যিরমিয় 44:12 - Chakma Bible

¹² যিহূদার বাদবাগি যিদুক্কুন মানুচ্ মিসরত্ যেইনে বজত্তি গুরিবাক্ বিলিনে ঠিগ্ গোজ্যন্ তারা বিরুদ্ধে মুই এমন বেবস্থা গুরিম যেনে তারা বেক্কুনে মিসরত্ ভস্ত অয়। তারা বেক্কুনে যুদ্ধোত্ ন-অলে ভাদরাদত্ মুড়িবাক্। তারা অবাক্ ঠাট্টা-মশ্‌‌‌‌কারি আর ঈচ্ গরেদে মানুচ্; তারা অবস্থা দেগিনে মানুচ্চুনে আমক্ অবাক্, আর তারা নাঙানিলোই মানুচ্চুনে অভিশাব্ দিবাক।

যিরমিয় 44:12 Iomraidhean Croise

যিশাইয় 1:28

মাত্তর্ উল্লোমীগুনে আর পাপীগুনে বেক্কুনে একসমারে ভস্ত অবাক্, আর যিগুনে লগেপ্রভুরে ছাড়ি যেইয়োন্ তারা শেজ্ ওই যেবাক্।

যিশাইয় 65:15

মর্ বেঈ লোইয়্যে মানুচ্চুনে কাররে নিন্দে গুরিবাত্তে তমা নাঙানি বেবহার গুরিবাক্। প্রভু লগেপ্রভু তমারে মারে ফেলেব, মাত্তর্ তা চাগরুনোরে তে আর এক্কান নাঙ্ দিবো।

যিরমিয় 18:16

সেনত্তে তারা দেজ্‌চান পুরি থেইয়্যে ভূই আর এক্কান জনমর্ ঈচ্ গরেদে জিনিস ওইনে থেবঅ; যিগুনে সে কুরেদি যেবাক্ তারা আমক্ ওইনে মাঢাবো লারেবাক্।‌‌‍‍

যিরমিয় 24:9

মুই তারারে যিয়েনত্ দূর গুরি দুয়োং সাৎ সিয়েনত্ মুই তারারে দর্‌‌গরেপারা মান্‌‌‍জ্য ধোক্ক্যেন গুরিম‍, পিত্‌থিমীর বেক্ জাদ্‌‌‍‌‌তুনো ইধু কাঙেলেত্যের বেপার্, এক্কো ঈচ্ গরা হেইয়্যে মানুচ্, এক্কান দাগ কধা আর এক্কো ঈচ্ গরা হেইয়্যে মানুচ্। মান্‌‌‍‌‍‌জ্যে তারা নাঙানিলোই অভিশাব্ দিবাক্।

যিরমিয় 26:6

তুমি যুনি এবাবোত্যেগুরি থাগঅ সালেন্ মুই এ ঘরানরে শীলো ধোক্ক্যেন গুরিম আর এমন গুরিম যেনে পিত্‌থিমীর বেক জাদ্‌‌‌‌‌‌‌‌তুনে এ শঅর নাঙান্দোই অভিশাব্ দুয়োন‌‌‌‌‌।’ ”

যিরমিয় 29:18

মুই যুদ্ধো, ভাদরাত্ আর ভানালোই তারা পিজেদি লোড়েম্ আর পিত্‌থিমীর বেক্ রেজ্যগানি ইধু তারারে দর্‌‍‌‍‍গরেপারা মান্‌‍জ্য ধোক্ক্যেন গুরিম। যিদুক্কুন জাদ ভিদিরে মুই তারারে ধাবেই দিম্ তারা ইধু তারারে গুরিম ঠাট্টা-মশকারি আর ঈচ্ গরেদে মান্‌‍জ্য ধোক্ক্যেন। তারার অবস্থা দেগিনে মানুচ্চুনে আমক্ অবাক্ আর তারার নাঙানি অভিশাব ইজেবে বেবহার গুরিবাক্।

যিরমিয় 29:22

বাবিলোত্ থেইয়্যে যিহূদার বেক বন্দীগুন তারা কধানি ইদোত্ গুরিনে এ অভিশাব্‌পান বেবহার গুরিবাক্, ‘লগেপ্রভু তরে সিদিকিয় আর আহাব ধোক্ক্যেন গোরোক্, যিগুনোরে বাবিল রাজা আগুনোত্ পুজ্যে,’

