আবিলেচ্ 2:2 - Chakma Bible

² যাকোবর্ বেক থেবার জাগায়ানি লগেপ্রভু গজক্ গোজ্যে, কনঅ মেয়্যে ন-গরে। যিহূদা-ঝিবোর্ ঘরানি তার অমকদ রাগে তে ভাঙি ফেলেয়্যে, সিয়েনি তে মাদিত্ ফেলেইনে ভস্ত গোজ্যে। তার রেজ্যগান আর নেতাগুনোরে তে অসর্মানত্ ফেলেয়্যে।

আবিলেচ্ 2:2 Iomraidhean Croise

ইয়োব 2:3

সেক্কে লগেপ্রভু শদান্‌নোরে কলঅ, “মঅ‌ চাগর্‌ ইয়োব ইন্দি কি তুই রিনি চেইয়োচ্‌? পিত্‌থিমীত তা ধোক্ক্যেন্ আর কনজন নেই। তে নিদ্দুজি আর গম্‌। তে মরে ভোক্তি গুরিনে দরায় আর ভান্ন্যেইয়ত্তুন্‌ দূরোত্‌ থায়। যুনিয়ো তে এনেবাদে তারে নাশ গুরিবাত্তে মরে উচ্ছোমি তুলি দিয়্যে তো তে এজঅ‌ কনঅ দুজ্‌ ন-গরে।”

গীতসংহিতা 21:9

তর্ ফগদাং অবার্ অক্তত্ তুই তারারে তুলিবে ছুলোর্ ধোক্‌‌ধোক্যে আঙারা ধোক্ক্যেন। লগেপ্রভু রাগে তারারে গিলি ফেলেব, তা আগুনানে তারারে পুড়ি ফেলেব।

গীতসংহিতা 74:7

তর্ সুদ্ধো-সাংগ জাগানত্ তারা আগুন বাজেই দুয়োন্, তর্ থেবার জাগানত্ মাদি সমারে মিজেইনে অসিজি গোজ্যন্।

যিশাইয় 22:5

বেগত্তুন্ খেমতাবলা প্রভু লগেপ্রভুত্তুন্ দর্শন-কলগত্ অমকদ দর্‌গরেপারা, টেঙোই মাড়িবার আর যাগুলুগোর এক্কো দিন এচ্চ্যে। সিবে দেবালান্ ভাঙি ফেলেবার আর মুড়ো-মুড়ি ইদু কানিবার্ এক্কো দিন।‍‍

যিশাইয় 23:9

তার বেক্ দেমাগ্‌কানে ভস্ত গুরিবাত্তে আর পিত্‌থিমীর নাঙ-গোজ্যে মানুচ্চুনোরে তলে ফেলেবাত্তে বেগত্তুন্ খেমতাবলা লগেপ্রভু এ পরিকল্পনাগান গোজ্যে।

যিশাইয় 25:12

তে মোয়াবর্ দেবাল অজল্ ঘরানি ভস্ত গুরিবো; তে সিয়েনি মাদিত্, এমন্ কি, ধূল্যেত্ মিজেই দিবো।

যিশাইয় 26:5

যিগুনে অজলত্ বজত্তি গরন্ তারারে তে তলে লামায়; সে অজল্ শঅরানরে তে ভস্ত গুরিনে তলে গরে। তে সিয়েন মাদিত্, এমন্ কি, ধূল্যেত্ মিজেই দে।

যিশাইয় 27:11

সিগুনোর্ ডেলাগুন শুগোনার্ পরেদি ভাঙি ফেলা অবঅ আর মিলেগুনে এইনে সিগুন্দোই আগুন জালেবাক্। ইবে এক্কো বুদ্ধিনেইয়্যে জাদ্, সেনত্তে যিবে তারারে বানেয়্যে তারা উগুরে তার্ কনঅ মেয়্যে নেই; তারা উগুরে তারা গোজেনর্ কনঅ দোয়্যে নেই।

যিশাইয় 43:28

সেনত্তে মুই তমা উবোসনা-ঘরর্ ধর্মগুরুগুনোরে অগমান গুরিম আর যাকোবরে ভস্তর্ অভিশাবর্ তলে গুরিম আর ইস্রায়েলরে ঠাট্টা-তামাজার্ মানুচ্ বানেম্।”

