যিহোশূয় 11:2 - Chakma Bible

² ইয়েন বাদে তে উত্তর মিক্যে অন্য যিদুক্কুন রাজা এলাক্‌ তারা ইদুয়ো হবর্ পাদেল। সে রেজ্যনি এলদে অজল্ মুড়ো-মুড়ি চাগালাত্‌, কিন্নেরতর দোগিণে অরাবা সংজাগানত, তলে মুড়ো-মুড়ি চাগালাত্‌‌ আর পোজিমেন্দি দোরর্‌ মুড়ো-মুড়ি জাগানত্‌।

যিহোশূয় 11:2 Iomraidhean Croise

১ রাজাবলী 15:20

রাজা আসা কধালোই বিনহদদে রাজী ওইনে তার্‌ সেনাপতিগুনোরে ইস্রায়েলর আদামানির বিরুদ্ধে পাধেই দিলো। তে ইয়োন, দান, আবেল-বৈৎ-মাখা আর পুরো কিন্নেরৎ আর তা লগে নপ্তালি-চাগালাগান্‌ গজক্ গুরি নেযেল।

১ রাজাবলী 4:11

নাফৎ-দোরোর বেক্‌ চাগালানিত্‌ বিন্-অবীনাদবে। তেয়ই শলোমনর্ ঝি টাফৎরে লোইয়্যে।

গণাণা 34:11

এই দুঝির্ চিহ্নোগান্‌ শফামত্তুন্‌ ঐনর পূগেন্দি রিব্লা সং লামি যেবঅ আর কিন্নেরৎ সাগরর্‌ কামা জাগানি ধুরি যাহ্ ধুরিবাক্।

লূকে লেখ্যে গম্ হবর্ 1:39

সে পরেদি মরিয়মে যাদিমাদি গুরি যিহূদিয়া রেজ্যর্ এক্কান আদামত্ গেলঅ। আদামান্ মুড়ো-মুড়ি চাগালাত্ এলঅ।

লূকে লেখ্যে গম্ হবর্ 5:1

এক সময়োত্ যীশু গিনেষর সাগর পারত্ থিয়্যেই এলঅ। মানুচ্চুনে গোজেন কধা শুনিবাত্তে তা চেরোকিত্তে ঠেলাঠিলি গত্তন্।

যিহোশূয় 10:40

এবাবোত্যেগুরি যিহোশূয় বেক্‌ চাগালাগান্‌ জিদি নেযেল। সে ভিদিরে এলদে অজল্‌ মুড়ো-মুড়ি চাগালা, নেগেভ, তলেদি মুড়ো-মুড়ি চাগালা আর মুড়ো-মুড়ির কামা জাগানি। তে সে চাগালার রাজাগুনোরেয়ো ওদেই দিলো আর সিদুগোর্ কাররে বাঁজেই ন-রাগেল। ইস্রায়েলীয়গুনোর গোজেন লগেপ্রভু যেধোক্ক্যেন্‌ উগুম গোজ্যে সেধোক্ক্যেন্‌ তে বেক্‌ জেদা পরাণবলাগুনোরে এক্কুবারে শেজ্‌ গুরি দিলো।

যিহোশূয় 10:6

সেক্কে গিবিয়োনীগুনে গিল্‌গলর তাম্বুলত্‌ যিহোশূয় ইদু এ হবরান পাদেলাক্‌, “তঅ চাগরুনোরে ছাড়ি ন-দিবে। তুমি যাদিমাদি এইনে আমারে রোক্ষ্যে গরগি, আমারে বল্‌ দুয়ো, কিত্যে মুড়োমুড়ি চাগালাত্তুন্‌ ইমোরীয় রাজাগুনে এইনে আমা বিরুদ্ধে তারার সৈন্যদলুন এক সমারে এগত্তর্‌ গোজ্যন।”

যিহোশূয় 11:16

এধোক্ক্যেনগুরি যিহোশূয় পুরো দেজ্‌চানি গজক্ গুরি নেযেল। সিয়েন ভিদিরে এলঅ অজল্ মুড়ো-মুড়ি চাগালা, পুরো নেগেভ্‌পান, পুরো গোশন চাগালাগান্‌, কামা মুড়ো-মুড়ি জাগায়ানি, অরাবা সং জাগায়ান্‌ আর ইস্রায়েলর উত্তরেন্দি অজল্‌ মুড়ো-মুড়ি চাগালাগান্‌ আর সে তলে জাগায়ানি।

যিহোশূয় 11:21

ইয়েনর্ পরেন্দি যিহোশূয় যেইনে মুড়ো-মুড়ি চাগালাত্‌‌ অনাকীয়গুনোরেয়ো মারে ফেলেল। এ চাগালাগান ভিদিরে এলাক্‌ হিব্রোণ, দবীর আর অনাব শঅ‌র আর যিহূদা আর ইস্রায়েলর বেক্‌ মুড়ো-মুড়ি জাগায়ানি। তে অনাকীয়গুনোরে আর তারার শঅ‌রানি আর আদামানি এক্কুবারে ভস্ত গুরি দিলো।

যিহোশূয় 12:3

ইয়েনবাদে কিন্নেরৎ সাগরত্তুন্‌ অরাবার সাগর, অত্তাৎ নুন্‌ সাগর্‌ আর বৈৎ-যিশীমোতর পথ্‌তান্‌ সং আর দোগিণেন্দি পিস্‌গা মুড়োবোর তলেদি সং অরাবা সং জাগানর পূগেদি ভাক্কান্‌ তার শাজনর্‌ অধীনোত্‌ এলঅ‌।

যিহোশূয় 13:27

কিজিঙো ভিদিরে বৈৎ-হারম, বৈৎ-নিম্রা, সুক্কোৎ, সাফোন আর হিষ্‌বোনর রাজা সীহোনর রেজ্যর বাদবাগি ভাক্কান্‌ আর কিন্নেরত সাগরর দোগিণেন্দি সং যর্দন গাঙর পূগ দুযিগান ধুরিনে বেক্‌ চাগালাগান।

যিহোশূয় 17:11

ইষাখর আর আশের-গুট্টির দুযি ভিদিরে বৈৎ-শান, যিব্‌লিয়ম আর সিয়েনির কায়-কুরে বেক্‌ আদামানি মনঃশি-গুট্টিরে দিয়্যে ওইয়্যে। ইয়েনবাদে দোর, ঐন্‌-দোর, তানক আর মগিদ্দোর মানুচ্চুন্‌ সহ এ বেক্‌ শঅর্‌ আর সিয়েনির কায়-কুরে বেক্‌ আদামানি মনঃশি-গুট্টিরে দিয়্যে ওইয়্যে। যেরেন্দি তিনান্‌ শঅর্‌ আর তারা সমারে আদামানি এলঅ মুড়ো-মুড়ি চাগালাত্‌।

বিচের গুরিয়্যেগুন 1:27

মনঃশি-গুট্টির মানুচ্চুনে বৈৎ-শান, তানক, দোর, যিব্লিয়ম আর মগিদ্দো শঅরর আর সিয়েনর চেরোকিত্তে আদাম্মেগুনোরে ধাবেই দি ন-পারন্‌, কিত্যে এ জাগায়ানর কনানীয়গুনে ঠিগ্‌ গোজ্যন্‌দে, তারা সে দেজ্‌চান ছাড়িনে ন-যেবাক্‌।