যিশাইয় 61:1 - Chakma Bible

¹ প্রভু লগেপ্রভুর আত্মাগান মঅ উগুরে আঘে, কিত্তে তে মরে নেযেয়্যে যেন মুই নাঢা মানুচ্চুনো ইদু গম্ হবর্ কুয়োই দুয়োং। তে মরে পাদেয়্যেদে যেন মুই মানুচ্চুনোর ভাঙা মনানি জড়া দি পারং আর বন্দীগুনো ইদু স্বাধীনতা আর জেলোত্ পুরিয়্যেগুনো ইদু উদ্ধোর্ অনা ফগদাং গুরি পারং;

যিশাইয় 61:1 Iomraidhean Croise

গীতসংহিতা 147:3

যিগুনোর্ মনানি ভাঙি যেইয়্যে তে তারারে দোল্ গুরিবো; তারার বেক্ ঘা গানি তেয়ই বানি দে।

গীতসংহিতা 149:4

কিত্তে লগেপ্রভু তা মানুচ্চুন্দোই হুজি অয়; তে নম্র মানুচ্চুনোরে উদ্ধোর্ গুরিনে সর্মান গরে।

গীতসংহিতা 2:6

লগেপ্রভু কবদে, “মুই যিবেরে রাজা বানেয়োং তারে মর্ সুদ্ধো-সাংগ সিয়োন মুড়োবোত্ বোজেয়োং।”

গীতসংহিতা 22:26

নম্র মানুচ্চুনোর্ হেইনে ঈল্ অবঅ; যিগুনে লগেপ্রভুর আওজ্ মজিম্ চলন্ তারা তার্ বাঈনী গুরিবাক্। তারা জিংকানিবর্ জেদা থেবাক্।

গীতসংহিতা 25:9

তে নম্রগুনোরে গম পধেদি চালেই নেযায় আর তার্ পথ্‌তান পৌইদ্যেনে শিক্ষ্যে দে।

গীতসংহিতা 34:18

যিগুনোর মনানি ভাঙি যেয়েগোই লগেপ্রভু তারা ইদু থায়; যিগুনোর মনানি ভাঙি যেয়েগোই তে তারারে উদ্ধোর্ গরে।

গীতসংহিতা 45:7

তুই ন্যায়ানরে কোচ্‌‌পাচ আর অন্যেয়রে ঘিনেচ্; সেনত্তে গোজেন, তর্ গোজেন, তর্ সমাজ্যেগুনোত্তুন্ বোউত্ হুজির্ তেল ধোক্ক্যেন্ গুরি তঅ উগুরে ঢালি দিয়্যে।

গীতসংহিতা 51:17

ভাঙিপোজ্যে মনানই গোজেনর মানি লোইয়্যে উৎসর্ব; ও গোজেন, বুযিপোজ্যে (নত আহ্ নম্র) মনানিরে তুই তুচ্ছো ন-গুরিবে।

গীতসংহিতা 68:7

ও গোজেন, তুই যেক্কেনে ধূল্যেচর-চাগালান্দি তঅ মানুচ্চুনোর আগে আগে যেইয়োচ্,

গীতসংহিতা 69:32

সিয়েন দেগিনে নম্র মানুচ্চুনে হুজি অবাক্; তুমি যিগুনে গোজেনরে জানিবাত্তে আওজি, তুমি বাঁজি থাগ।

যাত্রা 28:41

তর্‌ ভেই হারোণ আর তার্‌ পূঅগুনোর্‌ এই বেক্‌ পোজাক্কানি পিনেই দিইনে তুই তারারে তেল্লোই অভিষেক গুরিনে ধর্মগুরু ইজেবে বোজেই দিবে। লগেপ্রভুর্‌ নাঙে তুই তারারে ফারক্‌ গুরি নেযেবে যেনে তারা ধর্মগুরু ওইনে মরে সেবা গুরি পারন।

যাত্রা 29:7

ইয়েনর্ পরেদি অভিষেকর্‌ তেলান্ তা মাদাবোত্‌ ঢালি দিইনে তারে অভিষেক্‌ গুরিবে।

যিশাইয় 29:19

নম্র মানুচ্চুনে আরঅ লগেপ্রভুরে দেগিনে হুজি অবাক্, আর যিগুনে অমকদ নাঢা তারা ইস্রায়েলর সেই পবিত্র মানুচ্চোরে নিইনে ফুত্তি গুরিবাক্।

