গণাণা 18:3 - Chakma Bible

³ তর্‌ অধীনোত্‌ থেইনে সাক্ষ্য-তাম্বুলোর বেক্‌ কামানি তারাত্তুন্‌ গরা পুরিবো, মাত্তর্‌ পবিত্র তাম্বুলোর কনঅ জিনিজো ইদু বা পূজোবো ইদু তারা যেই ন-পারিবাক্। সিয়েন গুরিলে তুমি আর তারা বেক্কুনে মারা পুড়িবা।

গণাণা 18:3 Iomraidhean Croise

যিহিষ্কেল 44:13

তারা ধর্মগুরু ইজেবে মরে সেবা গুরিবাত্তে মইধু ন-এবাক্ বা মর্ কনঅ সুদ্ধো-সাংগ বা যদবদে সুদ্ধো-সাংগ জিনিজো ইধু এই ন-পারিবাক্; তারার্ জঘন্য আচার-বেবহারর্ লাজানাগান তারাত্তুন্ ভুগো পড়িবো।

গণাণা 1:51

থেবার্‌-তাম্বুলান যেক্কে অন্য কনকিত্তে নেযা পুরিবো সেক্কে লেবীয়গুনেই সিবে খুলিবাক আর যেক্কে সিবে মিলেই জানা পুরিবো সেক্কে তারাত্তুনো সিবে মিলে পুরিবো। অন্য কনজনে তাইদু গেলে তারে মারে ফেলা অবঅ।

গণাণা 1:53

যেনে ইস্রায়েলীয়গুনো উগুরে লগেপ্রভুর সাজা লামি ন-এজে সেনত্তে সাক্ষ্য-তাম্বুলর্‌ চেরোকিত্তে লেবীয়গুনে তাম্বুল বানেইনে থাহ্‌ পুরিবো। সাক্ষ্য-তাম্বুলোর দেগাশুনোত্তে লেবীয়গুনেই দায়ী থেবাক্।”

গণাণা 16:40

মোশিরে দিইনে লগেপ্রভু তারে যে উগুমান দিয়্যে তে সিয়েনোই গুরিলো। ইয়েন গরা অলঅ যেনে ইস্রায়েলীয়গুনে মনত্‌ রাগান, হারোণর বংশধর বাদে আর কনজনে পৌইরেগ্ জ্বালেবাত্তে লগেপ্রভুর মুজুঙোত্‌ যেই ন-পারন; যুনি কনজনে যান্‌ সালে তার্‌ অবস্থা কোরহ আর তার দলর মানুচ্চুনো ধোক্ক্যেন অবঅ।

গণাণা 18:4

তারা তর্‌ কামত্‌ মিজেবাক; মিলন-তাম্বুলোর দেগাশুনোর ভারান্‌, অত্তাৎ সেই তাম্বুলোর বেক্‌ কামর্‌ ভারান্‌ তারা উগুরে থেবঅ। মাত্তর্‌ তমা ইদু লেবীয়গুনে বাদে অন্য কনজনে যেই ন-পারিবাক্।

গণাণা 18:7

মাত্তর্‌ ধর্মগুরু্‌ ইজেবে বানা তুই আর তর্‌ পূঅগুনে পূজোবোর আর পর্দার ভিদিরে কামানি গুরি পারিবাক্। ধর্মগুরুর্ কামান্ মুই দান ইজেবে তমারে দুয়োঙর্। লেবীয়গুনে বাদে আর কনজনে যুনি মিলন-তাম্বুলোর চাগালা ইদু এজন্‌ সালে তারে মারে ফেলা অবঅ।”

গণাণা 3:25

মিলন-তাম্বুল পৌইদ্যেনে গের্শোনীয়গুনোর্‌ দায়িত্তো এলঅ থেবার-তাম্বুলান, তা উগুরে বিজেইয়ে ছাগল কেজর্‌ ঢাগনি, তা উগুরে ছাল্‌ দ্বিয়েন, মিলন-তাম্বুলত চুমিবার্‌ দোরানর পর্দাগান্‌,

গণাণা 3:31

কহাতীয়গুনোর দায়িত্তো এলদে সাক্ষ্য-সুন্দুক্কো, টেবিল, চেরাগ বদং, পূজোগুন্‌, পবিত্র তাম্বুলর সেবা-কামত্‌ বেবহারর্‌ পযা-পিরানি আর দাঙর্‌ পবিত্র জাগানর্‌ পর্দাগানি দেগাশুনো গরানা আর ইয়েনি সমারে অন্য বেক্‌ কামানি গরানা।

গণাণা 3:36

মরারীয়গুনোর্‌ দায়িত্বো এলদে থেবার-তাম্বুলোর ফ্রেমানি, তার হুক্, খুদো, টেঙানি আর তার্‌ বেক্‌ পযাপিরানি,

গণাণা 31:30

ইস্রায়েলীয়গুনোর্‌ ভাগত্‌ যিদুক্কুন্‌ মানুচ্‌, গোরু, গাধা, ভেড়াছাগল, ছাগল বা অন্য যে কনঅ য়েমান পরিবাক্ তার্‌ পত্তি পঞ্চাশ্‌চুয়োত্তুন্‌ এক্কোত্‌ ধরে ফারগ গুরি রাগেবে। সিগুন্‌ তুই লেবীয়গুনোর্‌ আঢত্‌ দিবে যিগুনো উগুরে থেবার্‌-তাম্বুলান দেগাশুনোর্‌ ভারান্ আঘে।”

গণাণা 4:15

“হারোণ আর তার্‌ পূঅগুনে যেক্কে এই বেক্‌ পবিত্র পজা-পিরানি আর পবিত্র তাম্বুলোর পজা-পিরানি নাঢি দেনা শেজ্ গুরিবাক আর মানুচ্চুনে তাম্বুলান বুদিনে যেবাত্তে যুক্কোল্‌ অবাক্‌ সেক্কে কহাতীয়গুনে এই বেক্কানি বুয়োই নেযেবাত্তে এবাক। মাত্তর্‌ কনঅ পবিত্র জিনিজোত্‌ তারার্‌ আত্‌ বাজেই ন-পারিবাক্। বাজেলে তারা মুরি যেবাক। মিলন-তাম্বুলোত্‌ যেদক্কানি জিনিস থেবঅ কহাতীয়গুনোর্‌ সিয়েনি বুয়োই নেযা পুরিবো।