যিহোশূয় 12:1 - Chakma Bible

¹ অরাবা সং জাগানর পুরো পূগেদি ভাক্কান্‌ অর্ণোন কিজিঙোত্তুন্‌ হর্মোণ মুড়োবো সং যর্দন গাঙর্‌ পূগেদি ইমোরীয়গুনোর রাজা সীহোন আর বাশনর রাজা ওগরে ইস্রায়েলীয়গুনে ওদেই দিইনে তারার্‌ চাগালাগানি গজক্ গুরি নেযেয়োন্‌।

যিহোশূয় 12:1 Iomraidhean Croise

১ রাজাবলী 4:19

গিলিয়দত্‌, অত্তাৎ ইমোরীয়গুনোর রাজা সীহোনর আর বাশনর রাজা ওগের্‌ দেজত্‌ ঊরির পূঅ গেবর। এ চাগালাত্‌ তেয়ই অলদে বানা শাজন্‌গুরিয়্যে।

গীতসংহিতা 133:3

মনে অয় সিয়েন হর্মোণ মুড়োবোত্ পোজ্যে শিরপানি যিয়েন ঝুরি পোজ্যে সিয়োন মুড়োবোত্; কিত্তে লগেপ্রভু সিয়েনত্ বর্ দিয়্যে, আর সেই বরান্ অলঅ উমরর্ জিংকানি।

গীতসংহিতা 136:21

তে তারা দেশচানত্ বজত্তি গুরিবাত্তে দি দিলো; - তার কোচ্‌পানাগান উমরত্তে থিদেবর্ গোজ্যে-

গীতসংহিতা 89:12

উত্তোর দোগিণ তরই বানেয়্যে; তাবোর আর হর্মোণ মুড়োগুনে তরে নিইনে হুজির গীদ্ গান।

যিশাইয় 16:2

পেগো বাহ্‌‌‌ত্তুন ঠিলিনে নিগিলেই দিলে পেগে যেবাবোত্যেগুরি ইন্দি উন্দি ঘুরি বেড়ায় সেবাবোত্যেগুরি মোয়াব মানুচ্চুনে অর্ণোন গাঙান্ আঢিনে পার্ অইদ্যে জাগানত্ ঘুরি বেড়েবাক্।

গণাণা 21:13

সিয়োত্তুন্‌ আদা মারিনে তারা অর্ণোন গাঙর্‌ উইপারত্‌ যেইনে তাম্বুলান ফেলেলাক্। ইমোরীয়োগুনো দেজত্তুন্‌ যে ধূল্যেচর-চাগালাগান্‌ আরাম্ভ ওইয়্যে সিয়েন ভিদিরে এলদে এই অর্ণোন গাঙান। গাঙানর্‌ এক কিত্তেন্দি এলদে মোয়াব আর অন্য কিত্তেন্দি এলদে ইমোরীয়োগুনোর দেজ্‌ছান।

গণাণা 21:21

ইস্রায়েলীয়গুনে ইমোরীয়গুনোর রাজা সীহোন ইদু মানুচ্‌ পাদেইনে হোজোলী গুরিলাক্,

গণাণা 21:24

এই যুদ্ধোত্‌ ইস্রায়েলীয়গুনে তারে মারে ফেলেইনে অর্ণোনত্তুন্‌ যব্বোক গাঙ্‌ সং তার দেজ্‌ছান্‌ গজক্ গুরি নিলাক। তারা বানা অম্মোনীয়গুনোর দুঝি সং গজক্ গুরি পাজ্জোন, কিত্যে অম্মোনীয়গুনোর্‌ দেজর্‌ দুঝিবো এবাবোত্যে এলদে যিবে ভাঙি যানা সহজ ন-এলঅ।

গণাণা 32:19

যর্দন গাঙর্‌ উইপারত্‌ ইস্রায়েলীয়গুনো সমারে আমি কনঅ সোম্বোত্তি ন-নিবোং, কিত্যে গাঙর্‌ পূগ পারন্দি দঅ আমি সিয়েনি পেবং।

গণাণা 32:32

আমি লগেপ্রভুর মুজুঙোত্‌ যুদ্ধোর্‌ পোজাক্‌ উড়িনে গাঙ্‌ পার্‌ ওইনে কনান দেজত্‌ যেবং, মাত্তর্‌ গাঙর্‌ এ পারত্ থেবঅ আমার্‌ সোম্বোত্তিগানি।”

গণাণা 32:33

মোশি সেক্কে ইমোরীয়গুনোর্‌ রাজা সীহোনর্‌ রেজ্য আর বাশনর রাজা ওগের রেজ্য গাদ আর রূবেণ-গুট্টির মান্‌জ্যরে আর মনঃশি-গুট্টির অদ্দেক্ মান্‌জ্যরে ভাগ গুরি রাগেল। এই মনঃশি যোষেফর পূঅ। গ্রাম আর শঅর আর সিগুনোর্‌ চেরোকিত্তে জাগানি সুদ্ধো বেক্‌ দেজ্‌চান্‌ তে তারাত্তে রাগেল।

দ্বি’লম্বর বিররণ 2:24

সে পরেন্দি লগেপ্রভু কোইয়্যেদে, তুমি নিগিলি যঅ আর অর্ণোন গাঙান্‌ পার্‌ ওইনে যঅ। চঅ, মুই হিষ্‌বোনোর ইমোরীয় রাজা সীহোন আর তার্‌ দেজ্‌ছান তমা আদত্‌ দি দুয়োং। তুমি তা দেজ্‌ছান গজক্ গরানা আরাম্ভ গুরিনে তারে যুদ্ধোত্‌ লামদে বাধ্য গরঅ।

