যিহোশূয় 21:43 - Chakma Bible

⁴³ লগেপ্রভু ইস্রায়েলীয়গুনোর পূরোণি মানুচ্চুনো ইদু যেদক্কানি জাগা দিবার শমক্‌ গোজ্যে সিয়েনি বেক্কানি তে তারারে দিয়্যে। ইস্রায়েলীয়গুনে সে দেজ্‌চানি গজক্ গুরি নেযেইনে সিয়েনিত্‌ বজত্তি গরা ধুরিলাক্‌।

যিহোশূয় 21:43 Iomraidhean Croise

পত্থম 12:7

পরেদি লগেপ্রভু অব্রামরে দেগা দিইনে কলঅ,“এ দেজ্‌চান্‌ মুই তঅ বংশবোরে দিম্‌।” যিবে তারে দেগা দিয়্যে সে লগেপ্রভুর্ নাঙে অব্রামে সেক্কে সিয়েনত্‌ এক্কো ডালিপূজো বানেল।

পত্থম 13:15

যেদক্কানি জাগা তুই দেগিবে সিয়েনি মুই তরে আর তঅ বংশবোরে উমরত্তে দিম্‌।

পত্থম 28:4

যে বরান্ তে অব্রাহামরে গোজ্যে সে বরান্ তে তরে আর তঅ পরেদি তঅ বংশর্‌ মানুচ্চুনোরে গোরোক্‌। যে দেজচান গোজেনে অব্রাহামরে দিলো, যিয়েনত্‌ তুই ইক্কিনে বিদেশী ইজেবে আগচ্‌, সে দেজ্‌চান্‌ যেনে তইদু এজে।”

২ বংশধর 20:8

তারা সিদু বজত্তি গত্তন্‌ আর তত্তেই এক্কান্‌ পবিত্র ঘর্‌ বানেইনে কোইয়্যেদে,

নহিমিয় 9:24

তারার্‌ পূঅ-ছাগুনে সে দেজত্‌ যেইনে সিয়েন্‌ গজক্‌ গুরি নেযেয়োন। সে দেজত্‌ বজত্তিগুরিয়্যে কনানীয়গুনোরে তুই তারার্‌ মুজুঙোত্‌ চিগোন্‌ গোজ্যস্‌। কনানীয়গুনোরে, তারার্‌ রাজাগুনোরে আর দেজর্‌ অন্য জাদ্‌তুনোরে তুই তারার্‌ আঢত্‌ তুলি দুয়োজ্‌ যেনে তারা তারার্‌ উগুরে যিয়েনি হুজি সিয়েনি গুরি পারন্‌।

নহিমিয় 9:8

তুই তার্‌ মনান্‌ বিশ্বেজি দেগিনে কনানীয়, হিত্তীয়, ইমোরীয়, পরিষীয়, যিবূষীয় আর গির্গাশীয়গুনোর্‌ দেজত্‌ তা বংশবোরে দিবাত্তে তাত্তেই এক্কান্‌ বেবস্থা থিদেবর্ গোজ্যস্‌। তুই গম্‌ বিলিনে তর্‌ এগেম্ তুই রোক্ষ্যে গোজ্যস্‌।

গীতসংহিতা 105:8

যে কধানি উগুম তে দিয়্যে আজার আজার বংশত্তে, তার সেই সুদোমর কধানি তে উমরত্যে ইদোত্ রাগেব।

গীতসংহিতা 44:3

তারা নিজো তলোয়ারলোই এ দেজ্‌ছান গজক্ ন-গরন, নিজো বল্লোই নয়ও জিদোন্; তর্ বল্লোই, অয়, তর্ বল্লোই; আর তর্ মহিমালোই সিয়েনি গোজ্যন্, কিয়া তারা উগুরে তর্ দোয়্যে এলঅ।

গীতসংহিতা 78:55

তারা মুজুঙোত্তুন অন্য জাদ্‌তুনোরে তে ধাবেই দিলো, আর সে জাদ্‌তুনোর জাগা-জোমিগানি তে জরীপ গুরিনে সোম্বোত্তি ইজেবে তারারে ভাগ গুরি দিলো; তারার ঘরানিত্ ইস্রায়েলর গুট্টিগুনোরে বজত্তি গরা বাজেই দিলো।

যাত্রা 3:8

মিসরীয়গুনোর্‌ আঢত্তুন্‌ তারারে রোক্ষ্যে গুরিবাত্যে মুই লামি এচ্চোং। মুই তারারে সে দেজত্তুন্‌ নিগিলেনে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনো দেজত্‌ নেযেম্‌। দেজ্‌সান্‌ এদক্‌ দাঙর্‌ আর দোল্; সিয়েনত্‌ দুধ, মধু আর কনঅ কিজুর্‌ অভাব নেই।

যিরমিয় 32:23

তারা এইনে সিয়েন গজক্ গোজ্যন্, মাত্তর্ তারা তঅ কধা ন-শুনোন্ আর তর্ সুদোম্ মজিম ন-চলন্; তুই যিয়েনি গুরিবাত্তে তারারে উগুম দুয়োচ্ সিয়েনি কিচ্চু তারা ন-গরন। সেনত্তে এ দজানি তুই তারা উগুরে আন্যচ্।