যিশাইয় 47:6

মঅ মানুচ্চুনো উগুরে মঅ রাগ্‌‌কান জুলি উঠ্যে আর মঅ সোম্বোত্তিগানরে মুই অসিজি অবাত্তে দুয়োং। তারারে মুই তঅ আঢত্ তুলি দুয়োং আর তুই তারা উগুরে কনঅ মেয়্যে ন-দেগাচ্। এমন্ কি, বুড়ো মানুচ্চুনো উগুরেয়ো তুই গুয়োর্ বুদি চাপি দুয়োচ্।

যিরমিয় 13:14

আংগুর-রস পিলে ধোক্ক্যেন গুরি মুই একজন উগুরে আর একজনরে আছাড়্ মারিনে চুরমার গুরিম; বাপ্ ওক্ বা পুয়ো ওক্ বেক্কুনোরে চুরমার গুরিম। মুই কনঅ কোচ্‌‌পানা বা দোয়্যে বা মেয়্যে ন-গুরিম; তারারে ভস্ত গুরিম্‌‌‍‍বে গুরিম।’ ”

যিরমিয় 19:15

“ইস্রায়েলর বেগত্তুন খেমতাবলা লগেপ্রভু কলঅ, ‘শুন, মুই এ শঅরানর আর তা কায়-কুরে আদামানি উগুরে যেদক্কানি দজা ঘোদেবার কধা কোইয়োং মুই সেই বেক্কানি তারা উগুরে ঘোদেম্, কিত্তে তারা গত্তনা দরমর গোজ্যন আর মঅ কধাগান ন-শুনোন।’ ”

যিরমিয় 21:7

সে পরেদি মুই ভানা, যুদ্ধো আর ভাদরাদর্ আঢত্তুন বাঁজি থেইয়্যে যিহূদার রাজা সিদিকিয়রে, তার রাজকর্মচারিগুনোরে আর এ শঅরর্ বেক মানুচ্চুনোরে বাবিলোর রাজা নবূখদ্‌নিৎসরর‌‌‌‌ আঢত্ আর যিগুনে তারারে মারে ফেলেবাত্তে চান সেই শত্রুগুনো আঢত্ তুলি দিম। নবূখদ্‌নিৎসরে তারারে মারে ফেলেব; তে তারার কনঅ মেয়্যে, দোয়্যে ন-দেগেব। মুই লগেপ্রভু এ কধাগান কঙর্।’ ”

যিরমিয় 5:10

“ও জাদ্‌তুন, তুমি যিরূশালেমর আংগুর খেত্‌‌‍‌‍তানিত্ যেইনে সিয়েনি ভস্ত গরঅ মাত্তর্ পুরোপুরি বর্‌‌বাত ন-গোজ্য। সিয়েনর ডেলাগুন কাবি ফেলঅ, কিত্তে এ মানুচ্চুন লগেপ্রভুর নয়।‍,

আবিলেচ্ 2:17

লগেপ্রভু তা পরিকল্পনা মজিম্ কাম গোজ্যে; যে কধানি তে বোউত্ আগেদি কোইয়্যে সে কধানি পূরোণ গোজ্যে। তে মেয়্যে ন-গুরিনে তরে মেলা মারি দিয়্যে; শত্রুরে তঅ বিরুদ্ধে তে ফুত্তি গুরিবাত্তে দিয়্যে, তর্ বিপক্কগুনোর্ বলানি বাড়েই দিয়্যে।

আবিলেচ্ 2:21

পুয়ো আর বুড়োগুনে ধূল্যে ভিদিরে পধে পধে পড়ি আগন্; মর্ গাবুজ্যে-গাবুরিগুনে তলোয়ার ইধু পড়ি যেয়োন। তর্ রাগ দিনোত্ তুই তারারে মারে ফেল্যস্; তুই তারারে কাবি ফেল্যস্, মেয়্যে ন-গরচ্।

আবিলেচ্ 2:5

লগেপ্রভু শত্রু ধোক্ক্যেন ওইয়্যে; তে ইস্রায়েলরে গজক্ গোজ্যে। তে গজক্ গোজ্যে তার বেক্ দাঙর্ দাঙর্ ঘরানি আর ভস্ত গুরি দিয়্যে তার বেক্ তাম্বুলানি। তে যিহূদা-ঝিবোর্ মনত্ দুঘ্ আর আবিলেচ্ গরানা বাড়েই দিয়্যে।

আবিলেচ্ 3:43

তুই রাগ্‌‌কোই নিজোরে ঢাগিনেই আমারে লোড়েয়োচ্; মেয়্যে ন-গুরিনে তুই মারে ফেল্যচ্।

