যিশাইয় 58:2 - Chakma Bible

² তারারে দেগিলে মনে অয় দিনকে দিন যেন তারা মঅ আওজ্ মজিম চলদন্ আর মঅ পথ্‌তান জানিবাত্তে তারার আওজ্ আঘে; তারা যেন এমন এক্কো জাদ্ যিগুনে ঠিগ্ কাম গরন্ আর তারার গোজেন উগুমান্ ন-ছাড়ন্; তারা যেন মইদু ন্যায় বিচের পৌইদ্যেনে জানিবাত্তে চান্ আর যেন গোজেন ইদু এবাত্তে আওজি।‌

যিশাইয় 58:2 Iomraidhean Croise

গীতসংহিতা 119:15

মুই তর্ সুদোম পৌইদ্যেনে ধ্যান গরং, আর তর পধ্‌থানন্দি মনযোগ দুয়োং।

গীতসংহিতা 119:151

মাত্তর্ ও লগেপ্রভু, তুই দঅ কায়কুরে আগচ্, আর তর্ বেক উগুমানি সত্য।

গীতসংহিতা 119:87

পিত্‌থিমীত্তুন্ তারা মরে পেরায় বাদ দুয়োন্, মাত্তর্ তর্ সুদোমানি মুই ইদোত্ রাগেয়োং।

গম্ উপদেজ্ 15:8

পাজিগুনোর উৎসর্বয়ানি লগেপ্রভু ঘিনেই, মাত্তর্ গম্ মানুচ্চুনোর তবনাগানি তে হুজি অয়।

যিশাইয় 1:28

মাত্তর্ উল্লোমীগুনে আর পাপীগুনে বেক্কুনে একসমারে ভস্ত অবাক্, আর যিগুনে লগেপ্রভুরে ছাড়ি যেইয়োন্ তারা শেজ্ ওই যেবাক্।

যিশাইয় 1:4

হায়! তারা এক্কো পাপে ভরা জাদ, দুষোর্ ভারে ভোজ্যে মানুচ্, অন্যেয় গুরিয়্যেগুনোর্ বংশ, ভান্ন্যেই কাম গোজ্যে পুয়ো। তারা লগেপ্রভুরে ছাড়ি যেইয়োন্ আর ইস্রায়েলর্ সেই পবিত্র মানুচ্চোরে এলাফেলা গোজ্যন্ আর তা পিজেদি ফিজ্যন্।

যিশাইয় 29:13

প্রভু কোইয়্যেদে, “এ মানুচ্চুনে মুয়োদি মরে উবোসনা গরন্ আর মুয়োদি মরে সর্মান গরন্, মাত্তর্ তারার্ মনানি মত্তুন্ দূরোত্ থায়। তারা বানা মান্‌জ্যর শিগেয়্যে সুদোম্বোই মরে উবোসনা গরন্।

যিশাইয় 42:20

তুই ভালোক্কানি দেগিনেয়ো মনান্ ন-দুয়োর; তঅ কানান্ খুলো থেলেয়ো কিচ্চু ন-শুনোর্।”

যিশাইয় 57:12

তর্ সততাগান আর তঅ কামানি যে কি সিয়েনি মুই ফগদাং গুরিম; সিয়েনি দঅ তর্ কনঅ উপকারত্ ন-এবঅ।

যিশাইয় 57:3

লগেপ্রভু কত্তে, ও যাদুগুরিয়্যে মিলেবোর পুয়োগুন্, সিনেলী আর বেশ্যে মিলেবোর পুয়োগুন্, তুমি ইদু এজঅ।

যিশাইয় 59:13

সিয়েনি অলঅ, উল্লোমী আর তরে অস্বিগের্ গরানা, আমা গোজেন ইত্তুন দূরোত্ সুরি যানা, আত্যেচার আর উল্লোমীত্তে উচ্চোমি তুলি দেনা আর মনত্তুন্ মিজে কধা নিগিলেই আনিনে সিয়েনি কনা।

