ফগদাং পেইয়্যে 18:13 - Chakma Bible

¹³ দারচিনি, এলাচ, আগর্‌বাট্টি, আতর আর তুম্বাজ্ রস; আংগুর-রস, জলপাইয়র্ তেল, মোয়দ্যে আর গম; গরু আর ভেড়া, ঘোড়া আর গাড়ী আর কিন্যে চাগর্।

ফগদাং পেইয়্যে 18:13 Iomraidhean Croise

১ রাজাবলী 10:10

তে রাজারে সাড়ে চের্‌ টনত্তুন্‌অ বেশ্‌ সোনা, ভালোক্কানি তুম্বাজ্‌ মজলা আর মানেক্‌ দিলো। শিবার রাণী রাজা শলোমনরে যেদক্কানি মজলা দিয়্যে সেদক্কানি মজলা আর কনদিনঅ দেজত্‌ আনা ন-অয়।

১ রাজাবলী 10:15

ইয়েনিবাদেয়ো বণিক আর সদাগরুনোর্‌ ইত্তুন্‌, আরবীয় রাজাগুনো ইত্তুন্‌ আর দেজর্‌ শাজন্‌গুরিয়্যেগুনো ইত্তুনঅ সোনা এদঅ।

১ রাজাবলী 10:25

যিগুনে এদাক্‌ তারা বেক্কুনে কিজু না কিজু বক্‌শিজ্ আনিদাক্‌। সিগুনো ভিদিরে এলদে সোনা-রূবোর পিলে, কাবড়-চুগোড়, আত্যের্, তুম্বাজ্‌ মজলা, ঘোড়া আর খচ্চর। বজরকে বজর্‌ এবাবোত্যেগুরি আনিদাক্।

১ বংশধর 5:21

তারা হাগরীয়গুনোর পঞ্চাশ আজার্ উট, আড়ি লাখ্‌ ভেড়া আর দ্বিআজার্ গাধা কারি নেযেলাক্‌ আর এক লাখ্‌ মান্‌জ্যরে বন্দী গুরি নেযেলাক্‌।

২ বংশধর 9:9

তে রাজারে চের্‌ আজার পাঁচশ বাওত্তুর্ কেজি বেশ্‌ সোনা, ভালোক্কানি তুম্বাজ্‌ মজলা আর মণি-মুত্তো দিলো। শিবার রাণী রাজা শলোমনরে যে বাবোত্যে মজলা দিয়্যে সে বাবোত্যে মজলা আর কনদিন্‌অ দেজত্‌ দেগা ন-যায়।

নহিমিয় 5:8

মুই কলুঙ্‌, “অযিহূদীগুনোর্‌ ইদু আমার্‌ যিদুক্কুন্‌ ভেই বেজা যেইয়োন্‌ যিদ্দুর্‌ সম্ভব্‌ তারারে আমি ছাড়িনে আন্যেই। আর ইক্কিনে তুমি তমা ভেইয়ূনোরে বিজিবাত্তে বাধ্য গোজ্য, যিয়েনর কারনে আমাত্তুন্‌ আরঅ তারারে কিনি নেযা পুরিবো।” এ কধাগান শুনিনে তারা জুরো গুরিনে থেলাক্‌, কিত্যে জোব্‌ দেদে ধোক্কেন্‌ তারা কনকিজু তোগেইনে ন-পেলাক্‌।

যাত্রা 21:16

যুনি কনজনে কাররে চুর্‌ গুরি আনিনেই বিজি দুয়োন্‌ বা যুনি তারে তা লগে পাহ্ যায়, সালে হামাক্কায়্‌ তারে মারে ফেলা পুরিবো।

গম্ উপদেজ্ 7:17

গন্ধরস, অগুরু আর দারচিনিলোই মঅ বিচ্ছোনান্ তুম্বাজ্ গোজ্যং।

পরমগীত 1:3

তঅ তেলানর্ তুম্বাজ্‌চানে হুজি রাগায়; ঢালি দিয়্যে তুম্বাজ তেল ধোক্ক্যেন্ তঅ নাঙান্। সেনত্তে দঅ মিলেগুনে তরে কোচ্‌পান।

পরমগীত 3:6

ধূল্যেচর-চাগালাত্তুন্ ধূমো খুদো ধোক্ক্যেন্ যে এজের্ সিবে কন্না? সে ধূমো খুদোবোত্ আগেদে বেবসায়িগুনোর নানান্ বাবোত্যে মজলা, তুম্বাজ রস্ আর তুম্বাজ আগর্‌বাট্টির্ বাজ্।

পরমগীত 5:5

মর্ পরাণ্যেরে দোরান্ খুলি দিবাত্তে মুই উদিলুং, মঅ আঢ্‌তান তুম্বাজ রসে ভিজে এলঅ, মঅ আঙুলুনোর্ তুম্বাজ রসর্ গঙারে দোরানর্ হেন্ডেল্লো ভিজিলো।

