যিরমিয় 44:22 - Chakma Bible

²² তমা ভান্ন্যেই আর জঘন্য কামানি লগেপ্রভু যেক্কে আর সোজ্য গুরি ন-পারিলো সেক্কে তমা দেজ্‌‌‌‌চান মানুচ্ নেইয়্যে, ভস্ত ওইয়্যে জাগা আর ঈচ্ গরে পারা ওই গেলঅ আর সে দেজ নাঙান মানুচ্চুনে অভিশাব্ ইজেবে বেবহার গরন। এজঅ সেবাবোত্যে রোইয়্যে।

যিরমিয় 44:22 Iomraidhean Croise

পত্থম 19:13

কিত্তে এ চাগালাগান্‌ ভস্ত গুরি ফেলেবাত্ত্যে আমি যুক্কোল ওই আগিই। এ চাগালার্‌ মানুচ্চুনো বিরুদ্বে লগেপ্রভু ইধু এদক্‌ বেশ্‌ গুরি রঅ রঅ অর্‌ যে, তে সিয়েন্‌ ভস্ত গুরিবাত্তে আমারে পাদেই দিয়্যে।”

পত্থম 6:3

এ অবস্থা দেগিনে লগেপ্রভু কলঅ, “মর্ আত্মাগানে জনম্‌ ভুরি মানুচ্চুনো ইধু ন-থেবঅ, কিত্তে মানুচ্‌ মরনর্‌ অধীন। মুই তারারে একশঅ কুড়ি বজর সময় দোঙর্।”

২ রাজাবলী 17:15

তারা তার্‌ বেক্‌ সুদোমানি, তারার্‌ পূরোণি মানুচ্চুনোত্তে থিদেবর্ গোজ্যে তার্‌ সুদোমান্‌ আর তারা ইদু তার্‌ দিয়্যে উজিয়ারর্‌ কধানি মানদে অস্বীগের্‌ গোজ্যন্‌। তারা বাজে মূত্তি পূজো গুরিনে নিজেয়ো বাজে ওই পোজ্যন্‌। লগেপ্রভু যিগুনো ধোক্ক্যেন চলিবাত্তে ইস্রায়েলীয়গুনোরে মানা গোজ্যে তারা তারার্‌ চেরোকিত্তে সে জাত্তুনোর্‌ ধোক্ক্যেন চলিদাক্‌।

যিশাইয় 1:24

সেনত্তে বেগত্তুন্ খেমতাবলা প্রভু লগেপ্রভু, ইস্রায়েলর্ সেই খেমতাবলা গোজেনে কোইয়্যেদে, “আহ্, মর্ বিপক্ষগুনো আঢত্তুন্ মুই রেহাই পেইম্ আর মঅ শত্রুগুনো উগুরে হেনা উগুরেম্।

যিশাইয় 43:24

তুই কনঅ তুম্বাজ্ বচ্ মত্তে কিনি ন-আনচ্; তর্ য়েমান উৎসর্বর তেল্‌লোই তুই মরে হুজি ন-গরচ্। সিবের্ বদলে তুই তঅ পাপ ভারান্ মঅ উগুরে চাপি দুয়োচ্ আর তর্ বেক অন্যেয়ানিলোই মরে বল্‌পোজ্যে গোজ্যস্।‌‌‍‌‌‍

যিশাইয় 7:13

সেক্কে যিশাইয় কলঅ, “দায়ূদ বংশর মানুচ্চুন্, তুমি শুনো। মান্‌জ্যর ধৈয্য পোরোক্ক্যে গরানা কি যগাজ্যে নয়? তুমি কি মঅ গোজেনর্ ধৈয্য পোরোক্ক্যে গুরিবা?

যিরমিয় 15:6

মুই লগেপ্রভু কঙর্, তুই মরে ছাড়ি যেইয়োচ্, তুই উগুদো পধেদি যেইয়োচ্। সেনত্তে মুই তইন্দি আত্ বাবেইনে তরে ভস্ত গুরিম; মুই আর মেয়্যে গুরি ন-পারং।

যিরমিয় 18:16

সেনত্তে তারা দেজ্‌চান পুরি থেইয়্যে ভূই আর এক্কান জনমর্ ঈচ্ গরেদে জিনিস ওইনে থেবঅ; যিগুনে সে কুরেদি যেবাক্ তারা আমক্ ওইনে মাঢাবো লারেবাক্।‌‌‍‍

