যিশাইয় 31:2 - Chakma Bible

² মাত্তর্ তার কি কনঅ জ্ঞান নেই? তে দঅ দজা ঘোদেব; তা কধাগান তে ফিরেই ন-নিবো। তে পাজিগুনোর্ বিরুদ্ধে আর তারার সাহায্যগুরিয়্যেগুনোর্ বিরুদ্ধে উদিবো।

যিশাইয় 31:2 Iomraidhean Croise

ইয়োব 12:13

মাত্তর্‌ জ্ঞান্‌ আর বলান্‌ গোজেনর; সল্লা আর বুদ্ধি তার্‌।

ইয়োব 12:16

বল্‌ আর জ্ঞানান তার্‌; যিবেরে ছলনা গরা ওইয়্যে আর যিবে ছলনা গরে তারা দ্বিজনে তা আধত্‌ তলে।

ইয়োব 5:13

তে জ্ঞানীগুনোরে তারার্‌ চালাগ ভিদিরে ধরে, আর ছলনাগুরিয়্যেগুনোর ফন্দিগানি নঅ ফলে।

যিশাইয় 1:4

হায়! তারা এক্কো পাপে ভরা জাদ, দুষোর্ ভারে ভোজ্যে মানুচ্, অন্যেয় গুরিয়্যেগুনোর্ বংশ, ভান্ন্যেই কাম গোজ্যে পুয়ো। তারা লগেপ্রভুরে ছাড়ি যেইয়োন্ আর ইস্রায়েলর্ সেই পবিত্র মানুচ্চোরে এলাফেলা গোজ্যন্ আর তা পিজেদি ফিজ্যন্।

যিশাইয় 14:20

তুই অন্য রাজাগুনো ধোক্ক্যেন্ গোর্ ন-পেবে, কিত্তে তঅ দেজ্‌ছানরে তুই ভস্ত গোজ্যস্ আর তঅ মানুচ্চুনোরে মারে ফেল্যচ্। পাজিগুনোর্ বংশধরুনোর কধা আর কনদিন্অ তুলো ন-অবঅ।

যিশাইয় 21:17

কেদরর ধনুবলা যোদ্ধোগুনো ভিদিরে কয়েক্কো মান্‌জ্যে বাঁজি থেবাক্। ইস্রায়েলর গোজেন লগেপ্রভু এ কধাগান কোইয়্যে।”

যিশাইয় 22:14

বেগত্তুন্ খেমতাবলা প্রভু লগেপ্রভু মঅ ইদু এ কধাগান ফগদাং গোজ্যে, “ তমার্ মরণ সময়োত্অ এ পাপ্পান খেমা গরা ন-অবঅ। মুই বেগত্তুন্ খেমতাবলা প্রভু লগেপ্রভু এ কধাগান কঙর্।”

যিশাইয় 28:21

লগেপ্রভু যুদ্ধো গুরিবো, যেবাবোত্যেগুরি তে পরাসীম মুড়োবোত্ গোজ্যে। তে উত্তেজিত অবঅ, যেবাবোত্যে গুরি গিবিয়োন কলগত্ ওইয়্যে। এবাবোত্যেগুরি তে তার কামানি, তার আমক্ অবার আর অসাধারন কামানি থুম্ গুরিবো।

যিশাইয় 28:29

এ বেক্ জ্ঞানানি বেগত্তুন্ খেমতাবলা লগেপ্রভু ইত্তুন্ এজে। তার সল্লাগান্ আমক্ অবার আর তা জ্ঞানান্ দোল্।

যিশাইয় 30:3

মাত্তর্ ফরৌণর আশ্রয়ান্ তারা লাজেবাক্ আর মিসরর্ ছাবাগান্ তারাত্তে অসর্মান্ আনিবো।

যিশাইয় 30:7

মিসরর্ এজালান বাজে বাবোত্যে, কনঅ কামর্ নয়; সেনত্তে মুই সেই জাদর্ নাঙানি রাগেয়োং রহব-হেম-শবৎ, অত্তাৎ যে বাঈনী গোজ্যে জাদ্ অলর্ গুরি বুয়োই থায়।

