যিরমিয় 22:3 - Chakma Bible

³ লগেপ্রভু কোইয়্যেদে, ‘যিয়েন ন্যায্য আর ঠিগ্ তুমি সিয়েনই গরঅ। যিবেরে লুদো ওইয়্যে তারে তা অত্যেচারিগুনোর আঢত্তুন উদ্ধোর গরঅ। বিদেশী, মা-বাপ নেইয়্যে আর রানিমিলেগুনো উগুরে কনঅ অন্যেয় বা অত্যেচার ন-গোজ্য আর এ জাগাত্ নিদ্দুযির্ লো ন-ঝোরেয়ো।

যিরমিয় 22:3 Iomraidhean Croise

২ শমূয়েল 23:3

ইস্রায়েলর গোজেনে কোইয়্যেদে, ইস্রায়েলর আশ্রয়-মুড়ো মরে কোইয়্যেদে, ‘যে মানুচ্চো গমেডালে মানুচ্চুনোরে শাজন্ গরে আর গোজেনরে দরায়,

ইয়োব 22:9

তো তুই রানি মিলেগুনোরে সুদো আত্যে বিদেয় গুরিদে আর মা-বাপ নেইয়্যেগুনোর অধিকারান্‌ কাড়ি নেযেদে।

ইয়োব 24:9

বাপনেইয়্যে চিজিবোরে সেই শদানুনে মা বুগোত্তুন্ কাড়ি নেযান্ আর কজ্জত্যে নাঢা মানুচ্চুনোর পুঅগুনোরে বন্ধক্ রাগান।

গীতসংহিতা 68:5

গোজেনে তার পবিত্র থেবার জাগানত্ মা-বাপ নেইয়্যেগুনোর বাপ্ আর রানিমিলেগুনোর পক্কে গুজিলোইয়্যে।

গীতসংহিতা 82:4

নাদা আর দিন-দুখিগুনোরে বাঁজা; পাজিগুনোর আঢত্তুন্ তারারে রোক্ষ্যে গরঅ।”

গীতসংহিতা 94:21

তারা গম মানুচ্চোর্ বিরুদ্ধে দল বানন্ আর নিদ্দুযিবোরে মরণর সাজা দিবাত্যে দুষি বানান্।

গীতসংহিতা 94:6

রানিমিলে আর বিদেশিগুনোরে তারা মারে ফেল্যন্ আর মা-বাপ নেইয়্যে গুনোরে খুন গোজ্যন্।

যাত্রা 22:21

কনঅ‌ পর্‌ভাস্যে সমারে ভান্ন্যেই বেবহার্‌ ন-গোজ্য বা তা উগুরে অত্যেচার্‌ ন-গোজ্য, কিত্তেই মিসর দেজত্‌ তুমিয়ো একদিন্‌ পর্‌ভাস্যে এলা।

যাত্রা 22:22

“কনঅ‌ রানিমিলেরে বা কনঅ মা-বাপ্‌ নেইয়্যে পূঅরে বা ঝিরে দুখ্‌ ন-দুয়ো।”

গম্ উপদেজ্ 23:10

দুযিগানর পুরোনা চিহ্নো-পাত্তর্ তুই সোরেই ন-দিচ্ বা বাপ্‌-মা নেইয়্যেগুনোর ভূইয়ানি গজক্ ন-গুরিচ্,

গম্ উপদেজ্ 6:17

বার্বো বার্বো চোগ, মিজেকধা কোইয়্যে জিলান্, গম্ মান্‌জ্যরে খুন্‌গোজ্যে যে আঢ্‌তানি,

যিশাইয় 1:23

তর্ শাজন্‌গুরিয়্যেগুন্ উল্লোমী আর চুরুনোর্ সমাজ্যে; তারা বেক্কুনে ঘুষ্ আর বক্‌শিজ্ পেবাত্তে চান্। তারা মা-বাপ নেইয়্যেগুনোর্ তপ্পে ন-থান্ আর রানিমিলেগুনোর্ মগদ্দমাগানি তারা ইদু জাগা ন-পায়।

যিশাইয় 58:6

আজলে মুই এবাবোত্যে উবোস্ থানাগান্ চাং: তুমি অবিচারর শিগোল্ আর জুঙোল দুড়িগান খুলি দুয়ো, অত্যেচারিত গুনোরে মুক্তি দুয়ো আর পত্তি জুঙোল্ ভাঙি ফেলঅ,