যিশাইয় 30:19

ও সিয়োনর মানুচ্চুন্, তুমি যিগুনে যিরূশালেমত্ বজত্তি গরঅ, তমাত্তুন্ আর কানা ন-পুরিবো। সাহায্যত্তে কানিলে তে হামাক্কায় তমারে দোয়্যে গুরিবো। তে শুনোনার্ লগে লগে জোব্ দিবো।

যিশাইয় 30:26

যেদিন্যে লগেপ্রভু তা মানুচ্চুনোর্ আঘাত পেইয়্যে জাগানি বানি দিবো আর তার গোজ্যে ঘা গানি গম্ গুরি দিবো সেদিন্যে চানানে পহর্ দিবো বেলান ধোক্ক্যেন্, আর বেলান পহ্‌রান অবঅ পুরো সাত দিনোর পহ্‌‍‌‍‌র ধোক্ক্যেন সাতগুন বেশ্।

যিশাইয় 32:7

বদ্‌মাইশচুনোর কামর ধারাবো বজং; এমন্ কি, অভাবীগুনোর্ কোজোলীগানি যগাজ্যে অলেয়ো তে মিজে কধালোই তারারে ভস্ত গুরিবাত্তে বজং ফন্দি গরে।

যিশাইয় 40:9

ও সিয়োন, গম্ হবর্ তুই যে আন্যস্, তুই অজল্ মুড়োবোত্ যেইনে উঠ্। ও যিরূশালেম, গম্ হবর্ যে তুই আন্যস্, তুই দাঙর্ দাঙর্ গুরি রঅ ছাড়্, রঅ ছাড়্, ন-দোরেচ্; যিহূদার শঅরানিরে কঅ, “এইদঅ তমার গোজেন!”

যিশাইয় 42:1

লগেপ্রভু কোইয়্যেদে, “চাহ্, মঅ চাগর্‌বো, যিবেরে মুই সাহায্য গরং, মর্ বেঈ লোইয়্যে মানুচ্চো, যিবে উগুরে মুই হুজি। মুই তা উগুরে মঅ আত্মাগান্ দিম আর তে জাদ্‌‌‌‌‌‌তুনো ইদু ন্যায়বিচের্ আনিবো।

যিশাইয় 42:7

তুই কান্ মানুচ্চুনো চোগ্‌কুন খুলি দিবে, জেলখানাত্তুন্ বন্দিগুনোরে উদ্ধোর্ গুরিবে আর সিদুগোর্ আন্ধার গাদত্ রাগেয়্যে মানুচ্চুনোরে নিগিলেই আনিবে।‌‍‍

যিশাইয় 48:16

“তুমি মইদু এইনে এ কধানি শুনো। মুই পোইল্যেত্তুন্ ধুরি কনঅ কধা গুমরত্ রাগেবাত্তে ন-কং; সে কধানি পূরোণ অবার্ অক্তত্ মুই সিয়েনত্ থাং।” ইক্কিনে প্রভু লগেপ্রভু তা আত্মালোই মরে পাদেয়্যে।

যিশাইয় 49:9

তুই বন্দীগুনোরে কবে, ‘তুমি উদ্ধোর্ অ,’ আর যিগুনে আন্ধারত্ আগন তারারে কবে, ‘তুমি নিগিলি এজঅ।’ তারা পধ পারত্ আর গাজ্-বাজ্ নেইয়্যে মুড়ো উগুরে হানা পেবাক্।

যিশাইয় 52:7

যে মানুচ্চো গম্ হবর্ দিবাত্তে এজে, সুগ্-শান্দি ফগদাং গরে, ভালেদির হবর্ আনে, উদ্ধোরান্ ফগদাং গরে আর সিয়োনানরে কয়, তঅ গোজেনে রাজাগিরি গরে, মুড়োমুড়ি উগুরেদি এবার্ অক্তত্ সেই মানুচ্চোর টেঙান কেধোক্ক্যেন দেগায়।

যিশাইয় 52:9

ও যিরূশালেমর ভস্তর্ জাগায়ানি, তুমি একসমারে রঅ ছাড়ি ছাড়ি হুজির্-গীদ্ গঅ, কিত্তে লগেপ্রভু তা মানুচ্চুনোরে বুঝেয়্যে আর যিরূশালেমানরে উদ্ধোর্ গোজ্যে।

