রোমীয় 1:14 - Chakma Bible

¹⁴ সভ্য-অসভ্য, শিক্ষিত-অশিক্ষিত, বেক্কুনো ইধু মুই বাধ্য।

রোমীয় 1:14 Iomraidhean Croise

গম্ উপদেজ্ 1:22

ভুল্ মানুচ্চুন, আর কয়দিন তুমি তমার ভুলো কামানি গম্‌পেবা? যিগুনে ঈচ্ গরন তারা আর কয়দিন তারা ইদু রঙ্গ-ফুত্তি পেবাক্? যিগুনোর চিদে চজ্জা নেই তারা আর কয়দিন জ্ঞানানরে ঘিনেবাক্?

গম্ উপদেজ্ 8:5

ভুল্ মানুচ্চুন, চালাগ্ অবাত্তে বুদ্ধি গরঅ; জ্ঞাননেইয়্যে মানুচ্চুন্, বিচেরবুদ্ধি শিগো।

যিশাইয় 35:8

সিয়েনত্ অবঅ এক্কান রাজপথ, অয়, এক্কান্ পথ অবঅ; সিয়েনরে কুয়ো অবঅ সুদো-সাংগর্ পথ। অসিজি মানুচ্চুনে সিয়েন উগুরেদি ন-যেবাক্; সিয়েন অবঅ তারাত্তে যিগুনে সুদ্ধো-সাংগর্ পধেদি চলন্। বাজে-বিবেক্ মানুচ্চুনে সে পধেদি ন-যেবাক্।

মথি লেখ্যে গম্ হবর্ 11:25

সে পরেদি যীশু কলঅ, ও বাবা, তুই স্বর্গ আর পিত্‌থিমীর গিরোজ্। মুই তর্ বাঈনী গরং, কিয়া তুই এই বেক্ বেপারানি জ্ঞানী আর বুদ্ধিবলাগুনোত্তুন্ লুগেই রাগেয়োচ্, মাত্তর্ চিগোন্‌গুরো ধোক্ক্যেন্ মান্‌জ্য ইধু ফগদাং গোজ্যস্।

লূকে লেখ্যে গম্ হবর্ 10:21

সেক্কে যীশু পবিত্র আত্মার্ দিয়্যে হুজিয়ে হুজি ওইনে কলঅ, ও বাবা, তুই স্বর্গ আর পিত্‌থিমীর প্রভু। মুই তর্ বাঈনি গরং, কিয়া তুই ইয়েনি বেক্ বিষয়ানি জ্ঞানী আর বুদ্ধিবলাগুনোত্তুন্ লুগেই রাগেয়োচ্ মাত্তর্ চিগোন্ গুড়ো ধোক্ক্যেন্ মানুচ্চুনো ইধু ফগদাং গোজ্যস্। অয় বাবা, তর্ আওজ্ মজিম্ ইয়েনি ওইয়্যে।

প্রেরিত্‌ 22:21

সেক্কে প্রভু মরে কলঅ, তুই যাহ্, মুই তরে দূরোত্ অযিহূদীগুনো ইধু পাধেম্।

প্রেরিত্‌ 28:2

সেই দ্বীপোর্ মানুচ্চুনে আমা সমারে ভারী গম্ বেবহার গুরিলাক্। সেক্কে ঝড় পড়ের্ আর ঠান্ডা এলঅ বিলিনে তারা আগুন জ্বালেইনে আমারে বেক্কুনোরে ডাগিলাক্।

প্রেরিত্‌ 28:4

সাপ্পোরে পৌল আঢত্ ঢুলদে দেগিনে সেই দ্বীপোর্ মানুচ্চুনে কুয়ো কি গরা ধুরিলাক্, “এ মানুচ্চো ঘেচ্চেকগুরি খুনী, কারন সাগর আঢত্তুন্ রোক্ষ্যে পেলেয়ো গম্ দেবেদাবো তারে বাঁজিবাত্তে ন-দিলো।”

প্রেরিত্‌ 9:15

মাত্তর্ প্রভু অননিয়রে কলঅ, “তুই যাহ্, কিয়া অযিহূদীগুনোর আহ্ তারার্ রাজাগুনোর আর ইস্রায়েলীয়গুনো ইধু মঅ পৌইদ্যেনে ফগদাং গুরিবাত্যে মুই এ মানুচ্চোরে বেঈ লোইয়োং।

রোমীয় 1:22

যুনিয়ো তারা নিজোরে জ্ঞানী বিলিনে দাবী গরলেয়ো আজলে তারা অঘা ওইয়োন।

রোমীয় 11:25

ভেইলগ্, তুমি যেন নিজোরে জ্ঞানী মনে ন-গরঅ সেনত্তে মুই এক্কান গুমুরো সত্য তমারে জানেই রাগেবাত্তে চাং। সেই সত্যগান্ ইয়েন-অযিহূদীগুনোরে গুণীনে ন-পুরোনা সং বেচ্‌ ভাগ্ ইস্রায়েলীগুনোর মনানি দরমর ওই থেবঅ।

