ফগদাং পেইয়্যে 5:8 - Chakma Bible

⁸ বোইবো লনার্ পর সেই চের্‌বো জেদা প্রাণী আর চব্বিচ্‌জন নেতা ভেড়া-ছবোর্ মুজুঙোত্ মাঢা নিগুরিলাক্। তারার পত্তিজনর্ আঢত্ এক্কো গুরিনে বীণা আর এক্কো গুরি আগর্‌বাট্টিলোই ভোরেয়্যে সনার কদরা এলঅ। সেই আগর্‌বাট্টিলোই ভোজ্যে কদরাগুন অলঅ গোজেন মানুচ্চুনোর তবনা।

ফগদাং পেইয়্যে 5:8 Iomraidhean Croise

গীতসংহিতা 141:2

মঅ তবনাগান্ যেন তুম্বাজ্ আগর্‌বাট্টি ধোক্ক্যেন্, মঅ আঢ্‌তান তুলোনা যেন সাজোন্যে উৎসর্ব ধোক্ক্যেন্ তঅ মুজুঙোত্ আজিল্ অন্।

গীতসংহিতা 150:3

তূরী বাজেইনে তারে নাঙ্ গিনো, বীণা আর সুরবাহার বাজেইনে তারে নাঙ্ গিনো।

গীতসংহিতা 33:2

বীণা বাজেইনে লগেপ্রভুরে ভালেদি জানঅ; তার্ নাঙে দশ তারর্ বীণা বাজঅ।

গীতসংহিতা 43:4

যেনে মুই গোজেনর পুজোবো ইদু যেই পারং। তেয়ই মর্ সুখ্ আর হুজি। ও গোজেন, মর্ গোজেন, মুই বীণা বাজেইনে তর্ বাঈনী গুরিম।

গীতসংহিতা 81:2

গান আরাম্ভ গরঅ, ঝোন্‌ঝোনি বাজঅ; বাজঅ মধুর বাশি আর হার্‌মোনি।

গণাণা 7:62

পৌইরেক্কোই ভোজ্যে একশত গ্রাম ওজনর্‌ এক্কো সনার্‌ চিগোন বাজোন্;

যোহন 1:29

তার্ কেল্যে যোহনে যীশুরে তা নিজো ইন্দি এত্তে দেগিনে কলঅ, “উইয়োবু চঅ, গোজেনর্ ভেড়া ছবুয়ো, যিবে মান্‌জ্যর্ বেক্‌ পাপ্পানি দূর্ গরে।

যোহন 5:23

যেন বাবরে যেবাবোত্যেগুরি বেক্কুনে সর্মান গরন্ সেবাবোত্যেগুরি পুয়োবোরেয়ো সর্মান গরন্। পুয়োবোরে যে সর্মান ন-গরে, যে তারে দিপাধেয়্যে সেই বাপ্পোরেয়ো তে সর্মান ন-গরে।

ইব্রীয় 1:6

না, তে সিয়েন ন-কয়। গোজেনে তার্ আজল্ পুয়োবোরে এ পিত্‌থিমীত দিপাধেবার অক্তত্ কোইয়্যেদে, “গোজেনর্ বেক্ দূত্‌‌তুনে তারে গোজেনর্ সর্মান দিইনে সালাম গোরোদোক্।”

ফগদাং পেইয়্যে 13:8

যিগুনে এ পিত্‌থিমীর, অত্তাৎ যিগুনোর্ নাঙান্ ভেড়া-ছবোর্ জিংকানি-বোইবোত্ লেঘা নেই তারা বেক্কুনে সেই য়েমান্নোরে গোজেনর্ সর্মান দিইনে সালাম গুরিবাক্। এই ভেড়া-ছবোরে পিত্‌থিমীগান সৃট্টি গুরিবার আগে মারে ফেলেবাত্যে ঠিগ্ গরা ওইয়্যে।

ফগদাং পেইয়্যে 15:2

সে পরেদি মুই আগুন মিজেয়্যে ফুদিগোর্ এক্কান সাগর ধোক্ক্যেন দেগিলুং, আর যিগুনে সেই য়েমান্নো আর তা মূত্তিবো আর তা নাঙানর্ লম্বর্‌‌বো উগুরে জিত্যন্ তারারেয়ো দেগিলুং। গোজেনর্ দিয়্যে বীণা আঢত্ গুরিনে তারা সেই ফুদিগোর্ সাগর পারত্ থিয়্যেই এলাক্।

ফগদাং পেইয়্যে 15:7

সেই চের্‌জন জেদা পরাণবলাগুনোর্ একজন সেই সাতজন স্বর্গদূতোরে সাত্‌টো সনার কদরা দিলো। গোজেন, যিবে যুগ যুগ ধুরিনে উমর্ সং জেদা আঘে, সেই কদরাগুন তার রাগে ভরা এলঅ।

ফগদাং পেইয়্যে 19:4

গোজেন, যিবে সিংহাসনত্ বৈ আঘে তারে সেই চব্বিচ্‌জন নেতা আর সেই চের্‌বো জেদা প্রাণী মাঢা নিগুরিনে সালাম গুরিনে কলাক্, “আমেন। হাল্লেলূয়া!”

