লেবীয় 22:4 - Chakma Bible

^4-6 কিয়্যেত্‌ চামাড়ারুগ্‌ নিইনে বা ফি-বলা মাসকাবরর্‌ অবস্থায় হারোণর্‌ কনঅ বংশধর্‌ সুদ্ধো-সাংগ ন-অনা সং উৎসর্ব গোজ্যে কনঅ পবিত্র জিনিস্ হেই ন-পারিবাক্। যুনি তে মরাকিয়্যেত্‌ বাজেদে কনঅ ফি-বলা জিনিস্ ধুরি ফেলায় বা যুনি তার্‌ বীর্যপাত(লের্ নিগিলে) ওই থায় বা কনঅ ফি-বলা চিগোন্-চাগোন্ প্রাণী বা ফি-বলা মানুচ্‌ তে ধুরি থায়-এক্কান কধায় তার্‌ ফি-বলাগানর্‌ কারনে যিয়েন্‌ অদ সাৎ, তে সাজোন্যে সং ফি-বলা অবস্থায় থেবঅ। পানিত্‌ ন-গাদানা সং তে কনঅ উৎসর্ব গোজ্যে পবিত্র জিনিস্ হেই ন-পারিবো।

লেবীয় 22:4 Iomraidhean Croise

লেবীয় 11:39

তমার্‌ হেবার্‌ মানা নেই এধোক্ক্যেন কনঅ য়েমান মুরি গেলে যে তার্‌ মরা কিয়্যেগান্‌ ধুরিবো তে সাজোন্যে সং ফিবলা অবস্থায় থেবঅ।

লেবীয় 15:17

কনঅ কাবড় বা চামাড়ার্‌ জিনিজোত্‌ লের্‌ বাঁজিলে সিয়েন্‌ পানিত্‌ ধোয়্‌ ফেলা পুরিবো, আর সাজোন্যে সং সিয়েন্‌ ফি-বলা থেবঅ।

লেবীয় 2:10

এ শোজ্য-উৎসর্বর জিনিজোর্‌ বাদবাগি যিয়েনি থেবঅ সিয়েনি হারোণ আর তার্‌ পূঅগুনোর্‌ পাওনা অবঅ। লগেপ্রভুর্ নাঙে আগুন্দোই-গোজ্যে বেক্‌ উৎসর্বয়ান ভিদিরে শোজ্য-উৎর্বর্ এ বাদবাগি ভাক্কান দাঙর্ পবিত্র জিনিস্।

লেবীয় 2:3

এ শোজ্য-উৎসর্বর জিনিজোর্‌ বাদবাগি যিয়েনি থেবঅ সিয়েনি হারোণ আর তার্ পূঅগুনোর্‌ পাওনা অবঅ। লগেপ্রভুর্ নাঙে আগুন্দোই-গোজ্যে বেক্‌ উৎসর্বয়ান ভিদিরে শোজ্য-উৎর্বর্ এ যেরেদি ভাক্কো দাঙর্‌ পবিত্র জিনিস্।

লেবীয় 21:1

ইয়েনর্ পরেদি লগেপ্রভু মোশিরে কলঅ, তুই ধর্মগুরুগুনোরে, অত্তাৎ হারোণর্‌ পূঅগুনোরে কোই দে, তারার্‌ কুদুম্মোগুনো ভিদিরে কনজনে মুরি গেলে সিয়েনর্‌ কারনে কনঅ ধর্মগুরুর্‌ নিজোরে ফি-বলা গরানা ন-চলিবো।

লেবীয় 21:22

হালিক্ গোজেনর্‌‌ নাঙে উৎসর্ব গোজ্যে হানা ভিদিরে পবিত্র আর দাঙর্‌ পবিত্র বেক্‌ হানাগানি তে হেই পারিবো,

হগয় 2:13

সেক্কে হগয় কলদে, “মরা কিয়্যে ধুরিনে অসিজি ওইয়্যে এবাবোত্যে কনঅ মানুচ্ যুনি ইয়েনির্ কনঅ এক্কান ধরে, সালে সে জিনিস্‌‌‌চান কি অসিজি ওই যেবঅ?” ধর্মগুরুগুনে জোব্ দিলাক্, “অয়, সিয়েন অসিজি ওই যেবঅ।”

গণাণা 18:19

লগেপ্রভুর নাঙে ইস্রায়েলীয়গুনোর উৎসর্ব গোজ্যে বেক্‌ সুদ্ধো-সাংগ জিনিস্‌-পাদিনি মুই তরে আর তর্‌ ঝি-পূঅগুনোরে নিত্য পাওনা ইজেবে দিলুং। ইয়েনি লগেপ্রভুর চোগোত্‌ তর্‌ আর তর্‌ বংশর বেক্কুনোত্তে এক্কান উমরত্যে ঠিগেদে সুদোম্।”

গণাণা 18:9

দাঙর পবিত্র উৎসর্বত্তে, অত্তাৎ শোজ্য-উৎসর্ব, পাপ-উৎসর্ব আর দুষ্‌-স্বীগেরত্তে ইস্রায়েলীয়গুনে মইদু যিয়েনি আনিবাক্‌ আর যে ভাক্কান্‌ পূজোবোর আগুনোত্‌ ন-পুড়িবা সিয়েনি তুমি নিবা; সিয়েনি অবঅ তমার আর তমার বংশধরুনোর পাওনা।

গণাণা 19:20

অসিজি অনার পরেদি যুনি কনজনে নিজোরে সিজি গুরি ন-নেযায় সালে তারে তার্‌ সমাজ ভিদিরেত্তুন্‌ সমাজ বাড়া গরা পুরিবো, কিত্যে নিজোরে সিজি ন-গুরিনে তে লগেপ্রভুর পবিত্র তাম্বুলান অসিজি গোজ্যে। সিজি গুরিবার্‌ পানিগান্‌ তা উগুরে ছিদেনা ন-অয় বিলি তে অসিজি।