যিরমিয় 19:4 - Chakma Bible

⁴ ইয়েনর ভেদ্‌তান্ অলঅ, তারা মরে ছাড়ি যেইয়োন আর এ জাগায়ান দেব-দেবেদাগুনোর জাগা বানেয়োন; তারা এমন দেবেদাগুনো ইধু আগর্‌বাট্টি জ্বালেয়োন যিগুনোর কধা তারার পুরোণি মানুচ্চুনে বা যিহূদার রাজাগুনে কনদিন্‌অ হবর্ ন-পেদাক্। ইয়েন বাদেয়ো এ জাগায়ান তারা নিদ্দুযিগুনোর লো-লোই ভোরেই দুয়োন।

যিরমিয় 19:4 Iomraidhean Croise

২ রাজাবলী 21:16

ইয়েনবাদে মনঃশি এত নিদ্দুযি মান্‌জ্যর লো ঝোরেয়্যে, সে লো-গানিলোই যিরূশালেমর এক দুযিত্তুন্‌ অন্য দুযি সং তজিমপুরো ওই যেইয়্যে। তে যিহূদার মানুচ্চুনোরে দিইনে পাপ গোরেয়্যে যিয়েনত্তে তারা লগেপ্রভুর চোগেন্দি যিয়েনি বজং সিয়েনি গোজ্যন্‌।

২ রাজাবলী 23:10

অন্য কনজনে যেনে মোলক দেবেদা নাঙে নিজোর পুয়ো বা ঝিগুনোরে আগুনোত্‌ পুড়িনে উৎসর্ব গুরি ন-পারে সেনত্তে যোশিয় বেন্‌-হিন্নোম কলগর্‌ তোফৎ নাঙে পূজো জাগায়ান্‌ অসিজি গুরি দিলো।

গীতসংহিতা 106:38

তারা নিদ্দুযিগুনোর, অত্তাত্ তারার পুয়ো-ঝিগুনোর লো ঝোরেই দিলাক্। তারা কনান মূত্তিগুনোর নাঙে তারার ডালি দিলাক্, সেক্কে পুরো দেজ্‌ছান সে লো-লোই ফি বাঁজিলো।

যিশাইয় 59:7

তারার্ টেঙানি পাপ ইন্দি দাবা দাবা যায়; তারা নিদ্দুযি মান্‌জ্যর লো ঝোরেবাত্তে যাদিমাদি যান্। তারার চিদে চজ্জানি বেক্কানি বজং আর তারার পথ্‌‍‌‌‌‌তানিত্ ভস্ত আর সর্বনাশ থায়।

যিশাইয় 65:11

মাত্তর্ তুমি যিগুনে লগেপ্রভুরে ছাড়ি যেইয়ো আর মর্ সুদ্ধো-সাংগ মুড়োবোরে ভুলি যেয়ো, যিগুনে ভাগ্যদেবর্ নাঙে টেবিল সাজেয়ো আর ভাগ্যদেবীর নাঙে মিজেয়ো পিলে ভোরেয়ো,

যিরমিয় 1:16

মঅ মানুচ্চুনে মরে ফেলেই যেইয়োন, তারা দেব-দেবেদাগুনোর নাঙে আগর্‌বাট্টি জ্বালেয়োন আর নিজো আঢে বানেয়্যে জিনিজোরে পূজো গোজ্যন্। তারার এই বেক্ পাজি কামানিত্তে মুই তারা বিরুদ্বে মর্ বিচেরর্ রায়য়ান দিম্।

যিরমিয় 11:13

যিহূদার যেদক্কানি শঅর্ আর আদাম আঘে সিদুক্কুন দেব-দেবেদায়ো আঘে, আর যিরূশালেমর যেদক্কানি পথ আঘে সেই লাজ্‌গরেপারা বাল দেবেদার নাঙে আগর্‌বাট্টি জ্বালেবাত্তে সিদুক্কুন পূজোয়ো বানা ওইয়্যে।‍‍

যিরমিয় 15:6

মুই লগেপ্রভু কঙর্, তুই মরে ছাড়ি যেইয়োচ্, তুই উগুদো পধেদি যেইয়োচ্। সেনত্তে মুই তইন্দি আত্ বাবেইনে তরে ভস্ত গুরিম; মুই আর মেয়্যে গুরি ন-পারং।

যিরমিয় 16:11

সেক্কে তুই তারারে কবে, লগেপ্রভু কোইয়্যেদে, ‘ইয়েনর কারনান্ অলঅ তমা পুরোণি মানুচ্চুনে মরে ছাড়ি যেইয়োন আর দেব-দেবেদাগুনোর পিজেদি যেইনে তারারে সেবা আর পূজো গোজ্যন্। তারা মরে ছাড়ি যেইয়োন আর মর্ সুদোমানি অমান্য গোজ্যন্।