যিরমিয় 21:12

‘ও দায়ূদর বংশ, মুই লগেপ্রভু কঙর্, তুমি পত্তিদিন বেন্যেমাদান্ ন্যায়বিচের গুরিবে। যিবেরে লুদো ওইয়্যে তারে তা অত্যেচারির আঢত্তুন্ উদ্ধোর গুরিবে; সিয়েন ন-গুরিলে তমা ভান্ন্যেই কামানিত্তে মঅ রাগ্‌‌কান নিগিলেনেই আগুনো ধোক্ক্যেন জুলিবো, কনজনে সিয়েন মারেই ন-পারিবো।

যিরমিয় 23:2

সেনত্তে যে পালক্‌‍‌কুনে মঅ মানুচ্চুনোরে চড়ান সেই পালক্‌কুনো বিরুদ্ধে ইস্রায়েলর গোজেন লগেপ্রভু কোইয়্যেদে, “তুমি মর্ পালর্ ভেড়াগুনোরে ছিদি ফেল্য আর তারারে ধাবেই দুয়ো, তারারে কনঅ যত্তন্ ন-গরঅ; সেনত্তে তমা অন্যেয়ত্তে মুই তমারে সাজা দিম।‍‌

যিরমিয় 24:9

মুই তারারে যিয়েনত্ দূর গুরি দুয়োং সাৎ সিয়েনত্ মুই তারারে দর্‌‌গরেপারা মান্‌‌‍জ্য ধোক্ক্যেন গুরিম‍, পিত্‌থিমীর বেক্ জাদ্‌‌‍‌‌তুনো ইধু কাঙেলেত্যের বেপার্, এক্কো ঈচ্ গরা হেইয়্যে মানুচ্, এক্কান দাগ কধা আর এক্কো ঈচ্ গরা হেইয়্যে মানুচ্। মান্‌‌‍‌‍‌জ্যে তারা নাঙানিলোই অভিশাব্ দিবাক্।

যিরমিয় 25:11

এ দেজ্‌‌‌চান ভস্তর্ জাগা আর ফেলা যেইয়্যে ভূই ওই যেবঅ আর এ জাদ্‌‌‌তুনে সত্তুর বজর ধুরি বাবিলো রাজার চাগর্ ওই থেবাক্।

যিরমিয় 25:18

মুই যিরূশালেম আর যিহূদার শঅরানিত্ আর তার রাজাগুনোরে আর রাজকর্মচারীগুনোরে হাবেলুং, যেন তারা এচ্চ্যে যেবাবোত্যে আগন সেবাবোত্যে ভস্তর্, অমকদ দর্‌গরেপারা, ঠাট্টার আর অভিশাবর্ জাগাত্ থান।‌‌‌‌

যিরমিয় 25:38

তে সিংহ ধোক্ক্যেন গুরি তা জাগায়ান ফেলেই এবঅ; সেক্কে অত্যেচারীগুনোর রাগত্তে আর লগেপ্রভুর দর্‌গরেপারা রাগত্তে তারা দেজ্‌‌‌‌‌‌চান ভস্ত ওইয়্যে জাগা অবঅ।

যিরমিয় 26:6

তুমি যুনি এবাবোত্যেগুরি থাগঅ সালেন্ মুই এ ঘরানরে শীলো ধোক্ক্যেন গুরিম আর এমন গুরিম যেনে পিত্‌থিমীর বেক জাদ্‌‌‌‌‌‌‌‌তুনে এ শঅর নাঙান্দোই অভিশাব্ দুয়োন‌‌‌‌‌।’ ”

যিরমিয় 29:18

মুই যুদ্ধো, ভাদরাত্ আর ভানালোই তারা পিজেদি লোড়েম্ আর পিত্‌থিমীর বেক্ রেজ্যগানি ইধু তারারে দর্‌‍‌‍‍গরেপারা মান্‌‍জ্য ধোক্ক্যেন গুরিম। যিদুক্কুন জাদ ভিদিরে মুই তারারে ধাবেই দিম্ তারা ইধু তারারে গুরিম ঠাট্টা-মশকারি আর ঈচ্ গরেদে মান্‌‍জ্য ধোক্ক্যেন। তারার অবস্থা দেগিনে মানুচ্চুনে আমক্ অবাক্ আর তারার নাঙানি অভিশাব ইজেবে বেবহার গুরিবাক্।

