লূকে লেখ্যে গম্ হবর্ 10:15 - Chakma Bible

¹⁵ আর তুই, কফরনাহূম, তুই নাহি স্বর্গয়ান সং অজলত্ উদিবে? কনদিন্অ নয়, তরে তলেদি নরগত্ ফেলেই দিয়্যে অবঅ।”

লূকে লেখ্যে গম্ হবর্ 10:15 Iomraidhean Croise

পত্থম 11:4

তারা কলাক্, “এজঅ, আমি আমাত্তে এক্কান্‌ শঅর্‌ বানেই আর এন্‌ এক্কান অজল ঘর বানেবং যিয়েনর মাদাবো যেইনে আগাজত্‌ লুমিবো। সিয়েনত্‌ আমার সুনাঙ্অ অবঅ আর আমি গোদা পিত্‌থিমীগানত্‌অ ছিদি ন-পড়িবোং।”

যিশাইয় 5:14

সেনত্তে মরন জাগায়ানে তা গত্তনার্ নালীবো পাদাজ্যে গোজ্যে, তা মুয়োন্ অমকদ দাঙর্ গুরিনে আ গোজ্যে। সর্মানি আর সাধারন মান্‌‌জ্যে, কোজ্যে বাজেয়্যে আর রঅ ছাড়িয়্যেগুনে বেক্কুনে সিয়েনত্ লামিবাক্।

যিরমিয় 51:53

বাবিলান যুনি আগাজত্ সংঅ লুমেগোই আর সিয়েনত্ দরমর ঘর্ তুলে, তো মুই তা বিরুদ্ধে ভস্তগুরিয়্যেগুনোরে পাধেই দিম্।”

যিহিষ্কেল 26:20

সেক্কেনে মুই তরে মরণ জাগাত যেইয়্যে মানুচ্চুনো সমারে পুরোনা দিনো মানুচ্চুনো ইধু তলে লামেই দিম। মুই তরে পিত্‌‌‌‌‌‌‌‌‌‌থিমীর গভীনোত্ পুরোনা দিনোর ভস্তওইয়্যে জাগানর সংমোধ্যে মরণ জাগাত্ যেইয়্যে মানুচ্চুনো সমারে বজত্তি গোরেম। তঅ ভিদিরে আর কনজনে বজত্তি ন-গুরিবাক্ আর জেদাগুনো দেজত্ তর্ জাগা ন-অবঅ।

যিহিষ্কেল 31:18

ও ফরৌণ, সয়-সাগোজ্যে আর বাঈনী গরানাগান ইন্দি এদনর্ গাজ্‌চুনো ভিদিরে এক্কোয়ো তর্ সং সং নয়। তো এদনর্ গাজ্‌‌‌‌‌‌চুনো সমারে তরেয়ো পিত্‌‌‌‌‌‌থিমীর গভীনোত্ লামেই দিয়্যে অবঅ; যিগুনে যুদ্ধোত্ মুরি যেইয়োন সেই সু্ন্নত-ন-গোজ্যে মানুচ্চুনো সমারে তুই পড়ি থেবে। মুই প্রভু লগেপ্রভু কঙর্, সেই গাজ্‌‌‌‌‌‌‌চুন অলাক্ ফরৌণ আর তার বেক্ দলুন।

যিহিষ্কেল 32:18

ও মান্‌‌জ্যর পুয়োবো, মিসর মানুচ্চুনোত্তে আবিলেচ্ গর আর যিগুনে মরণ জাগাত্ লামদন্ তারা লগে তারে আর অন্য খেমতাবলা জাদর্ মানুচ্চুনোরে পিত্‌‌‌থিমীর গভীনোত্ পাধেই দে।

যিহিষ্কেল 32:20

যুদ্ধোত্ যিগুনে মারা পোজ্যন্ তারা ভিদিরে তা মানুচ্চুনে পড়ি থেবাক্। লাম্বা ছুরি আঢত্ তারে তুলি দিয়্যে অবঅ; তার বেক মানুচ্চুনো সমারে তারেয়ো টানি নেযা অবঅ।

