মীখা 7:11 - Chakma Bible

¹¹ ও যিরূশালেম, সে অক্তত্ তর্ দেবাল গাদনিগান তুলো অবঅ, তঅ দুযিগান বাড়া অবঅ।

মীখা 7:11 Iomraidhean Croise

নহিমিয় 2:17

পরেন্দি মুই সে দাঙর্‌ পোজিশনর্‌ কাম্‌গুরিয়্যেগুনোরে কলুঙ্‌, “আমি যে কেধোক্কেন্‌ দুঘোত্ আগিই সিয়েন্‌ তুমি দেগর্‌। যিরূশালেমান ভস্ত ওই রোইয়্যে আর সিয়েনর্‌ গেট্‌তুন্‌ আগুন্দোই পুড়ো ওইয়্যে। এজঅ, আমি যিরূশালেমর দেবালান্‌ আরঅ গাদেইনে তুলিই। ইয়েন্দোই আর আমি ঘিনাইদে মানুচ্‌ ওই ন-থেবং।”

নহিমিয় 2:8

ইয়েনিবাদেয়ো তে যেনে তার্‌ ঝাড়-চুগিদিয়্যে আসফর ইদু এক্কান্‌ চিদি দে যেনে তে উবোসনা-ঘরর্‌ কায়-কুরে তাম্বুলানির গেদোর্‌ গাজ্‌ছানিত্তে আর শঅরর্‌ দেবাল আর মর্‌ থেবার্‌ ঘরত্তে মরে গাজ্‌ দে।”মঅ গোজেনর ভালেদির্ আঢ্‌তানি আমা উগুরে এলঅ বিলিনে রাজা মর্‌ বেক্‌ কোজোলিগানি রোক্ষ্যে গুরিলো।

নহিমিয় 4:3

অম্মোনীয় টোবিয় সেক্কে তার্‌ কায়-কুরে এলঅ; তে কলদে, “তারা যিয়েন্‌ বানেয়োন্‌ সিয়েনর্‌ উগুরে যুনি এক্কো শিয়েল্‌ উদেগোই সালে তারার্‌ সে পাত্তরর্‌ দেবালান্‌ ভাঙি পুরিবো।”

নহিমিয় 4:6

দেবালান্‌ যেদক্‌ অজল্‌ অবঅ সিয়েনর্‌ অদ্দেকান্‌ সং এধোক্কেন্‌ গুরিনে আমি তুলিলোং, কিত্যে মানুচ্চুনে তারার্‌ বেক্‌ মনান্‌-পরাণান দিইনে কাম্‌ গোজ্যন্‌।

যিশাইয় 54:11

লগেপ্রভু কত্তে, ও ঝড়ে আঘাত্ পেইয়্যে, সান্তনা ন-পেইয়্যে অত্যেচার ওইয়্যে শঅরান্, মুই তরে জোল্‌‍‌‌জোল্যে পাত্তর্‌লোই বানেবাত্তে যাঙর্ আর তর্ গড়াগান নীলকান্ত মণিলোই গাড়েম্।

যিশাইয় 54:2

তঅ তাম্বুলানর্ জাগায়ান আরঅ বাড়া; তঅ তাম্বুলানর্ পর্দাগান আরঅ পাদাজ্যে গর্, কুলি ন-গুরিচ্। তঅ তাম্বুলানর দুড়িগানি লাম্বা গর্ আর খুদোগুন দরমর গর্,

যিশাইয় 58:12

তমা মানুচ্চুনে আগে ভস্ত ওইয়্যে জাগায়ানি আরঅ বানেবাক্ আর পুরোণি দিনো গড়াগানি উগুরে আরঅ গাড়েবাক্; তমারে কুয়ো অবঅ ভাঙা দেবাল আর বজত্তি গুরিবার জাগানর পথ্‌তানি ঠিগ্ গুরিয়্যে।‍‌

যিশাইয় 61:4

তারা আগ দিনোত্ ভস্ত ওইয়্যে জাগানি আরঅ তুলিবাক আর ঠিগ্ গুরিবাক। যেদক্কানি শঅর্ বংশর পর বংশ ধুরিনে ভস্ত ওই যেইয়্যে সিয়েনি তারা আরঅ নূয়ো গুরি বানেবাক্।

দানিয়েল 9:25

“তুই জানি লঅ আর বুঝি লঅ, যিরূশালেমরে আরঅ ঠিগ্ গুরিবার আর বানেবার উগুম ফগদাং অনাত্তুন্ ধুরি আরাম্ভ গুরিনে সেই মশীহর, অত্তাৎ শাজন্‌গুরিয়্যেবোর এযানা সং সাত গুণ সাত বজর্ আর বাষট্টি গুণ সাত বজর অবঅ। শঅর-চক্করুন আর শঅর রোক্ষ্যের্ বেবস্থা আরঅ নূয়ো গুরিনে বানা অবঅ আর সিয়েন গরা অবঅ দুঘো সময়োত্।