যিরমিয় 31:3 - Chakma Bible

³ সে অক্তত্ ইস্রায়েলীয়গুনে কোইয়োন, লগেপ্রভু দূরোত্তুন্ তারারে দেগা দিয়্যে। সেক্কে লগেপ্রভু তারারে কোইয়্যেদে, “অমকদ কোচ্‌‌পানালোই মুই তমারে কোচ্‌‌পেইয়োং; অমকদ কোচ্‌‌পানালোই মুই তমারে কায়কুরে টান্যং।”

যিরমিয় 31:3 Iomraidhean Croise

১ রাজাবলী 10:9

তর্‌ গোজেন লগেপ্রভুর বাঈনী ওক্‌, যিবে তঅ উগুরে হুজি ওইনে তরে ইস্রায়েলর সিংহাসনত্‌ বোজেয়্যে। ইস্রায়েলীয়গুনোরে তে জিংকানিবর্‌ কোচ্‌পায় বিলিনে তে দোল্‌বিচের্‌ আর ন্যায় রোক্ষ্যে গুরিবাত্তে তরে রাজা বানেয়্যে।”

গীতসংহিতা 103:17

মাত্তর্ যিগুনে লগেপ্রভুর ভক্ত, যিগুনে তার সুদোমানি মানি চলন্ আর তার সুদোম মজিম চলেদে ইন্দি খিয়েল রাগান্, তারা উগুরে তার অমকদ কোচ্‌পানা আর তার বিশ্বেজছান্ উমরত্যে থেবঅ, বংশর পর বংশ ধুরি থেবঅ।

গীতসংহিতা 25:6

ও লগেপ্রভু, তর্ মমতা আর অমকদ কোচ্‌‌পানার কধা তুই পুরি ন-ফেলেচ্; সিয়েনি দঅ তর্ উমরর্ কাম।

পরমগীত 1:4

মুই রাজারে কলুং, “তুই মরে তঅ সমারে নেযা; আঢিচ্, আমি যাদিমাদি যেই।” তে মরে তা ঘরত্ নেযেল। আমি তরে নিইনে ফুত্তি গুরিবোং আর হুজি অবং; আংগুর-রসত্তুন্ বেশ্ তঅ কোচ্‌পানাগান বাঈনী গুরিম্। তারা যে তরে কোচ্‌পান সিয়েন্ ঠিগই গরন্।

যিশাইয় 43:4

মুই তঅ বদলে অন্য মানুচ্চুনোরে দিম্ আর তঅ পরাণানর্ বদলে অন্য জাদ্‌তুনোরে দিম, কিত্তে তুই মঅ চোগেদি মূল্যবান আর সর্মান পেইয়্যে, আর মুই তরে কোচ্‌‌পাং।

যিশাইয় 45:17

মাত্তর্ গোজেনে ইস্রায়েলরে উমরত্তে উদ্ধোর্ গুরিবো; তুমি কনঅ কালত্ লাজত্ ন-পুরিবা বা অগমান ন-পেবা।

যিশাইয় 49:14

মাত্তর্ সিয়োনে কলঅ, “লগেপ্রভু মরে ছাড়ি যেইয়্যে, তে মরে ভুলি যেইয়্যে।”

হোশেয় 11:1

লগেপ্রভু কত্তে, ইস্রায়েল চিগোন অক্তত্ মুই তারে কোচ্‌পেদুং আর মিসরত্তুন্ মর্ পুয়োবোরে ডাগি আন্যং।‌‌‌‌‌‌

হোশেয় 11:4

মুই কির্ব্যে গরানা আর কোচ্‌পানালোই তারারে চালেইদুং; তারা গত্তনা উগুরেত্তুন্ জুঙোলান্ তুলি নেযেদুং আর নিযো ওইনে তারারে হাবেদুং।

মালাখি 1:2

লগেপ্রভু কত্তে, “মুই তমারে কোচ্‌পেইয়োং‌,” মাত্তর্ তুমি কত্তে, “তুই কেধোক্ক্যেন গুরি আমারে কোচ্‌‌পেইয়োচ্?” ইয়েনর্ জোবত্ লগেপ্রভু কত্তে, “এষৌ কি যাকোবর ভেই ন-এলঅ? তো দঅ মুই যাকোবরে কোচ্‌পেইয়োং মাত্তর্ এষৌরে এলাফেলা গোজ্জ্যং। মুই তা মুড়োগুন ভস্তর্ জাগা বানেয়োং আর তার জাগাগান ধূল্যেচর-চাগালার শিয়েলুনোরে দুয়োং।”

