নহিমিয় 5:11 - Chakma Bible

¹¹ ইক্কিনে তুমি তারার্‌ ভূইয়ানি, আংগুর ক্ষেত্‌তানি, জলপাইয়োর্‌ বাগানানি আর ঘরানি তারারে ফিরেই দুয়ো, আর টেঙা, ধান, নূয়ো আংগুর-রস আর তেলত্তেই শতকরা যে সুদ্‌তুন তুমি নেযেয়ো সিয়েনঅ তারারে ফিরেই দুয়ো।”

নহিমিয় 5:11 Iomraidhean Croise

২ শমূয়েল 12:6

তে এক্কেনায়ো দোয়্যে ন-গুরিনে এ কামান্‌ গোজ্যে বিলিনে তাত্তুন্‌ সে ভেড়া ছঅবোর্‌ চেরগুন্‌ দাম দিয়্যে পুরিবো।”

নহিমিয় 5:10

মানুচ্চুনোর ইত্তুন্‌ মর্‌, মর্‌ ভেইয়ূনোর্‌ আর মর্‌ কামগুরিয়্যেগুনোর্‌অ টেঙা আর ধান পেবার্‌ আঘে। মাত্তর্‌ এজঅ, আমি ইগুন্‌ বেক্কুন্‌ মাফ্‌ গুরি দিই।

নহিমিয় 5:12

এ কধাগান শুনিনে তারা কলাক্‌, “আমি বেক্কানি ফিরেই দিবোং। আমি তারাত্তুন্‌ আর কিচ্ছু দাবি ন-গুরিবোং। তুই যিয়েনি কলে আমি সিয়েনি গুরিবোং।” সে পরেন্দি মুই ধর্মগুরুগুনোরে ডাগিনে পাদেলুঙ্‌ আর মুরুব্বীগুনোরে আর নেতাগুনোরে দিইনে শমক্‌ খাবেলঙ্‌ যেনে তারা তারার্‌ শমক্‌ অনুসারে কাম্‌ গরন্‌।

যিশাইয় 58:6

আজলে মুই এবাবোত্যে উবোস্ থানাগান্ চাং: তুমি অবিচারর শিগোল্ আর জুঙোল দুড়িগান খুলি দুয়ো, অত্যেচারিত গুনোরে মুক্তি দুয়ো আর পত্তি জুঙোল্ ভাঙি ফেলঅ,

লূকে লেখ্যে গম্ হবর্ 3:8

তুমি যে পাপত্তুন্ মনানি ফিরেয়ো সিয়েনির্ যগাজ্যে ফল্ তমা জিংকানিত্ দেগঅ। নিজে মনে ন-গোজ্য যে, তুমি অব্রাহাম গুট্টির্ মানুচ্। মুই তমারে কঙর্, এ পাত্তরুনোত্তুন্ গোজেনে অব্রাহামর গুট্টি বানেই পারে।

দ্বি’লম্বর বিররণ 6:11

এধোক্ক্যেন বেক্‌ গম্‌ গম্‌ জিনিস্‌ছোই ভোজ্যে ঘর-বাড়ী যে বেক্‌ পযাপিরানি তুমি নিজে এগত্তর্‌ ন-গরঅ, এধোক্ক্যেন পানি রাগেবার্‌ জাগা যিয়েনি তুমি নিজে কাবিনে ন-বানঅ আর এধোক্ক্যেন আংগুর ক্ষেত্‌ আর জলপাই বাগান যিবের্‌ গাজপালা তুমি নিজেয়ো ন-লাগঅ। মাত্তর্‌ সিদু খেই-দেই ঈল্‌ অবার্‌ পরেন্দিয়ো উঝিয়ার্‌ থেয়ো যেনে তুমি লগেপ্রভুরে ভুলি ন-যঅ, যিবে মিসর দেজর্‌ চাগর কাদানাত্তুন্‌ তমারে নিগিলেই আন্যে।

১ শমূয়েল 12:3

মুই ইয়োদোই আগং; মর্‌ বিরুদ্ধে যুনি তমার কিজু কবার্‌ থায় সালে লগেপ্রভু আর তার অভিষেগ-গোজ্যে মানুচ্চোর মুজুঙোত্‌ সিয়েনিই কঅ। তুমি সাক্ষি দুয়ো, মুই কার্ বলত্তো বা কার্ গাধাবো অন্যেয়গুরি নেযেয়োং? মুই কার উগুরে অত্যেচার গোজ্যং? কার উগুরে বজং বেবহার গোজ্যং? কাত্তুন্‌ ঘুষ নেযেইনে মুয়োন বন্ধ গুরি রাগেয়োং? ইয়েনির কনগান যুনি মুই গুরি থাং সালে সিয়েনির ক্ষতিপূরণ দিম।”