আবিলেচ্ 2:14 - Chakma Bible

¹⁴ তর্ ভাববাদীগুনোর্ দর্শনানি মিজে আর বাজে; তর্ বন্দীদজাগান্ যেনে দূর্ ওই যায় সেনত্তে তারা তঅ পাপ্‌‌পানি দেগেই ন-দুয়োন্। আগাম্ কধা ইজেবে তারা যিয়েনি তমারে কোইয়োন সিয়েনি মিজে; সিয়েনি তমারে ভুল পধেদি চালেয়্যে।

আবিলেচ্ 2:14 Iomraidhean Croise

যিশাইয় 58:1

লগেপ্রভু কত্তে, দাঙর্ দাঙর্ গুরি রঅ ছাড়অ, বেক্ বলান্দোই রঅ ছাড়অ; শিংগা রঅ ধোক্ক্যেন দাঙর্ দাঙর্ গুরি রঅ ছাড়অ। মঅ মানুচ্চুনো ইদু তারার্ অন্যেয়র্ কধানি আর যাকোবর্ বংশগুনো ইদু তারার্ পাপ কধানি জানঅ।

যিরমিয় 2:8

ধর্মগুরুগুনে পুযোর্ ন-গরন, লগেপ্রভু কুধু? যিগুনো আঢত্ রীদি-সুদোম এলঅ তারা মরে ন-চিনোন্; নেতাগুনে মঅ বিরুদ্ধে উল্লোমী গোজ্যন্। ভাববাদীগুনে অপদাত্ত মূত্তিগুনোর পিজেদি যেইনে বাল দেবেদার নাঙে কধা কোইয়োন।

যিরমিয় 20:6

আর ও পশ্‌হূর, তরে আর তঅ ঘরর বেক্কুনোরে বন্দী গুরি বাবিলোত্ নেযা অবঅ। সিদু তুই মুরিবে আর তরে গোর্ দিয়্যে অবঅ; তর্ যিদুক্কুন সমাজ্যে ইধু তুই ভাববাদী ইজেবে কধা কবার অক্তত্ মিজে কধা কোইয়োচ্ তারার বেক্কুনোর এক্কুই দযা অবঅ।’ ”

যিরমিয় 23:22

মাত্তর্ তারা যুনি মঅ মুজুঙোত্ থিয়্যেদাক, সালে মঅ মানুচ্চুনো ইধু তারা মঅ কধানি ফগদাং গুরিদাক্ আর ভান্ন্যেই পথ আর ভান্ন্যেই কামত্তুন্ তারারে ফিরেদাক্।”

যিরমিয় 23:36

মাত্তর্ তুমি যেন আর কনদিন্‌অ ন-কঅ, ‘লগেপ্রভুর কধাগান ইয়েন,’ কিত্তে পত্তি মানুচ্ নিজোর কধানরে গোজেনর কধা বানায়। এবাবোত্যেগুরি তুমি জেদা গোজেনর, তমা বেগত্তুন খেমতাবলা লগেপ্রভুর কধানি বেঙা গরঅ।”

যিরমিয় 28:15

সেক্কে ভাববাদী যিরমিয় ভাববাদী হনানিয়রে কলঅ, “হনানিয়, শুন। লগেপ্রভু তরে ন-পাদায়, মাত্তর্ তুই এ জাদ্‌তোরে মিজে কধালোই বিশ্বেজ্ গরত্তে। ‍‍‍

যিরমিয় 29:21

কোলায়র পুয়ো আহাব আর মাসেয়র পুয়ো সিদিকিয়, যিগুনে মঅ নাঙে তমা ইধু মিজে কধা কদন্ তারা পৌইদ্যেনে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মুই বাবিলোর রাজা নবূখদ্‌নিৎসর আঢত্ তারারে তুলি দিম্, আর তে তমা চোগো মুজুঙোত্ তারারে মারে ফেলেব।

যিরমিয় 37:19

যিগুনে তমা ইধু এ আগাম্ কধাগান গোজ্যেন্, বাবিল রাজা তরে বা এ দেজ্‌চানরে আক্রমণ ন-গুরিবো, তমা সেই ভাববাদীগুন কুদু?

