যিরমিয় 11:17 - Chakma Bible

¹⁷ বেগত্তুন্ খেমতাবলা লগেপ্রভু, যে তারে লাগেয়্যে তেয়ই তার সর্বনাজর্ রায়য়ান দিয়্যে, কিত্তে যিহূদা আর ইস্রায়েলর মানুচ্চুনে ভান্ন্যেই কাম্ গোজ্যন আর বাল দেবেদার নাঙে আগর্‌বাট্টি জ্বালেইনে তার রাগ্‌কান জাগেই তুল্যন্।

যিরমিয় 11:17 Iomraidhean Croise

২ শমূয়েল 7:10

মঅ মানুচ্‌ ইস্রায়েলীয়গুনোত্তে মুই এক্কান জাগা ঠিগ্‌ গুরিনে সিয়েনত্ গাজঅ ধোক্ক্যেন্‌ তারারে বোজেই থোম্, যেনে তারা নিজো জাগাত্‌ গমে ডালে বজত্তি গুরি পারন্ আর মঅ মানুচ্চুনে ইস্রায়েলীয়গুনো উগুরে শাজন্‌গুরিয়্যে নেযানার পরেত্তুন্‌ ধুরি পাজি মানুচ্চুনে তারা উগুরে যে অত্যেচার্‌ গুরি এত্তন্‌ তারা যেনে আর সিয়েনি গুরি ন-পারন। মুই বেক্‌ শত্রুগুনোর আঢত্তুন্‌ তরে মাব্ দিম্‌। “ ‘মুই লগেপ্রভু আরঅ কঙর্‌, মুই নিজেই তর্‌ বংশবোরে অাক্কোই নেযেম্।

২ বংশধর 28:25

দেব-দেবেদাগুনোর্‌ নাঙে আগর্‌বাট্টি জ্বালেবাত্তে তে যিহূদার পত্তি শঅর্‌ আর আদামত্‌ পূজো গুরিবার্‌ অজল্‌ জাগা বানেইনে তার্‌ পূরোণি মানুচ্চুনোর্‌ গোজেন লগেপ্রভুরে বেজার্‌ বানেল।

গীতসংহিতা 44:2

তুই নিজোর আঢে অন্য জাদ্‌‌তুনোরে ধাবেই দিইনে সেই জাগানত্ আমা পুরোণি মানুচ্চুনোরে বোজেয়োচ্; তুই সেই মানুচ্চুনো উগুরে দজা আন্যচ্ আর আমা পুরোণিমানুচ্চুনোরে দাঙর্ অবাত্তে দুয়োচ্।

গীতসংহিতা 80:15

যে চারা গাজ্‌ছোরে তুই নিজো আঢ্‌তোই লাগেয়োচ্, যিবের ডেলাগুন তর্ নিজোত্যে তুই দরমর গোজ্যস্;

গীতসংহিতা 80:8

তুই এক্কান আংগুর লুদি ধোক্ক্যেন্ মিসর দেজত্তুন্ আমারে আনিলে; অন্য জাদ্‌তুনোরে ধাবেই দিইনে তুই সিয়েনরে লাগেলে।

যিশাইয় 5:2

তে জাগায়ান্ খুড়িনে বেক্ পাত্তরুন্ তুলি ফেলেল আর সিয়েনত্ লাগেল বেগত্তুন্ গম্ আংগুর লুদি। সিয়েন ভিদিরে বানেল এক্কান অজল্ চুগিদার-ঘর আর আংগুর মাড়িবাত্তে পাত্তর্ কাবিনে ঠিগ্ গুরি নেযেল। সে পরেদি তে সিয়েনত্ গম গম আংগুর ফলত্তে বাজ্জেই থেলঅ, মাত্তর্ সিয়েনত্ ধুরিলাক্ বানা ঝার্ আংগুর।

যিশাইয় 61:3

যেন সিয়োনত্ যিগুনে আবিলেচ্ গোজ্যন তারা মাঢা উগুরে মুই ছেইয়োর বদলে দোল্ মুকুট দি পারং; যেন মুই আবিলেচর্ বদলে হুজির্ তেল আর হতাশার্ বদলে নাঙ্ গিনিবার পোজাক্ দি পারং। তারারে কুয়ো অবঅ সততার এলোন গাজ্; লগেপ্রভু সিগুন লাগেয়্যেদে যেন সিগুনোর মাধ্যমে তারে বাঈনী গরানাগান ফগদাং পায়।

যিরমিয় 1:14

লগেপ্রভু মরে কলদে, “এ দেজত্ যিগুনে বজত্তি গরন তারার বেক্কুনো উগুরে উত্তোরেত্তুন দজার্ বান পানি ধোক্ক্যেন উজেই এবঅ।

যিরমিয় 11:11

সেনত্তে মুই লগেপ্রভু কঙর্, মুই তারা উগুরে এন্ দজা আনিম যিয়েনত্তুন্ তারা ধেই ন-পারিবাক্। যুনিয়ো তারা মঅ মুজুঙোত্ কানিবাক্ তো মুই তারা কধানি ন-শুনিম।