যিশাইয় 57:15

যিবে মহান আর বাঈনী গরানালোই বর্ পুনোং, যিবে উমরত্তে জেদা, যিবে নাঙান্ পবিত্র, তে কত্তে, “মুই অজল্ আর সুদ্ধো-সাংগ জাগাত্ বজত্তি গরং, মাত্তর্ যিবের মনান্ নম্র, যিবের্ মনান্ ভাঙিনে কট্টা কট্টা ওইয়্যে মুই তা সমারেয়ো বজত্তি গরং যেনে নম্রগুনোর আর মন ভাঙি যেইয়্যে মানুচ্চুনোর্ মনানি মুই নূয়ো গুরিনে ঠিগ্ গুরি পারং।

যিশাইয় 57:18

মুই মান্‌জ্যর্ বেক্ বেবহারানি দেখ্যং, তো মুই তারারে গম্ গুরিম। মুই তারারে পরিচালনা গুরিম আর যিগুনে আবিলেচ্ গরন তারারে বুঝেম্।

যিশাইয় 59:21

তারাত্তে মর্ বেবস্থাগান ইয়েন: মর্ যে আত্মাগান তমা উগুরে আঘে আর মর্ যে কধাগান মুই তমা মুয়োনত্ দুয়োং সিয়েন তমার, তমা ঝি-পুয়োগুনোত্তুন্ আর তারার বংশধরুনো মুয়োত্তুন্ সিয়েনি ন-যেবঅ; সিয়েনি ইক্কেত্তুন ধুরি উমর সং থেবঅ। মুই লগেপ্রভু এ কধাগান কঙর্।”

যিশাইয় 66:2

ইয়েনি বেক্কানি মুই নিজো আঢে বানেয়োং আর সেনত্তে ইয়েনি ওইয়্যে। যে মানুচ্চো নম্র, যিবের্ মনান্ ভাঙিনে চুর্‌‌মার্ ওইয়্যে আর যে মঅ কধালোই গির্‌‌‌গিরেই তারে মুই গম্ চোগেদি চেম্।

যিরমিয় 34:8

পরেদি লগেপ্রভু আরঅ যিরমিয় লগে কধা কলঅ। ইয়েন আগেদি রাজা সিদিকিয় যিরূশালেমর বেক্ মানুচ্চুনোরে সমারে চাগরুনোর উদ্ধোর্ কধাগান ফগদাং গরানার পৌইদ্যেনে সুদোমান থির্ গোজ্যে।

যিরমিয় 52:33

যিহোয়াখীনে জেলখানার কাবড়্-চুগোরানি খুলি ফেলেল আর জিংকানির্ বাদবাগি দিনুন্ দোলেডালে রাজা সমারে হানা-দানা গুরিনে কাদেই দিলো।

দানিয়েল 9:24

তর্ মানুচ্চুনোত্তে আর তর্ সুদ্ধো-সাংগ শঅরত্তে সত্তুর্ গুণ সাত বজর ঠিগ্ গরা ওইয়্যে। সেই সময়ো ভিদিরে ভান্ন্যেয়ানি বন্ধ গরা অবঅ, অন্যেয়র্ থুম্ অবঅ, পাপ নাঢি দিয়্যে অবঅ, উমরত্যে ন্যায্যতা থিদেবর্ গরা অবঅ, দর্শন আর আগাম্ বাণী পূরোণ গরা অবঅ আর দাঙর্ সুদ্ধো-সাংগ জাগানরে অভিষেগ্ গরা অবঅ।

হোশেয় 6:1

আঢঅ, আমি লগেপ্রভু ইধু ফিরি যেই। তেয়ই আমারে কট্টা কট্টা গোজ্যে, তে আমারে গম্অ গুরিবো; তেয়ই আমারে আঘাত্ গোজ্যে, তে আমারে ঘাগানি বানিয়ো দিবো।

লেবীয় 7:35

হারোণ আর তার্‌ পূঅগুনোরে যেদিন্যে ধর্মগুরু্‌ ইজেবে লগেপ্রভুর্ সেবা গুরিবাত্তে নেযা ওইয়্যে সেদিন্যে লগেপ্রভুর্ নাঙে আগুন্দোই-গোজ্যে উৎসর্বর য়েমানত্তুন্‌ এ ভাগ্‌কান্‌ তারার্ পাওনা বিলি ঠিগ্ গুরি রাগা ওইয়্যে।

