যিশাইয় 26:15 - Chakma Bible

¹⁵ ও লগেপ্রভু, তুই এ জাদ্‌তোরে দাঙর্ গোজ্যস্; এ জাদ্‌তোরে দাঙর্ গুরিনে তুই বাঈনী পেইয়োচ্; তুই দেজর্ বেক দুযিগান্ বাবেই দুয়োচ্।

যিশাইয় 26:15 Iomraidhean Croise

পত্থম 12:2

তরে দিইনে মুই এক্কো দাঙর্‌ জাদ্ বানেই দিম্‌। মুই তরে বর্‌ দিম্‌ আর এবাবোত্তে গুরিম্‌ যেনে তর গম্‌ হবরান চেরোকিত্তে ছিদি পড়ে আর তঅ মাধ্যমে যেনে মান্‌জ্যে বর্ পান।

পত্থম 13:16

মুই তঅ বংশর মানুচ্চুনোরে পিত্‌থিমীর ধূল্যেচর-ধোক্ক্যেন গুণি ন-পুরেইয়্যে গুরিম। পিত্‌থিমীর ধূল্যেচরুন যুদি কনজনে গুণিনে শেজ্ গুরি পারন্‌ সালে তঅ বংশবোর মানুচ্চুনোরেয়ো গুণো যেবঅ।

১ রাজাবলী 8:46

তারা যেক্কে তঅ বিরুদ্ধে পাপ গুরিবাক্‌-অয় পাপ ন-গোজ্যে এধোক্কেন মানুচ্‌ নেই-আর তুই তারা উগুরে বেজার্‌ ওইনে শত্রুর্‌ আঢত্‌ তারারে তুলি দিবে আহ্‌ শত্রুগুনে তারারে বন্দী গুরিনে কায়-কুরে বা দূরোত্‌ তারার্‌ নিজোর্‌ দেজত্‌ নেযেবাক্‌,

২ রাজাবলী 17:23

যেরেন্দি লগেপ্রভু তার্‌ বেক্‌ চাগরুনোরে, অত্তাৎ ভাববাদীগুনোর্‌ মাধ্যমে দিয়্যে উজিয়ারর্‌ কধা মজিম তার্‌ মুজুঙোত্তুন্‌ তারারে দূর্‌ গুরি দিলো। ইয়েনত্তেই ইস্রায়েলর মানুচ্চুনোরে তারার্‌ নিজোর্‌ দেজত্তুন্‌ বন্দী গুরিনে আসিরিয়া দেজত্‌ নেযা অলঅ, আর এজঅ তারা সিদু আগন্‌।

২ রাজাবলী 17:6

হোশেয়র রাজাগিরির্‌ নয় বজরত্‌ আসিরিয়ার রাজা শমরিয়াগান্‌ গজক্ গুরিনে ইস্রায়েলীয়গুনোরে বন্দী গুরি আসিরিয়াত্‌ নেযেল। তারারে তে হলহেত, হাবোর গাঙ পারত্‌ গোষণ চাগালাত্‌ আর মাদীয়গুনোর শঅরানিত্‌ বজত্তি গুরিবাত্তে দিলো।

২ রাজাবলী 23:27

সেনত্তে লগেপ্রভু কলঅ, “মঅ মুজুঙেত্তুন্‌ যেধোক্ক্যেন গুরি মুই ইস্রায়েলরে দূর্‌ গোজ্যং সেধোক্ক্যেন গুরি যিহূদারেয়ো দূর্‌ গুরিম্‌, আর যে শঅরানরে মুই বেঈ লোইয়োং সে যিরূশালেমানরে আর যিবে পৌইদ্যেনে মুই কোইয়োং, ‘ইয়েন্‌ মর্‌ থেবার্‌ জাগা অবঅ’ সে তবনা- ঘরানরে মুই অগ্রাজ্য গুরিম।”

নহিমিয় 9:23

আগাজ তারা ধোক্কেন্‌ তুই তারারে বোউত্‌ পূঅ-ছা দুয়োজ্‌ আর তুই তারারে সে দেজত্‌ নেযেয়োজ্‌ যে দেজ্‌ছানত্‌ সুমিনে সিয়েন্‌ গজক্‌ গুরিবার্‌ কধা তুই তারার্‌ পূরোণিমানুচ্চুনোরে কোইয়োচ্‌।