যিরমিয় 11:13

যিহূদার যেদক্কানি শঅর্ আর আদাম আঘে সিদুক্কুন দেব-দেবেদায়ো আঘে, আর যিরূশালেমর যেদক্কানি পথ আঘে সেই লাজ্‌গরেপারা বাল দেবেদার নাঙে আগর্‌বাট্টি জ্বালেবাত্তে সিদুক্কুন পূজোয়ো বানা ওইয়্যে।‍‍

যিরমিয় 12:2

তুয়ই তারারে লাগেয়োচ্ আর তারা শিঙোর্ বোজেয়োন; তারা দাঙর্ অন আর তারার গুলোগুলি ধরন। মুয়োদি তারা আমিঝে তঅ কধা কন্ মাত্তর্ তারার মনান তত্তুন দূরোত্ থায়।

যিরমিয় 18:15

মাত্তর্ মঅ মানুচ্চুনে মরে ভুলি যেইনে বাজে মূত্তি ইধু আগর্‌বাট্টি জালাদন। তারা ঠিগ্ পধত্তুন উজোত্ হেইনে সেই পুরোনা পধেদি আর্ আঢাউদো ন-গত্তন। তারা গম্ পধ্‌‌থান ছাড়িনে ভান্ন্যেই পধেদি চলদন।

যিরমিয় 19:15

“ইস্রায়েলর বেগত্তুন খেমতাবলা লগেপ্রভু কলঅ, ‘শুন, মুই এ শঅরানর আর তা কায়-কুরে আদামানি উগুরে যেদক্কানি দজা ঘোদেবার কধা কোইয়োং মুই সেই বেক্কানি তারা উগুরে ঘোদেম্, কিত্তে তারা গত্তনা দরমর গোজ্যন আর মঅ কধাগান ন-শুনোন।’ ”

যিরমিয় 2:21

মুই দঅ তরে নখ্‌বাজ্ গোজ্যে বিজিত্তুন জোর্মেয়্যে গম্ আংগুরোর্ চারা ইজেবে লাগেয়োং; সালে কেধোক্ক্যেন গুরি তুই এক্কো ভান্ন্যেই ঝার আংগুর গাজ্ ওইয়োচ্?

যিরমিয় 24:6

মুই তারার ভালেদিত্তে তারা উগুরে খিয়েল্ রাগেম আর এ দেজত্ তারারে ফিরেই আনিম। মুই তারারে গড়েই তুলিম, ভাঙি ন-ফেলেম; মুই তারারে লাগেই দিম, তুলি ন-ফেলেম।

যিরমিয় 26:13

ইক্কিনে তুমি তমার আদাউদো আর কামানি বদল আর তমা গোজেন লগেপ্রভুর কধানি শুনো। সালে লগেপ্রভু তমা বিরুদ্ধে যে দযাগান পাদেবার কধা কোইয়্যে সিয়েন আর ন-পাদেব।

যিরমিয় 26:19

যিহূদার রাজা হিষ্কিয় বা যিহূদার অন্য কনজনে কি মীখারে মারে ফেলেয়োন? হিষ্কিয় কি লগেপ্রভুরে ভোক্তিগুরিনে ন-দরায় আর তার দোয়্যে ভিক্ষে ন-গরে? ইয়েনত্ লগেপ্রভু মানুচ্চুনো উগুরে যে দযাগান্ পাদেবার কধা কোইয়্যে সিয়েন আর ন-পাদায়। মাত্তর্ আমি দঅ নিজো উগুরে এক্কান দর্‌‌‌গরেপারা দযা ডাগি আন্ন্যেই‌।”

যিরমিয় 32:29

যে বাবিলীয়গুনে শঅরান্ আক্রমণ গোজ্যন্ তারা শঅরত্ চোমেইনে সিয়েনত্ আগুন বাজেই দিবাক্। যেদক্কানি ঘরর্ ছাল উগুরে মানুচ্চুনে বাল দেবেদার নাঙে আগর্‌বাট্টি জ্বালেয়োন আর অন্য দেবেদার নাঙে ঢাল্যে-উৎসর্বর অনুষ্ঠান গুরিনে মরে অহুজি গোজ্যন্ তারা সে ঘরানি সুমুত্তো শঅরান পুড়ি দিবাক্।

যিরমিয় 32:30

ইস্রায়েল আর যিহূদার মানুচ্চুন চিগোনত্তুন্ ধুরি মঅ চোগেদি বানা ভান্ন্যেই কাম বাদে কিচ্চু ন-গরন; ঘেচ্চেকগুরি ইস্রায়েলর মানুচ্চুনে তারার আঢে বানেয়্যে জিনিস্‌‌চোই মরে বানা অহুজি গোজ্যন্।