যিশাইয় 31:3

মিসরীয়গুনে দঅ মানুচ্, তারা গোজেন নয়; তারার্ ঘোড়াগুন য়েরাবলা, সিগুন আত্মা নয়। লগেপ্রভু যেক্কে তা আঢ্‌তান তুলিবো সেক্কে সাহায্যগুরিয়্যেগুনে উজোত্ হেবাক্ আর যিগুনে সাহায্য পান্ তারা পড়িবাক্; তারা বেক্কুনে একসমারে ভস্ত ওই যেবাক্।

যিশাইয় 32:6

কিত্তে চিগোন মন মানুচ্চো ভান্ন্যেই কধা কয় আর তা মনান্ ভান্ন্যেয় পৌইদ্যেনে লুদুপুদু গুরি থায়। তে জঘন্য জঘন্য কাম গরে আর লগেপ্রভু পৌইদ্যেনে অগমানর্ কধা ছড়ায়। তে এমন্ বেবস্থা গরে যেনে পেট্ পুজ্যে মানুচ্চুনে হানা ন-পান্ আর পানি তিরেস্ পেইয়্যে মানুচ্চুনে পানি ন-পান্।

যিশাইয় 45:7

মুয়ই পহ্‌‌র আর আন্ধারানরে বানেয়োং; মুয়ই ভালেদি আনং আর সর্বনাশ সৃট্টি গরং। মুই লগেপ্রভু ইয়েনি গুরি থাং।

যিশাইয় 9:17

সেনত্তে প্রভু গাবুজ্যেগুনোরে নিইনে কনঅ ফুত্তি ন-পেবঅ, আর মা-বাপ নেইয়্যেগুনোরে, রানি মিলেগুনো উগুরে তে কনঅ দোয়্যে ন-গুরিবো; কিত্তে বেক্কুনে গোজেন উগুরে ভোক্তি নেইয়্যে আর পাজি, বেক্কুনে বজং কধা কন্। ইয়েনি অলেয়ো তা রাগ্‌কান ন-থামেব; এজঅ সং তা আঢ্‌তান তুল্যে আঘে।‌‌

যিরমিয় 10:12

লগেপ্রভু নিজোর খেমতালোই পিত্‌‌‍‌‍‍থিমীগান বানেয়্যে, তারা জ্ঞানান্দোই সংসারান থিদেবর্ গোজ্যে আর বুদ্ধিলোই আগাজ্‌চান বিজেই দিয়্যে।‌‍‌‍‍

যিরমিয় 10:7

ও জাদ্‌তুনোর রাজাবো, তরে কন্না ভোক্তি গুরিনে ন-দোরেব? ইয়েন দঅ তর্ পাওনা। জাদ্‌তুনোর বেক্ জ্ঞানী মানুচ্চুনো ভিদিরে আর তারার বেক্ রেজ্যগানি ভিদিরে কনজনে তঅ ধোক্ক্যেন নয়।‌‍‌‍‍‌‍‌‍‍

যিরমিয় 36:32

সেক্কে যিরমিয় আর এক্কো ভাজ্ গুরি থোইয়্যে বোই নিইনে নেরিয়র পুয়ো লিগিয়্যে বারূকরে দিলো; যিহূদার রাজা যিহোয়াকীমে যে বোইবো আগুনোত্ পুড়ি দিয়্যে সিয়েনত্ যেদক্কানি লেগা এলঅ সেই বেক কধানি যিরমিয় মুয়োত্তুন্ শুনিনে বারূকে আরঅ লিগিলো। সেবাবোত্যে আরঅ বোউত্ কধায়ো সিবে সমারে মিজে অলঅ।

যিহিষ্কেল 29:6

সেক্কে যিগুনে মিসরত্ বজত্তি গরন্ তারা বেক্কুনে হবর্ পেবাক, মুয়ই লগেপ্রভু। তুই ইস্রায়েলীয়গুনোত্তে নল লাদি ওইয়োচ্।

আমোষ 3:6

শঅরত্ শিংগার রঅ শুনিলে কি মানুচ্চুনে ন-গির্‌গিরান? লগেপ্রভু ন-ঘোদেলে কি শঅরত্ দযা ঘদে?