যিশাইয় 58:7

পেট পুরেদে মানুচ্চুনোরে তমা হানাগানি ভাগ্ গুরি দুয়ো, ঘুরি বেড়েয়্যে নাঢা মান্‌জ্যরে নিজো ঘরত্ আশ্রয় দুয়ো, লাংতা-বাংতা দেগিলে তারে কাবড় উরেই দুয়ো, আর নিজো কুদুম্মোগুনোত্তুন্ মুয়োন ফিরেই ন-নুয়ো। ইয়েনি গরানা অলঅ আজল্ উবোস্‌থানা।

যিরমিয় 19:4

ইয়েনর ভেদ্‌তান্ অলঅ, তারা মরে ছাড়ি যেইয়োন আর এ জাগায়ান দেব-দেবেদাগুনোর জাগা বানেয়োন; তারা এমন দেবেদাগুনো ইধু আগর্‌বাট্টি জ্বালেয়োন যিগুনোর কধা তারার পুরোণি মানুচ্চুনে বা যিহূদার রাজাগুনে কনদিন্‌অ হবর্ ন-পেদাক্। ইয়েন বাদেয়ো এ জাগায়ান তারা নিদ্দুযিগুনোর লো-লোই ভোরেই দুয়োন।

যিরমিয় 21:12

‘ও দায়ূদর বংশ, মুই লগেপ্রভু কঙর্, তুমি পত্তিদিন বেন্যেমাদান্ ন্যায়বিচের গুরিবে। যিবেরে লুদো ওইয়্যে তারে তা অত্যেচারির আঢত্তুন্ উদ্ধোর গুরিবে; সিয়েন ন-গুরিলে তমা ভান্ন্যেই কামানিত্তে মঅ রাগ্‌‌কান নিগিলেনেই আগুনো ধোক্ক্যেন জুলিবো, কনজনে সিয়েন মারেই ন-পারিবো।

যিরমিয় 22:17

মাত্তর্ তর্ চোগ আর মনান্ আগেদে বানা ভান্ন্যোয়ানি পানা, নিদ্দুযি মানুচ্চুনোর লো ঝরানা আর অত্যেচার আর জুলুম গরানা উগুরে।”

যিরমিয় 26:16

সেক্কে রাজকর্মচারীগুনে আর বেক মানুচ্চুনে ধর্মগুরু আর ভাববাদীগুনোরে কলাক্, “এ মানুচ্চো মরণর সাজা পেবার যগাজ্যে নয়। তে আমার গোজেন লগেপ্রভুর নাঙে আমা ইধু কধা কোইয়্যে।”

যিরমিয় 5:28

তারা পক্তা মক্তা আর তেল্‌তেল্যে ওইয়োন। তারার ভান্ন্যেই কামানির ধুঝি নেই; মা-বাপ্ নেইয়্যেগুনে যেনে ন্যায়বিচের পান সেনত্তে তারা তারার তপ্পে ন-থিয়্যেন আর তারা নাঢা মানুচ্চুনোর অধিকারান্‌অ রোক্ষ্যে ন-গরন।

যিরমিয় 7:23

মাত্তর্ মুই তারারে এ উগুমান দুয়োং, তুমি মঅ কধামজিম আঢঅ, সেক্কে মুই তমার গোজেন ওম্ আর তুমি মঅ মানুচ্ অবা। মুই যে পধেদি আঢিবাত্তে উগুম দুয়োং সে পধেদি আঢঅ যেনে তমার ভালেদি অয়।

যিরমিয় 9:24

মাত্তর্ যে বাড়্‌বো গুরিবাত্তে চায় তে ইয়েনিলোই বাড়্‌বো গোরোক্, তে মরে বুঝে আর হবর্ পায়, অত্তাৎ তে হবর্ পাইদে, মুয়ই লগেপ্রভু; মর্ কোচ্‌পানাগান বোউত্ আর পিত্‌থিমীত মর্ কামানি ন্যায়ে আর সততালোই ভরা। ইয়েনি পৌইদ্যেনে মুই গম্ পাং। মুই লগেপ্রভু এ কধাগান কঙর্।”‌‍

আবিলেচ্ 3:36

ন্যায়বিচের্ অবাত্তে ন-দেনা- ইয়েনি কি প্রভু ন-দেগিবো?