যিরমিয় 42:1

সে পরেদি সৈন্যদলর বেক সেনাপতিগুনে, কারেহের পুয়ো যোহানন আর হোশয়িয়র পুয়ো যাসনিয় আর বেক মানুচ্চুনে এইনে ভাববাদী যিরমিয়রে কলাক্, “দোয়্যে গুরি তুই আমা কোজোলিগান শুন্ আর বাদবাগি মানুচ্চুনোত্তে তুই তঅ গোজেন লগেপ্রভু ইধু তবনা গর্। তুই দঅ ইক্কিনে দেগর্ যুনিয়ো এক সময় আমি ভালক্কুন্ এলং ইক্কিনে বানা কয়েকজন আগিই।

যিরমিয় 42:22

সেনত্তে ইক্কিনে তুমি হবর্ রাগ, তুমি যে জাগানত্ যেইনে বজত্তি গুরিবাত্তে চঅ সিয়েনত্ তুমি যুদ্ধো,ভাদরাত্ আর ভানালোই মারা পড়িবা।”

যিরমিয় 43:11

তে এইনে মিসরান আক্রমণ গুরিবো আর যিগুনে মরণত্তে ঠিগ্ ওই আগন তারার মরণ অবঅ, যিগুনে বন্দী অবাত্তে ঠিগ্ ওই আগন্ তারা বন্দী অবাক্ আর যিগুনে তলোয়ারত্তে ঠিগ্ ওই আগন্ তারা যুদ্ধোত্ মুরিবাক্।

যিরমিয় 44:22

তমা ভান্ন্যেই আর জঘন্য কামানি লগেপ্রভু যেক্কে আর সোজ্য গুরি ন-পারিলো সেক্কে তমা দেজ্‌‌‌‌চান মানুচ্ নেইয়্যে, ভস্ত ওইয়্যে জাগা আর ঈচ্ গরে পারা ওই গেলঅ আর সে দেজ নাঙান মানুচ্চুনে অভিশাব্ ইজেবে বেবহার গরন। এজঅ সেবাবোত্যে রোইয়্যে।

হোশেয় 4:6

গোজেন পৌইদ্যেনে জ্ঞানর্ অভাবে মঅ মানুচ্চুন ভস্ত ওই যাদন্। তুমি সেই জ্ঞানানরে এলাফেলা গোজ্য বিলি মুইয়ো মর্ ধর্মগুরু ইজেবে তমারে এলাফেলা গুরিলুং। তুমি তমার্ গোজেনর রীদি-সুদোম্ ভুলি যেইয়ো, সেনত্তে মুইয়ো তমা ঝি-পুয়োগুনোরে ভুলি যেইম্।

হোশেয় 9:6

যেক্কেনে তারা ভস্ত অইদ্যে আঢত্তুন্ ধেই যেবাক্ সেক্কেনে মিসরে তারারে এগত্তর্ গুরিবো আর মোফ শঅরত্ তারারে গোর্ দিবো। তারার্ তুবেয়্যে রূবো আর তারার্ থেবার ঘরানি হেরপদনা আরি কাদাগাজে ঢাগি ফেলেব।

সখরিয় 8:13

ও যিহূদা আর ইস্রায়েল, বেক্ জাদর্ মানুচ্চুনে আগে তমা নাঙানি অভিশাব্ ইজেবে বেবহার গুরিদাক্, মাত্তর্ ইক্কিনে মুই তমারে উদ্ধোর্ গুরিম আর তারা তমা নাঙানি আশিদ্‌‌বাদ ইজেবে বেবহার গুরিবাক্। তুমি ন-দোরেয়ো, বরং দরমর অ।

গণাণা 5:27

মিলেমানুচ্চো যুনি অসতী ওইনে নেগরে বিশ্বেজ্ ন-গরে সালে অভিশাবর্‌ এই পানিগান্‌ তারে হাবানার্‌ পরেদি সিয়েন্‌ তার্‌ পেদত্‌ যেইনে তারে অমহদ দুখ্‌ দিবো। তার্‌ পেট্টো ফুলি উদিবো আর মিলে-জিনিসচান অকেজো ওই যেবঅ আর তা মানুচ্চুনে তার্‌ নাঙান্‌ অভিশাব ইজেবে বেবহার্‌ গুরিবাক।