যিহিষ্কেল 5:11

সেনত্তে মুই প্রভু লগেপ্রভু মঅ জিংকানিগান নাঙে কঙর্, তর্ বেক বাজে মূত্তি আর জঘন্য কামানিলোই তুই মঅ ঘরান অসিজি গোজ্যস্ বিলিনে মুই নিজে মঅ দোয়্যেগান সোরেই নেযেম্; মুই তঅ উগুরে মেয়্যে গুরি রিনি ন-চেম্ বা তরে রেহাই ন-দিম্।

যিহিষ্কেল 7:4

মুই তঅ ইন্দি মেয়্যেলি চোগে রিনি ন-চেম্ বা তরে রেহাইঅ ন-দিম্; তর্ চালচলন আর তঅ ভিদিরে জঘন্য কামানিত্তে মুই ঘেচ্চেকগুরি তরে সাজা দিম্। সেক্কে তুই হবর্ পেবেদে, মুয়ই লগেপ্রভু।’”

যিহিষ্কেল 7:9

মুই মেয়্যেলি চোগেদি তমা ইন্দি রিনি ন-চেম্ বা তমারে রেহাইঅ ন-দিম্; তমার চালচলনানি আর তমা ভিদিরে জঘন্য কামর্ পাওনাগানি মুই তমারে দিম্। সেক্কে তুমি হবর্ পেবা যে, মুই লগেপ্রভু আঘাত্ গরং।

যিহিষ্কেল 8:18

সেনত্তে মুই রাগে জুলি উদিনে তারা সমারে ইয়েনি বেবহার গুরিম; মুই তারারে মেয়্যেলি চোগেদি রিনি ন-চেম্ বা তারারে রেহাই ন-দিম্। তারা মঅ কান্‌‌জাবা কুরে রঅ ছাড়িলেয়ো মুই তারা কধা ন-শুনিম।”

যিহিষ্কেল 9:10

সেনত্তে মুই তারারে মেয়্যেলী চোগেদিয়ো ন-চেম্, রেহাইঅ ন-দিম; তারা যিয়েনি গোজ্যন্ সিয়েনর ফল মুই তারা উগুরে ঢালি দিম্।”

মীখা 5:14

মুই তঅ ভিদিরেত্তুন্ বেক্ আশেরা-খুদোগুন উগুরে ফেলেম আর তর্ শঅরানি ভাঙি ফেলেম।

মালাখি 1:4

ইদোমে অয়ত কবঅ, “আমারে কট্টা কট্টা গরা অলেয়ো আমি ভস্ত ওইয়্যে জাগায়ানি আরঅ তুলিবোং।” মাত্তর্ বেগত্তুন্ খেমতাবলা লগেপ্রভু কত্তে, “তারা তুলি পারন্ মাত্তর্ মুই ভাঙি ফেলেম। তারারে কুয়ো অবঅ, ‘পাজি দেশ’ আর ‘যে জাদ্‌তো নিত্য লগেপ্রভুর রাগর্ তলে রোইয়্যে ।’

মথি লেখ্যে গম্ হবর্ 18:33

মুই যেবাবোত্যেগুরি তরে দোয়্যে গোজ্যং সেবাবোত্যেগুরি তঅ সমাজ্যে-চাগর্‌বোরে দোয়্যে গরানা কি তর্ উচিত্ ন-এলঅ?

২ করিন্হীয় 10:4

সাধা-সিধে মান্‌জ্যে যেদক্কানি আত্যের্‌লোই যুদ্ধো গরন্ আমি সিয়েনিলোই যুদ্ধো ন-গুরির্, মাত্তর্ গোজেনর্ খেমতালোই আমার্ দরমর দেবাল ঘিজ্যে আত্যেরানি ভাঙি ফেলেই পারে।

দ্বি’লম্বর বিররণ 28:52

তারা তমার আদামানি আর শঅরানি ঘিরিনে রাগেবাক, আর যেরেন্দি তমার উজু আর দর দেবালানি ভাঙি পুরিবো যিয়েন উগুরে তুমি এদক আজা গরর্‌। তমা গোজেন লগেপ্রভু যে দেজ্‌ছান তমারে দিবাত্তে যার্‌ সে দেজর্‌ বেক্‌ আদামানি আর শঅরানি তারা ঘিরিবাক।

দ্বি’লম্বর বিররণ 32:22

মর্‌ রাগর আগুনান জুলি উঠ্যে; সেই আগুনান জ্বলের গোরর্ বেগত্তুন তলেন্দি জাগান সং। সেই আগুনান পিত্‌থিমী আর তার বেক ফসলানি হেই ফেলেব আর আগুনান্ লাগেব বেক মুড়োবোর গড়াত্‌।