লেবীয় 16:2 - Chakma Bible

² তে কলঅ, তর্‌ ভেই হারোণরে কঅ‌, সাক্ষ্য-সুন্দুগো উগুরে ঢাগোনিগান মুজুঙোত্ যে পর্দাগান্‌ রোইয়ে ‍সিয়েনর্‌ পিজেন্দি সে পবিত্র জাগানত্‌ তে যেন তার্‌ আওজ্ মজিম যেক্কে-সেক্কে ন-যায়। সেধোক্ক্যেন গুরিলে তে মুরি যেবঅ, কিত্তে সে ঢাগনিগান উগুরে মেঘ ভিদিরে মুই দেগা দিম্‌।

লেবীয় 16:2 Iomraidhean Croise

১ রাজাবলী 6:16

তবনা-ঘর ভিদিরে দাঙর্ পবিত্র জাগা নাঙে ইক্কো ভিদিরে গুদি বানেবাত্তে তে তবনা-ঘরর্‌ পিচ্চো ভাগত্ কুড়ি আত্‌ জাগা তলেত্তুন্‌ ধুরি দোন্‌দোমা সং এরস গাজ তক্তালোই ফারক্‌ গুরি নেযেল।

১ রাজাবলী 8:6

সে পরেন্দি ধর্মগুরুগুনে লগেপ্রভুর সুদোম-সুন্দুক্কো ঠিগ জাগানত্‌, তবনা-ঘরর্ ভিদিরে গুদিবোত্‌, অত্তাৎ দাঙর্ পবিত্র জাগানত্‌ করূবপুনোর মিলি দিয়্যে ডুয়োগানির্‌ তলে নেযেইনে রাগেলাক্।

২ বংশধর 5:14

সে মেঘত্তে ধর্মগুরুগুনে তারার্‌ সেবা-কামানি গুরি ন-পারিলাক্‌, কিত্তে লগেপ্রভুর মহিমায় গোজেন ঘরান পেলেপেলে ওই যেইয়্যে।

যাত্রা 30:10

পাপ ঢাগিবাত্যেই পাপ-উৎসর্বর লো ডালিপূজোবো শিঙুনো উগুরে বাজেই দিইনে হারোণে বজরে একবার্‌ গুরি ডালিপূজোবো সিজি গুরি নেযেব। এধোক্ক্যেনগুরি বজরে একবার্‌ গুরি বংশর পর্‌ বংশ ধুরি দাঙর্‌ ধর্মগুরুবোত্তুন্‌ এই কামান্‌ গুরি যাহ্ পুরিবো। ইবে লগেপ্রভুর নাঙে দাঙর্‌ পবিত্র ডালিপূজো।”

লেবীয় 16:13

সিয়েনত্‌ লগেপ্রভুর্ মুজুঙোত্ তে আগুনো উগুরে পোইরেগ্‌ দিবো। সে পোইরেগর ধূমোলোই সাক্ষ্য-সুন্দুগো উগুরে ঢাগনিগান্‌ ঢাগা যেবঅ আর সেক্কে তে মারা ন-পুরিবো।

লেবীয় 16:34

ইবে অবঅ তমাত্তে এক্কান্‌ থিদেবর্ গোজ্যে সুদোম। বজরত্‌ একবার্‌ গুরি ইস্রায়েলীয়গুনোর্‌ বেক্‌ পাপ্পানিত্তে এ পাপ ঢাগি দিবার্‌ অনুষ্ঠানান্‌ গরা পুরিবো। মোশিরে দিয়্যে লগেপ্রভুর উগুম মজিম বেক্কানি গরা ওইয়্যে।

লেবীয় 23:27

“এ সাত মাজর্‌ দশ দিনোর্‌ দিন্নো অবঅ পাপ ঢাগি দিবার দিন। সেদিন্যে তমার্‌ এক্কো পবিত্র মিলন-সভা অবঅ আর নিজোর্‌ মনান্‌ ভাঙিচুরি দুখস্বীগের্‌ গরা পুরিবো। তমার্‌ সেদিন্যে লগেপ্রভুর্ নাঙে আগুন্দোই-গোজ্যে উৎসর্বর্‌ অনুষ্ঠান গরা পুরিবো।

লেবীয় 8:35

তুমি যেন মারা ন-পড় সেনত্তে এচ্চ্যেত্তুন্‌ ধুরি সাত দিন সং তুমি দিন-রেদ্‌ মিলন-তাম্বুলো ভিদিরে থেবা আর লগেপ্রভু চাইদে ধোক্ক্যেন গুরি কাম্‌ গুরিবা। মুই এ উগুমান পেইয়োং।”