ইয়োব 12:23

তে জাত্‌তুনোরে দাঙর্ গরে আর ভস্তয়ো গরে, তারারে বাড়েই তুলে আরঅ বন্দী দজানিয়ো নেযায়।

যিশাইয় 10:22

ও ইস্রায়েল, যুনিয়ো তমা মানুচ্চুন্ সাগর পার ধূল্যেচর ধোক্ক্যেন্ তো বানা কয়েকজন মান্‌জ্যে ফিরি এবাক্। ইস্রায়েলত্তে ভস্ত অনাগান ঠিগ্ গরা আঘে আর সেই পেবার্ সাজাগান তারা উগুরে এবদে এবঅ।

যিশাইয় 33:17

তঅ চোগ্‌কুনে রাজারে তার সয়সাগর ভিদিরে দেগিবাক্, আর দেগিবাক্ এমন্ এক্কান দেজ্ যিয়েনর দুযি বোউত্ দাঙর্।‌‌‌

যিশাইয় 40:5

সেক্কে লগেপ্রভুর্ বাঈনী ফগদাং গরা অবঅ, আর বেক মানুচ্চুনে সিয়েনি এক সমারে দেগিবাক্; লগেপ্রভু এ কধানি কোইয়্যে।”

যিশাইয় 44:23

ও আগাজ্‌চান, হুজিয়ে গিদ্ গাহ্, ‍‍ কিত্তে লগেপ্রভু ইয়েন গোজ্যে। ও পিত্‌থিমীর গভিন্ জাগায়ানি, জয় ধুনি দে।‍‍‍ ও মুড়ো-মুড়িগুন্, ও ঝার্ আর সিয়েনর গাজ্-বাজ্‌চুন্, তুমি হুজিয়ে-গানে ফুত্তি গরঅ, কিত্তে লগেপ্রভু যাকোবরে উদ্ধোর্ গোজ্যে আর ইস্রায়েলর্ মাধ্যমে তার বাঈনী গরানা ফগদাং গুরিবো।

যিশাইয় 6:12

যেদকদিন্ সং লগেপ্রভু বেক্কুনোরে দূর্ গুরি ন-দে আর দেজত্ ভালোক্ জাগাত্ মানুচ্ নেইয়্যে অন্।

যিশাইয় 60:21

সেক্কে তর্ বেক মানুচ্চুনে গম্ অবাক্; তারা উমরত্তে দেজ্‌‌‌চান গজক্ গুরিবাক্।‌‌ তারা মর্ লাগেয়্যে চারা, মর্ আঢ কাম; তারার মাধ্যমে মর্ সয়সাগজ্যে কামানি ফগদাং অবঅ।

যিশাইয় 9:3

তুই সেই জাদ্‌তোরে দাঙর্ গুরিবে‌ আর তারার্ হুজিগানি বাড়েই দিবে; খেত্-খেত্তি কাবিবার অক্তত্ মান্‌জ্যে যেধোক্ক্যেন্ ফুত্তি গরন্, লুদেয়্যে মাল ভাগ্ গুরিবার অক্তত্ যেধোক্ক্যেন্ ফুত্তি গরন্, সেধোক্ক্যেন্ গুরি তারা তঅ মুজুঙোত্ ফুত্তি গুরিবাক্।

যিরমিয় 30:19

সিয়েনত্তুন্ নিগিলি এবঅ সাধুবাদ দেনার্ গীদ্ আর হুজির্ রঅ। মুই তারার মানুচ্চুন বাড়েম্, তারা কুমি ন-যেবাক্। মুই তারারে সর্মানিত গুরি তুলিম, তারারে কনজনে ঈচ্ ন-গুরিবাক্।

যিরমিয় 32:37

মুই অমকদ বেজার্ আর জ্বোল্‌‌‍জোল্যে আর দর্‌গরেপারা রাগে মুই তারারে যেদক্কানি দেজত্ ধাবেই দুয়োং সিয়েনিত্তুন মুই হামাক্কায় তারারে এগত্তর্ গুরিম। মুই এ জাগাত্ তারারে ফিরেই আনিম আর গমেডালে বজত্তি গুরিবাত্তে দিম্।‌‍‍‍

