রোমীয় 3:25 - Chakma Bible

²⁵ গোজেনে ফগদাং গোজ্জ্যেদে যে, যিগুনে বিশ্বেজ্ গরন্ তারাত্ত্যে যীশু খ্রীষ্ট তা লো-গান্দোই, অত্তাৎ তা জিংকানিগান্-উৎসর্বলোই তারে হুজি গোজ্জ্যে। এবাবোত্যেগুরি গোজেনে দেগেয়্যেদে, যুনিয়ো তে তার্ সোজ্য গুণোত্তে মান্‌জ্যর্ আগ পাপর্ সাজা ন-দে তো তে নিদ্দুজি।

রোমীয় 3:25 Iomraidhean Croise

গীতসংহিতা 119:142

তর্ ধার্মিকতাগান্ উমরত্তে থিদেবর্ গোজ্যে, আর তর্ বেক উগুমানি সত্য।

গীতসংহিতা 22:31

যিগুনোর্ এজঅ জর্ম ন-অয়, তারা ইদু যেইনে মানুচ্চুনে তার্ ন্যায্য কধাগানি ফগদাঙ্ গুরিবাক্; কবাক্কে, তেয়ই এ কামানি গোজ্যে।

গীতসংহিতা 40:10

তঅ ধোক্ক্যেন কামর্ কধা মর্ মনত্ মুই লুগেই ন-রাগাং; মুই তর্ বিশ্বেজ্‌ছান আর উদ্ধোর-কামর্ কধানি কোই থাং; তর্ অমকদ কোচ্‌পানা আর তর্ বিশ্বেজর্ কধা দাঙর্ মিটিঙোত্ মুই গুমোর্ ন-গরং।

গীতসংহিতা 50:6

আগাজ্‌ছানে তার্ ন্যায়বিচেরর্ কধা ফগদাং গরের্, কিত্যে গোজেনে নিজেই বিচেরক্।

গীতসংহিতা 97:6

দেবাবো তার ন্যায়র কধা ফগদাং গোজ্যে, আর বেক জাদ্‌তুনে তার বাঈনী গরানাগান্ দেখ্যন্।

গীতসংহিতা 98:2

লগেপ্রভু তার উদ্ধোরর্ কামানি দেগেই দিয়্যে; বেক জাদ্‌তুনোর ইদু তার ন্যায়র কামানি ফগদাং গোজ্যে।

যিশাইয় 53:11

তে তার দুঘ্ পানার ফলান্ দেগিনে হুজি অবঅ; লগেপ্রভু কোইয়্যেদে, মর্ ন্যায়বলা চাগরবোরে গমেডালে হবর্ পানার মাধ্যমে ভালোক্ জনরে নিদ্দুযি বিলিনে গুজি লুয়ো অবঅ, কিত্তে তে তারার বেক্ অন্যেয়ানি বুয়োই নেযেব।

লেবীয় 16:10

মাত্তর্‌ লটারীত্‌ যে ছাগল্লো অজাজেলত্তে উদিবো সিবে জেদা অবস্থায় লগেপ্রভুর মুজুঙোত্ আঝিল্ গরা পুরিবো আর পাপ ঢাগি দিবার নাঙে অজাজেলত্তে ধূল্যেচর-চাগালাত্‌‌ পাদেই দিয়া পুরিবো।

লেবীয় 16:15

পরেদি তাত্তুন্‌ মানুচ্চুনোর্‌ পাপ-উৎসর্বর্ ছাগল্লো কাবা পুরিবো আর তার লো-নেযেইনে পর্দাগানর্‌ পিজেন্দি যেইনে বলত্তোর লো-লোই যিয়ান গুরিবার্‌ কধা কুয়ো ওইয়ে সিয়ান গরা পুরিবো। সুন্দুগোর্‌ ঢাগনিগান উগুরে আর মুজুঙোত্ সে লো-গান তাত্তুন্‌ ছিদি দিয়া পুরিবো।

যোহন 6:47

মুই তমারে ঘেচ্চ্যেক্‌গুরি কঙর্, যে কেঅ মঅ উগুরে বিশ্বেজ্ গরে তে সেক্কেনে উমর জিংকানি পায়।”

প্রেরিত্‌ 14:16

আগ দিনোত্ বেক্‌ জাদ্‌তুনোরে তে তারার্ আওজ্ মজিম চলিবাত্তে দিয়্যে,

প্রেরিত্‌ 15:18

ভালোক্ দিন আগেত্তুন্ ধুরি ইবে তা মনঅ ভিদিরে এলঅ।”

প্রেরিত্‌ 17:30

আগ দিনো মানুচ্চুনে হবর্ ন-পেদাক্ বিলি গোজেনে ইয়েনি দেগিনেয়ো ন-দেগে। মাত্তর্ ইক্কিনে তে বেক্ জাগানিত্ বেক্ মানুচ্চুনোরে পাপত্তুন্ মনানি ফিরেবাত্তে উগুম্ দের্,

