ফগদাং পেইয়্যে 17:3 - Chakma Bible

³ সে পরেদি সেই স্বর্গদূত্‌তো মরে ধূল্যেচর চাগালাত্ নেযেল। সেক্কে মুই পবিত্র আত্মার্ অধিনোত্ এলুং। সিয়েনত্ মুই এক্কো মিলেরে এক্কো রাঙা রংয়র্ য়েমান উগুরে বৈ থাদে দেগিলুং। গোজেনরে অগমান গুরিবাত্যে ভালক্কানি নাঙ্ সেই য়েমান্নো উগুরে লেগা এলঅ। তার্ সাত্‌টো মাঢা আর দোচ্‌শো শিং।

ফগদাং পেইয়্যে 17:3 Iomraidhean Croise

১ রাজাবলী 18:12

মুই তরে ফেলেই গেলে লগেপ্রভুর আত্মাগান্‌ তরে অন্য কন্‌ জাগাত্‌ নেযেব যিয়েন্‌ মুই হ্‌বর ন-পাং। মুই যেইনে আহাবরে কনার্‌ পরেন্দি যুনি তে তরে তোগেইনে ন-পাই সালে তে মরে মারে ফেলেব। মাত্তর্‌ চিগনত্তুন্‌ ধুরি তঅ চাগর্‌ মুই লগেপ্রভুরে ভোক্তি গুরিনে দোরেনেই এজঙর্‌।

২ রাজাবলী 2:16

“চাহ্, আমি ইয়োত্‌ তর্‌ পঞ্চাশজন বোলী চাগর্‌ আগিই; আমি যেইনে তঅ গিরোজ্‌সোরে তোগেই চেই। লগেপ্রভুর আত্মাগানে অয়ত তারে তুলি নেযেইনে কনঅ মুড়ো-মুড়িত্‌ বা কনঅ কিজিঙোত্‌ লামে রাগেয়্যে।” ইলীশায় কলঅ, “না, নঅ-যেয়ো।”

পরমগীত 8:5

তার পরাণ্যে উগুরে ভর্ দিইনে ধূল্যেচর-চাগালাত্তুন্ যে এজের্ সিবে কন্না? আপেল গাজ তলে মুই তরে জাগেলুং; তঅ মা সিয়েনত্ পুয়ো পুদেইনে তরে জর্ম দিয়্যে।

যিহিষ্কেল 11:24

সে পরেদি গোজেনর আত্মাগানে মরে তুলি নিলো আর তার দিয়্যে দর্শনর ভিদিরেদি আরঅ বাবিলোত্ বন্দীগুনো ইধু নেযেল। যে দর্শনান্ মুই দেখ্যং ইয়েনর পরেদি সিয়েন শেজ্ ওই গেলঅ।

যিহিষ্কেল 3:12

সে পরেদি গোজেনর আত্মাগানে মরে তুলি নিলো, আর মুই মঅ পিজেদি জোরে কোইয়্যে এ কধাগান শুনিলুং, “লগেপ্রভুর থেবার্ জাগানত্ তার্ মহিমার বাঈনী ওক্।”

যিহিষ্কেল 8:3

তে আঢ্‌তান বাবেইনে মঅ মাঢাবো চুলানি ধুরিলো। সেক্কে গোজেনর আত্মাগানে মরে আগাজত্ তুলি নেযেল আর গোজেনর দিয়্যে দর্শনর্ ভিদিরে তে মরে যিরূশালেমর উবোসনা-ঘর ভিদিরে উদোনর্ উত্তোরেদি গেদোত্ সোমেবার পথ্‌তানত্ নেযেল। সিয়েনত্ এমন এক্কো মূত্তি এলঅ যিবে গোজেনর রাগ্‌কান তুলি দিয়্যে।

