যিরমিয় 6:23 - Chakma Bible

²³ তারা ইধু ধনু আর সেল্ আগন; তারা চিৎনপুজ্যে আর কনঅ মেয়্যে ন দেগান্। ঘোড়া পিদিত্ উদি এবার অক্তত্ তারা রঅগুন সাগর গুজুরি উদেধে ধোক্ক্যেন; ও সিয়োন-ঝি, তরে আক্রমন গুরিবাত্তে তারা যোদ্ধা ধোক্ক্যেন যুক্কোল্ ওই এত্তন্।”

যিরমিয় 6:23 Iomraidhean Croise

যিশাইয় 10:32

এচ্চ্যে আসিরিয়গুনে নোবত্ যেইনে থামেবাক্; তারা সিয়োন-ঝিবোর মুড়োবো ইদু, অত্তাৎ যিরূশালেম মুড়োবো ইন্দি ঘুষি বাগাদন্।

যিশাইয় 13:18

তারা ধনুলোই গাবুজ্যেগুনোরে মারে ফেলেবাক্; তারা চিগোন পুয়োগুনোরে কনঅ মেয়্যে ন-গুরিবাক্ বা ঝি-পুয়োগুনোর ইন্দি মেয়্যের্ চোগেদি রিনি ন-চেবাক্।

যিশাইয় 17:12

হায় হায়, বোউত্ মান্‌জ্যর রঅ শুনো যার্! গুজুরি উঠ্যে সাগর ধোক্ক্যেন জাদ্‌‍‍তুনে গুজুরোদন্। জাদ্‌তুনোর জদবদে রঅ ছাড়ানাগানি শুনো যার্। দর্‌‍‍‍‍গরেপারা বান পানির গুজুরোনি ধোক্ক্যেন তারা রঅ ছাড়দন্।‍

যিশাইয় 19:4

এক্কো কড়া গিরোজ আঢত্ মুই মিসরীয়গুনোরে তুলি দিম্; এক্কো দর্‌‌‌‌গরেপারা রাজা তারারে শাজন্ গুরিবো।” ইয়েন অলঅ বেগত্তুন্ খেমতাবলা প্রভু লগেপ্রভুর্ কধা।

যিরমিয় 25:32

বেগত্তুন্ খেমতাবলা লগেপ্রভু কোইয়্যেদে, “চঅ, এক জাদত্তুন্ আর এক জাদত্ দজা ছিদি পোজ্যে; পিত্‌থিমীর শেজ্ ধুজিত্তুন এক্কান দর্‌‌‌‌গরেপারা ঝড় উদের্।”

যিরমিয় 25:9

সেনত্তে মুই উত্তোরর্ বেক জাদ্‌তুনোরে আর মর্ চাগর বাবিলোর রাজা নবূখদ্‌নিৎসররে ডাগি আনিম। এ দেজ্‌‌‌‌চান আর তা আদাম্মেগুনোর বিরুদ্ধে আর চেরোকিত্যে বেক জাদ্‌তুনোর বিরুদ্ধে মুই তারারে আনিম। মুই সেই মানুচ্চুনোরে পুরোপুরিভাবে ভস্ত গুরি দিম আর অমকদ দরর্ আর ঈচ্ গরেপারা গুরিম; তারা দেজ্‌‌‌‌চান মুই জিংকানিবরর্ ভস্তর্ জাগা গুরিম।‌

যিরমিয় 30:14

তর্ বেক লাঙুনে তরে ভুলি যেয়োন; তারা তঅ পৌইদ্যেনে চিদে ন-গরন। মুই তরে শত্রুর আঘাত ধোক্ক্যেন আঘাত গোজ্যং আর চিৎ-কোল্জ্যে নেইয়্যে মান্‌জ্য ধোক্ক্যেন সাজা দুয়োং, কিত্তে তর্ অন্যেয়ান অমকদ বেশ্ আর তঅ পাপ্‌‌‌পান বোউত্।

যিরমিয় 4:13

চঅ, তে মেঘ ধোক্ক্যেন গুরি উজেই এজের্। তার রথ্‌‌তানি টুত্যে বোইয়্যের ধোক্ক্যেন এজের্ আর তার ঘোড়াগুন ধবাচিল পেগোত্তুন্‌অ জোরে দাবা দুয়োন্। হায়, হায়, আমি ভস্ত ওই গেলং!