যিরমিয় 42:20

তুমি অমকদ ভুল গুরিবাত্তে যর্। তুমি মরে তমা গোজেন লগেপ্রভু ইধু ইয়েন কোইনে পাদেয়ো, ‘তুই আমাত্তে আমা গোজেন লগেপ্রভু ইধু তবনা গর্; তে যিয়েনি কবঅ সিয়নি বেক্কানি তুই আমারে কবে আর আমি সিয়েনি গুরিবোং।’

যিরমিয় 7:10

সে পরেদি এইনে তুমি মঅ ঘরত্ মঅ মুজুঙোত্ এইনে থিয়্যেইনে কঅ, তুমি গমে আগঅ। তুমি সিয়েনি গরঅ যেনে তুমি সেই জঘন্য কামানি গুরি যেই পারঅ।

যিরমিয় 7:9

তুমি দঅ চুর্, খুন, সিনেলি আর মিজে শমক্ খঅ আর বাল দেবেদাগুনো নাঙে আগর্‌বাট্টি জ্বালঅ। ইগুন বাদেয়ো যে দেবেদাগুনোরে তুমি ন-চিনো তুমি তারার পিজেদি যেইনে থাগঅ।

যিহিষ্কেল 20:3

ও মান্‌জ্যর পুয়োবো, তুই ইস্রায়েলর বুড়ো নেতাগুনোরে কঅ, প্রভু লগেপ্রভু কোইয়্যেদে, তুমি কি মঅ আওজ্‌‌‌‌চান জানিবাত্তে এচ্চো? মঅ জিংকানির নাঙে কঙর্, মুই তমারে মঅ আওজ্‌‌‌‌চান জানিবাত্তে ন-দিম।

আমোষ 5:18

অভিশাব্ পোড়োক্ তমার! তুমি দঅ নরম ওইনে লগেপ্রভুর দিন দেগিবাত্তে চর্! কিত্তে তুমি সেদিন্নোর্ আজা গরর্? তমা ইধু সেদিন্নো পহ্‌‌‌র নয় মাত্তর্ আন্ধার অবঅ।

মার্ক 12:14

তারা যীশু ইধু এইনে কলাক্, “গুরু, আমি হবর্ পেই তুই এক্কো গম্ মানুচ্। মান্‌‌জ্যে কি মনে গুরিবাক্ ন-গুরিবাক্, সিয়েনিলোই তর্ কি অয়, কিয়া তুই কারঅ মুয়োন্ চেইনে কিচ্চু ন-গরচ্। তুই সত্যগুরিনে গোজেনর পথ্‌তান পৌইদ্যেনে শিক্ষ্যে দি থাচ্। ইক্কিনে তুই কঅ, মোশির সুদোম মজিম্ রোম-সম্রাটরে কি খাজানা দেনা উচিত?

মার্ক 6:20

মাত্তর্ হেরোদে যোহনরে দোরেদ বিলি তে সিয়েন গুরি ন-পারে। যোহনে যে এক্কো গোজেন্‌ভক্ত আর পবিত্র মানুচ্ হেরোদে সিয়েন হবর্ পেদঅ, সেনত্তে তে যোহনরে দযাত্তুন্ রোক্ষ্যে গুরিদো। যোহনর্ কধা শুনিবার সলাত্ মনত্ খুব দুঘ্ পেলেয়ো হেরোদে তা কধানি শুনিবাত্তে গম্ পেদঅ।

যোহন 5:35

যোহনে এলদে সেই জোল্-জোল্যে চেরাক্কো যিবে জ্বলিনে পহ্‌র দের্; তুমি খানক্‌কনত্যে তার্ সেই পহ্‌রত্ হুজী গুরিবাত্তে রাজী ওইয়ো।

তীত 1:16

মুয়োদি তারা কন্দে তারা গোজনরে জানন্, মাত্তর্ তারার্ কামানিলোই তারা তারে অস্বীগের্ গরন্। তারা ঈচ্‌গরা খেইয়্যে আর অবাধ্য; তারা কনঅ গম কামর্ যগাজ্জ্যে নয়।

যাকোব 4:8

গোজেন ইধু উজেই যঅ, সালে তেয়ো তমা ইন্দি উজেই এবঅ। পাপীগুন্, তুমি নিজোরে সাব্ গরঅ। দ্বিমনা মানুচ্চুন, তমা মনানি খাটি গরঅ।