো ইধু, বিশেষ গুরি তমা ইধু জিংকানি কাদেয়্যেই। সেই জিংকানিগানি আমি জগদ জ্ঞানর্ পরিচালনায় ন-কাদেই বরং গোজেনর্ দোয়্যেই পরিচালনায় কাদেয়্যেই।

২ করিন্হীয় 1:23

মঅ জিংকানিগানর্ নাঙে শমক্ হেইনে মুই গোজেনরে সাক্ষী রাগেইনে কঙর্, সাজাত্তুন্ তমারে রেহাই দিবাত্যে মুই করিন্থ শঅরত্ ফিরি ন-যাং।

২ করিন্হীয় 11:10

মইধু খ্রীষ্টর্ যে সত্যগান্ আঘে সে ধগে মুই কংগে, আখায়া রেজ্যর্ কনঅ জাগাত মর্ এ দেমাগ্ গরানাগান্ কেঅ বন্ধ গুরি ন-পারিবাক্।

২ করিন্হীয় 11:31

আমা প্রভু যীশু খ্রীষ্টর্ গোজেন আর বাপ্, যিবে উমরত্যে বাঈনী পেবার্, তে কোই পারে মুই মিজে কধা ন-কঙর্।

২ করিন্হীয় 12:19

তমার্ কি মনে অয়, এ চিধিগানর্ মাধ্যমে আমি তমা ইধু নিজোর্ পক্ষে কধা কোর্? খ্রীষ্ট সমারে মিজেইনে আমি গোজেন মুজুঙোত্ কধা কোর্। কোচ্‌পেইয়্যে ভেইয়ুন, তমারে উগুরেদি তুলিবাত্যে আমি ইয়েনি কোর্।

গালাতীয় 1:20

গোজেনে সাক্ষী, মুই তমা ইধু যিয়েন লেগঙর্ সিয়েনর্ কিচ্চু মিজে নয়।

ফিলিপীয় 1:8

খ্রীষ্ট যীশুর্ কোচ্‌পানা রিবেঙত্ থোইনে মুই যে তমারে কদক্ কোচ্‌পাং সিয়েনর গোজেনে সাক্ষী।

১ থিষলনীকীয় 2:5

তুমি কোই পারঅ আমি কনদিন্অ বিগিদি গুরিনে কধা ন-কোই, আর লুভ্‌পানরে নাঢি থোইনেয়ো যে ছলনা গুরিনে কনঅ কধা আমি ন-কোই, গোজেনে তার্ সাক্ষী।

১ তীমথিয় 1:5

এ উগুমানর্ উদ্দেচ্য অলঅ কোচ্‌পানা জাগেই তুলোনা। এ কোচ্‌পানাগান খাটি মন, সাব্ বিবেক আর আজল্ বিশ্বেজত্তুন্ এজে।

১ তীমথিয় 2:7

আর এ সাক্ষ্যগান দিবাত্যে গোজেনে মরে প্রচারক, দূত আর অযিহূদীগুনো ইধু বিশ্বেজ্ আর সত্যর্ মাষ্টর ইজেবে বেঈ লোইয়্যে। মুই সত্য কধাগান্ কঙর্, মিজে ন-কঙর্।

১ তীমথিয় 5:21

গোজেন আর খ্রীষ্ট যীশু আর বেঈ লোইয়্যে স্বর্গদূত্‌‍‍‍ত‌‍‍ুনো মুজুঙোত্ মুই তরে এ উগুমান দুয়োঙর্-কারঅ পক্ষ ন-লোইনে ইয়েনি বেক্কানি গুরিবে আর একচোক্ক্যে ওইনে কনঅ কাম ন-গুরিচ্।