প্রেরিত্‌ 2:23

গোজেন, যিবে আগে-বাগে বেক্কানি কোই পারে, যীশুরে তমা আঢত্ দিয়্যে অবঅ। আর তুমিয়ো দঅ পাজি মানুচ্চুনোরে দিইনে তারে ক্রুশোত্ দিইনে মারে ফেলেয়ো।

প্রেরিত্‌ 3:18

মাত্তর্ গোজেনে ভালোক্ দিন আগে বেক্‌ ভাববাদীগুনোর মাধ্যমে কোইয়্যেদে তার মশীহর কষ্ট ভোগ গরা পুরিবো; আর সে কধাগান গোজেনে এবাবোত্যে গুরি পূরেই দিবো।

প্রেরিত্‌ 4:28

তর্ খেমতালোই আর আওজ্‌সোই যিয়েনি ঘুদিবো বিলি তুই আগে ঠিগ্ গুরি থোইয়োচ্ তারা সিয়েনই গোজ্যন্।

রোমীয় 2:4

তুই দঅ গোজেনর্ দোয়্যে, সোজ্যগুন্ আর ধৈজ্জ্যগানিরে ঈচ্ গোজ্জ্যস্। তুই পুরি ফেল্ল্যচ্ গোজেনর্ এ দোয়্যের্ উদ্দেচ্চ্য অলঅ তরে পাপত্তুন্ মন ফিরেবার পদথ্ আনানা।

রোমীয় 3:26

তে যে নিদ্দুজি সিয়েন তে ইক্কিনে দেগেয়্যেদে যেন প্রমাণ অয় যে, তে নিজে নিদ্দুজি আর যে কেঅ যীশু উগুরে বিশ্বেজ্ গরে তারেয়ো তে নিদ্দুজি বিলি মানি লবঅ।

রোমীয় 5:1

বিশ্বেজর্ মাধ্যমে আমারে নিদ্দুজি বিলি মানি লুয়ো ওইয়্যে আর সিয়েনত্তে প্রভু যীশু খ্রীষ্টর্ মাধ্যমে গোজেন ইধু আর আমা ইধু শান্তি ওইয়্যে।

রোমীয় 5:11

বানা সিয়েন নয়, যিবেলোই গোজেন সমারে আমি মিজেয়্যেই সেই প্রভু যীশু খ্রীষ্টর্ মাধ্যমে গোজেনরে লোইনে আমি ফুত্তি গুরির্।

রোমীয় 5:18

সালে এক্কান্ পাপর মাধ্যমে যেবাবোত্যেগুরি বেক্ মানুচ্চুনোর সাজা পেবার্ যগাজ্যে বিলি ধরা ওইয়্যে, সেবাবোত্যেগুরি এক্কান গম্ কামর্ মাধ্যমে বেক্ মানুচ্চুনোরে নিদ্দুজি বিলি মানি লবার্ বেবস্থা গরা ওইয়্যে আর সিয়েনর্ ফল অলঅ উমর জিংকানি।

রোমীয় 5:9

সালে খ্রীষ্টর্ লো-গান্দোই যেক্কে আমারে নিদ্দুজি বিলি মানা ওইয়্যে সেক্কে আমি খ্রীষ্টর্ মাধ্যমে গোজেনর্ সাজাত্তুন্ খামাক্কায় রেহাই পেবং।

১ করিন্হীয় 5:7

যেন তুমি এক্কান নুয়ো সদানেইয়্যে মোইদ্যের্ তাল্ ওই পারঅ; আর আসলেয়ো তুমি সিয়েন। আমা উদ্ধোর্-পরবর্ ভেড়া-ছঅ খ্রীষ্টরে উৎসর্ব গরা ওইয়্যে।

২ করিন্হীয় 5:21

যীশু খ্রীষ্ট ইধু কনঅ পাপ্ ন-এলঅ; মাত্তর্ গোজেনে আমা পাপ্‌পানি যীশু উগুরে তুলি দিইনে তারে পাপ জাগানত্ দিলো, যেন খ্রীষ্ট সমারে মিজেইনে গোজেনর্ পবিত্রতাগান্ আমার পবিত্রতাগান্ অয়।

ইফিষীয় 1:7

গোজেনর্ দোয়্যে অনুসারে খ্রীষ্ট লগে মিজেইনে তার্ লোগান্দোই আমি খেমা পেইয়্যেই, অত্তাৎ পাপর্ খেমা পেইয়্যেই।

ইফিষীয় 2:13

তুমি এক কালত্ দূরোত্ এলা, মাত্তর্ খ্রীষ্ট যীশু সমারে এগত্তর্ ওইয়ো বিলিনে তমারে ইক্কিনে তার্ লো-লোই কায়কুরে আনা ওইয়্যে।

১ তীমথিয় 1:15

এ কধাগান বিশ্বেজ্‌বলা আর পুরোপুরি গুরিনে মানি লবার্‌অ যগাজ্জ্যে যে, পাপত্তুন্ পাপীগুনোরে উদ্ধোর্ গুরিবাত্যে খ্রীষ্ট যীশু জগদত্ এচ্চ্যে।