যিরমিয় 17:13

ও লগেপ্রভু, ইস্রায়েলর আজা, যিগুনে তরে ছাড়ি যেইয়োন তারার বেক্কুনোরে লাজত্ ফেলা অবঅ। তত্তুন্ যিগুনে ফিরি যেইয়োন তারার নাঙানি ধুল্যেলোই লেগা অবঅ, কিত্তে তারা জেদা পানির পয়নালা লগেপ্রভুরে ছাড়ি যেইয়োন।

যিরমিয় 17:20

তে মরে এ কধাগান কবাত্তে কলঅ, “ও যিহূদার রাজাগুন আর বেক্ মানুচ্চুন আর যিরূশালেমত্ বজত্তি গুরিয়্যে বেক্কুনে, তুমি যিগুনে এ গেট্‌তুনোদি ভিদিরে এযানা-যানা গুরি থাগঅ, তুমি লগেপ্রভুর কধানি শুনো।‍‌‍‍‍‍

যিরমিয় 18:15

মাত্তর্ মঅ মানুচ্চুনে মরে ভুলি যেইনে বাজে মূত্তি ইধু আগর্‌বাট্টি জালাদন। তারা ঠিগ্ পধত্তুন উজোত্ হেইনে সেই পুরোনা পধেদি আর্ আঢাউদো ন-গত্তন। তারা গম্ পধ্‌‌থান ছাড়িনে ভান্ন্যেই পধেদি চলদন।

যিরমিয় 2:13

কিত্তে মঅ মানুচ্চুনে দ্বিয়েন পাপ গোজ্যন্। জিংকানিবলা পানির পয়নাল্ সিবে যে মুই তারা মরে ফেলেই যেইয়োন, আর নিজোত্তে তারা এমন্ পানি রাগেবার জাগা বানেয়োন যিবে ভাঙা, যিয়েনত্ পানি রাগা ন-যায়।

যিরমিয় 2:17

তর্ গোজেন লগেপ্রভু যেক্কে তরে ঠিগ্ পধেদি চালেয়্যে সেক্কে কি তুই তারে ছাড়িনে ইয়েনি বেক্কানি নিজো উগুরে ন-আনস্?

যিরমিয় 2:19

তর্ পাজি কামানিয়ে তরে সাজা দিবো; তর্ ভান্ন্যেই পধেদি যানাগানে তরে দুষি গুরিবো। সালে এবেরা চিদে গর্ আর বুঝি চাহ্, তুই যেক্কে তর্ গোজেন লগেপ্রভুরে ছাড়ি যাচ্ আর তারে ন-দরাচ্ সেক্কে সিয়েন তত্তে কত্তমান বজং আর তিদে অয়। এ কধাগান মুই বেগত্তুন্ খেমতাবলা প্রভু লগেপ্রভু কঙর্।

যিরমিয় 2:30

মুই তমারে অনত্তক্ সাজা দুয়োং; তুমি শাজনান্ এলাফেলা গোজ্য। পেট্ পুরেত্তে সিংহ ধোক্ক্যেন তমা তলোয়ারানিয়ে তমা ভাববাদীগুনোরে গিলি ফেল্যে।

যিরমিয় 2:34

তঅ কাবড়-চুগোড়ানিত্ নিদ্দুযি নাঢা মানজ্যর্ লো দেগা যায়, যুনিয়ো তারা তঅ ঘরান ভাঙিনে ন-চমান্। ইয়েনি অলেয়ো তুই কোইয়োচ্চে, মুই নিদ্দুযি; মঅ উগুরে লগেপ্রভুর আর রাগ নেই। মাত্তর্ মুই তর্ বিচের গুরিনে তরে সাজা দিম্, কিত্তে তুই কোইয়োচ্চে, ‘মুই পাপ ন-গরং।’

যিরমিয় 22:17

মাত্তর্ তর্ চোগ আর মনান্ আগেদে বানা ভান্ন্যোয়ানি পানা, নিদ্দুযি মানুচ্চুনোর লো ঝরানা আর অত্যেচার আর জুলুম গরানা উগুরে।”

যিরমিয় 22:3

লগেপ্রভু কোইয়্যেদে, ‘যিয়েন ন্যায্য আর ঠিগ্ তুমি সিয়েনই গরঅ। যিবেরে লুদো ওইয়্যে তারে তা অত্যেচারিগুনোর আঢত্তুন উদ্ধোর গরঅ। বিদেশী, মা-বাপ নেইয়্যে আর রানিমিলেগুনো উগুরে কনঅ অন্যেয় বা অত্যেচার ন-গোজ্য আর এ জাগাত্ নিদ্দুযির্ লো ন-ঝোরেয়ো।