যিরমিয় 29:19

ইয়েনর কারনান্ অলঅ, যে কধাগান মুই বার্ বার্ মঅ চাগরুনোরে, অত্তাৎ ভাববাদীগুনোরে দিইনে তারা ইধু কোই পাদেয়োং সিয়েন তারা ন-শুনোন্।

যিরমিয় 30:14

তর্ বেক লাঙুনে তরে ভুলি যেয়োন; তারা তঅ পৌইদ্যেনে চিদে ন-গরন। মুই তরে শত্রুর আঘাত ধোক্ক্যেন আঘাত গোজ্যং আর চিৎ-কোল্জ্যে নেইয়্যে মান্‌জ্য ধোক্ক্যেন সাজা দুয়োং, কিত্তে তর্ অন্যেয়ান অমকদ বেশ্ আর তঅ পাপ্‌‌‌পান বোউত্।

যিরমিয় 34:22

মুই তারারে উগুম দিইনে এ শঅরত্ ফিরেই আনিম। তারা এ শঅর বিরুদ্ধে যুদ্ধো গুরিবাক্ আর সিয়েন গজক্ গুরিনে পুড়ি দিবাক্। মুই যিহূদার শঅরানিরে ভস্ত গুরিনে মানুচ্ নেইয়্যে গুরিম।”

যিরমিয় 4:4

ও যিহূদা আর যিরূশালেমর মানুচ্চুন, লগেপ্রভুর বাধ্য অবাত্তে তমার চুনুগুলোবোর্ মাঢাবোর্ চামান কাবঅ , অত্তাৎ তমা মন ভিদিরে কজরাগানি দূর্ গরঅ; সিয়েন ন-গুরিলে তমা ভান্ন্যেই কামানিত্তে মঅ রাগ্‌কান নিগিলিনে আগুনো ধোক্ক্যেন জুলি উদিবো, কনজনে সিয়েন মারেই ন-পারিবো।‍‌‍

যিরমিয় 42:18

ইস্রায়েলর গোজেন বেগত্তুন্ খেমতাবলা লগেপ্রভু কোইয়্যেদে, যিগুনে যিরূশালেমত্ বজত্তি গুরিদাক্ তারা উগুরে যেবাবোত্যে মর্ অহুজি আর রাগ্ ঢালি পোজ্যে তুমি মিসরত্ গেলে সেবাবোত্যেগুরি মঅ রাগ্‌কান তমা উগুরেয়ো পুরিবো। তুমি অবা ঠাট্টা আর ঈচ্ গরা হেইয়্যে মানুচ্; তমা অবস্থা দেগিনে মানুচ্চুনে আমক্ অবাক্ আর তমা নাঙানিলোই মান্‌জ্যে অভিশাব্ দিবাক্। তুমি আর কনদিন্‌অ এ জাগায়ান ন-দেগিবা।

যিরমিয় 44:12

যিহূদার বাদবাগি যিদুক্কুন মানুচ্ মিসরত্ যেইনে বজত্তি গুরিবাক্ বিলিনে ঠিগ্ গোজ্যন্ তারা বিরুদ্ধে মুই এমন বেবস্থা গুরিম যেনে তারা বেক্কুনে মিসরত্ ভস্ত অয়। তারা বেক্কুনে যুদ্ধোত্ ন-অলে ভাদরাদত্ মুড়িবাক্। তারা অবাক্ ঠাট্টা-মশ্‌‌‌‌কারি আর ঈচ্ গরেদে মানুচ্; তারা অবস্থা দেগিনে মানুচ্চুনে আমক্ অবাক্, আর তারা নাঙানিলোই মানুচ্চুনে অভিশাব্ দিবাক।

যিরমিয় 44:2

মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, মুই যিরূশালেম আর যিহূদার বেক্ আদামানি আর শঅর উগুরে যে অমকদ দজা আন্যং সিয়েনি তুমি দেখ্য। সিয়েনি এচ্চ্যে ভস্ত ওইনে পড়ি আঘে; সিয়েনিত্ কনজনে বজত্তি ন-গরন্।

যিরমিয় 44:6

সেনত্তে মর্ অমকদ রাগ্‌‍‌কান ঢালি দিয়্যে ওইয়্যে; সিয়েন যিহূদার শঅরত্ শঅরত্ আর যিরূশালেমর পধে পধে জুলি উঠ্যে আর সেনত্তে এচ্চ্যে সিয়েনি মানুচ্ নেইয়্যে আর ভস্ত ওই পড়ি আঘে।

যিরমিয় 48:9

মোয়াব্‌‌‍‍‍‍পানরে ডুয়ো দো যেন তে উড়িনে ধেই যেই পারে; তা শঅরানি মানুচ্ নেইয়্যে অবাক্, সিয়েনিত্ কনজনে বজত্তি ন-গুরিবাক্।”

যিরমিয় 5:9

মুই লগেপ্রভু পুযোর্ গরঙর্, ইয়েনত্তে কি মুই তারারে সাজা ন-দিম্? মুই কি এবাবোত্যে জাদ উগুরে হেনা ন-সুজিম্?