যিশাইয় 50:1

লগেপ্রভু কত্তে, “মুই যে ছুড়্ কাবোজ্‌চান দিইনে তমা মাবোরে দূর্ গুরি দুয়োং সিয়েন কুদু? মর্ লোনদিয়্যেগুনোর ভিদিরেত্তুন্ কাইদু মুই তমারে বিজি দুয়োং? তমা পাপত্তে তুমি বেজা যেইয়ো; তমা অন্যেয়ত্তে তমা মাবোরে দূর্ গরা ওইয়্যে।

যিহিষ্কেল 27:13

গ্রীস, তূবল আর মেশকে তঅ লগে বেবসা গুরিদাক্; তারা তর্ পযাপিরানির বদলে চাগর্-চাগরানি আর পিদোল পিলে দিদাক্।

আমোষ 2:6

লগেপ্রভু কত্তে, ইস্রায়েলর তিনেন্ পাপ, এন্ কি, চেরান পাপর্ কারনে মুই হামাক্কায় তারে সাজা দিম। তা মানুচ্চুনে টেঙা-পোজেত্যে গম্ মানুচ্চুনোরে আর টেঙর্ এক জড়া জদাত্তে নাঢাগুনোরে বেজন্।

আমোষ 6:6

তুমি কদরা ভুরিনে আংগুর-রস খঅ আর বেগত্তুন্ গম্ তুম্বাজ্ তেল কিয়্যেত্ মাজঅ, মাত্তর্ তুমি যোষেফর্, অত্তাৎ ইস্রায়েলর ভস্ত অনাত্তে দুঘ্ ন-পেয়ো।

আমোষ 8:6

রূবোলোই নাঢা মান্‌‌‌‌জ্যরে আর এক জড়া জদালোই অভাবীরে কিনি নেযেম আর ঝান্দালোই ফেলে দিয়্যে গমুন্ তারা ইধু বেজি দিম।”

দ্বি’লম্বর বিররণ 24:7

যুনি দেগা যায়দে, কনঅ মানুচ্‌ কনঅ ইস্রায়েলীয় ভেইয়োরে চুর্‌ গুরি নেযেইনে চাগর্‌ ইজেবে বেবহার গোজ্যে বা বিজি দিয়্যে, তো সে চুর্‌বোত্তুন্‌ মরা পুরিবো। তমা ভিদিরেত্তুন্‌ তুমি এবাবোত্যে ভান্ন্যেইয়ানি শেজ্‌ গুরি ফেলেবা।

দ্বি’লম্বর বিররণ 28:68

মিসরত যানা পৌইদ্যেনে মুই তারারে কোইয়োং, সেই পথতানন্দি আর কনদিনঅ তমাত্তুন টেং দিয়্যে ন-পুরিবো; মাত্তর্‌ লগেপ্রভু সেক্কে জাহাজত্‌ ভোরেইনে তমারে মিসরত ফেরৎ পাদেব। সিয়েনত্ তুমি চাগর আর চাগরানি ইজেবে শত্রুগুনো ইদু নিজোরে বিজি দিবাত্তে চেবা মাত্তর্‌ কনজনে তমারে ন-কিনিবাক্।”

১ তীমথিয় 1:10

যিগুনে সিনেলী গরন, যিগুনে সমকামী, যিগুনে চাগর বেবসা গরন্, যিগুনে মিজে কধা কন্ আর মিজে সাক্ষি দুয়োন, আর যিগুনে সত্য শিক্ষ্যের বিরুদ্ধে অন্য কনঅ কাম্ গরন।

২ পিতর 2:3

লুভে পড়িনে ছলনার্ কধা কোইনে তারা নিজো লাভত্যে তমারে কামত্ লাগেবাক্। তারার্ সাজাগান ভালোক দিন ধুরিনে তারা উগুরে দুলের্, আর তারার্ ভস্ত অনাগান জুরো গুরিনে বোইদ্যে নেই।

ফগদাং পেইয়্যে 18:14

সেই বেবসায়ীগুনে কবাক্, “যে ফল তুই লাভ গুরিবাত্যে চেইয়োচ্ সিয়েন তত্তুন্ দূরোত্ সুরি যেইয়্যে; তর বেক্‌ ধন আর সয়সাগোজ্জ্যেগানি ভস্ত ওই যেইয়্যে। মান্‌জ্যে আর কনদিনঅ সিয়েনি ন-পেবাক্।”

ফগদাং পেইয়্যে 18:15

যিগুনে এ জিনিস্‌চানির বেবসা গুরিনে থাগোইয়্যে ওইয়োন সেই বেবসায়ীগুনে তার্ যন্ত্রণাগান দেগিনে দরে দূরোত্ থিয়্যেই থেবাক্।