যিরমিয় 26:15

মাত্তর্ ইয়েন ঘেচ্চেকগুরি হবর্ পেবাদে যে, তুমি যুনি মরে মারে ফেল সালে নিদ্দুজিবোর্ লো ঝরানার অন্যেয়ান তুমি নিজো উগুরে আর এ শঅরান উগুরে আর যিগুনে ইধু বজত্তি গরন তারা উগুরে আনিবো; কিত্তে এই বেক কধানি তমারে শুনেবাত্তে ঘেচ্চেকগুরি লগেপ্রভু মরে পাদেয়্যে।”

যিরমিয় 26:23

তারা মিসরত্তুন্ ঊরিয়রে আনিনে রাজা যিহোয়াকীমো ইধু নেযেলাক্; রাজা তারে তলোয়ারলোই মারে ফেলেইনে তা কিয়্যেগান সাধারন মান্‌‌‍‌জ্যর্ গোরত্ ফেলেই দিলো।

যিরমিয় 44:3

সিয়েন ওইয়্যেদে তারার পাজিগানির কারনে, কিত্তে তারা দেব-দেবেদাগুনো মুজুঙোত্ আগর্‌বাট্টি জ্বালেইনে আর তারারে পূজো গুরিনে মরে অমকদ রাগ্ তুলি দুয়োন। সে দেব-দেবেদাগুনোর্ কধা তারায়ো হবর্ ন-পেদাক্, তুমিয়ো হবর্ ন-পেদা বা তমা পুরোণি মানুচ্চুনেয়ো হবর্ ন-পেদাক্।

যিরমিয় 5:6

সেনত্তে ঝারত্তুন্ এক্কো সিংহ এইনে তারারে মারে ফেলেব। ধূল্যেচর-চাগালার এক্কো হোক্ক্যে বাঘে তারারে ভস্ত গুরিবো আর তারার্ শঅরানি ইধু এক্কো হোক্ক্যে বাঘে উঠ্ পাদি থেবঅ। যুনি কনজনে সিয়োনত্তুন নিগিলি এজন্ সালে তে কট্টা কট্টা ওই যেবঅ, কিত্তে তারার পাপ্ অমকদ বেশ্ আর তারার ভান্ন্যেই পধেদি যেবার ঘটনাগান বেশ্।

যিরমিয় 7:6

যুনি বিদেশি, মা-বাপ নেইয়্যে বা রানিমিলেগুনোরে অত্যেচার ন-গোজ্য আর এ দেজত্ নিদ্দুযিগুনোর লো ন-ঝোরেয়ো আর দেব-দেবেদাগুনোর পিজেদি যেইনে নিজোরে খেতি ন-গোজ্য,

যিরমিয় 7:9

তুমি দঅ চুর্, খুন, সিনেলি আর মিজে শমক্ খঅ আর বাল দেবেদাগুনো নাঙে আগর্‌বাট্টি জ্বালঅ। ইগুন বাদেয়ো যে দেবেদাগুনোরে তুমি ন-চিনো তুমি তারার পিজেদি যেইনে থাগঅ।

আবিলেচ্ 4:13

এ ঘটনাগান ঘোট্যেদে তা ভাববাদীগুনোর্ পাপত্তে, তা ধর্মগুরুগুনোর্ অন্যেয়ত্তে, কিত্তেই সিয়োদোই তারা গম্ মানুচ্চুনোর্ লো জোরেদাক্।

যিহিষ্কেল 20:26

পত্তম্ জোর্মেয়্যে এবাবোত্যে পত্তি পুয়োরে তারা আগুনোত্ পুড়িনে উৎসর্ব গোজ্যন্, আর সিয়েনর মাধ্যমে মুই তারারে অসিজি অবাত্তে দিলুং যেন মুই তারারে ভস্ত গুরি পারং। সেক্কে তারা হবর্ পেবাক্ যে, মুয়ই লগেপ্রভু।

যিহিষ্কেল 7:22

ডাগেত্‌তুনে মর্ সুদ্ধো-সাংগ জাগানত্ সোমেইনে সিয়েন অসিজি গুরিবাক্, আর মুই তারা ইন্দিত্তুন্ মুয়োন ফিরেই নিম্।

যিহিষ্কেল 8:11

সিগুনো মুজুঙোত্ থিয়্যেই আগন্ ইস্রায়েলীয়গুনোর সত্তুর্ জন নেতা আর তারা ভিদিরে থিয়্যেই আগেদে শাফনর পুয়ো যাসনিয়। তারার্ পত্তিজনর আঢত্ এক্কো গুরি আগর্‌বাট্টির্ টগ্ এলঅ আর সিগুনোত্তুন্ আগর্‌বাট্টির্ ধূমো মেঘ্‌কানি উগুরেদি উদের্।

