লেবীয় 26:36 - Chakma Bible

³⁶ তমা ভিদিরেত্তুন্‌ যিগুনে শত্রুগুনোর্‌ দেজত্‌ বাঁচি থেবাক্ তারার্‌ মনত্‌ মুই এমন্‌ দর্‌ ভোরেই দিম্‌, বোইয়্যেরত্‌ পাদা লড়িবার্‌ রঅবোলোইয়ো তারা ধেই যেবাক্। যুদ্ধোর্‌ দরে যেধোক্ক্যেন গুরি মান্‌জে ধেই যান্‌ সেধোক্ক্যেন গুরি তারা ধেই যেবাক্। পিজেন্দি কনজনে লোড়েইনে ন-গেলেয়ো তারা দাবা যাদে উজোত্‌ হেইনে পড়ি যেবাক্।

লেবীয় 26:36 Iomraidhean Croise

পত্থম 35:5

সে পরেদি তারা যাহ্ ধুরিলাক্। তারা যেবার্‌ পদথ্‌ গোজেনে চেরোকিত্তে শঅর মানুচ্চুনো ভিদিরে এক বাবোত্যে দর্ বুগ্ লাগেল যিয়েনত্তে যাকোব পিজেদি কনজনে আর্ ন-লোড়েলাক্।

পত্থম 4:12

তুই যেক্কে ভূইয়ো চাষ গুরিবে সেক্কে সিয়েনে আর তরে সেধোক্ক্যেন খেত-খেত্তি ন-দিবো। তুই পোল্ল্যেই পোল্ল্যেই পিত্‌থিমীয়ানত্‌ ঘুরি বেড়েবে।”

২ বংশধর 14:14

তারা গরারর চেরোকিত্তে বেক্‌ আদামানি ভস্ত গুরি দি পাজ্যন্‌, কিত্তে সিদুগোর মানুচ্চুনে লগেপ্রভুরে অমকদ দোরেয়োন্‌। সিদু লুট গরেদে ধোক্ক্যেন বোউত্‌ পযাপিরা এলঅ বিলিনে তারা বেক্‌ আদামানি লুদেয়োন্‌।

ইয়োব 13:25

যে পাদাগান্‌ বোইয়্যেরত্‌ উড়ে তারে কি তুই দর্‌ দেগেবে? শুগুনো তুষোর্‌ পিজেন্দি কি তুই লোড়েবে?

গীতসংহিতা 53:5

তর্ আক্রমণগুরিয়্যে গুনোর আড়্‌‌গড়াগুন তে সোড়েই রাগেয়্যে; আগে তারার দর্-ভর্ ন-এলঅ, তো তারা ইক্কিনে অমকদ দোরেলাক্; গোজেনে তারারে বাদ দিয়্যে, সেনত্তেই তুই তারারে লাজত্ ফেলেয়োচ্।

গীতসংহিতা 53:6

ইস্রায়েলীয়গুনোর উদ্ধোর সিয়োনর ভিদিরেত্তুন্ এজোক্। গোজেনে যেক্কে তা মানুচ্চুনোর অবস্থা ফিরেব সেক্কেনে যাকোবর বংশগুনে ফুত্তি গুরিবাক্- ইস্রায়েলীয়গুনে হুজি অবাক্।

গীতসংহিতা 89:43

তুই তার তলোয়ারান্ অকেজো গুরি দুয়োচ্; তুই যুদ্ধোত্ তারে টিগিবাত্যে ন-দুয়োচ্।

গম্ উপদেজ্ 28:1

কনজনে ন-লোড়েলেয়ো পাজি মান্‌‌জ্যে ধেই যান, মাত্তর্ গোজেন ভক্ত মান্‌‌জ্যে সিংহ ধোক্ক্যেন্ ন-দোরেয়্যেগুরি বজত্তি গরে।

যিশাইয় 30:17

একজন দরে তমাত্তুন্ আজার্ জন ধেই যেবাক্ আর পাচজন দরে তুমি বেক্কুনে ধেই যেবা; সেক্কে তমা সৈন্যদলত্ মুড়োবো উগুরে বাবতা খুদোবো বাদে আর কিচ্ছু ন-থেবঅ।