গণাণা 17:10

ইয়েনর্ পরেদি লগেপ্রভু মোশিরে কলঅ, “উল্লোমি গুরিয়েগুনো ইদু এক্কান মনত্‌ রাগেবার চিহ্নো ওই থেবাত্তে তুই হারোণর লুদিক্কো আরঅ সাক্ষ্য-সিন্দুগোর মুজুঙোত্‌ রাগেই দে। ইয়েন্দোই তুই মঅ বিরুদ্ধে তারার্‌ বক্‌বক্‌ গরানাগান্ থামেই দি পারিবে, যিয়েনত্যে তারা আর ন-মুরিবাক।”

গণাণা 18:7

মাত্তর্‌ ধর্মগুরু্‌ ইজেবে বানা তুই আর তর্‌ পূঅগুনে পূজোবোর আর পর্দার ভিদিরে কামানি গুরি পারিবাক্। ধর্মগুরুর্ কামান্ মুই দান ইজেবে তমারে দুয়োঙর্। লেবীয়গুনে বাদে আর কনজনে যুনি মিলন-তাম্বুলোর চাগালা ইদু এজন্‌ সালে তারে মারে ফেলা অবঅ।”

গণাণা 4:19

যেনে তারা দাঙর্‌ পবিত্র পজা-পিরানি ইধু যেইনে মারা ন-পড়ন্‌ বরং বাঁজি থান্‌ সেই আজাই হারোণ আর তার্‌ পূঅগুনে পবিত্র তাম্বুলো ভিদিরে যেইনে পত্তিজনর কাম্‌ কি আরঅ তাত্তুন কি বুয়োই নেযা পুরিবো সিয়েন্‌ ঠিগ্ গুরি দিবাক।

গণাণা 4:5

তাম্বুল তুলিনে যেবার্‌ সময় অলে হারোণ আর তার্‌ পূঅগুনে থেবার্‌-তাম্বুলো ভিদিরে যেইনে সাক্ষ্য-সুন্দুক্কো নাঢি রাগেবার্‌ পর্দাগান লামেইনে সিয়েন্দোই সুন্দুক্কো নাঢি দিবাক।

মথি লেখ্যে গম্ হবর্ 27:51

সে পরেদি উবোসনা-ঘরর্ পর্দাগান উগুরেত্তুন্ ধুরি তলেদি সং ফাদিনে দ্বিভাগ্ ওই গেলঅ; ভূজোল্ বেলঅ আর দাঙর্ দাঙর্ পাত্তরুন ফাদি গেলাক্।

ইব্রীয় 6:19

এই আজাগান আমা জিংকানিত্ নোংগর ধোক্ক্যেন ঘেচ্চেকগুরি আর থিদেবর্, আর সিয়েন দাঙর্ পবিত্র জাগানর্ পর্দাগান পিজেদি, অত্তাৎ গোজেন মুজুঙোত্ যেইনে লুমেগোই।

ইব্রীয় 9:25

দাঙর্ ধর্মগুরুবো য়েমান লো-লোই যেবাবোত্যে গুরি পত্তি বজর্ দাঙর্ পবিত্র জাগানত্ সমায়, খ্রীষ্ট নিজোরে বারবার্ উৎসর্ব গুরিবাত্যে সেবাবোত্যে গুরি স্বর্গত্ ন-সমায়।

ইব্রীয় 9:3

দ্বি-লম্বর্ পর্দাগানর্ পিজেদি তাম্বুলানর্ আর এক্কান ভাগ্ এলঅ; সিয়েন নাঙান এলঅ দাঙর্ পবিত্র জাগা।

ইব্রীয় 9:5

সেই সিন্দুক্কো উগুরে গোজেনর্ মহিমালোই ভোজ্যে দ্বিবে সনার্ করূব এলঅ। তারার্ ডুয়োগানি সেই সিন্দুগোর ঢাগনি উগুরে মেল্যে এলঅ। এই ঢাগনিগান উগুরে পাপ ঢাগি দিয়্যে অদঅ। খালিক্ ইয়েনির্ টুগিটাগির্ কধা কনা ইক্কিনে সম্ভব নয়।

ফগদাং পেইয়্যে 15:8

গোজেনর্ মহিমা আর খেমতাগানত্তুন যে ধূমোগান নিগিলের্ সেই ধূমোগান্দোই উবোসনা-ঘরান ভুরিলো। সেই সাতজন স্বর্গদূতোর্ সাত্‌তান আঘাত থুম্ ন-অনা সং কেঅ সেই উবোসনা-ঘরত সোমেই ন-পারিলাক্।