দ্বি’লম্বর বিররণ 2:32

ইয়েনর্ পরেন্দি যেক্কে সীহোনে তা সৈন্যগুন লোইনে নিগিলিনে যহসত্‌ আমা সমারে যুদ্ধো গুরিবাত্তে এলঅ সেক্কে আমা গোজেন লগেপ্রভু তারে আমা আদত্‌ আনি দিলো। আমি তারে, তার্‌ বেক্‌ পূঅগুনোরে আর তার্‌ সৈন্যগুনোরে শেজ্ গুরিলোং।

দ্বি’লম্বর বিররণ 3:1

ইয়েনর্ পরেন্দি আমি ঘুরিনে বাশন দেজ ইন্দি যেবার্‌ পথ্‌তান্ ধুরিনে উজেই গেলং। আমা সমারে যুদ্ধো গুরিবাত্তে বাশনর রাজা ওগ তার্‌ বেক্‌ সৈন্যগুন নেযেইনে নিগিলিনে ইদ্রিয়ী শঅরত্‌ এলাক।

দ্বি’লম্বর বিররণ 4:44

মোশি ইস্রায়েলীয়গুনো মুজুঙোত্‌ এ রীদি-সুদোমানি তুলি ধোজ্যে। মিসরত্তুন্‌ নিগিলি এজানার্‌ পরেন্দি তে যর্দনর্‌ পূগেন্দি হিষ্‌বোনোর্‌ ইমোরীয় রাজা সীহোনর্‌ দেজত্‌ বৈৎ-পিয়োরর মুজুঙো কিঝিঙানত্‌ ইস্রায়েলীয়গুনো ইদু এদক্কানি উঝিয়ারর্‌ কধা আর সুদোম আর উগুম্‌ জানেয়্যে। মিসর দেজত্তুন্‌ নিগিলি এজানার্‌ পরেন্দি মোশি আর ইস্রায়েলীয় রাজাবো সীহোনরে অদেই দিয়্যে।

দ্বি’লম্বর বিররণ 4:48

অর্ণোন কিঝিঙোর্‌ দুঝিত্‌ অরোয়র্‌ শঅরত্তুন্‌ সীওন মুড়ো, অত্তাৎ হর্মোণ মুড়োবো সং এলদে এ দ্বিয়ান্‌ রেজ্য।

যিহোশূয় 1:15

লগেপ্রভু যেদকদিন তমা ধোক্ক্যেন গুরি তমা ভেইয়ুনোরেয়ো বেক্কানিত্তুন জিরেবাত্তে ন-দে আর যেদকদিন সং তারা তমার গোজেন লগেপ্রভুর দিয়্যে দেজ্‌চান গজক্ গুরি ন-নেযান্‌ সেদকদিন সং তুমি ভেইয়ুনোরে এজাল্‌ দিবা। সে পরেন্দি তুমি ফিরি এইনে তমার নিজোর জাগায়ানি পুরোপুরিগুরিনে গজক্ গুরি পারিবা যিয়েনি লগেপ্রভুর চাগর্‌ মোশি যর্দনর পূগেন্দি তমারে দি যেইয়্যে।”

যিহোশূয় 11:17

এক কধায় সেয়ীর মুড়োবো ইন্দি উদি যেইয়্যে হালক মুড়োত্তুন হর্মোণ মুড়োবোর্‌ তলেদি লেবানন কিজিঙোর্‌ বাল্‌গাদ সং বেক্‌ জাগায়ানি যিহোশূয় গজক্ গুরি নেযেল। তে বেক্‌ জাগায়ানির্‌ রাজাগুনোরে ধুরিনে মারে ফেলেল।

যিহোশূয় 11:3

তে পূগ্‌ আর পোজিমেন্দি কনানীয়গুনোর কায়-কুরে আর মুড়ো-মুড়ি চাগালার্‌ ইমোরীয়, হিত্তীয়, পরিষীয় আর যিবূষীয়গুনো ইদু আর হর্মোণ মুড়োবোর্‌ তলে মিস্পা চাগালার হিব্বীয়গুনো ইদুয়ো হ্‌বর পাদেল।

যিহোশূয় 13:8

মনঃশি-গুট্টির অদ্দেক্‌ মানুচ্‌ আর রূবেণ আহ্‌ গাদ-গুট্টির মানুচ্চুনে যর্দনর পূগেন্দি জাগায়ান সোম্বোত্তি ইজেবে আগে পেইয়োন্‌। লগেপ্রভুর চাগর্‌ মোশি তারাত্তে সে জাগায়ান ঠিগ্‌ গুরি দি যেইয়্যে।

যিহোশূয় 22:4

তমা গোজেন লগেপ্রভুর এগেম্ মজিম তে যুদ্ধোত্তুন্‌ তমা ভেইয়ুনোরে জিরেবাত্তে দিয়্যে; সেনত্তেই লগেপ্রভুর চাগর্‌ মোশি যর্দনর উইপারত্‌ তমারে যে জাগায়ান্‌ দিয়্যে সে জাগানর ঘরানত্‌ এবেরা তুমি ফিরি যঅ।

বিচের গুরিয়্যেগুন 11:18

সে পরেন্দি তারা ধূল্যে-চর চাগালার ভিদিরেন্দি যেইনে ইদোম আর মোয়াব দেজ্‌চান ঘুরিনে মোয়াব দেজর পূগেন্দি যেইনে অর্ণোন গাঙর্‌ উই পারন্দি তাম্বুলান ফেলেয়োন। তারা মোয়াব দেজত্‌ ন-চমন্‌, কিয়া অর্ণোন গাঙান্‌ এলদে মোয়াব দেজর ধুজি।