যিশাইয় 7:2

সেক্কে দায়ূদ বংশর মানুচ্চুনোরে কুয়া অলঅ, “অরামর্ সৈন্যদলুনে সমাজ্যে ইজেবে ইফ্রয়িমত্ তাম্বুল ফেলেইনে আগন্।” এ কধাগান শুনিনে আহসে আর তা মানুচ্চুনোর্ মনানি দরে বোইয়্যেরে দুলি পোজ্যে ঝার গাজ ধোক্ক্যেন্ দুলি উদিলো।

যিশাইয় 7:4

তারে এ কধাগান কঅ, ‘উজিয়ার্ অ, থির্ থাক্ আর ন-দোরেচ্। ধূমো উঠ্যে সেই দ্বিবে তক্তার্ শেজ্ ভাগ্‌কান দেগিনে, অত্তাৎ রৎসীন, অরাম আর রমলিয় পুয়োবোর দর্‌গরেপারা রাগ্‌‌‌‌‌‌‌‌‌কান দেগিনে মন্‌মরা ন-ওচ্।‌‌‌‌‌‌

যিরমিয় 37:10

যে বাবিলীয় সৈন্যগুনে তমারে আক্রমণ গোজ্যন্ তুমি যুনি তারারে বেক্কুনোরে ওদেই দুয়ো আর বানা তারার আহত মানুচ্চুনে তাম্বুলোত্ পড়ি থান, সালে তারা নিগিলি এইনে এ শঅরান পুড়ি ফেলেই দিবাক্।’ ”

যিরমিয় 46:16

তারা বার্ বার্ উজোত্ হেবাক্; তারা একজনে আর একজন উগুরে পড়িবাক্। তারা কবাক্, ‘উদো, আঢঅ আমি অত্যেচারিগুনো তলোয়ারত্তুন্ দূরোত্ যেইনে আমা নিজো মানুচ্চুনো ইধু আর নিজো দেজত্ ফিরি যেই।’

আবিলেচ্ 1:3

দুঘ্ আর অমকদ কাম গরানার পরেদি যিহূদা দূরোত্ বন্দীদজাত্ যেইয়্যে। তে নানান্ জাদ ভিদিরে বজত্তি গোজ্যে; কনজাগাত্‌অ তে জিরেবার জাগা ন-পায়। যিগুনে তারে লোড়েয়োন্ তারা তার দুঘোত্ তারে ধুরি ফেল্যন্।

আবিলেচ্ 1:6

সিয়োন ঝিবোর্ বেক্ সয়সাগোজ্যেগানি যেয়্যেগোই। তার নেতাগুন এমন উরিঙো ধোক্ক্যেন যিগুনে চড়িবার জাগা ন-পান; তারা বল্‌‌‌পোজ্যে ওইনে তারা আগে অাগে ধেই যেইয়োন যিগুনে তারারে লড়াদন্।

আবিলেচ্ 4:19

আমারে যিগুনে লোড়েদাক্ তারা আগাজ ঈগল পেগোত্তুন্‌অ বেশ্ জোরে যেদাক্; তারা মুড়োই মুড়োই আমারে লোড়েদাক্ আর ধূল্যেচর-চাগালাত্ হাফ্ দি থেদাক্ আমাত্তে।

যিহিষ্কেল 21:12

ও মান্‌‌‌‌‌‌‌‌‌জ্যর্ পুয়োবো, কানি লঅ আর আবিলেচ্ গর্, কিত্তে সেই তলোয়ারান্ মঅ মানুচ্চুনোর বিরুদ্ধে আর ইস্রায়েলর্ বেক নেতাগুনোর্ বিরুদ্ধে। মঅ মানুচ্চুনো সমারে তারারেয়ো লাম্বাছুরি আঢত্ দিয়্যে অবঅ। সেনত্তে তুই বুগ্ বাজ্যে।

যিহিষ্কেল 21:15

কাবি ফেলেবাত্তে তারার্ বেক্ গেট্‌‌‌‌‌‌‌‌‌‌তুনোত্ মুই লাম্বাছুরি বোজেয়োং আর যেনে তারার্ মনানি বেক্কানি গুলি যায় আর ভালোক্কুনে মুরি যান্। অয়, সেই লাম্বা ছুরিগানে কারেন ধোক্ক্যেন ঝিমিলায়; সিয়েনে কাবি ফেলেবাত্তে ধারা ওইয়্যে।