দানিয়েল 11:36

উত্তরেদি রাজাবো নিজো আওজ্ মজিম কাম্ গুরিবো। বেক্ দেবেদাগুনোত্তুন্ তে নিজোরে দাঙর্ গুরি দেগিবো আর যিবে দেবেদগুনোর গোজেন তা বিরুদ্ধেয়ো দাঙর্ দাঙর্ কধা কবঅ। গোজেনর রাগ্‌‌কান পুরোপুরিগুরি ঢালি ন-দেনা সং তে সফল অবঅ, কিত্যে যিয়েন থির্ গরা ওইয়্যে সিয়েন ‌‌হামাক্কায় ঘুদিবো।‌‌

দানিয়েল 7:20

তা মাঢাত্ দোশ্‌‌‌‌‌‌‌‌‌‌চো শিং পৌইদ্যেনে আর অন্য যে শিঙো উঠ্যে, যিবের মুজুঙোত্ তিন্নো শিং পড়ি যেইয়্যে, যিবের্ চোগ আর বাড়্‌‌‌‌‌‌‌‌‌‌বো গোজ্যে মু এলঅ আর যিবে অন্যগুনোত্তুন্ দাঙর্ ওই উঠ্যে, সেই শিঙুনো পৌইদ্যেনে জানিবাত্তে চেলুং।

দানিয়েল 7:25

দাঙর্ গোজেন বিরুদ্ধে তে কধা কবঅ আর তা মানুচ্চুনো উগুরে অত্যেচার গুরিবো। সে ঠিগ্ গোজ্যে দিনুন্ আর রীদি-সুদোম বুদুলিবার চেট্ট্যা গুরিবো। গোজেনর সেই মানুচ্চুনোরে সাড়ে তিন বজরত্তে তা আঢত্ তুলি দিয়্যে অবঅ।‌‌‌‌‌‌‌‌‌‌

দানিয়েল 7:8

মুই যেক্কে সেই শিঙুনোরে রিনি চাঙর্ সেক্কে আর এক্কো চিগোন্ শিং সিগুনোর সংমোধ্যে উদিলো; তা মুজুঙোত্ আগ শিঙুনো ভিদিরেত্তুন্ তিন্নো উগুরে ফেলা অলঅ। এ শিঙোর্ মান্‌‌‌‌জ্য চোগো ধোক্ক্যেন চোগ এলাক্ আর এক্কান মু এলঅ যিয়েনে বাড়্‌‌‌‌বো গুরি কধা কর্।

মথি লেখ্যে গম্ হবর্ 27:28

তারা যীশুর কাবড়-চুগোড়ানি খুলিনে তারে রাঙা রঙর্ কাবড় উরেই দিলাক্।

প্রেরিত্‌ 8:39

যেক্কে তারা পানিত্তুন্ উদি এলাক্ সেক্কে প্রভুর আত্মাগানে আদিক্ক্যে গুরি ফিলিপরে নেযেল। সেই চাগর্‌বো আর তারে ন-দেগিলো। সেক্কে তে ফুত্তি গত্তে গত্তে ঘর পধেদি গেলঅ।

২ থিষলনীকীয় 2:4

গোজেন বিলিনে যিয়েনি আঘে সিয়েনি বেক্কানির্ বিরুদ্ধে আর উবোসনা গরেদে ধোক্ক্যেন বেক্কানির্ বিরুদ্ধে থিয়্যেইনে তে নিজোরে দাঙর্ গুরি দেগেব; এমন্‌ কি, তে গোজেনর্ উবোসনা-ঘরত্ বৈইনে নিজোরে গোজেন বিলিনে দাবী গুরিবো।

ফগদাং পেইয়্যে 1:10

প্রভুর দিনোত্ পবিত্র আত্মাগানে মরে পরিচালনা গোজ্জ্যে। এন্ সময়োত্ মঅ পিজেদি তূরীর রঅ ধোক্ক্যেন একজনর দাঙর্ রঅ শুনিলুং।