যিহিষ্কেল 18:12

তে নাঢা আর অভাবীগুনোরে অত্যেচার গরে। তে চুর্ গরে আর বন্ধগী জিনিস্‌‌চানি ফিরেই ন-দে। তে মূত্তিপূজো গরে আর জঘন্য কাম্ গরে।

যিহিষ্কেল 18:7

তে কাররে অত্যেচার্ ন-গরে বরং সুদি টেঙা লোইয়্যে মান্‌জ্যরে বন্ধগী জিনিস ফিরেই দে। তে চুর্ ন-গরে, মাত্তর্ যিগুনোর পেট্ পুরের্ তারারে হেবাত্তে দে আর লাংটা-বাংটা গুনোরে কাবড় দে।

যিহিষ্কেল 22:7

তঅ ভিদিরে মান্‌‌‌‌‌‌‌‌‌‌জ্যে মা-বাবরে ঈচ্ গত্তন্, বিদেশীগুনোরে অত্যেচার গত্তন্ আর মা-বাপ নেইয়্যে আহ্ রানিমিলেগুনো সমারে ভান্ন্যেই বেবহার গত্তন্।

যিহিষ্কেল 45:9

ও ইস্রায়েলর শাজন্‌গুরিয়্যেগুন, মুই প্রভু লগেপ্রভু কঙর্, যদেষ্ট ওইয়্যে। ইক্কিনে জোর্ জবরদস্তি আর অত্যেচার গরানা ছাড়ি দিইনে তুমি ন্যায় আর গম্ কাম গরঅ। মঅ মানুচ্চুনোর জাগা তমা গজগত্ নেযানা বন্ধ গরঅ।

যোয়েল 3:19

মাত্তর্ মিসরান ভস্তর্ জাগা অবঅ আর ইদোমান ভস্ত ওই যেইয়্যে ধূল্যেচর-চাগালা অবঅ, কিত্যে যিহূদার মানুচ্চুনো উগুরে অত্যেচার গরা ওইয়্যে আর তারার্ দেজত্ নিদ্দুজির্ লো ঝরা ওইয়্যে।

লেবীয় 19:15

অন্যেয় গুরি বিচের্‌ গরানা ন-চলিবো। বিচেরত্‌ চিগোন-দাঙর্‌ কারঅ‌ পক্ষ নেযানা ন-চলিবো; তুমি বেক্কুনো উগুরে দোল্‌বিচের্‌ গুরিবা।

আমোষ 5:15

ভান্ন্যেয়ানরে ঈচ্ গরঅ, গমানরে কোচ্‌পঅ; শঅর গেদোত্ ন্যায়বিচের্ রোক্ষ্যে গরঅ। অয়ত ইস্রয়েলর বাঁজি থেইয়্যে মানুচ্চুনো উগুরে বেগত্তুন্ খেমতাবলা গোজেন লগেপ্রভু দোয়্যে গুরিবো।

আমোষ 5:24

তাত্তুন্ বরং ন্যায়বিচের্ গাঙ ধোক্ক্যেন আর সততা উমরর্ বেঈ যেইয়্যে গঙার্ পানি ধোক্ক্যেন বেঈ যোক্।

মীখা 3:11

সিদুগোর্ নেতাগুনে ঘুষ হেইনে বিচের্ গরন, ধর্মগুরুগুনে বেতন নিইনে শিক্ষ্যে দৈন্ আর ভাববাদীগুনে টেঙা নিইনে ভাগ্যগান গণান্। আর তো তারা লগেপ্রভুর সাহায্যর্ আজা গুরিনে কন্, “লগেপ্রভু কি আমা ভিদিরে নেই? আমা উগুরে কনঅ দযা ন-এবঅ।”

মীখা 6:8

ও মানুচ্চো, যিয়েনি গম্ সিয়েনি দঅ তে তরে দেগেয়্যে। ন্যায় কাম্ গরানা, গোজেন উগুরে বিশ্বেজি থেবাত্তে কোচ্‌পানা আর তঅ গোজেন লগে নম্রগুরিনে উদোলোলি রোক্ষ্যে গরানা বাদে লগেপ্রভু তইদু আর কিচ্ছু ন-চায়।

