যিরমিয় 48:11 - Chakma Bible

¹¹ এক কুমোত্তুন্ আর এক কুমোত্ ঢালা ন-অলে মদ যেবাবোত্যে তা গাদ উগুরে পড়ি থায় সেবাবোত্যেগুরি মোয়াবে তার চিগোনত্তুন্ ধুরি নিশিদেগুরি পড়ি আঘে; তে বন্দীদজাত্ ন-যায়। সেনত্তে তার সুয়োত্তান্ আগ ধোক্ক্যেন রোইয়্যে, তা তুম্বাজ্‌‌চান্ ন-বদলে।

যিরমিয় 48:11 Iomraidhean Croise

গীতসংহিতা 123:4

আরামত্ থেইয়্যে মানুচ্চুনোর ফেচ্ কারানিগানি আর বাড়্‌বো গুরিয়্যেগুনোর ঈচ্ গরানা আমা তাল্লোত্ সং লুম্মেগোই।

গীতসংহিতা 55:19

গোজেন, যিবে পৌইল্যাত্তুন ধুরি সিংহাসনত্ আঘে তে শুনিবো আর তারারে সাজা দিবো। তারার মনানি কনঅ পরিবত্তন্ নেই, গোজেন উগুরে দর্‌অ নেই।

গম্ উপদেজ্ 1:32

ভুল মানুচ্চুনোর ভান্ন্যেই পধেদি যানাগান তারার মরণর দযা অবঅ, জ্ঞান নেইয়্যেগুনোর চিদেচজ্জা নেইয়্যে মনভাব্‌পানি তারারে ভস্ত গুরিবো;

যিশাইয় 16:6

আমি মোয়াবর দেমাগর্ কধা শুন্ন্যেই, তে অমকদ দেমাগ্। তার বাড়্‌বো কধা, নিজোরে দাঙর্ গুরিবার কধা আর বেক দেমাগর্ কধানি শুন্ন্যেই, মাত্তর্ তার বেক বাড়্‌বো গরানাগানি মিজে।

যিশাইয় 24:3

পিত্‌থিমীগান এক্কুবারে খালি ওই পড়ি থেবঅ, সিয়েন এক্কুবারে লুদো অবঅ। লগেপ্রভু এ কধাগান কোইয়্যেদে।

যিশাইয় 25:6

বেগত্তুন্ খেমতাবলা লগেপ্রভু এ মুড়োবো উগুরে বেক্ জাদ মানুচ্চুনোত্তে গম্ গম্ হানা জিনিজোর আর পুরোণ আংগুর-রসর এক্কো দাঙর্ হানা দিবো ; সিয়েনত্ থেবদে বেগত্তুন্ গম্ য়েরাগান আর বেগত্তুন গম্ আংগুর-রসছান্।

যিরমিয় 22:21

তুই যেক্কে গম্ অবস্থায় এলে সেক্কে মুই তরে উজিয়ার গোজ্যং, মাত্তর্ তুই কোইয়োচ্চে, ‘মুই ন-শুনিম।’ পৌইল্যাত্তুন্ ধুরি তঅ বেবহারান এবাবোত্যে; তুই মর্ বাধ্য ন-অচ্।

যিরমিয় 48:12

মাত্তর্ দিন এজের্ যেক্কে মুই কুমোত্তুন্ ঢালেদে মানুচ্চুনোরে পাধেই দিম, আর তারা তারে ঢালিনে নিগিলেবাক্; তারা তা কুমুন্ সুদো গুরিবাক্ আর তা পিলেগুন চুরমার গুরি দিবাক্।

যিরমিয় 48:29

মোয়াব্‌‌পুনে অমকদ চেদেয়্যে। আমি তার চেদেয়্যে কধা, বদ্‌রাগী, মান্‌জ্যরে ঠোগেয়্যে আর মনর্ বাড়্‌বো কধানি হবর্ পেই।

যিরমিয় 51:34

যিরূশালেমর মানুচ্চুনে কদন্, “বাবিল রাজা নবূখদ্‌নিৎসরে আমারে গিলি ফেল্যে, আমারে চুরমার গোজ্যে, আমারে সুদো কুমো ধোক্ক্যেন গোজ্যে। দানব ধোক্ক্যেন্ তে আমারে গিলি ফেল্যে আর আমারে গম্ গম্ হানা দিইনে তা পেট্‌‌‌‌তো ভোরেয়্যে, আর সে পরেদি আমারে এঁটোকাঁটা ধোক্ক্যেন দূর্ গুরি দিয়্যে।”

নহূম 2:10

তারে লুদো অর্, খালি গরা অর্ আর ভস্ত গরা অর্। তা মানুচ্চুনোর মনানি গলি যেইয়্যে, আঢু গিলেগুন দগ্‌‌দগাদন্; তারার্ কমরত্ আর জোর্ নেই, তারার পত্তিজনর্ রাঙা-কালা মু ওই যেইয়্যে।

নহূম 2:2

যুনিয়ো ভস্তগুরিয়্যেগুনে ইস্রায়েলরে মানুচ্ নেইয়্যে গোজ্যন্ আর তা আংগুর খেত্‌তানি চৌইদ্যেল্ গুরি দৈন্ তো লগেপ্রভু ইক্কিনে যাকোবর, অত্তাৎ ইস্রায়েলর আগর্ সয়-সাগোজ্যে ফিরেই দিবো।

সফনিয় 1:12

সে সময়োত্ মুই চেরাগ্‌‌কোই যিরূশালেমর বেক জাগানিত্ তোগেম্ আর যিগুনে নিজোরে নিইনে হুজি থান্ আর কন্, ‘লগেপ্রভু গম্-ভান্ন্যেই কিচ্ছু ন-গুরিবো,’ তারারে মুই সাজা দিম্।

সখরিয় 1:15

মুই নিচিদে থেইয়্যে সেই বেক জাদ্‌‌‌‌‌তুনো উগুরে অমকদ বেজার্ ওইয়োং, কিত্যে মুই যেক্কে মঅ মানুচ্চুনো উগুরে বানা এক্কানাগুরি বেজার্ ওইয়োং সেক্কে সেই বেক জাদ্‌তুনে মঅ মানুচ্চুনোর দুদ্দশা সমারে আরঅ দুদ্দশা দুয়োন্।‌‌‌‌