যিরমিয় 4:16

জাদ্তুনো ইধু আর যিরূশালেম ইধু এ কধাগান ফগদাং গরঅ, “ঘিরিবাত্তে সৈন্যগুনে দূর দেজত্তুন্ এত্তন্; তারা যিহূদার শঅরানির বিরুদ্ধে যুদ্ধোর্ ডাগ দেদন্।‌

যিরমিয় 4:29

ঘোড়া বাহিনী আর ধনুবলাগুনোর রঅলোই বেক্ শঅরর্ মানুচ্চুনে ধেই যেবাক্। কিজু মানুচ্ যেবাক্ ঘন ঝুবো ভিদিরে আর কিজু মানুচ্ উদিবাক্ দাঙর্ দাঙর্ পাত্তর উগুরে। পত্তি শঅর্ খালি ওইনে পড়ি থেবঅ; সিয়েনত্ কনঅ মানুচ্ বজত্তি ন-গুরিবাক্।

যিরমিয় 5:16

তারা জদবদে সেল্ মারন; তারা বেক্কুনে দরমর যোদ্ধা।

যিরমিয় 50:41

“চাহ্, একদল সৈন্য উত্তোরেত্তুন এত্তন্; পিত্‌‌‌‌থিমীর শেজ্ দুযিত্তুন এক্কো দাঙর্ জাদে আর ভালোক্কুন রাজায় উত্তেজিত ওইনে এত্তন্।

যিরমিয় 50:42

তারা ধনু আর তলোয়ারবলা; তারা চিৎনপুজ্যে আর দোয়্যেনেইয়্যে। তারা ঘোড়াত্ গুরি এবার্ অক্তত্ সাগর গুজুরোনি রঅ অর্; ও বাবিল-ঝি, তরে আক্রমণ গুরিবাত্তে তারা যুদ্ধোর্ সাজে এত্তন্।

যিরমিয় 6:4

তারা কবাক্কে, ‘তার বিরুদ্ধে যুদ্ধোর যুক্কোল্ অ। উদো, আঢ, আমি দিবুজ্যে আক্রমণ গুরিই। মাত্তর্ হায়, দিনোর পহ্‌রান কুমি যার্, আর সাজোন্যের ছাবাগান লাম্বা অর্।

যিরমিয় 8:16

দান শঅরত্তুন্ শত্রুগুনোর ঘোড়াগুনোর্ নাগ রঅ শুনো যার্; তারার্ ঘোড়াগুনোর রগুন্দোই পুরো দেজ্‌চান গির্‌গিরের। দেজ্ আর সিয়েন ভিদিরে বেক্কানিযার্ আর শঅর আর শঅরত্ থেইয়্যেগুনোরে তারা গিলিবাত্তে এত্তন্।

যিহিষ্কেল 21:31

মঅ রাগ্‌‌‌‌‌কান মুই তমা উগুরে ঢালি দিম আর তমা বিরুদ্ধে মর্ অমকদ রাগর্ আগুনোত্ ফুন্ দিম। মুই তমারে এমন চিৎনপুজ্যে মান্‌‌‌‌‌‌‌জ্য আঢত্ তুলি দিম যিগুনে ভস্ত গুরিবার কামত্ কাবিল্।

দ্বি’লম্বর বিররণ 28:49

লগেপ্রভু দূরোত্তুন, পিত্‌থিমীর শেজ্‌ দুঝিত্তুন এমন্‌ এক্কো জাদরে তমার বিরুদ্ধে লোই আনিবো যিগুনোর কধানি তুমি ন-বুঝিবা। ঈগল পেগো ধোক্ক্যেন গুরি সে জাত্তো ছোঁ মারিনে তমা উগুরে লামি এবঅ।