মালাখি 3:5

বেগত্তুন্ খেমতাবলা লগেপ্রভু কত্তে, সেক্কে মুই বিচের্ গুরিবাত্তে তমা ইদু এইম্; সে অক্তত্ যাদুগুরিয়্যেগুন, বেশ্যেমিগুরিয়্যেগুন, মিজে সাক্ষীদিয়্যেগুন আর যিগুনে চাগরুনোরে ঠগান্, যিগুনে রানি মিলেগুনোরে আর মা-বাপ্ নেইয়্যেগুনোরে অত্যেচার গরন্ আর বিদেশীগুনোরে ন্যায়বিচের্ পেবাত্তে ন-দুয়োন, অত্তাৎ যিগুনে মরে ন-দরান্ তারা বেক্কুনো বিরুদ্ধে মুই সাক্ষী দিবাত্তে দেরি ন-গুরিম।

মথি লেখ্যে গম্ হবর্ 23:23

ফক্কর্ ধর্ম-মাষ্টর আর ফরীশীগুন, তমাত্যে কত্তমান্ দর্‌গরেপারা! তুমি পুদিনা, মৌরি আর জিরের্ দশ ভাগর্ এক ভাগ্ গোজেনরে ঠিগ্ মজিম দি থাগঅ; মাত্তর্ ন্যায়, দোয়্যে আর বিশ্বেজ্, যিয়েনি মোশির রীতি সুদোমর্ আরঅ দরকারী বিষয় সিয়েনি তুমি বাদ্ দুয়ো। আগ ইয়েনি পালানা লগে লগে যেরেদি ইয়ানিয়ো পালানা তমার্ উচিত।

দ্বি’লম্বর বিররণ 10:18

নাদা আর রানীমিলেগুনোর্‌ দাবীগানি তে রোক্ষ্যে গরে আর তমা ভিদিরে বজত্তি গুরিয়্যে বিদেশীগুনোরে খানা উরোনা দিইনে তার্‌ কোচ্‌পানাগান দেগায়। তে তারারে হেবাত্তে উরিবাত্তে দে।

দ্বি’লম্বর বিররণ 24:17

বিদেশী বাসিন্দা বা অসহায় উগুরে অন্যেয় বিচের অবাত্তে ন-দুয়ো। কনঅ রানিমিলেত্তুন বন্ধক ইজেবে তার্‌ কিয়্যের্‌ কাবড়ান্ ন-নেযেয়ো।

দ্বি’লম্বর বিররণ 24:7

যুনি দেগা যায়দে, কনঅ মানুচ্‌ কনঅ ইস্রায়েলীয় ভেইয়োরে চুর্‌ গুরি নেযেইনে চাগর্‌ ইজেবে বেবহার গোজ্যে বা বিজি দিয়্যে, তো সে চুর্‌বোত্তুন্‌ মরা পুরিবো। তমা ভিদিরেত্তুন্‌ তুমি এবাবোত্যে ভান্ন্যেইয়ানি শেজ্‌ গুরি ফেলেবা।

দ্বি’লম্বর বিররণ 25:1

যুনি মানুচ্চুনো ভিদিরে কোল্-কোজ্যে দেগা যায় আর সিয়েন আদালদত্‌ নেযা অয় সালে বিচারক্কুনে তার্‌ বিচের গুরিনে নিদ্দুজীবোরে নিদ্দুজী আর দুজীবোরে দুজী বিলিনে রায় দিবাক।

দ্বি’লম্বর বিররণ 27:19

সে মানুচ্চো অভিশাব খেইয়্যে, যে বিদেশী বাসিন্দা, মা-বাপ নেইয়্যে আর রানিমিলেগুনো উগুরে অন্যেয় বিচের অবাত্তে দে। সেক্কে বেক্কুনে কবাক, আমেন।

যাকোব 1:27

রানী মিলে আর বাপ্-মা নেইয়্যেগুনোর্ দুঘোত্ তারার্ দেগাশুনো গরানা আর জগদর্ বেক্‌ কাজরানিত্তুন্ নিজোরে সাব্ রাগানা অলঅ বাবা গোজেনর্ চোগেদি খাটি আর সত্য ধর্ম।