মীখা 3:8

মাত্তর্ মুই যাকোবরে তার্ অন্যেয়, ইস্রায়েলরে তার পাপ পৌইদ্যেনে জানেবাত্তে লগেপ্রভুর আত্মার্ দিয়্যে বল্লোই, ন্যায়বিচেরে আর সাহসে ভর্‌‌পুনং ওইয়্যেই।

মথি লেখ্যে গম্ হবর্ 11:5

তারে জানঅ, কান্ মানুচ্চুনে দেগদন্, আঢুরুনে আঢদন্, ফারাঙিবলাগুনে সিজি অদন্, বহ্‌রা মানুচ্চুনে শুনোদন্, মরা মানুচ্চুনে জেঁই উদোদন্ আর নাঢা মানুচ্চুনো ইধু গম্ হবর্ প্রচার গরা অর্।

মথি লেখ্যে গম্ হবর্ 3:16

বাপ্তিষ্ম লনার্ পরেদি যীশু পানিত্তুন্ উদি এজানার লগে লগে তা মুজুঙোত্ আগাজ্‌চান খুলি গেলঅ। তে গোজেনর আত্মাগানরে কোদোর ধোক্ক্যেন্ ওইনে তা উগুরে লামি এত্তে দেগিলো আর পহর্ অলঅ।

লূকে লেখ্যে গম্ হবর্ 7:22

ইয়েনি বেক্কানি গুরিবার্ পরেদি যীশু যোহন শিচ্চ্যগুনোরে জোব্ দিলো, “তুমি যিয়েন্ দেগিলে আর শুনিলে সিয়েন্ যেইনে যোহনরে কঅ। তারে কঅ, কান্ মানুচ্চুনে দেগদন্, আঢুরুনে আঢদন্, ফারাঙিবলাগুনে সিজি অদন্, বহ্‌রা মানুচ্চুনে শুনোদন্, মরা মানুচ্চুনে জেই উদোদন্ আর নাঢা মানুচ্চুনো ইধু গম্ হবর্ ফগদাং গরা অর্।

যোহন 1:41

আন্দ্রিয় পত্তমে তার্ ভেই শিমোনরে তোগেইনে নিগিলেল আর কলঅ, “আমি মশীহর (অত্তাৎ খ্রীষ্টর্) দেগা পেইয়্যেই।”

যোহন 3:34

গোজেনে যিবেরে পাধেয়্যে তে গোজেনর্ কধা কয়, কিয়া গোজেনে তারে পবিত্র আত্মা মাবি ন-দে।

প্রেরিত্‌ 10:38

তুমি ইয়েন-অ কোই পারঅ যে, গোজেনে নাসরতর্ যীশুরে পবিত্র আত্মালোই আর খেমতালোই অভিষেগ্ গোজ্যে। গোজেনে তা সমারে এলঅ বিলিনে তে গম্ কাম গুরিনে বেড়েদ আর শদান আঢত্ যিগুনে দুঘ্ পেদাক্ তারারে বেক্কুনোরে গম্ গুরিদো।

প্রেরিত্‌ 4:27

“তর্ পবিত্র চাগর্ যীশু, যিবেরে তুই মশীহ ইজেবে বেঈ লোইয়োচ্, রাজা হেরোদ আর পন্তীয় পীলাতে এ শঅরত্ তা বিরুদ্ধে অযিহূদীগুনো সমারে আর ইস্রায়েলীগুনো সমারে ঘেচ্চ্যেক্ গুরি আঢ্ মিলেয়োন।

২ করিন্হীয় 3:17

এই প্রভুই অলঅ পবিত্র আত্মা; আর যিয়েনত্ প্রভুর আত্মা সিয়েনত্ স্বাধীনতা।

২ করিন্হীয় 7:6

মাত্তর্ গোজেনে, যিবে দুঘি মানুচ্চুনোরে সান্তনা দে, তে তীতে এজানার্ মাধ্যমে আমারে সান্তনা দে।

ইব্রীয় 1:9

তুই ন্যায়ানরে কোচ্‌পেইয়োচ অার অন্যেয়ানরে ঈচ্ গরচ্; সেনত্যে গোজেন, তর্ গোজেন, তঅ সমাজ্জ্যেগুনোত্তুন্ বোউত্ বেশ্ হুজি তেল ধোক্ক্যেন গুরি তঅ উগুরে ঢালি দিয়্যে।”