যিরমিয় 35:17

“সেনত্তে মুই ইস্রায়েলর গোজেন বেগত্তুন্ খেমতাবলা লগেপ্রভু কঙর্, ‘শুন, মুই যিহূদা আর যিরূশালেমত্ বজত্তি গুরিয়্যে পত্তিজনর বিরুদ্ধে যেদক্কানি দজার্ কধা কোইয়োং সিয়েনির এক এক্কান মুই তারা উগুরে ঘোদেম্। মুই তারারে কোইয়োং, মাত্তর্ তারা ন-শুনোন্; মুই তারারে ডাক্যং, মাত্তর্ তারা জোব্ ন-দুয়োন।’ ”

যিরমিয় 36:7

অয়ত তারা লগেপ্রভু ইধু তবনা গুরিবাক্ আর পত্তিজনে তারার ভান্ন্যেই পধত্তুন ফিরিবাক্, কিত্তে এ মানুচ্চুনো বিরুদ্ধে লগেপ্রভু অমকদ অহুজি আর রাগর্ কধা কোইয়্যে।”

যিরমিয় 40:2

যিরমিয়রে ইরি দিবার সময়োত্ নবূষরদনে তারে কোইয়্যেদে,“তর্ গোজেন লগেপ্রভু যিহূদা বিরুদ্ধে এ ভস্ত অবার কধা কোইয়্যেদে।

যিরমিয় 40:3

লগেপ্রভু সিয়েন ঘোদেইয়্যে, যেবাবোত্যে কোইয়্যে, সেবাবোত্যে গোজ্যে। তুমি লগেপ্রভুর বিরুদ্ধে পাপ গোজ্য আর তা কধার অবাধ্য ওইয়ো।

যিরমিয় 42:10

তুমি যুনি দেজত্ থাগঅ সালে মুই তমারে তুলিম, ভাঙি ন-ফেলেম; মুই তমারে লাগেই দিম্, উগুরে ন-ফেলেম, কিত্তে তমা উগুরে যে দজাগান আন্যং সিয়েনত্তে মুই মনত্ দুঘ্ পেইয়োং।

যিরমিয় 44:5

মাত্তর্ তারা সিয়েনত্ কান্‌‍অ ন-পাদন, মনযোগ্‌অ ন-দুয়োন; তারা তারার পাজিগানিত্তুন্ ন-ফিরোন বা দেব-দেবেদাগুনো ইধু আগর্‌বাট্টি জ্বালানাগান্‌অ ন-থামান।

যিরমিয় 44:8

তুমি যিয়েনত্ বজত্তি গুরিবাত্তে এচ্চ্য সেই মিসর দেজর্ দেব-দেবেদাগুনোর মূত্তিগুনো মুজুঙোত্ আগর্‌বাট্টি জ্বালেইনে কিত্তে তুমি মর্ রাগ্‌কানরে জাগেইয়ো? তুমি দঅ নিজোরে ভস্ত গুরিবা আর পিত্‌‍‌‌থিমির বেক্ জাদর্ মানুচ্চুনে তমারে ঘিনেবাক্ আর তমা নাঙানিলোই অভিশাব্ দিবাক্।

যিরমিয় 45:4

“লগেপ্রভু মরে এ কধাগান তরে কবাত্তে কোইয়্যে, ‘মুই লগেপ্রভু সারা দেজ ভিদিরে যিয়েনি বানেয়োং সিয়েনি ভাঙি ফেলেম আর যিয়েনি লাগেয়োং সিয়েনি উগুড়েই ফেলেম।

যিরমিয় 7:18

পুয়ো-ছাগুনে দার্‌বো কুড়োন, বাব্‌‌‍‌‍পুনে আগুন জ্বালান্ আর মিলেগুনে মোয়দ্যে মেগন্ আর আগাজ-রানির নাঙে পিধে বানান্। মরে দুঘ্ দিবাত্তে তারা দেব-দেবেদার নাঙে ঢাল্যে-উৎসর্বর অনুষ্ঠান গরন।

যিরমিয় 7:9

তুমি দঅ চুর্, খুন, সিনেলি আর মিজে শমক্ খঅ আর বাল দেবেদাগুনো নাঙে আগর্‌বাট্টি জ্বালঅ। ইগুন বাদেয়ো যে দেবেদাগুনোরে তুমি ন-চিনো তুমি তারার পিজেদি যেইনে থাগঅ।

যিহিষ্কেল 17:5

সে পরেদি তে কিজু বীজ্ বোল্‌‌বোল্যে মাদিত্ লাগেই দিলো। পানি নাল পারত্ উইলো গাজ ধোক্ক্যেন গুরি তে সিগুন লাগেই দিলো।

হোশেয় 10:1

ইস্রায়েল এলদে এক্কান ছিদি যেইয়্যে লুদি; সিয়েনত্ বোউত্ গুলোগুলি ধোজ্যন্। সিয়েন ফলুন্ যেদক বাজ্যন্ সেদক্ বেশ্ সোংখ্যেদি তে পূজো বানেয়্যে; তা দেজত্ যেদক্ ভালেদি ওইয়্যে সেদক্ তে তার্ পূজোর পাত্তরুন দোলেডালে সাজেয়্যে।