রোমীয় 12:16

তমার্ একজন উগুরে অন্যর্ মনভাব্ যেন এক্কুই অয়। দাঙর্ মান্‌জ্যর্ ভাব্ ন-দেগেইনে বরং যিগুনে দাঙর্ মানুচ্‌ নয় তারা সমারে মিজেয়ো। নিজোরে জ্ঞানী মনে ন-গোজ্য।

রোমীয় 13:8

অন্য ইধু এক কোচ্‌পানার কজ্জ বাদে আর অন্য কনঅ কজ্জ যেন তমার্ ন-থায়। যিগুনে অন্যরে কোচ্‌পান সিগুনে মোশির রীদি-সুদোম মানি চলদন্।

রোমীয় 16:19

তমা বাধ্যতার কধা বেক্কুনে শুন্ন্যন্, আর সেনত্তে মুই তমা উগুরে হুজী ওইয়োং। মুই চাং যেন তুমি গমানরে চিনিনে মানি লঅ আর বজঙত্তুন্ দূরোত্ থাগঅ।

রোমীয় 8:12

সেনত্তে ভেইলগ্, আমি কজ্জ তলাত্, মাত্তর্ সেই কজ্জগুন্ পাপ-খাচ্চ্যদ ইধু নয়। পাপ-খাচ্চ্যদর্ অধীন্ ওইনে আর আমার চলিবার্ দরকার্ নেই।

১ করিন্হীয় 14:11

ইয়েনত্যে মুই যুনি কনঅ ভাষার্ অত্ত ন-বুঝোং সালে যে মানুচ্চো কধা কর্ তাইধু দঅ মুই অজানা বিদেশী ধোক্ক্যেন ওম্, আর তেয়ো মইধু সেধোক্ক্যেন্ অবঅ।

১ করিন্হীয় 14:16

সিয়েন ন-অলে যুনি তুই আত্মালোই ভালেদি জানাচ্ সালে সেই ভাষা বুঝি ন-পারে এন্ কনঅ মানুচ্‌ যুনি সিয়েনত্ থায়, সালে তে কেধোক্ক্যেন গুরি তর্ ভালেদিগান আমেন বিলিনে মানি লবঅ? তে দঅ কোই ন-পারে তুই কি কর্।

১ করিন্হীয় 2:13

আর সে দানানির্ কধা আমি কোই। সিয়েনি কবাত্যে আমি যেদক্কানি কধা বেবহার গুরিই সিয়েনি মান্‌জ্যর্ জ্ঞানত্তুন্ শিক্ষ্যে পেইনে ন-কোই, মাত্তর্ পবিত্র আত্মালোই শিক্ষ্যে পেইনে কোই। আত্মিক সত্য বুঝেবাত্তে আমি আত্মিক কধা বেবহার গুরিই।

১ করিন্হীয় 3:18

তুমি কেঅ নিজোরে ফাগি ন-দুয়ো। তমাত্তুন্ যুনি কেঅ এ যুগোর চিন্তেলোই নিজোরে জ্ঞানী মনে গরে সালে তে মূর্খ ওক্‌ যেন তে ঘেচ্চেকগুরি জ্ঞানী ওই পারে,

২ করিন্হীয় 10:12

তমা ভিদিরেত্তুন্ কেঅ কেঅ নিজোর্ নাঙ্ ফুদেবাত্যে চান্। আমি তারার্ দলত্ নিজোরে ফেলেবাত্যে বা তারা সমারে নিজোরে তুলোনা গুরিবাত্যে সাহচ্‌ ন-গুরিই। কি মূর্খ তারা। কিয়া তারা নিজে যিয়েন গম্ মনে গরন্, সিয়েন সমারে নিজোরে তুলোনা গরন্ আর সিয়েন্দোই নিজোরে বিচের্ গরন্।

২ করিন্হীয় 11:19

তুমি জ্ঞানী বিলিনে হুজি ওইনে বেদমাগুনোরে সোজ্জ্য গরঅ।

কলসীয় 3:11

এ অবস্থায় অযিহূদী বা যিহূদী ভিদিরে, চুনু মাঢা কাপ্যে বা চুনু মাঢা-ন-কাপ্যে মান্‌জ্য ভিদিরে, ব-কলম, নিচুজাদ্, চাগর্ বা গিরোজ মোধ্যে কনঅ ফারগ্ নেই; সিয়েনত্ খ্রীষ্ট আজল্ আর তে পত্তিজন ভিদিরে আঘে।

২ তীমথিয় 2:10

সেনত্যে গোজেনে যিগুনোরে বেঈ লোইয়্যে সিগুনোত্যে মুই বেক্কানি সোজ্জ্য গরঙর্, যেন তারায়ো খ্রীষ্ট যীশুলোই পাপত্তুন্ উদ্ধোর পান্ আর উমরর্ মহিমা লাভ গরন।

তীত 3:3

আমিয়ো আগে বুদ্ধি-নেইয়্যে আর অবাধ্য এলং, ভুল্ পধেদি চলিদোং, সুগী আর নানান্ বাবোত্যে কামনা-বাসনার চাগর্ এলং। আমি অন্যরে ইংসে গুরিদোং আর ক্ষোতি গুরিবার চিন্তেলোই জিংকানি কাদেদং। নিজে অন্যগুনোত্তুন্ ঈচ্ গরা হেইয়্যে অলেয়ো আমি একজন অারেক জনরে ঘিনেদং।