যিহিষ্কেল 39:23

আর জাদ্‌তুনে হবর্ পেবাক যে, ইস্রায়েলীয়গুনে তারার্ পাপত্তে বন্দীদজাত্ যেইয়োন, কিত্যে তারা মঅ উগুরে অবিশ্বেজি ওইয়োন্। সেনত্তে মর্ মুয়োন মুই তারাত্তুন্ ফিরেই রাগেয়োং আর শত্রুগুনো আঢত্ তারারে তুলি দুয়োং; তারা বেক্কুনে যুদ্ধোত্ মারা পোজ্যন্।

যিহিষ্কেল 5:13

ইয়েনি গরানার্ পরেদি মর্ অমকদ বেজার্ অনাগান্ থুম্ অবঅ; তারা উগুরে মর্ রাগ্‌‌কান পুরোপুরি ঢালি দেনার পরেদি মুই শান্ত ওম্। সেক্কে তারা হবর্ পেবাক্ যে, মর্ রিবেঙর্ জ্বালায় মুই লগেপ্রভু এই কধানি কোইয়োং।

দানিয়েল 9:11

ইস্রায়েলীয়গুন বেক্কুনে তর্ উগুম অমান্য গুরিনে তঅ পদত্তুন্ সুরি যেইয়োন; তারা তঅ কধা ন-শুনোন্। সেনত্তে তর্ চাগর্ মোশির সুদোমত্ লেখ্যে যে অভিশাবর্ কধা তুই শমক্ হেইনে কোইয়োচ্ সিয়েনি আমা উগুরে ঢালি দিয়্যে ওইয়্যে, কিত্যেই আমি তঅ বিরুদ্ধে পাপ গোজ্যেই।

দানিয়েল 9:12

আমার আর আমার শাজন্‌গুরিয়্যেগুনোর্ বিরুদ্ধে তুই যে কধানি কোইয়োচ্ সিয়েনি পূরোণ গুরিবাত্তে তুই আমা উগুরে দাঙর্ দযা আন্যচ্। যিরূশালেম উগুরে যিয়েনি গরা ওইয়্যে গোদা পিত্‌‌‌থিমীত্ আর কনজাগাত্ সেবাবোত্যে গরা ন-অয়।

আমোষ 2:13

“শোজ্য বুয়োইয়্যে গাড়িত্ তলে কিজু পড়িলে যেবাবোত্যে গুড়ি ওই যায় সেবাবোত্যে গুরি ইক্কিনে মুই তমারে গুড়ি গুরিম।

মালাখি 2:17

তুমি নিজো কধালোই লগেপ্রভুরে বল্‌‌‌‌‌পোজ্যে গোজ্য। তো তুমি কত্তে, “কেধোক্ক্যেন্‌গুরি আমি তারে বল্‌পোজ্যে গোজ্যেই‌‌‌‌‌?” তুমি এবাবোত্যেগুরি গোজ্য-তুমি কোইয়োদে, “যিগুনে অন্যেই গরন্ তারা বেক্কুনে লগেপ্রভুর চোগেদি গম্ আর তে তারা উগুরে হুজি,” বা কোইয়োদে, “কুদু সেই গোজেনে যিবে ন্যায়বিচের্ গরে?”

রোমীয় 9:22

ঠিগ্ সেবাবোত্যেগুরি গোজেনে তা রাগ্‌কান্ আহ্ খেমতাগান্ দেগেবাত্তে চেইয়্যে; তো যে মানুচ্চুনো উগুরে তা রাগ্‌কান্ ফগদাং গুরিবো, খুব ধৈজ্জ্য ধুরিনে তে তারারে সোজ্জ্য গুরিলো। এ মানুচ্চুনোর বানা এক্কান্ পাওনা এলদে ভস্ত অনা।