সফনিয় 3:8

“ও যিরূশালেম, তুই মত্তে বাজ্জেই থাগ্; যেদিন্যে মুই জাদ্‌‌‌‌তুনো বিরুদ্ধে সাক্ষি দিবাত্তে থিয়্যেম্ তুই সেদিন্নোত্তে বাজ্জেই থাগ্। মুই ঠিগ্ গোজ্যংগে, জাদ্‌তুনোরে মুই এগত্তর্ গুরিম, রেজ্যগানি এগত্তর্ গুরিম আর তারা উগুরে মর্ অমকদ অহুজিগান, মর্ জ্বোল্‌‌‌‌‌জোল্যে রাগ্‌‌‌‌‌কান ঢালি দিম। মর্ মনর্ জ্বালার্ আগুনে গোদা পিত্‌‌‌‌থিমীগান পুড়ি যেবঅ। গোটা জগৎতান্ পুড়ি যেবঅ।

সখরিয় 1:6

মাত্তর্ মুই মর্ চাগরুনোরে, অত্তাৎ ভাববাদীগুনোরে যেদক্কানি উগুম দুয়োং, মর্ সেই বেক্ কধানি আর সুদোম্ মজিম কি তমা পূরোণি মানুচ্চুনে সাজা ন-পান্? সেক্কে তারা মনানি ফিরেইনে কোইয়োন্দে যে, বেগত্তুন খেমতাবলা লগেপ্রভু তারার্ আচার-বেবহার আর অভ্যেস্ মজিম তারা উগুরে যিয়েনি গুরিবো বিলি ঠিগ্ গোজ্যে তে সিয়েনই গোজ্যে।’ ”

গণাণা 10:35

যেক্কে সাক্ষ্য-সুন্দুক্কো যাহ্ ধুরিদো সেক্কে মোশি কদঅ, “ও লগেপ্রভু, উঠ্‌। তর্‌ শত্রুগুনে বেক্কুন ছিদি পোত্তোক্‌ আর যিগুনে তরে ঘিনাইদে চোগেন্দি দেগন্‌ তারা তর্‌ মুজুঙোত্তুন্‌ ধেই যাদোক।”

গণাণা 23:19

গোজেনে দঅ মানুচ্‌ নয়দে যে, মিজে কধা কবঅ; মানুজোত্তুন্‌ তার্‌ জর্ময়ো নয় যে, তে মন বোদোলেব। তে যিয়েনি কবঅ সেধোক্ক্যেন গুরিবো, তার এগেমানি তে আমিঝে পূরোণ গরে।

মথি লেখ্যে গম্ হবর্ 24:35

আগাজ্ আর পিত্‌থিমীগান্ শেজ্ অবঅ, মাত্তর্ মঅ কধানি উমরত্তে থেবঅ।

রোমীয় 16:27

তে বানা এক্কো গোজেন, তেয়ই জ্ঞানী। যীশু খ্রীষ্টর্ মাধ্যমে উমরত্তে তার্ বাঈনী ওক্। আমেন।

যিহোশূয় 23:15

মাত্তর্‌ যুনি তুমি তমার গোজেন লগেপ্রভুর দিয়্যে সুদোমানি তে পালেবাত্তে কোইয়্যে সিয়েনি ন-পালঅ‌, আর যুনি তুমি যেইনে দেব-দেবেদাগুনোরে পূজো গরঅ‌ আর তারার্‌ মুজুঙোত্‌ মাদাবো নিগিরো, সালে তমার গোজেন লগেপ্রভু ভালেদি গুরিবাত্তে যেদক্কানি এগেম্ গোজ্যে সিয়েনির বেক্কানি যেধোক্ক্যেন্‌ পূরণ ওইয়্যে সেধোক্ক্যেন্‌ লগেপ্রভু যেদক্কানি অমংগলর দর্‌ দেগেয়্যে সিয়েনি বেক্কানি তে তমা উগুরে ঘোদেব আর যে দোল্‌ দেজ্‌চান তে তমারে দিয়্যে যেরেন্দি সিয়োত্তুন্‌ তমারে ভস্ত গুরি ফেলেব। লগেপ্রভুর রাগ্‌কান্‌ তমার বিরুদ্ধে জুলিবো, আর যে দোল্‌ দেজ্‌চান তে তমারে দিয়্যে সিয়েনত্তুন যাদিমাদি তুমি ভস্ত ওই যেবা।”

১ শমূয়েল 2:3

তুমি আর বার্‌বো কধা ন-কোইয়ো, অহংকারর্ কধা তমা মুয়োত্তুন্ ন নিগিলোক্; কিত্যে লগেপ্রভু এধোক্ক্যেন গোজেন যে বেক্কানি হবর্ পাই, আর তেয়ই কামানি মাবি চাই।