ফগদাং পেইয়্যে 12:14

সেক্কে সেই মিলেবোরে এক্কো দাঙর্ ঈগলর্ দ্বিয়েন দুয়ো দিয়্যে অলঅ যেন তে ধূল্যেচরত্ তা জাগানত্ উড়িনে যেই পারে। সিধু সেই সাব্‌পোর্ চোগো আন্দলে সাড়ে তিন বজর্ তারে যত্তন্ গরা অবঅ।

ফগদাং পেইয়্যে 12:3

সে পরেদি স্বর্গত্ আর এক্কান চিহ্নো দেগা গেলঅ-আগুনো ধোক্ক্যেন রাঙা এক্কো দাঙর্ দানব্। তার্ সাত্‌টো মাঢা আর দশ্‌চো শিং, আর মাঢাগুনোত্ সাত্‌টো মুকুট এলাক্।

ফগদাং পেইয়্যে 12:6

আর সেই মিলেবো ধূল্যেচরত্ ধেই গেলঅ। গোজেনে সেই ধূল্যেচরত্ তাত্যে এক্কান জাগা থিক্ গুরি থোইয়্যে যেন এক আজার দ্বিশঅ ষায়েত দিন তে সিধু যত্তন্ পায়।

ফগদাং পেইয়্যে 17:18

যে মিলেবোরে তুই দেখ্যচ্ তে অলঅ সেই নাঙ্-গোজ্জ্যে শঅরান্, যে জগদর্ বেক্ রাজাগুনো উগুরে রাজাগিরি গরের্।”

ফগদাং পেইয়্যে 17:4

সেই মিলেবো বিগুনি আর রাঙা রংয়র্ পোজাক্ এলঅ আর তা কিয়্যেত্ সনা, মংগা মংগা পাত্তর্ আর মুক্তোর গয়না এলঅ। জঘণ্য জিনিচ্‌ আর তার্ বেভিচারর্ কজরালোই ভরা এক্কো সনার কদরা তা আঢত্ এলঅ।

ফগদাং পেইয়্যে 18:12

তারার সেই জিনিচ্চানি ভিদিরে আঘে-সনা, রূবো, মংগা পাথর আর মুক্তা; কচি মসীনার্ কাবড়, বিগুনী রংয়র্ কাবড়, রেশমী আর রাঙা কাবড়; নানান্ বাবোত্যে তুম্‌বাচ্‌ গাজ আর এদো দাতর্ বানেয়্যে নানান্ বাবোত্যে জিনিচ্‌; ভারী মংগা গাজ্‌চোই বানেয়্যে আর পিদোল, লুয়ো আর মার্বেল পাথরলোই বানেয়্যে নানান্ জিনিচ্‌;

ফগদাং পেইয়্যে 18:16

তারা কানি কানি দুঘ্ পেইনে কবাক্, “হায়, হায়! নিগুজ্ মসীনা কাবড় আর বিগুনী আর রাঙা কাবড় পিন্ন্যে আর সনা, মংগা পাথর আর মুক্তোলোই সাজেইয়্যে সেই নাঙ-গোজ্জ্যে শঅরান্!

ফগদাং পেইয়্যে 21:10

যেরেদি সেই স্বর্গদূত্‌তো মরে এক্কো দাঙর্ আর অজল্ মূড়োত্ নেযেল। সেক্কে মুই পবিত্র আত্মায় পরিচালিত এলুং। গোজেনর্ মহিমালোই জ্বোল্‌জোল্ল্যে যে পবিত্র শঅরান যিরূশালেম স্বর্গর্ ভিদিরেত্তুন্ আর গোজেনত্তুন্ লামি এজের্ তে মরে সিয়েন দেগেল।

ফগদাং পেইয়্যে 4:2

আর সেলক্কে মুই পবিত্র আত্মার চালে স্বর্গত্ এক্কান সিংহাসন দেগিলুং। মুই দেগিলুং, সেই সিংহাসনত্ একজন বৈ আঘে।