যিহিষ্কেল 36:24

মুই জাদ ভিদিরেত্তুন্ তমারে নিগিলেই আনিম; বেক্ দেজ্‌‌‌‌‌‌‌‌‌‌‌‌চানিত্তুন্ মুই তমারে এগত্তর্ গুরিনে তমা নিজো দেজত্ ফিরেই আনিম।

যিহিষ্কেল 5:12

তঅ তিন ভাগর্ এক ভাগ মানুচ্ তঅ ভিদিরে অয় বানালোই ন-অয় ভাদরাদে মুরিবাক্; তিন ভাগর্ এক ভাগ্ দেবাল বারেদি যুদ্ধোত্ মুরিবাক্ আর তিন ভাগর্ এক ভাগরে মুই চেরোকিত্তে ছিদি দিম্ আহ্ খুলো তলোয়ারলোই লোড়েম।

গণাণা 23:10

যাকোবর্ বংশধরুনে ধূল্যেকণা ধোক্ক্যেন গুণি ন-পুড়েইয়্যে, কন্না তারারে গুণিই পারে? ইস্রায়েলের্‌ চের্‌ভাগর্‌ একভাগঅ কি কারঅ পক্ষে গুণোনা সম্ভব? উই গম মানুচ্চুনো ধোক্ক্যেন যেন মর্‌ মরন্‌ অয়; মর্‌ থুমান যেন অয় তারা ধোক্ক্যেন।”

লূকে লেখ্যে গম্ হবর্ 21:24

লাম্বা ছুড়িলোই তারারে মারে ফেলা অবঅ আর বেক জাদ্‌তুনো ইধু তারা বন্দী ইজেবে ছিদি থেবাক্। যেদক্ দিন সং অযিহূদীগুনো সময়বো ন-পুরায় সেদক্ দিন সং অযিহূদীগুনে যিরূশালেমানরে তারার্ ঠেংঅ পাদালোই উরিবাক্।

যোহন 15:8

যুনি তমা জিংকানিত্ জদবদে গুলো ধরে আর এবাবোত্যেগুরি তুমি নিজোরে মঅ শিচ্চ্য বিলিনে প্রমাণ গরঅ সালে মঅ বাপ্পোর্ বাঈনী অবঅ।

যোহন 17:1

এই বেক্‌ কধানি কনার্ পরেদি যীশু স্বর্গ ইন্দি রিনি চেইনে কলঅ, বাবা, সময় এচ্চ্যে। তঅ পুয়োবোর্ মহিমাগান্ ফগদাং গর্ যেন পুয়োবোয়ো তঅ মহিমাগান্ ফগদাং গুরি পারে।

দ্বি’লম্বর বিররণ 10:22

তমার্‌ যে পুরোণি মানুচ্চুনে মিসরত্‌ যেইয়োন তারা সোংখ্যেন্দি এলাক্কে বানা সত্তুরজন আর ইক্কিনে তমার গোজেন লগেপ্রভু তমারে জনেদি গুরি দিয়্যে আগাজর্‌ তারাগুনো ধোক্ক্যেন গুণি ন-পুড়েইয়্যে।

দ্বি’লম্বর বিররণ 28:25

লগেপ্রভু এধোক্ক্যেন গুরিবো যেনে তুমি তমার শত্রুগুনোর মুজুঙোত্‌ উদিই যঅ। তুমি এককিত্তেন্দি তারারে আক্রমণ গুরিবা মাত্তর্‌ তারা মুজুঙোত্তুন ধেই যেবাক সাত কিত্তেত্তুন। পিত্‌থিমীর অন্য বেক্‌ রেজ্যর্‌ মানুচ্চুনে তমা অবস্থা দেগিনে দরে গির্‌গিরেবাক।

দ্বি’লম্বর বিররণ 28:64

“সে পরেন্দি লগেপ্রভু পিত্‌থিমীর এক দুঝিত্তুন অন্য দুঝি সং বেক্‌ জাদর্‌ ভিদিরে তমারে ছিদি দিবো। তুমি সিয়েনত্‌ তমার আর তমার পুরোণিমানুচ্চুনোর হবর্ ন-পেইয়্যে গাজর আর পাত্তরর্‌ দেবেদামূত্তির পূজো গুরিবা।