রোমীয় 8:30

যিগুনোরে তে আগেত্তুন্ ধুরি ঠিগ্ গুরি রাগেয়্যে তারারে তে ডাগিলো; যিগুনোরে ডাগিলো তারারে তে নিদ্দুজি বিলি মানিয়ো ললঅ; যিগুনোরে নিদ্দুজি বিলি মানি ললঅ তারারে তে নিজোর্ মহিমায়ো দান গুরিলো।

রোমীয় 9:13

আর সেনত্তে পবিত্র বোইবোত্ লেগা আঘে, “যাকোবরে মুই কোচ্‌পেইয়োং, মাত্তর্ এষৌরে এলাফেলা গোজ্জ্যং।”

দ্বি’লম্বর বিররণ 10:15

তো তমার্‌ পুরোণি মানুচ্চুনো উগুরে তার্‌ টান্ এলঅ বিলিনে তে তারারে কোচ্‌পেইয়্যে। তে পুরো জাদ ভিদিরেত্তুন্‌ তারার্‌ বংশধরুনোরে, অত্তাৎ তমারে বেঈ লোইয়্যে আর এচ্চ্যেয়ো তুমি সেই বেঈ লোইয়্যে জাদ ইজেবে আগঅ।

দ্বি’লম্বর বিররণ 33:26

তে কোইয়্যেদে, “যিশুরূণর গোজেন ধোক্ক্যেন আর কনজন নেই। তর্‌ সাহায্যকারী অবাত্তে মেঘঅ উগুরে চড়িনে নিজোর মহিমায় তে আগাজ-পদেন্দি যায়।

দ্বি’লম্বর বিররণ 33:3

“ঘেচ্চ্যেকগুরি তে তার নিজোর মানুচ্চুনোরে কোচ্‌পায়। পবিত্র দূত্তুনে তার অধীনোত্‌ আগন, তারা বেক্কুনে তা টেঙানিত্‌ মাদা নিগিরিনে আগন; তাত্তুনোই তারা উগুম পান্‌।

দ্বি’লম্বর বিররণ 4:37

তে তমার পুরোণি মানুচ্চুনোরে কোচ্‌পেদঅ আর তারার্‌ পরেন্দি তারার্‌ বংশধরুনোরে বেঈ লোইয়্যে। সেনত্তে তে নিজে আঝিল্ ওইনে তার্‌ দাঙর্‌ বলান্দোই মিসর দেজত্তুন্‌ তমারে নিগিলেই আন্যে।

২ তীমথিয় 1:9

গোজেনে আমারে পাপত্তুন্ উদ্ধোর্ গোজ্জ্যে আর পবিত্র গুরি জিংকানি কাদেবাত্যে ডাক্ক্যে। আমার কনঅ কামত্যে তে সিয়েন ন-গরে, বরং তার্ উদ্দেচ্য আর দোয়্যের্ কারনে গোজ্জ্যে। জগদ্ সৃট্টি অবার আগে খ্রীষ্ট যীশুরে দিইনে তে তার্ দোয়্যে আমারে দান গোজ্জ্যে,

যাকোব 1:18

তা নিজোর্ আওজে সত্য কধানিলোই তে আমারে তার্ পুয়ো বানেয়্যে, যেন তার্ সৃট্টি জিনিজো ভিদিরে আমি এক বাবোত্যে পত্তম ফল ধোক্ক্যেন ওই।

১ পিতর 1:3

আমা প্রভু যীশু খ্রীষ্টর্ গোজেন আর বাবার্ বাঈনী গরা ওক্‌। যীশু খ্রীষ্টরে মরণত্তুন্ জেদা গুরি তুলিনে গোজেনে তার্ দোয়্যেলোই আমারে নুয়ো জর্ম দান গোজ্জ্যে। সিয়েনর্ কারনে আমি এক্কান জদবদে আশ্বাস পেইয়্যেই,

১ যোহন 4:19

তে পত্তমে আমারে কোচ্‌পেইয়্যে বিলিনে আমি কোচ্‌পেই।