যিরমিয় 51:57 - Chakma Bible

⁵⁷ যিবের্ নাঙান বেগত্তুন্ খেমতাবলা লগেপ্রভু সেই রাজাবো কোইয়্যেদে, “মুই তার রাজার চাগরুনোরে, জ্ঞানী মানুচ্, শাজন্‌গুরিয়্যে, দাঙর্ পোজিশনর কামগুরিয়্যেগুন আর যোদ্ধাগুনোরে মাত্তল্ গুরিম। তারা উমরত্যে ঘুম যেবাক্; তারা আর ন-জাগিবাক্।

যিরমিয় 51:57 Iomraidhean Croise

যিশাইয় 37:36

সে পরেদি লগেপ্রভুর দূত্‌তো নিগিলিনে আসিরিয়গুনোর্ তাম্বুলোর্ এক লাখ্ পাচাশি আজার্ মান্‌‌‌জ্যরে মারে ফেলেল। তার্ কেল্যে বেন্যে অক্তত্ মানুচ্চুনে যেক্কে উদিলাক্ সেক্কে দেগা গেলদে বেক জাগানিত্ বানা মরা মানুচ্।‌‍‌

যিশাইয় 44:25

ভন্ড ভাবভাদীগুনোর্ চিহ্নোগানি মুই বিফল গুরি দুয়োং আর গণক্ক্যেগুনোরে ভুল-বেদমা বানাং। মুই জ্ঞানীগুনোর শিক্ষ্যেগানি বিফল গুরিনে সিয়েনি ভুল-বেদমাগুনোর্ শিক্ষ্যে বানাং।‌

যিশাইয় 6:5

সেক্কে মুই কলুং, “হায়, মুই ভস্ত ওই গেলুং, কিত্তে মঅ মুয়োন্ ফিবলা আর মুই এবাবোত্যে মান্‌জ্য ভিদিরে বজত্তি গরং যিগুনোর্ মুয়োনি ফিবলা। মুই নিজো চোগেদি রাজারে, বেগত্তুন্ খেমতাবলা লগেপ্রভুরে দেখ্যং।”

যিরমিয় 13:13

সালে তুই তারারে কবে, লগেপ্রভু কোইয়্যেদে, ‘যিগুনে এ দেজত্ বজত্তি গরন, অত্তাৎ দায়ূদোর সিংহাসনত্ বোস্যে বেক্ রাজাগুনোরে, ধর্মগুরুগুনোরে, ভাববাদীগুনোরে আর যিরূশালেমত্ বজত্তি গুরিয়্যে বেক্কুনোরে মুই মাত্তল্ গুরি থোম্।‌

যিরমিয় 25:27

সে পরেদি লগেপ্রভু মরে কোইয়্যেদে, তারারে কঅ, ইস্রায়েলর্ গোজেন বেগত্তুন খেমতাবলা লগেপ্রভু কোইয়্যেদে, মুই তমা ভিদিরে যুদ্ধো পাদাঙর্; তুমি মর্ রাগর গলস্‌চত্তুন হঅ, মাত্তল্ অ, অগল, গোজ্যে পড় আর ন-উঠ্য‌‌।

যিরমিয় 46:18

যিবে নাঙান্ বেগত্তুন্ খেমতাবলা লগেপ্রভু সেই রাজাবো ফগদাং গোজ্যে, মঅ জিংকানিগানর্ নাঙে কঙর্, এমন এক্কো এবঅ যিবে মুড়োগুনো ভিদিরে তাবোর ধোক্ক্যেন, সাগর ইধু কর্মিল ধোক্ক্যেন।

যিরমিয় 48:15

মোয়াব্‌পান্ ভস্ত অবঅ আর তা শঅরানি আক্রমণ গরা অবঅ; তার মূলুক্ মূলুক্ গাবুজ্যেগুনে গদ্দন্ দিবার জাগানত্ লামিবাক্।” যিবের্ নাঙান বেগত্তুন্ খেমতাবলা লগেপ্রভু সেই রাজাবো এ কধাগান কোইয়্যেদে,

যিরমিয় 50:30

সেনত্তে তার্ গাবুজ্যেগুনে শঅরর্ খুলো জাগাত্ মুরিনে পড়ি থেবাক্; সেদিন্যে তার বেক্ সৈন্যগুনোরে শেজ্ গুরি দিয়্যে অবঅ।

যিরমিয় 51:39

তারা রাগ্ গুরিলে পরেদি মুই তারাত্তে এক্কো মেইট্‌বানর্ বেবস্থা গুরিম। মুই তারারে মাত্তল্ গুরিম যেন তারা হুজিয়ে নাজি উদোন্, সে পরেদি উমরত্তে ঘুমোন্, কনদিন্‌অ ন‌‌‌-জাগন।

যিহিষ্কেল 20:33

মুই প্রভু লগেপ্রভু মর্ জিংকানির নাঙে কঙর্, মর্ খেমতাবলা আঢ্‌‌‌তানি বাবেইনে রাগে মুই তমা উগুরে রাজাগিরি গুরিম।

নহূম 1:10

তুমি মাদি ফেগঅ ভিদিরে দলামজা ওই যেবা আর মদ হেইনে মাত্তল্ অবা; তুমি নাড়া ধোক্ক্যেন পুড়ি যেবা।

নহূম 3:18

ও আসিরিয়ার রাজা, তঅ নেতাগুনে ঘুমোদন্; তঅ রাজ্‌কামগুরিয়্যেগুনে পড়ি আগন্। তঅ মানুচ্চুনে মুড়োই মুড়োই ছিদি পোজ্যন্, তারারে এগত্তর্ গুরিবার কনজন নেই।

মালাখি 1:14

যিবের্ য়েমান পাল ভিদিরে যগাজ্যে মরদ য়েমান্ আগন্ আর তে সিবে দিবাত্তে মানত্ গোজ্যে মাত্তর্ সে পরেদি এক্কো থুদো য়েমান্ লগেপ্রভুর নাঙে উৎসর্ব গোজ্যে, তে দঅ দগাবাঁজি। তা উগুরে অভিশাব্ পোড়োক্। মুয়ই দাঙর্ রাজা আর বেক্ জাদ্‌‌‌‌তুনে মরে দরান্। মুই বেগত্তুন্ খেমতাবলা লগেপ্রভু এ কধাগান কঙর্।”

ফগদাং পেইয়্যে 18:9

পিত্‌থিমীর্ যিদুক্কুন্ রাজা তা সমারে বেভিচের্ গোজ্জ্যন আর উবোল্‌পাল্ গুরি তা সমারে বজত্তি গোজ্জ্যন তারা তারে পুড়ি ফেলেবার্ সময়োত্ ধূমো দেগিনে কানিবাক্ আর তাত্যে দুঘ্ পেবাক্।