দানিয়েল 11:31

তা সৈন্যগুনে উপোসনা-ঘর, অত্তাৎ ঘরানি অসিজি গুরিবাক্ আর পত্তিদিনোর উৎসর্বর অনুষ্ঠান বন্ধ গুরি দিবাক্। সে পরেদি তারা ভস্ত অবার্ ঈচ্ গরেদে জিনিস থিদেবর্ গুরিবাক্।

লূকে লেখ্যে গম্ হবর্ 11:50

ইয়েনর্ ফল অলঅ, সংসারান্ সৃট্টির সময়োত্তুন্ ধুরি আরাম্ভ গুরিনে যেদক্‌‌জন ভাববাদীরে খুন্ গরা ওইয়্যে, তারার্ লো-গানির্ দায়ী অবাক্ এ কালর্ মানুচ্চুনে।

দ্বি’লম্বর বিররণ 13:13

সিদুগোর্ ইস্রায়েলীয়গুনো ভিদিরে কিজু পাজি মানুচ্‌ দেগা দুয়োন যিগুনে সিদুগোর্ মানুচ্চুনোরে ইয়েন কোইনে ভান্ন্যেই পধেদি টানি নেযেয়োন, আদঅ, আমি দেব-দেবেদাগুনোরে পূজো গুরিই, যে দেব-দেবেদাগুনে তমা ইদু নূয়ো।

দ্বি’লম্বর বিররণ 13:6

পিত্‌থিমীর এক দুঝিত্তুন অন্য দুঝি সং তমার চেরোকিত্তে কায়কুরে বা দূরোর মানুচ্চুনে যে দেব-দেবেদাগুনোরে পূজো গুরিদাক, যিগুনে তমার আর তমার পুরোণিমানুচ্চুনোর অজানা সেই দেব-দেবেদাগুনোন্দি যুনি তমার নিজোর ভেই বা তমার পূঅ বা ঝি অথবা আদরর্‌ মোক্‌ বা তমার পরাণর সমাজ্যে তরে গায় গায় পেইনে ভান্ন্যেই পদেন্দি নেযেবাত্তে কন্‌, আদিচ্‌, আমি যেইনে দেব-দেবেদাগুনোর পূজো গুরিই,

দ্বি’লম্বর বিররণ 28:20

ভান্ন্যেই কামানি গুরিনে লগেপ্রভুরে ফেলে যেবার অপরাধে তমার বেক্‌ কামানিত্‌ তে তমারে অভিশাব্ দিবো, যাগুলুগোত্‌ ফেলেব আর ঘিনেব, যিয়েনর কারনে তুমি ক্ষয় যাদে যাদে কম্‌ সময়ো ভিদিরে শেজ্‌ ওই যেবা।

দ্বি’লম্বর বিররণ 28:36

যিবেরে তুমি রাজা বানেইনে তমা উগুরে বোজেবা লগেপ্রভু তারে আর তমারে বোন্দী গুরি নেযেবাত্তে এমন্‌ এক্কো জাদর্‌ আদত্‌ ফেলেব যিবেরে তুমিয়ো ন-জান আর তমার পুরোণি মানুচ্চুনেয়ো ন-জানন্‌। সিয়েনত্ তুমি তক্তা আর পাত্তরর্‌ দেবেদামূত্তির পূজো গুরিবা।

দ্বি’লম্বর বিররণ 28:64

“সে পরেন্দি লগেপ্রভু পিত্‌থিমীর এক দুঝিত্তুন অন্য দুঝি সং বেক্‌ জাদর্‌ ভিদিরে তমারে ছিদি দিবো। তুমি সিয়েনত্‌ তমার আর তমার পুরোণিমানুচ্চুনোর হবর্ ন-পেইয়্যে গাজর আর পাত্তরর্‌ দেবেদামূত্তির পূজো গুরিবা।

ফগদাং পেইয়্যে 16:6

এ মানুচ্চুনে গোজেন মানুচ্চুনোরে আর ভাববাদীগুনোরে খুন গোজ্জ্যে। সেনত্যে তুই তারারে এ লো-গান হেবাত্যে দুয়োচ্ আর ইয়েনই তারাত্যে যগাজ্জ্যে ওইয়্যে।”

বিচের গুরিয়্যেগুন 5:8

তারা যেক্কে নূয়ো দেব-দেবেদার ইন্দি মনান্‌ দিলাক্‌ সেক্কে তারার্‌ শঅ‌রর-গেদো দোরানত্‌ যুদ্ধো অলঅ‌। চোল্লিশ আজার ইস্রায়েলীয়োর আঢেত্‌ এক্কান আন্দল দিবারঅ‌ ন-এলঅ, এক্কো সেলঅ‌ ন-এলঅ।