যিরমিয় 32:22 - Chakma Bible

²² যে দেজত্ দুধ, মধু আর কনঅ কিজুর্ অভাব নেই সে দেজ্‌চান দিবার কধা তুই তারার পুরোণি মানুচ্চুনো ইধু শমক্ হেইয়োচ্ আর সিয়েন তারারে দুয়োচ্।‌

যিরমিয় 32:22 Iomraidhean Croise

পত্থম 13:15

যেদক্কানি জাগা তুই দেগিবে সিয়েনি মুই তরে আর তঅ বংশবোরে উমরত্তে দিম্‌।

পত্থম 24:7

স্বর্গর গোজেন লগেপ্রভু মরে মঅ বাবঅ ঘর-ভিদে আর মর্‌ জর্মেয়্যে জাগাত্তুন্‌ নিগিলেই আনিলো। তে মঅ লগে কধা কোইয়্যে আর শমত্‌ খেইনে কোইয়্যেদে, এ দেজ্‌সান্‌ তে মঅ বংশবোরে দিবো। তে তঅ আগেন্দি তা দূত্তোরে সিদু পাদেই দিবো যেনে মঅ পুয়োবোর্‌ মোক্‌ অবাত্তে তুই সিয়েনত্তুন্‌ এক্কো মিলে আনি পারচ্‌।

পত্থম 50:24

পরেদি এক সময়ত্‌ যোষেফে তা ভেইয়ুনোরে কলঅ, “মর্‌ মুরিবার্‌ অক্ত ওই এচ্চ্যে, মাত্তর্‌ ইয়েন্‌ ঘেচ্চেকগুরি, গোজেনে তমারে দেগাশুনো গুরিবো। তে অব্রাহাম, ইসহাক আর যাকোবরে যে দেজ্‌সান্‌ দিবো বিলি শমক্‌ গোজ্যে সে দেজ্‌সানত্‌ তে তমারে ইয়োত্তুন্‌ নেযেব।”

নহিমিয় 9:15

পেট্‌পরা বুগ্‌মারেবাত্তে তুই স্বর্গত্তুন্‌ তারারে হানা দুয়োচ্‌ আর পানিতিরেজ্ মারেবাত্তে পাত্তরত্তুন্‌ পানি নিগিলেই দুয়োজ্‌। যে দেজ্‌ছান দিবাত্তে তুই শমক্‌ খেইয়োজ্‌ সিদু যেইনে সিয়েন্‌ অধিকার্‌ গুরিবাত্তে তুই তারারে উগুম্‌ দুয়োজ্‌।

যাত্রা 13:5

যেক্কে লগেপ্রভু তমারে কনানীয়, হিত্তীয়, ইমোরীয়, হিব্বীয় আর যিবূষীয়গুনোর্‌ দেজত্‌ নেযেব সেক্কে তুমি বজরর্‌ এই মাস্যত্‌ এই অনুষ্ঠানান্ পালন গুরিবা। ইয়েনই সেই দেজ্‌ছান যিয়েন্‌ লগেপ্রভু তমারে দিবো বিলি তমার পুরোণি মানেইয়ুনো ইধু শমক্‌ গোজ্যে। সিয়েনত্‌ দুধ, মধু আর কনঅ‌ কিজুর্‌ অভাব নেই।

যাত্রা 3:17

সেনত্যে মুই কঙর্‌, মিসর দেজর্ অত্যেচারত্তুন্‌ নিগিলেনে মুই তমারে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনোর দেজত্‌ নেযেম্‌। সিয়েনত্ দুধ, মধু আর কনঅ কিজুর্‌ অভাব নেই।

যাত্রা 3:8

মিসরীয়গুনোর্‌ আঢত্তুন্‌ তারারে রোক্ষ্যে গুরিবাত্যে মুই লামি এচ্চোং। মুই তারারে সে দেজত্তুন্‌ নিগিলেনে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনো দেজত্‌ নেযেম্‌। দেজ্‌সান্‌ এদক্‌ দাঙর্‌ আর দোল্; সিয়েনত্‌ দুধ, মধু আর কনঅ কিজুর্‌ অভাব নেই।

যিরমিয় 11:5

মুই তমা পুরোণী মানুচ্চুনো ইধু এমন দেজ্ দিবার শমক্ গোজ্যং যিয়েনত্ দুধ, মধু আর কনঅ কিজুর অভাব নেই, আর সে শমক্তান্ মুই পুরেই দিম।’ সে দেজ্‌চানই এচ্চ্যে তুমি গজক্ গুরি আগঅ।” ‍ জোবত্ মুই কলুং, “আমেন, লগেপ্রভু।”

যিহিষ্কেল 20:15

ইয়েনিবাদেয়ো সেই ধূল্যেচর-চাগালাত্ তারা ইধু মুই শমক্ হেইয়োঙ্, মর্ দিয়্যে দেজ্-যে দেজত্ দুধ, মধু আর কনঅ কিজুর্ অভাব নেই, যে দেজ্‌‌‌‌‌চান বেক্ দেজ্‌‌‌‌‌চানিত্তুন সেরা-সে দেজত্ মুই তারারে ন-নেযেম।

যিহিষ্কেল 20:6

সেদিন্যে মুই তারা ইধু আরঅ শমক্ হেইয়োঙ, মিসর দেজত্তুন তারারে নিগিলেনে তারাত্তে যে দেজ্‌‌‌চান মুই ঠিগ্ গোজ্যং সে দেজত্ তারারে নেযেম্। সিদু দুধ, মধু আর কনঅ কিজুর অভাব নেই; সিয়েন বেগ্ দেজ্‌‌‌চানিত্তুন্ সেরা।