যিহিষ্কেল 32:27

তারা সুন্নত-ন-গোজ্যে অন্য যোদ্ধাগুনে সমারে পড়ি ন-থেবাক্। সেই যোদ্ধাগুনে তারার্ যুদ্ধোর্ আত্যেরানি নিইনে মরণ জাগাত্ লামি যেইয়োন, তারার তলোয়ারানি তারার্ মাঢাগুনো তলে রাগা ওইয়্যে আর তারার পাপর্ সাজা তারার আড়ুনো উগুরে আঘে। তারায়ো জেদাগুনো দেজত্ দর্‌‌‌বুক লাগেয়োন্।

ওবদিয় 1:4

যুনিয়ো তুই ঈগল পেগো ধোক্ক্যেন অজলত্ ঘর্ বানাচ্ আর তারাগুনো ভিদিরে ঘর বানাচ্ তো মুই সিয়েনিত্তুন তরে লামেই আনিম। মুই লগেপ্রভু এ কধাগান কঙর্।

মথি লেখ্যে গম্ হবর্ 10:28

যিগুনে বানা কিয়্যেগান মারে ফেলেই পারন্ মাত্তর্ আত্মাগানরে মারি ন-পারন্ তারারে ন-দোরেয়ো। যিবে কিয়্যে আর আত্মা দ্বিয়েনরে নরগত্ ভস্ত গুরি পারে বরং তারেই দরঅ।

মথি লেখ্যে গম্ হবর্ 11:23

আর তুই কফরনাহূম! তুই নাকি স্বর্গয়ান সং অজলত্ উদিবে? কনদিন্অ নয়, তরে তলেদি নরগত্ ফেলেই দিয়্যে অবঅ। যেদক্কানি আমক্ অবার্ কাম্ তঅ ভিদিরে গরা ওইয়্যে সিয়েনি যুনি সদোম শঅরত্ গরা অদঅ সালে সদোমান্ এজঅ ঠিগি থেদঅ।

লূকে লেখ্যে গম্ হবর্ 13:28

যেক্কে তুমি দেগিবা, অব্রাহাম, ইস্‌হাক, যাকোব আর ভাববাদী বেক্কুনে গোজেন রেজ্যত্ আঘন্ আর তমারে বারেদি ফেলেই দিয়্যে ওইয়্যে, সেক্কে তুমি কানাকুদি গুরিবা আর যন্ত্রনায় দাত্ কামেড়েবা।

লূকে লেখ্যে গম্ হবর্ 16:23

মরণ জাগাত্ অমকদ যন্ত্রণাত্ থেইনে তে উগুরেদি রিনি চেলঅ আর দূরোত্তুন্ অব্রাহাম আহ্ তা কুরে লাসাররে দেগিলো ।

দ্বি’লম্বর বিররণ 1:28

আমি কেধোক্ক্যেনগুরি সিদু যেবং? আমা ভেইয়ুনে আমা মনানি ভাঙি দুয়োন। তারা কদন্দে, সিদুগোর্‌ মানুচ্চুনে তারাত্তুন্‌ বেশ্‌ বোলী আর লাম্বা; তারার্‌ শঅরানিয়ো দাঙর্‌ দাঙর্‌ আর তারার্‌ চেরোকিত্তে রোইয়্যেদে আগাজত্‌-দুস্যে দেবাল্‌। সিয়েনত্‌ তারা অনাকীয়গুনোরেয়ো দেখ্যন।

২ পিতর 2:4

স্বর্গদূত্‌তুনে যেক্কে পাপ গোজ্জ্যন সেক্কে গোজেনে তারারে ইরি নঅ-দে বরং নরগর্ আন্ধার গাঢত্ ফেলে দিইনে বিচারত্যে থোই দিয়্যে।