যিহিষ্কেল 21:7

তারা যেক্কে তরে পুযোর্ গুরিবাক্, ‘কিত্তে ভঅ নিজেস্ ফেলর্?’ তুই কবে, ‘যে হবরান্ এজের্ সিয়েনত্তে ভঅ নিজেস্ ফেলাঙর্। সে অক্তত্ বেক্কুনোর মনানি গুলি যেবঅ আর বেক্কুনোর আঢ্‌‌‌‌‌‌তানি ন-লুরিবো; বেক্কুনোর মনানি ভাঙিবো আর বেক্কুনোর আঢুগুন্ বল্‌‌‌‌‌‌পোজ্যে ওই যেবাক্। প্রভু লগেপ্রভু কোইয়্যেদে, সিয়েনি এজের্; সিয়েনি অবদে অবঅ।’”

হোশেয় 8:3

মাত্তর্ যিয়েন গম্ ইস্রায়েলে সিয়েন এলাফেলা গোজ্যে, সেনত্তে শত্রুবো তা পিজেদি লোড়েব।

লেবীয় 26:17

মুই তমান্দিত্তুন্‌ মুয়োন ফিরেই নেযেম্‌ আর তুমি তমার শত্রুগুনো ইদু উদি যেবা। তমারে ঈচ্ গরন্দেগুনে তমারে শাজন গুরিবাক্ আর কনজনে তমারে ন-লোড়েলেয়ো তুমি ধেই যেবা।

লেবীয় 26:35

তুমি নিজোর্‌ দেজত্‌ বজত্তি গুরিবার্‌ অক্তত্‌ তমার্‌ ভূইয়ানি জিরেবার্‌-বজরুনোত্‌ জিরেন্‌ ন-পায় বিলি যেক্কে দেজ্‌চান্‌ ভস্ত ওইনে পড়ি থেবঅ সেক্কে ভূইয়ানি জিরেন পেবঅ।

দ্বি’লম্বর বিররণ 1:44

সিয়েন্‌ দিগিনে যিদুক্কুন ইমোরীয় সেই মুড়ো-মুড়ি চাগালাত্‌ বজত্তি গুরিদাক তারা তমার বিরুদ্ধে নিগিলি এলাক্। এক ঝাক্ মু পুগো ধোক্ক্যেন তারা তমারে লোড়েলাক্ আর সেয়ীর ভিদিরে হর্মা সং তমারে মাত্যে মাত্যে নেযেলাক্।

যিহোশূয় 5:1

যর্দন গাঙর্‌ পোজিমেন্দি ইমোরীয়গুনোর বেক্‌ রাজাগুনে আর সাগর পারর্‌ বেক্‌ কনানীয় রাজাগুনে যেক্কে শুনিলাক, আমি পার্‌ ওই এজানার্‌ সলাবোত্‌ লগেপ্রভু কিঙিরিনে যর্দনর পানিগান আমারে, অত্তাৎ ইস্রায়েলীয়গুনোর মুজুঙোত্তুন্‌ শুগেই দিয়্যে সেক্কে তারার আজা-ভরসা থুম্‌ অলঅ; ইস্রায়েলীয়গুনো মুজুঙোত্‌ থিয়্যেবার সাহস আর তারার ন-থেলঅ।

যিহোশূয় 7:5

শঅরর্‌ গেদো ইত্তুন্ অয় শঅরর্‌ মানুচ্চুনে ইস্রায়েলীয়গুনোরে লোড়েইনে শবারীম সং নেযেলাক্‌ আর শবারীমর কামা জাগানত্‌ তারার্‌ ছত্রিশজনরে মারে ফেলেলাক্‌। সেক্কে ইস্রায়েলীয়গুনোর মনবল এক্কুবারে ভাঙি পড়িলো।

১ শমূয়েল 17:24

ইন্দি ইস্রায়েলীয় সৈন্যগুনে বেক্কুনে সেই মানুচ্চোরে দেগিনে অমহদ দোরেইনে তা মুজুঙোত্তুন্‌ ধেই গেলাক্।