ফগদাং পেইয়্যে 4:10

সেক্কে সেই চব্বিচ্‌জন নেতা সিংহাসনর অধিকারী, অত্তাৎ যিবে উমরত্যে জেদা আঘে তারে মাঢা নিগুরিনে সালাম গরন্। এই নেতাগুনে সেক্কে সেই সিংহাসনান মুজুঙোত্ তারার মুকুট্‌তুন খুলি থোইনে কদন্দে,

ফগদাং পেইয়্যে 4:4

সেই সিংহাসনানর চেরোকিত্যেদি আরঅ চব্বিচ্চান সিংহাসন এলঅ, আর সেই সিংহাসনানিত্ চব্বিচ্‌জন নেতা বৈ এলাক্। তারার পোজাগ্‌কানি এলঅ ধুব্ আর তারার মাঢাত্ সনার মুকুট এলঅ।

ফগদাং পেইয়্যে 4:6

সেই সিংহাসনান মুজুঙোত্ যেন ফুদিগো ধোক্ক্যেন পোত্‌পোত্যে এক্কান কাচ ধোক্ক্যেন সাগর এলঅ। সেই সিংহাসনান সংমধ্যে সিংহাসনানর চেরোকিত্যেদি চেরজন জেদা পরাণবলা এলাক্। সিগুনোর্ মুজুঙেদি আর পিজেদি চোগ্‌কোই ভরণ এলাক্।

ফগদাং পেইয়্যে 4:8

এই চের্‌বো জেদা পরাণবলার্ পত্তিবোর্ ছ'গান গুরি ডুয়ো এলঅ আর বেক্‌ জাগানিত্ চোগ্‌কোই ভরণ এলঅ। সেই পরাণবলাগুনে দিনে-রেদে এ কধাগান কধন্, “বেগত্তুন্ খেমতাবলা প্রভু গোজেন, যিবে এলঅ, যিবে আঘে আর যিবে এজের্, তে পবিত্র, পবিত্র, পবিত্র।”

ফগদাং পেইয়্যে 5:11

যেরেদি মুই দেগিলুং; আর মুই সেই সিংহাসন, জেদা প্রাণী আর নেতাগুনোর চেরোকিত্যে ভালোক্কুন স্বর্গদূতোর্ রঅ শুনিলুং। সেই স্বর্গদূত্‌তুনে এলাক্ জনেদি আজার আজার, কোটি কোটি।

ফগদাং পেইয়্যে 5:12

তারা জোরে জোরে এ কধাগান কদন্: “যে ভেড়া-ছবোরে মারে ফেলা ওইয়্যে, তেয়ই খেমতা, ধন, জ্ঞান, বল্, সম্মান, বাঈনী আর নাঙ্ গিনে হেবার যোগ্য।”

ফগদাং পেইয়্যে 5:14

সেই চের্‌‌‌বো জেদা প্রাণীয়ে কলাক্, “আমেন”। সে পরেদি সেই নেতাগুনে মাঢা নিগুরিনে জু জু জানেলাক্।

ফগদাং পেইয়্যে 5:6

চের্‌বো জেদা প্রাণী আর নেতাগুনো সংমধ্যে যে সিংহাসনান্ এলঅ সিয়েন উগুরে এক্কো ভেড়া-ছরে মুই থিয়্যেই থাগদে দেগিলুং। মর্ মনে অত্তে যেন সেই ভেড়া-ছবোরে মারে ফেলা ওইয়্যে। সেই ভেড়া-ছবোর্ সাত্‌টো শিং আর সাত্‌টো চোগ্ এলাক্। গোজেনর্ যে সাত্‌টান আত্মারে পিত্‌থিমীর বেক্‌ জাগানিত্ দিপাধা অয় এই চোগ্‌কুন এলাক্ সেই সাত্‌টান আত্মা।

ফগদাং পেইয়্যে 6:1

ভেড়া-ছবো যেক্কে সেই সাত্‌টো সীলমহ্‌‌রর পত্তম্মো ভাঙের্ সেক্কে মুই রিনি চেলুং; আর মুই সেই চের্‌বো জেদা প্রাণী ভিদিরে এক্কোরে দেবা পেরাগ পড়েদে ধোক্ক্যেন আবাজ রলোই কধা কধে শুনিলুং, “আয়।” সেক্কে মুই এক্কো ধুব্ ঘোড়া দেগিলুং।