যিরমিয় 5:31

ভাববাদীগুনে মিজে কধা ফগদাং গরন্, ধর্মগুরুগুনে নিজোের্ আঢ খেমতালোই শাজন্‌ গরন, আর মঅ মানুচ্চুনে এবাবোত্যে গম্ পান। মাত্তর্ ও মর্ মানুচ্চুন, যেরেদি তুমি কি গুরিবে?”

আবিলেচ্ 4:13

এ ঘটনাগান ঘোট্যেদে তা ভাববাদীগুনোর্ পাপত্তে, তা ধর্মগুরুগুনোর্ অন্যেয়ত্তে, কিত্তেই সিয়োদোই তারা গম্ মানুচ্চুনোর্ লো জোরেদাক্।

যিহিষ্কেল 13:22

যে গম্ মানুচ্চুনোরে মুই দুঘ্ ন-দুয়োং, মিজে কধা কোইনে তুমি তারারে আশানেইয়্যে ন গোজ্য আর পাজি মানুচ্চুনোরে তুমি উচ্চোমি দুয়ো যেনে তারা পরাণানি বাজেবাত্তে ভান্ন্যেই পধত্তুন্ ন-ফিরোন্।

যিহিষ্কেল 22:25

সেই দেজ মানুচ্চুনে কুজুরোমি গরন্; তারা গুজুরি উদোন্দে সিংহ ধোক্ক্যেন শিগের্ গরন। তারা মানুচ্চুনোরে গিলোন, ধন-সম্পদ আর মংগা মংগা জিনিস নেযান্ আর দেজ ভিদিরে ভালোক্কুন্ মিলেরে রানি বানেয়োন্।

যিহিষ্কেল 22:28

মিজে দর্শন আর মিজে গোণা-পড়ালোই তারার্ ভাববাদীগুনে তারার্ সেই কামানি উগুরে চিবিদি গুলোন্। লগেপ্রভু ন-কলেয়ো তারা কন্, প্রভু লগেপ্রভু এ কধাগান কোইয়্যে।

যিহিষ্কেল 23:36

ইয়েনর্ পরেদি লগেপ্রভু মরে কলদে, ও মান্‌‌‌জ্যর পুয়োবো, তুই কি অহলা আর অহলীবার বিচের্ গুরিবাত্তে যুক্কোল্? সালে তুই তারার্ জঘন্য কামর্ কধানি তারারে জানা।

হোশেয় 9:7

ইস্রায়েল যেন হবর্ রাগায়, সাজার্ দিন্নো এই যেইয়্যে, ইজেব-নিকেশর্ দিন্নো এইচ্চ্যে। তারার্ পাপ জনেদি বোউত্ আর তারা গোজেনরে এদক্ ঈচ্ গরনদে যে, তারা ভাববাদীগুনোরে বেদমা আর গোজেনর আত্মায় পেইয়্যে মান্‌জ্যরে পাগল্ মনে গরন্।

মীখা 2:11

যুনি কনঅ মিজে কধা কোইয়্যে আর ঠোগেয়্যে এইনে কয়, ‘মুই কঙর্, তমার্ বোউত্ মদ আর আংগুর-রস অবঅ,’ মাত্তর্ তেয়ই অবঅ এ জাদ্‌তোত্তে যগাজ্যে ভাববাদী‌‌‌!”

মীখা 3:8

মাত্তর্ মুই যাকোবরে তার্ অন্যেয়, ইস্রায়েলরে তার পাপ পৌইদ্যেনে জানেবাত্তে লগেপ্রভুর আত্মার্ দিয়্যে বল্লোই, ন্যায়বিচেরে আর সাহসে ভর্‌‌পুনং ওইয়্যেই।

সফনিয় 3:4

তার ভাববাদীগুনে অবাধ্য আর বেঈমান। তার ধর্মগুরুগুনে সিজিগানরে অসিজি গরন্ আর রীদি-সুদোম বিরুদ্ধে পাপ গরন্।