গণাণা 14:16

লগেপ্রভু সেই মানুচ্চুনো ইদু যে দেজ্‌চান্‌ দিবার্‌ শমক্‌ গোজ্যে সিয়েনত্‌ লোই যেবার্‌ খেমতা নেই বিলিই তে ধূল্যেচর-চাগালাত্‌ তারারে মারে ফেলেয়্যে।

গণাণা 14:30

বজত্তি গুরিবাত্তে যে দেজ্‌চান্‌ তমারে দিম্‌ বিলি মুই শমক্‌ গোজ্যং বানা যিফুন্নির পূঅ কালেবে আর নূনোর পূঅ যিহোশূয়ো বাদে আর কনজনে সেই দেজত্‌ চোমেই ন-পারিবাক।

দ্বি’লম্বর বিররণ 1:8

চঅ‌, মুই সেই জাগায়ানি তমারে দি ফেল্যং। মুই লগেপ্রভু তমার্‌ পুরোণিমানুচ্‌ অব্রাহাম, ইসহাক, যাকোব আর তারার্‌ পরেন্দি তারার্‌ বংশধরুনোরে যে দেজ্‌ছান দিবাত্তে শমক্‌ খেইয়োং তুমি সিয়েনত্‌ যেইনে সেই দেজ্‌ছান গজক্ গরঅ।

দ্বি’লম্বর বিররণ 6:10

তমার পুরোণি মানুচ্‌ অব্রাহাম, ইস্‌হাক আর যাকোব ইদু তমা গোজেন্‌ লগেপ্রভু তমারে যে দেজ্‌ছান দিবার্‌ কধা শমক্‌ খেইনে কোইয়্যে সিদু তে তমারে নেযেব। সিদু আগেদে এন্‌ দোল্‌ আর দাঙর্‌ দাঙর্‌ শঅর্‌ যিয়েনি তুমি নিজেই ন-বানঅ,

দ্বি’লম্বর বিররণ 6:18

তমার্‌ যেনে ভালেদি অয় সেনত্যে লগেপ্রভুর চোগোত্‌ যিয়েনি ঠিগ্ আর গম্‌ তুমি সিয়েনোই গোজ্য। সেক্কে লগেপ্রভু তমার্‌ পুরোণি মানুচ্চুনো ইদু শমক্‌ গুরিনে যে দোল্‌ দেজ্‌ছান দিবার কধা এগেম্ গোজ্য, সে দেজত্‌ যেইনে তুমি সিয়েনি গজক্ গুরিবা আর লগেপ্রভু যেধোক্ক্যেন কোইয়্যে সেধোক্ক্যেন গুরি তমা মুজুঙোত্তুন্‌ তমার্‌ শত্রুগুনোরে তুমি ধাবেই দি পারিবা।

দ্বি’লম্বর বিররণ 6:23

মাত্তর্‌ সিয়েনত্তুন্‌ তে আমারে নিগিলেই আন্যে যেনে আমার্‌ পুরোণি মানুচ্চুনো ইদু যে দেজ্‌ছান দিবার্‌ শমক্‌কান্‌ তে গোজ্যে সে দেজত্‌ নেযেইনে আমারে সিয়েনি দি পারে।

দ্বি’লম্বর বিররণ 7:13

তে তমারে কোচ্‌পায়, বর্ দিবো আর তমা মান্‌জ্যর সোংখ্যেগুন বাড়েই দিবো। যে দেজ্‌ছান তমারে দিবার্‌ কধা তে তমার পুরোণি মানুচ্চুনো ইদু শমক্‌ খেইনে কোইয়্যে সে দেজত্‌ তে তমারে বর্ দিবো। সেক্কে তমার্‌ ভালোক্কুন্‌ পূঅ-ছা অবাক্‌, তমা ভূইয়োত্তুন্‌ তুমি জদবদে শোজ্য, আংগুরো-রস আর তেল পেবা, আর তমার্‌ গোরু, ছাগল আর ভেড়াগুনোরঅ ভালোক্কুন ছঅ অবাক্।

দ্বি’লম্বর বিররণ 8:1

এচ্চ্যে মুই তমারে যেদক্কানি উগুম্‌ দুয়োঙর্‌ সিয়েনির্‌ পত্তি উগুম পালন গুরিবাত্তে তুমি মন দুয়ো, যেনে তুমি বাঁজি থাগঅ আর সোংখ্যেন্দি বাড়িই উদো আর লগেপ্রভু তমার পুরোণি মানুচ্চুনো ইদু যে দেজ্‌ছান দিবার্‌ কধা শমক্‌ খেইনে এগেম্ গোজ্যে সিদু সুমিনে সিয়েনি গজক্ গুরি পারঅ।

যিহোশূয় 1:6

“তুই বলী অ, মনত্‌ বল্‌ বান্‌, কিত্তেই যে দেজ্‌চান দিবার্‌ কধা মুই এ মানুচ্চুনোর পূরোণি মানুচ্চুনো ইদু শমক্‌ খেইনে কোইয়োং, সে দেজ্‌চান এ মানুচ্চুনোর অধিকার ইজেবপান্ তত্তুনোই ভাগ গুরি দিয়্যে পুরিবো।

যিহোশূয় 21:43

লগেপ্রভু ইস্রায়েলীয়গুনোর পূরোণি মানুচ্চুনো ইদু যেদক্কানি জাগা দিবার শমক্‌ গোজ্যে সিয়েনি বেক্কানি তে তারারে দিয়্যে। ইস্রায়েলীয়গুনে সে দেজ্‌চানি গজক্ গুরি নেযেইনে সিয়েনিত্‌ বজত্তি গরা ধুরিলাক্‌।