গণাণা 33:53

পরেদি তুমি সেই দেজ্‌চান্‌ গজক্ গুরি নেযেইনে সিয়েনত্‌ বজত্তি গুরিবা কিত্যে গজক্ গুরিবাত্তে দেজ্‌চান মুই তমারে দুয়োং।

দ্বি’লম্বর বিররণ 11:31

তমার গোজেন লগেপ্রভু যে দেজ্‌ছান তমারে দিবাত্তে যার্‌ সে দেজ্‌ছান গজক্ গুরিবাত্তে তুমি যর্দন গাঙান পার্‌ অবাত্তে যর্‌। তুমি যেক্কে সিয়েন্‌ গজক্ গুরিনে সিদু বজত্তি গুরিবাত্তে থেবা সেক্কে মুই তমারে এচ্চ্যে যেদক্কানি সুদোম আর উগুম্‌ দিলুং সিয়েনি হামাক্কাই পালন গুরিনে চলিবা।

দ্বি’লম্বর বিররণ 12:29

যিদুক্কুন জাদরে তুমি গজক্ গুরিবাত্তে যর্‌ তমা গোজেন লগেপ্রভু তমা মুজুঙোত্তুন্‌ তারারে এক্কুবারে ভস্ত গুরি দিবো। মাত্তর্‌ তারারে গজক্ গরানার পরেন্দি যেক্কে তুমি তারার দেজত্‌ বজত্তি গুরিবা সেক্কে উঝিয়ার অবা যেনে তমা মুজুঙোত্তুন্‌ তারা ভস্ত ওই যানার পরেন্দি তারার্‌ দেব-দেবেদাগুনোর পৌইদ্যেনে তোগেবাত্তে যেইনে তুমি কেরাবত্‌ ন-পড় আর পুজোর্ ন-গরঅ, এ বেক্‌ জাদ্‌তুনে কেধোক্ক্যেনগুরি তারার্‌ দেব-দেবেদাগুনোরে পূজো গুরিদাক্? আর যেরেন্দি কঅ, আমিয়ো সিয়েন্‌ গুরিবোং।

দ্বি’লম্বর বিররণ 17:14

তমার গোজেন লগেপ্রভু যে দেজ্‌ছান তমারে দিবাত্তে যার্‌ সিয়েনত্‌ যেইনে সিয়েন গজক্ গুরিনে যেক্কে তুমি সিয়েনত্ বজত্তি গুরিবা আর কবা, আমা কায়-কুরে জাদ্‌তুনো ধোক্ক্যেন এজঅ, আমি আমাত্তে একজনরে রাজা ইজেবে বেঈ লোই,

দ্বি’লম্বর বিররণ 34:4

সে পরেন্দি লগেপ্রভু তারে কলঅ, “ইয়েনই সেই দেজ্‌চান যিয়েন অব্রাহাম, ইসহাক আর যাকোব ইদু শমক্ গুরি কোইয়োং, ‘দেজ্‌চান মুই তর বংশধরুনোরে দিম্‌।’ দেজ্‌চান মুই তরে নিজোর চোগেদি চেবার সুযোগ দিলুং, মাত্তর গাঙ্‌ পার ওইনে তর্‌ সিয়েনত্‌ যেই ন-পারিবো।”

যিহোশূয় 1:6

“তুই বলী অ, মনত্‌ বল্‌ বান্‌, কিত্তেই যে দেজ্‌চান দিবার্‌ কধা মুই এ মানুচ্চুনোর পূরোণি মানুচ্চুনো ইদু শমক্‌ খেইনে কোইয়োং, সে দেজ্‌চান এ মানুচ্চুনোর অধিকার ইজেবপান্ তত্তুনোই ভাগ গুরি দিয়্যে পুরিবো।

যিহোশূয় 21:42

ইয়েনির্‌ পত্তিগানির্‌ চেরোকিত্তে এ্যামান্ চোড়েবার খলা এলঅ‌।

বিচের গুরিয়্যেগুন 11:24

তর্‌ কমোশ-দেবেদাবো তরে যিয়েন গজক্‌ গুরিবাত্তে দিয়্যে সিয়েন কি তঅ আন্দারে নেই? ঠিগ্ সেধোক্কেন্‌গুরি আমার্‌ গোজেন লগেপ্রভু আমা মুজুঙেত্তুন্‌ যিগুনোরে ধাবেই দিয়্যে আমি তারার জাগায়ানি গজক্‌ গুরি আগিই।

১ শমূয়েল 12:8

যাকোবে মিসর দেজত্‌ গেলঅ, আর পরেন্দি যেক্কে তমার পুরোণি মানুচ্চুনে লগেপ্রভুর ইদু কানাকুদি গুরিলাক্ সেক্কে লগেপ্রভু মোশি আর হারোণরে পাধেই দিলো। তারা মিসর দেজত্তুন্‌ তমার পুরোণি মানুচ্চুনোরে নিগিলেই আনিলাক্ আর এই দেজত্‌ তারারে বজত্তি গুরিবার বেবস্থা গুরিলো।