ইব্রীয় 10:4

কিয়া বলদ্ গোরু আর ছাগলর্ লো-গানি কনদিনঅ পাপ ধাবেই দি ন-পারে।

ইব্রীয় 11:14

যিগুনে সিয়েন স্বীগের্ গরন্ তারা গমেডালে বুঝোন্দে যে, তারা নিজোত্যে এক্কান দেশ তগাদন্।

ইব্রীয় 11:17

অব্রাহামরে যগা চেবার্ অক্তত্ তে গোজেন উগুরে বিশ্বেজত্যে ইস্‌হাকরে উৎসর্ব গোজ্জ্যে। যিবে ইধু গোজেনে এগেম্ গোজ্জ্যে তেয়ই তার্ বানা এক্কো গুরি পুয়োরে উৎসর্ব গুরিবাত্যে যার্।

ইব্রীয় 11:7

যিয়েন সেক্কেয়ো দেগা ন-যায় সেই পৌইদ্যেনে গোজেনে নোহরে উজিয়ার্ গোজ্জ্যে। নোহ গোজেন-ভক্ত এলঅ বিলি গোজেনর্ কধা বিশ্বেজ্ গুরিনে এক্কান জাহাজ বানেয়্যে, যেনে তা ঘোর্‌বোবু রোক্ষ্যে পায়। নোহ তার্ বিশ্বেজ্‌চান্দোই জগদ্‌তানরে দুষি বিলিনে প্রমাণ গোজ্জ্যে আর গোজেন ইধু নিদ্দুজি বিলিনে মানি লবার্ অধিকার পেয়্যে, যিয়েন বানা বিশ্বেজর্ কারনে পাহ্ যায়।

ইব্রীয় 9:28

ঠিগ্ সেবাবোত্যেগুরি ভালোক্কুন মান্‌জ্যর পাপর্ বুধি ভুগিবাত্যে খ্রীষ্টরেয়ো একবার উৎসর্ব গরা ওইয়্যে। তে দ্বিপল্লা এবঅ, মাত্তর্ সেক্কে পাপর্ কারনে মুরিবাত্যে ন-এবঅ, বরং যিগুনে তাত্যে আওজ্ গুরিনে বাজ্জেই আঘন তারারে পুরোপুরি গুরিনে উদ্ধোর্ গুরিবাত্যে এবঅ।

ইব্রীয় 9:5

সেই সিন্দুক্কো উগুরে গোজেনর্ মহিমালোই ভোজ্যে দ্বিবে সনার্ করূব এলঅ। তারার্ ডুয়োগানি সেই সিন্দুগোর ঢাগনি উগুরে মেল্যে এলঅ। এই ঢাগনিগান উগুরে পাপ ঢাগি দিয়্যে অদঅ। খালিক্ ইয়েনির্ টুগিটাগির্ কধা কনা ইক্কিনে সম্ভব নয়।

১ যোহন 1:10

যুনি কোই আমি পাপ ন-গুরিই সালে আমি তারে মিজেমাদিয়্যে বানেই আর তা কধানি আমা মন ভিদিরে নেই।

১ যোহন 2:2

আমা পাপ্পানি দূর্ গুরিবাত্যে খ্রীষ্ট তার্ নিজো জিংকানিগান্ উৎসর্ব গুরিনে গোজেনরে হুজি গোজ্জ্যে। বানা আমা পাপ্পানি নয়, মাত্তর্ বেক মানুচ্চুনোর পাপ্পানি দূর্ গুরিবাত্যে তে সিয়েন গোজ্জ্যে।

১ যোহন 4:10

আমি যে গোজেনরে কোচ্‌পেয়্যেই সিয়েন নয়, মাত্তর্ তে আমারে কোচ্‌‌পেইনে তা পুয়োবোরে দিপাধেয়্যে, যেন পুয়োবো তার নিজোর জিংকানিগান-উৎসর্ব গরানায় আমা পাপ্পানি দূর্ গুরিনে গোজেনরে হুজি গরে। ইয়েনই অলঅ কোচ্‌পানা।

ফগদাং পেইয়্যে 13:8

যিগুনে এ পিত্‌থিমীর, অত্তাৎ যিগুনোর্ নাঙান্ ভেড়া-ছবোর্ জিংকানি-বোইবোত্ লেঘা নেই তারা বেক্কুনে সেই য়েমান্নোরে গোজেনর্ সর্মান দিইনে সালাম গুরিবাক্। এই ভেড়া-ছবোরে পিত্‌থিমীগান সৃট্টি গুরিবার আগে মারে ফেলেবাত্যে ঠিগ্ গরা ওইয়্যে।

ফগদাং পেইয়্যে 5:9

তারা এ নুয়ো গান্নো গাদন্: “তুয়ই সে বোইবো লোইনে তার্ সীলমহ্‌রুন খুলিবার যোগ্য, কিয়া তরে মারে ফেলা ওইয়্যে। তুয়ই তর্ লো-গান্দোই পত্তি বংশ, ভাযা, দেশ আর জাদ ভিদিরেত্তুন্ গোজেনত্যে মানুচ্চুনোরে কিন্ন্যচ্।